Yihooway Atto Giyoogan Ubbaappe Aadhdhees

1. Kawuwaa Solomoni Eranchchaa 7:20n yootido tumay aybee?

KAWUWAA Solomoni hagaadan giis: “Xillobaa xalaalaa oottiiddi, nagara oottennan de7iya asi ha sa7aa bollan baawa.” (Era. 7:20) Hegee tuma gidiyoogee qoncce! Nuuni ubbay nagaranchcha. (1 Yoh. 1:8) Hegaa gishshawu, nuussi ubbawu Xoossaappenne nu mala asaappe maarotay koshshees.

2. Ne mata laggee neeyyo atto giyo wode neessi aybi siyettii?

² Ne mata laggiyaa neeni yiilloyido wodiyaa hassayay? Intte laggetettay moorettanaadan neeni koyenna gishshawu wozanappe maarotaa oychchiyoogee tuma. Ne laggee neeyyo coo atto giido wode neessi aybi siyettidee? Woppu gaadii? Ubba qassi, hegee neeni ufayttanaadan oottidee?

3. Nuuni ha huuphe yohuwan ay beꞌanee?

³ Nuuni Yihoowawu mata dabbo gidanawu koyoos, shin issi issitoo A yiilloyiyaabaa haasayoos woy oottoos. Gidoppe attin, Yihooway nuuyyo atto gaanawu koyiyoogaa nuuni ammanettana danddayiyoy aybissee? Yihooway issi urawu atto giyoogaa giddooninne nuuni issi urawu atto giyoogaa giddon deꞌiya dummatettay aybee? Qassi wurssettan, Xoossay oossi atto gii?

YIHOOWAY ATTO GAANAWU KOYEES

4. Yihooway atto gaanawu koyiyoogaa nuuni ammanettana danddayiyoy aybissee?

⁴ Yihooway atto gaanawu koyiyoogaa Xoossaa Qaalay yootees. Siinaa Deriyaa bolli Yihooway Muuseyyo qonccido wode, I hagaadan giidi yootanaadan issi kiittanchchaa kiittiis: “Taani GODAA; taani GODAA; qaretainne maarotai kumido Xoossaa, danddayanchchaa, aggenna siiqoi daridoogaanne daro ammanettiyaagaa. Taani ta aggenna siiquwaa sha7atussi naagiyaagaa; iitatettaa, makkalaanne nagaraa atto yaagiyaagaa.” (Kes. 34:6, 7) Yihooway nagaraappe simmidaageetuyyo atto gaanawu ubbatoo koyiya kehanne maariya Xoossa.—Nah. 9:17; Maz. 86:15.

5. Mazamure 103:13, 14y yootiyoogaadan, Yihooway asaa hanotaa eriyo gishshawu waatii?

⁵ Yihooway nuna Medhdhidaagaa gidiyo gishshawu, nubaa ubbabaa erees. Ane hagaa qoppa! I saꞌan deꞌiya ubba asaabaa ubbabaa erees. (Maz. 139:15-17) Hegaa gishshawu, nuna yelidaageetuppe nuuni laattido nagaraa I akeekees. Ubba qassi, I nuussi haꞌꞌi deꞌiyaagaa mala eeshshay deꞌanaadan oottidabaa erees. Yihooway nubaa loytti eriyo gishshawu waatii? Hegee I nuuyyo atto gaanaadan oottees.—Maz. 78:39; Mazamure 103:13, 14 nabbaba.

6. Yihooway atto gaanawu keehi koyiyoogaa waati bessidee?

⁶ Yihooway atto gaanawu keehi koyiyoogaa bessiis. Koyro bitanee, Addaamee oottidobaa gaasuwan nuuni nagaranchcha gidiyoogaanne wurssettan hayqqiyoogaa I erees. (Roo. 5:12) Nuuni nuna woy hara uraa nagaraappenne hayquwaappe ashshanawu aybanne oottana danddayokko. (Maz. 49:7-9) Gidoppe attin, nu siiqo Xoossay qarettido gishshawu nuna laꞌa kessanawu issibaa oottiis. I waatidee? Yohaannisa 3:16y yootiyoogaadan, Yihooway ba mexi issi Naꞌay nu gishshawu hayqqanaadan kiittiis. (Maa. 20:28; Roo. 5:19) Yesuusi banan ammaniya ubbay laꞌa kiyanaadan nu gishshawu hayqqiis. (Ibr. 2:9) Yihooway ba siiqiyo Naꞌay waayettidinne kawuyyidi hayqqiyoogaa beꞌiyoogee I keehi seelettanaadan oottiis. Yihooway nuuyyo atto gaanawu koyennaakko ba Naꞌay hayqqanaadan oottennaagee tuma.

7. Geeshsha Maxaafan etabay odettido Yihooway coo atto giido asatuppe amaridaageeti oonee?

⁷ Yihooway coo atto giido asatubaa yootiya daro taarikee Geeshsha Maxaafan deꞌees. (Efi. 4:32) Neeni oona hassayay? Kawuwaa Minaasa hassayennan aggakka. He iita bitanee Yihoowa bolli gita nagaraa oottiis. I worddo xoossatuyyo goynniisinne haratikka goynnanaadan minttettiis. I ba naata worddo xoossatuyyo yarshshiis. I Yihoowa geeshsha beetamaqidasiyan eeqa misiletakka essiis. Abaa Geeshsha Maxaafay hagaadan gees: “GODAA sinttan i daro iitabaa oottidi, a hanqqetissiis.” (2 Odi. 33:2-7) Gidoppe attin, Minaasee ba nagaraappe wozanappe simmido wode, Yihooway ayyo coo atto giis. Xoossay I zaarettidi kawo gidanaadankka paqqadiis. (2 Odi. 33:12, 13) Wodiraa laammiyoogaanne asa woriyoogaa gujjin, Yihoowa bolli gita nagaraa oottida Kawuwaa Daawitabaa neeni qoppennan aggakka. SHin, Daawiti ba oottido nagaraa ammanidi wozanappe ba nagaraappe simmido wode, Yihooway ayyookka coo atto giis. (2 Sam. 12:9, 10, 13, 14) Ee, Yihooway atto gaanawu keehi koyiyoogaa nuuni ammanettana danddayoos. Qassi, nuuni kaallidi beꞌanaagaadan, asaagaara geeddarssiyo wode, Yihoowa maarotay keehi dumma.

YIHOOWA MAAROTAY KEEHI DUMMA

8. Yihooway gita maatay deꞌiyo Daanna gidiyoogee I maaranaadan waati oottii?

⁸ Yihooway ‘ha saꞌaa ubbaa Pirddiyaagaa.’ (Doo. 18:25) Issi loꞌꞌo daannay higgiyaa loytti erana koshshees. Yihooway nu Daannaa, qassi I nuuyyo Higgiyaa Immiyaagaa gidiyo gishshawu higgiyaa loytti erees. (Isi. 33:22) Likkebaanne likke gidennabaa Yihoowaagaadan eriya asi baawa. Issi loꞌꞌo daannay oottana koshshiya harabay aybee? I pirddanaappe kase issi allaalliyaa xeelliyaagan tumu naqaasha ubbaa erana koshshees. Yihooway tuma gidida ubbabaa ubbatoo eriyo gishshawu ooppenne aadhdhiya Daanna.

9. Yihooway atto gaanaadan woy geennaadan oottiyaabay aybee?

⁹ Daanna gidida asatuppe dumma hanotan, Yihooway ubba allaalliyaa xeelliyaagan tumubaa ubbaa awudenne erees. (Doo. 18:20, 21; Maz. 90:8) I asay beꞌiyoobaa woy siyiyoobaa denddo oottidi pirddenna. Issi uri bana yelidaageetuppe laattido eeshshati, I tamaaridobaynne deꞌiyo heeray, qassi awu siyettiyaabaynne I qoppiyoobay I oottiyoobaara waani gayttiyaakko Yihooway loyttidi erees. Yihooway wozanan deꞌiyaabaakka erees. I issi uri issibaa oottidoy aybissakko loytti erees. Yihoowappe aybinne geemmana danddayenna. (Ibr. 4:13) Yaatiyo gishshawu, issi allaalliyaa xeelliyaagan ubbabaa I eriyo gishshawu issi urawu atto gees.

10. Nuuni Yihoowa pirdday ubbatoo suure gaana danddayiyoy aybissee? (Zaarettido Wogaa 32:4)

¹⁰ Yihoowa pirdday ubbatoo suure. I asa asappe mule shaakkenna. Yihooway issi uray loꞌꞌiyaagaa, dure, hayttatidaagaa, woy daro eray deꞌiyoogaa gidiyo gishsha xallawu mule atto geenna. (1 Sam. 16:7; Yaaq. 2:1-4) Yihooway issibaa oottanaadan ooninne wolqqanttana woy mattaayiyaa awu immana danddayenna. (2 Odi. 19:7) I bawu siyettiyaabaa kaallidi mule kuuyenna. (Kes. 34:7) Yihooway nubaanne nu hanotaa xeelliyaagan ubbabaa eriyo gishshawu ooppenne aadhdhiya Daanna.—Zaarettido Wogaa 32:4 nabbaba.

11. Yihoowa maarotay asaagaappe waani dummatii?

¹¹ Ibraawettuwan xaafettida Geeshsha Maxaafaa xaafidaageeti Yihoowa maarotay keehi dumma gidiyoogaa akeekidosona. Issi maxaafay yootiyoogaadan eti issi issi hanotatun goꞌettido Ibraawetto qaalay “Xoossay nagaranchchatuyyo atto giyoogaa xallaa qonccissees. He qaalay issi uri hara urawu atto giyoogaa mule qonccissiyaaba gidenna.” Nagaraappe simmida uraa muleera atto giyo maatay deꞌiyoy Yihoowa xalaalaassa. Yihooway nuussi atto giyoogee ay demissii?

12-13. (a) Yihooway issi urawu atto giyo wode he uri demmiyo goꞌꞌay aybee? (b) Yihoowa maarotay ay keena wodiyawu takkii?

¹² Yihooway nuuyyo atto giidoogaa nuuni ammanikko, woppaanne geeshsha kahaa gujjin, ‘ayyaanaa minotettaa wodiyaa’ demmoos. Hegaa mala maarotay ‘Yihoowa matappe’ yiyoogaappe attin asappe yaana danddayenna. (Oos. 3:19) Yihooway nuuyyo atto giyoogee nuuni aara zaaretti dabbotanaadan oottees; qassi hegee nuuni nagaraa mule oottibookko giyoogaa mala.

¹³ Yihooway nuuyyo atto gi simmidi, he nagaraa gaasuwan nuna haranttuwaa mule mootenna woy qaxxayenna. (Isi. 43:25; Erm. 31:34) “Awai mokkiyoosaappe awai wulliyoosai haakkiyoogaadan” Yihooway nu nagaraa haassees.b (Maz. 103:12) Yihoowa maarotay keehi gita gidiyoogaa nuuni wotti dentti qoppiyo wode, nuuni A galatoosinne nashshoos. (Maz. 130:4) SHin, Yihooway ooyyo atto gaanee?

YIHOOWAY OOYYO ATTO GAANEE?

14. Yihooway issi urawu atto gaanawu woy geennan agganawu gaaso gidiyaabaa nuuni hanno gakkanawu ay tamaaridoo?

¹⁴ Nuuni beꞌidoogaadan, Yihooway atto gaanawu kuuyiyoy nagaray gita woy guutta gidiyo gishshataassa gidenna. Qassi, Yihooway issi urawu atto gaanaakkonne kuuyiyo wode, I nuna Medhdhidaagaa, nuuyyo Higgiyaa Immiyaagaanne nu Daanna gidiyoogaadan ba eraa goꞌettiyoogaa nuuni tamaarida. SHin, Yihooway atto gaanawu woy geennan agganawu kuuyanaappe kase qoppiyoobay aybee?

15. Luqaasa 12:47, 48y yootiyoogaadan, Yihooway qoppiyo issibay aybee?

¹⁵ Yihooway qoppiyo issibay nagaranchcha uri ba oottidobay bala gidiyoogaa erii erennee giyaagaa. Yesuusi Luqaasa 12:47, 48n yootidobay hegaa loytti qonccissees. (Nabbaba.) Issi uri eriiddi Xoossaa ufayssennabaanne iitabaa halchchidi oottikko, I gita nagaraa oottiis. Yihooway he urawu atto geennan agganawu kuuyana danddayees. (Mar. 3:29; Yoh. 9:41) SHin tumaa haasayanawu, nuuni issi issitoo oottiyoobay bala gidiyoogaa eroos. Yaatin, Yihooway nuuyyo atto gaanee? Ee! Ayssi giikko, Yihooway qoppiyo harabaykka deꞌees.

16. Nagaraappe simmiyoogaa giyoogee woygiyoogee, qassi Yihooway nuuyyo atto gaanaadan koyikko, nuuni nagaraappe simmana koshshiyoy aybissee?

¹⁶ Yihooway qoppiyo harabay nagaraa oottida uri ba nagaraappe tumuppe simmidee, simmibeennee giyaagaa. Nagaraappe simmiyoogaa giyoogee woygiyoogee? Nagaraappe simmiyoogee “issi uri qofaa, eeshshaa, woy halchchuwaa” laammiyoogaa qonccissiyaaba. Hegee he uri oottido iitabaa gaasuwan woy I oottana koshshiya likkebaa oottennan aggidoogaa gaasuwan zilꞌꞌettiyoogaanne wozanappe azzaniyoogaa qonccissiyaaba. Ba nagaraappe simmida uri, Yihoowaara dabbotido dabbotay shuggido gishshawunne hegee I iitabaa oottanaadan gaaso gidido gishshawu azzanees. Kawuwaa Minaaseenne Daawiti gita nagaraa oottikkonne, eti tumuppe bantta nagaraappe simmido gishshawu Yihooway etawu atto giidoogaa hassaya. (1 Kaw. 14:8) Ee, nuuni nagaraappe simmidoogaa beꞌiyo wode Yihooway nuuyyo atto gees. SHin, nu oottido nagaraa gishshawu azzaniyoogaa xallay gidenna.c Nuuni issibaa oottanawu giigi uttidaageeta gidana koshshees. Yihooway qoppiyo harabaykka deꞌees.

17. Yihooway koyiyo ogiyan deꞌanawu issi uri waatana bessii? Qassi hegee nuuni kase oottido nagaraa zaarettidi oottennaadan naagettanawu keehi koshshiyoy aybissee? (Isiyaasa 55:7)

¹⁷ Yihooway qoppiyo keehi koshshiya harabay issi uri iitabaa oottiyoogaa aggidoogaanne asay deꞌanaadan Yihooway koyiyo ogiyan I deꞌiyoogaa doommidoogaa. (Isiyaasa 55:7 nabbaba.) He uri Yihoowa qofaadan deꞌanawu ba qofaa laammana koshshees. (Roo. 12:2; Efi. 4:23) I ba iita qofaanne oosuwaa agganawu murttana bessees. (Qol. 3:7-10) Yihooway nuuyyo atto gaanaadaaninne nagaraappe nuna geeshshanaadan oottiya waannabay nuuni Kiristtoosa yarshshuwan ammaniyo ammanuwaa. Nuuni nu deꞌuwaa laammanawu wozanappe baaxetiyoogaa Yihooway beꞌiyo wode he yarshshuwaa denddo oottidi nuuyyo atto gaana.—1 Yoh. 1:7.

YIHOOWAY NEEYYO ATTO GAANAAGAA AMMANETTA

18. Yihoowa maarotaa xeelliyaagan nuuni ay tamaaridoo?

¹⁸ Nuuni beꞌido waannabatuppe amaridabata ane qanttan zaarettoos. Yihooway atto giyoogan saluwan saꞌan ubbaappe aadhdhees. Nuuni hegaadan gaana danddayiyoy aybissee? Koyruwan, I ubbatoo atto gaanawu koyees. Naaꞌꞌanttuwan, I nubaa ubbabaa erees. I nubaa wurssi eriyo gishshawu nuuni tumuppe nagaraappe simmidaakkonne kuuyanawu ayyo maatay deꞌees. Heezzanttuwan, Yihooway nuuyyo atto giyo wode muleera atto gees, qassi hegee nuuni A sinttan nagaraa mule oottibookko giyoogaa mala. Hegee nuussi geeshsha kahay deꞌanaadaaninne nuuni an sabettanaadan oottees.

19. Nuuni nagaranchchanne ubbatoo nagaraa oottiyaageeta gidikkonne ufayttana danddayiyoy aybissee?

¹⁹ Nuuni nagaranchcha gidiyo gishshawu, ubbatoo nagaraa oottiyoogee tuma. SHin, Geeshsha Maxaafaa Loytti Akeekiyoogaa, (Inggilizettuwaa) Paydo 2, sinttaa 771n deꞌiya qofay nuna minttettana danddayees: “Yihooway maariyaagaa gidiyo gishshawu ba ashkkarati shugo gididobaa erees. Yaatikko, eti nagaranchcha gidiyo gishshawunne moorobaa oottiyo gishshawu ubba wode azzanana koshshenna. (Maz 103:8-14; 130:3) Eti Xoossay koyiyoogaadan deꞌanawu banttawu danddayettida ubbabaa oottikko, ufayttana danddayoosona. (Pili 4:4-6; 1Yoh 3:19-22).” Hegee keehi minttettiyaaba!

20. Kaalliya huuphe yohuwan nuuni ay beꞌanee?

²⁰ Nuuni oottido nagaraa gaasuwan tumuppe azzaniyo wode Yihooway nuuyyo atto gaanawu koyiyo gishshawu A galatoos. SHin, nuuni Yihoowaagaadan waati maarana danddayiyoo? Nu maarotay Yihoowa maarotaara issi mala gidiyo ogeti awugeetee, qassi dummatiyo ogeti awugeetee? He dummatettaa akeekiyoogee keehi koshshiyaaba gidiyoy aybissee? Kaalliya huuphe yohoy he oyshata zaarana.