Mishiraachuwaa Brooshuriyaa Goꞌettidi Tamaarissiyoogaa
1. Mishiraachuwaa giyo brooshuree waani giigidee?
1 Isiiniyaa Nu Kawotetta Haggaazuwan qonccidaagaadan, nuuni tamaarissanawu goꞌettiyo miishshatuppe issoy Xoossaappe Yiya Mishiraachuwaa! giyo brooshuriyaa! Hegan deꞌiya xiqisetu qofay xaafettibeenna gishshawu, haasayissiyo uri Geeshsha Maxaafaappe he xiqisiyaa kessidi nabbabana danddayees. Nuuni xannaꞌissanawu goꞌettiyo daro xuufeti nabbabiya uri barkka akeekana danddayiyo ogiyan giigidaba gidikkokka, ha brooshuree issi uri bana xannaꞌissiya uraara tobbanaadan giigiis. Hegaa gishshawu, ha brooshuriyaa immiyo wode, mishiraachuwaa Geeshsha Maxaafaappe tamaariyoogee keehi ufayssiyaaba gidiyoogaa he izaawu akeekanaadan nuuni a waati xannaꞌissanaakko bessenna koshshees.—Maa. 13:44.
2. Asaa koyro haasayissiyo wode Mishiraachuwaa brooshuriyaa waati goꞌettana danddayiyoo?
2 Koyro Haasayissiyo Wode: Hagaadan gaana danddayeeta: “Alamiyan hananabay asaa qofissiyo gishshawu etaara issi issibaa haasayiiddi deꞌoos. Alamiyaa hanotay giigana gaada qoppay? [Zaaranaashin takki giite.] Geeshsha Maxaafay nuussi hidootay deꞌanaadan oottiya mishiraachuwaa yootees. Geeshsha Maxaafay zaariyo oyshatuppe amaridaageeta beꞌa.” Brooshuriyaa ayyo immidi, wurssetta sinttan deꞌiyaageetuppe i eranawu koyiyo oyshaa dooranaadan yootite. Yaatidi, i doorido timirttiyaa kessidi, waatidi xannaꞌanaakko koyro menttuwaa bessite. Hara ogee qassi, i eranawu koyiyo issi oyshaa oychidi, he brooshuriyan intte doorido huuphe yohoy Geeshsha Maxaafaa zaaruwaa demmanaadan a waatidi maaddiyaakko bessite. He timirttiyaara issi mala qofay deꞌiyo biidoy jw.org sayttiyan deꞌikko, issi issi aassiyaageeti ha wodiyan bessoosona.
3. Mishiraachuwaa giyo brooshuriyaa goꞌettidi waati xannaꞌissanaakko yoota.
3 Xannaꞌissanawu Waati Goꞌettanee? (1) I waanna qofaa akeekanaadan borxxu giidi xaafettida paydotu oyshata nabbabite. (2) Hegaappe simmin, menttuwaa nabbabite. (3) Geddi gi xaafettida xiqisiyaa nabbabite; qassi keettaaway xiqisiyaa qofaa akeekanaadan paydotu oyshawu Geeshsha Maxaafay zaariyo zaaruwaa akeekanaadan hiillan oychite. (4) Issi oyshawu zaaroy naaꞌꞌu menttuwan deꞌiyaaba gidikko, 2tuwaaninne 3tuwan deꞌiya maaraa kaallite. He oyshaa qofaara issi mala gidida biidoy deꞌikko, qassi izaawu kasetidi beꞌibeennaba gidikko tobbiyo wode bessite. (5) Wurssettan, keettaaway loytti akeekidaakkonne eranawu paydotu oyshata zaaranaadan oychite.
4. Ha muruta miishshaa loytti goꞌettanawu nuna aybi maaddii?
4 Ha muruta miishshaa loytti meezetite. Koshshiya wodiyan ubban a goꞌettite. Xannaꞌissanaappe kase ubbatoo, nu xinaatiyaa hanotaanne he timirttiyan deꞌiya xiqiseta goꞌettidi i loytti akeekanaadan waati maaddanaakko qoppana koshshees. (Lee. 15:28; Oos. 17:2, 3) Nuuni loytti meezetiyo wode, ha brooshuree asaa tumaa tamaarissanawu goꞌettiyo keehi dosiyo miishshatuppe issuwaa gidana!