IXUWAA WAATA XOONANA DANDDAYAY?

4 | Xoossaa Maaduwan Ixuwaa Xoona

Geeshsha Maxaafay Tamaarissiyoobaa:

“Geeshsha Ayyaanaa aifee, siiquwaa, ufaissaa, sarotettaa, danddayaa, kehatettaa, lo77otettaa, ammanuwaa, ashkketettaa, ba huuphiyaa naagiyoogaa.”—GALAATIYAA 5:22, 23.

Hegee Woygiyoogee?

Xoossay maaddin ixuwaa xoonana danddayoos. Nuuni baaxetidi nurkka demmana danddayenna daro eeshshati nuuyyo deꞌanaadan, A geeshsha ayyaanay nuna maaddees. Nuuni nu wolqqan ixuwaa xayssanawu baaxetiyoogaappe, Xoossaa maaduwan ammanettana danddayoos. Nuuni Xoossan ammanettikko, nuuyyookka kiitettida PHawuloosaagaadan siyettana danddayees. I hagaadan giis: “Ubbaappe aadhdhiya wolqqai Xoossaagaa gidiyoogaappe attin, nuugaa [gidenna.]” (2 Qoronttoosa 4:7) Qassi nuuni, ‘Taayyo maadoy Yihoowappe yees’ gaana danddayoos.—Mazamure 121:2.

Ay Oottana Danddayay?

“Yihooway taani makkalancha asa gidiyoogaa aggada saro asa gida laamettanaadan maaddiis.”—WALDDA

Yihooway ba geeshsha ayyaanaa immanaadan akko wozanappe woossa. (Luqaasa 11:13) Neeyyo loꞌꞌo eeshshay deꞌanaadan I maaddana mala A oychcha. Siiquwaa, sarotettaa, danddayaanne nena naagiyoogaa mala, ixuwaa xayssanaadan maaddiya eeshshatubaa Geeshsha Maxaafay woygiyaakko xannaꞌa. Hegaa mala eeshshata bessanawu baaxeta. Qassi, hegaa mala eeshshata bessanawu baaxetiyaageetuura laggeta. Hegaa mala laggeti ‘siiquwawunne loꞌꞌo oosuwawu’ nena denttettana danddayoosona.—Ibraawe 10:24.

Deꞌuwan Hanidabaa—WALDDA

Ixuwaa Xooniis

Walddoy yelagatettan deꞌiyo wode harati A ixxiyo gishshawu, deꞌuwan metiyaabay A gakkiis. I hagaadan giis. “Jallissiya xaliyaa bayzziyaageetura ogiyaa bolli ooshshaa denttidi darotoo warettoos . . . Issi wode, nu morkke gidida danobaa oottiya citay tana worissanau meqettaa iita bitaniyaa miishshan shammiis, I tana cubiyan caddikkokka baqatada attaas.”

Walddoy ba keettayiyaa Yihoowa Markkatuura Geeshsha Maxaafaa xannaꞌiyoogaa doommido wode ufayttibeenna. I hagaadan giis: “Taani Yihoowa Markkata ixxays, qassi darotoo eta iita cashshaa cayays. SHin eti ubbatoo tana . . . saruwan haasayissoosona.”

Amarida wodiyaappe guyyiyan Walddoykka Geeshsha Maxaafaa xannaꞌiyoogaa doommiis. I hagaadan giis: “Taani tamaariyoobaa oosuwan peeshshiyoogee metennaba gidenna. Taani hanqquwaa eexxa kiyiyoogaa mule aggana danddayennabadan qoppaas.” SHin, Geeshsha Maxaafaappe tamaaridobay, I keehi laamettanaadan maaddiis.

Walddoy hagaadan giis: “Tana xannaꞌissiya Alahanddiroy, issi gallassi taani Galaatiyaa 5:22, 23 nabbabanaadan yootiis. . . . Alahanddiroy, taassi he eeshshati deꞌana danddayiyoy ta minotettaana gidennan, Xoossaa ayyaanaa maaduwaana gidiyoogaa yootiis. Hegee taani ta qofaa laammanaadan oottiis!”

Xoossay maaddanaagaa Walddoy ammanettido gishshawu, harata ixxiyoogaa aggiis. I hagaadan giis: “Ta dabbotinne ta kase laggeti taani hegaadan laamettidoogan keehippe garamettidosona.” I gujjidikka hagaadan giis: “Yihooway taani makkalancha asa gidiyoogaa aggada saro asa gida laamettanaadan maaddiis.”