Nashshiyoogaa Bessiyaageeta Gidoos Godaa Kahoy Hosppune 17n Bonchettees
1. Godaa Kahuwaa bonchiyo heeran mazamuraawiyaagaadan ay qoppiyoogee bessiyaabee?
1 Yihooway maarotaa bessanaunne ashshanau oottido darobay denttettin, mazamuraawee, “I taassi kehido kehatettaa gishshaa taani GODAASSI ai qanxxanau danddayiyaanaa?” yaagidi oychiis. (Maz. 116:12) Ha wodiyan Xoossau oottiyaageeti galatiyo daro gaasoy deꞌees. Ha qofay ayyaanaa kaaletuwan xaafettoosappe daro layttay aadhi simmin, Yihooway asaa naatussi ubbaappe aadhiya imotaa, giishin wozuwaa immiis. Hosppune 17n bonchiyo Kiristtoosa hayquwaa hassayiyo baalau nuuni giigettiyo wode galatiyaageeta gidiyoogaa bessiyo loꞌꞌo gaasoy dees.—Qol. 3:15.
2. Nuuni wozuwaa yarshshuwaa nashshanaadan oottiya amarida gaasoti augeetee?
2 Wozoy Demissiyo Anjjuwaa: Wozuwaa yarshshoy ‘nu nagaray atto geetettanaadan’ oottees. (Qol. 1:13, 14) Hagee nu zoriya wozanay qumꞌꞌennan Yihoowau goynnanaadan nuna maaddees. (Ibr. 9:13, 14) Nuuni Yihoowakko woossiyo wode yayyennan haasayana danddayoos. (Ibr. 4:14-16) Wozuwaa yarshshuwan ammaniyoogaa oosuwan bessiyaageetussi ufayssiya merinaa deꞌuwaa hidootay dees!—Yoh. 3:16.
3. Wozuwaa yarshshuwaa gishshau Yihoowa nashshiyoogaa ayba ogiyan bessana danddayiyoo?
3 Nashshiyoogaa Bessiyo Ogiyaa: Nuuni wozanappe nashshiyoogaa bessiyo issi ogee, Godaa Kahuwaa bonchiyo heeran nabbabiyo Geeshsha Maxaafaa xiqiseta ubba galla nabbabiyoogaanne etan wotti denttidi qoppiyoogaa. Laappune 1, 2011 Wochiyo Keelan, “Laytta Giddon Keehi Dumma Gidida Gallassau Giigettidetii?” giya huuphe yohoy nuuni hegaadan oottanau maaddana mala giigiis. Nuuni wozuwaa ay keena xoqqu oottidi xeelliyaakko, Yihoowakko wozanappe woossiyoogankka yootana danddayeettees. (1 Tas. 5:17, 18) Yesuusa azazuwaa azazettiyoogan Godaa Kahuwaa Bonchiyo Baalan beettiyoogee nuuni galatiyoogaa bessees. (1 Qor. 11:24, 25) Hegaa bollikka, Yihooway wozanappe siiqido siiquwaa leemisuwaa kaalliyoogan, nuuyyo danddayettida keenan daro asay nunaara Godaa Kahuwaa bonchanaadan shoobbana danddayoos.—Isi. 55:1-3.
4. Nu murttee ayba gidana koshshii?
4 Yihoowassi nashshidi oottiyaageeti Godaa Kahuwaa Bonchiyo Baalaa hara shiiqodan xeellokkona. Hegee layttaa giddon keehi dumma shiiqo! Godaa Kahuwaa Bonchiyo Baalay matattiyo wode, “Tanooshsho, GODAA galata! I neeyyo oottido kehatettaa ubbaa dogoppa” yaagida mazamuraawiyaagaadan murttidaageeta gidoos.—Maz. 103:2.