Zoriya Koyana Koshshiyoy Aybissee?

1. Nuuni loꞌꞌobaa kuuyanawunne nu halchchidobaa polanawu waatana danddayiyoo? (Leemiso 13:10; 15:22)

NUUNI ubbay loꞌꞌobaa kuuyana koyoos. Qassi nuuni ubbay nu halchchidobay polettanaadankka koyoos. Hegawu nuuni zoriya oychchana koshshiyogaa Xoossaa Qaalay yootees.—Leemiso 13:10; 15:22 nabbaba.

2. Yihoowi nuuyyo qaalaa gelidobay aybee?

² Keehi loꞌꞌo zoriya nuuyyo yootana danddayiyay nu Aawaa Yihoowa gidiyogee tuma. Hegaa gishshawu nuuni A woossananne hayyuwa demmanawu A oychchana koshshees. I nu hanotaa xeellidi nuna maaddanawu hagaadan giidi qaalaa geliis: “Taani nena zorananne naagana.” (Maz. 32:8) Ha xiqisee Yihoowi nuna zoriyogaa xalaala gidennan, nuussi qoppiyogaanne A zoriya oosuwan peeshshanaadan nuna maaddiyogaa bessees.

3. Nuuni ha huuphe yohuwan ay beꞌanee?

³ Ha huuphe yohuwan, nuuni Xoossaa Qaalaa goꞌettidi oyddu oyshatuyyo zaaruwa demmana: (1) Loꞌꞌo zoriyan goꞌettanawu koyikko taayyo deꞌana bessiya eeshshati awugeetee? (2) Tana loꞌꞌobaa zorana danddayiyay oonee? (3) Taani zoriya tumuppe koyiyogaa waata bessana danddayiyanaa? (4) Harati tawu kuuyanaadan taani oychchana koshshennay aybissee?

TAAYYO DEꞌANA BESSIYA EESHSHATI AWUGEETEE?

4. Loꞌꞌo zoriyappe goꞌꞌaa demmanawu nuussi deꞌana bessiya eeshshati awugeetee?

⁴ Loꞌꞌo zoriyappe goꞌꞌaa demmanawu nuuni nuna ziqqi oottananne ashkke gidana koshshees. Nuna kase gakki erennabay gakkiyo wode, nuuni loꞌꞌobaa dooranawu haratu maadoy nuussi koshshiyogaa ammanana bessees. Qassi nuuni ubbabaa erennaagaa akeekana koshshees. Nuuni nuna ziqqi oottiyanne ashkke asa gidana xayikko, Yihoowi nuna maaddenna. Hegaa gishshawu, Xoossaa Qaalaa nabbabiyo wode ayba zoriyakka demmokko; hegee shuchchaa bolli haattaa tigiyogaa mala gidana danddayees. (Mik. 6:8; 1 Phe. 5:5) Shin nuuni nuna ziqqi oottiyanne ashkke asa gidikko, Geeshsha Maxaafaa zoriya sohuwara ekkoosinne hegan goꞌettoos.

5. Kawuwa Daawiti otorettanawu gaaso gidana danddayiya I oottidobati awugeetee?

⁵ Kawuwa Daawitappe nuuni tamaarana danddayiyobaa beꞌa. I malaalissiya darobaa oottikkonne otorettibeenna. I kawo gidanaappe daro layttaappe kase, muuziqa miishshaa kaaꞌiyogan erettida asa. Ubba I kawuwa sinttan muuziqa miishshaa kaaꞌanaadankka xeesettiis. (1 Sam. 16:18, 19) Kaalliya kawo gidanaadan Yihoowi Daawita tiyi simmidi, I wolqqaama gidanaadan Ba geeshsha ayyaanaa immiis. (1 Sam. 16:11-13) Wogga wolqqaama asa gidida Pilisxxeemiya Gooliyada gujjin, morkketa worido gishshawu I ba asan sabettiis. (1 Sam. 17:37, 50; 18:7) Daawiti otorettiya asa gidiyakko ha ubbabata oottido gishshawu, haratuppe baayyo zoree koshshennabadan qoppana danddayees. Shin Daawiti bana ziqqi oottiis.

6. Daawiti zoriya siyanawu koyiyogaa waati eriyoo? (Misiliyakka xeella.)

⁶ Daawiti kawo gidi simmidikka, bana zorana danddayiya asaara laggetiyogaa aggibeenna. (1 Odi. 27:32-34) Loꞌꞌo zoriya siyiyo meezee Daawitawu deꞌiyo gishshawu, hegee garamissiyaba gidenna. I attumaasaa zoriya xalla gidennan, Abigaalo giyo maccaasiya yootido zoriyakka siyiis. A otorettiya, galatennanne harata bonchchenna Naabaala giyo bitaniya machchiyo. Daawiti bana ziqqi oottidi I loꞌꞌo zoriya siyido gishshawu, gita balaa oottiyogaappe naagettiis.—1 Sam. 25:2, 3, 21-25, 32-34.

7. Nuuni Daawitappe ay tamaarana danddayiyoo? (Eranchchaa 4:13) (Misiliyakka xeella.)

⁷ Nuuni Daawitappe amaridabaa tamaarana danddayoos. Leemisuwawu, issibaa oottiyo imotay woy issi aawatettay nuussi deꞌana danddayees. Gidikkokka, nuuni ubbabaa eriyabadaaninne nuussi zoree koshshennabadan qoppana bessenna. Qassi Daawitaagaadan, nuna zoriyay oona gidikkokka nuuni loꞌꞌo zoriya siyanawu eeno gaana koshshees. (Eranchchaa 4:13 nabbaba.) Nuuni yaatikko, nunanne harata keehi azzanttana danddayiya gita balaa balennaadan naagettana danddayoos.

TANA LOꞌꞌOBAA ZORANA DANDDAYIYAY OONEE?

8. Yonaataani Daawita loꞌꞌobaa zorana danddayidoy aybissee?

⁸ Nuuni Daawitappe tamaarana danddayiyo harabaakka ane beꞌa. Yihoowara loytti dabbotida, qassi A gakkidabaakka loytti akeekana danddayiya asata zoriya oychchiis. Leemisuwawu, I Kawuwa Saaꞌooli aara sigettanawu koshshay deꞌiyakkonne eranawu koyido wode, Saaꞌoola naꞌaa Yonaataana zoriya siyiis. Yonaataani loꞌꞌobaa A zorana danddayidoy aybissee? Yonaataani Yihoowara loytti dabbotidanne Saaꞌoolakka loytti eriya asa gidiyo gishshaassa. (1 Sam. 20:9-13) Hagaappe nuuni ay tamaarana danddayiyoo?

9. Nuuni zoriya oona oychchana koshshii? Leemisuwa yoota. (Leemiso 13:20)

⁹ Nuussi zoree koshshiyo wode, Yihoowara loytti dabbotida, qassi nuussi maadoy koshshiyo ginaa loytti eriya ura zoriya oychchiyogee loꞌꞌo.a (Leemiso 13:20 nabbaba.) Leemisuwawu, issi yelaga ishay loꞌꞌo aqo lagge demmanawu koyiiddi deꞌiyabadan qoppa. Loꞌꞌobaa A zorana danddayiyay oonee? I aqo oyqqibeenna issi ura oychchin he uri Geeshsha Maxaafaappe A zorikko, I loꞌꞌo zoriya demmana danddayees. Shin he ishay A loytti eriyanne daro wodiyawu issippe Yihoowawu haggaazida aqo laggeta oychchikko, keehi maaddiya zoriya demmana danddayees. Eti Geeshsha Maxaafay yootiyo zoriya I waati oosuwan peeshshanaakko xalla gidennan, bantta aqo deꞌuwan tamaaridobaakka awu yootana danddayoosona.

10. Nuuni haꞌꞌi ay beꞌanee?

¹⁰ Nuuni nuussi deꞌana bessiya naaꞌꞌu eeshshatanne loꞌꞌobaa nuna ooni zorana danddayiyakko beꞌida. Nuuni zoriya tumuppe koyana koshshiyoy aybissakko, qassi nuuyyo harati kuuyanaadan oychchana koshshiyakkonne ane haꞌꞌi beꞌoos.

TAANI ZORIYA TUMUPPE KOYIYOGAA WAATA BESSANA DANDDAYIYANAA?

11-12. (a) Issi issitoo nuuni waatana danddayiyoo? (b) Kawuwa Robiꞌaami gitabaa kuuyana koshshido wode waatidee?

¹¹ Issi issitoo, issi uri zoriya koyiyabaa milatana danddayees. Shin tumaa yootanawu, I ba kuuyidobaa harati maayettanaadan xalla koyees. Hegaa mala asi tumuppe zoriya koyenna. Kawuwa Robiꞌaama taarikiyappe I tamaarana koshshees.

¹² Robiꞌaami ba aaway Solomoni hayqqin Israaꞌeelan kawotiis. Robiꞌaami kawotido wode asay ishaluwan deꞌiyaba gidikkokka, eti Solomoni keehi wolqqaama oosuwa eta ootissidabadan qoppidosona. He asati Robiꞌaamakko yiidi deexo qambbaraa etawu kawushshanaadan A mintti woossidosona. Robiꞌaami kuuyanabaa qoppanawu eti baayyo wodiya immanaadan oychchiis. Koyruwan I Solomona maaddida cima asata zoriya oychchidoogee loꞌꞌoba. (1 Kaw. 12:2-7) Shin I he cima asati yootido zoriya ekkennan ixxiis. I ixxidoy aybissee? I oottanabaa kasetidi kuuyidabanne he cima asati A qofan maayettana giidi qoppidaba milatees. Hegaa gishshawu, I yelaga gidida ba laggeta zoretaa bessin eti A qofan maayettido wode ba laggeti yootidobaa I dosiis. (1 Kaw. 12:8-14) Robiꞌaami ba laggeti giidobaa asawu yootiis. Hegaappe denddidaagan, deree naaꞌꞌawu shaahettiis; qassi hegaappe simmin Robiꞌaami tuggatiiddi deꞌiis.—1 Kaw. 12:16-19.

13. Nuuni zoriya tumuppe siyanawu koyiyakkonne waati erana danddayiyoo?

¹³ Robiꞌaama taarikiyappe nuuni ay tamaarana danddayiyoo? Nuuni zoriya oychchiyo wode zoriya tumuppe koyana koshshees. Nuuni zoriya tumuppe koyiyakkonne waati erana danddayiyoo? Nuna hagaadan oychchana danddayoos, ‘Taani zoriya oychchada hegee ta siyanawu koyiyogaa mala gidenna gishshawu, hegaa sohuwara ixxiyanaa?’ Issi leemisuwa ane beꞌoos.

14. Nuuyyo zoree imettiyo wode nuuni ay hassayana koshshii? Leemisuwa yoota. (Misiliyakka xeella.)

¹⁴ Issi uri daro miishshaa demissiya oosuwa oottanaadan issi ishaa shoobbiis gaada qoppa. I he shoobiya ekkanaappe kase issi cimaa zoriya oychchiis. He ishay he oosoy I adussa wodiyawu so asaappe haakkanaadan oottanaagaa yootiis. So asawu ayyaanaaban koshshiyabaa kunttiyogee kaseyana bessiya aawatetta gidiyogaa qonccissiya Geeshsha Maxaafay yootiyo maaraa he cimay ishaa hassayissiis. (Efi. 6:4; 1 Xim. 5:8) He ishay cimay yootiyoban maayettennan ixxidi, I siyanawu koyiyobaa yootana danddayiya ura demmanaashin hara ishantta oychchees. He ishay tumuppe zoriya koyiiddi deꞌiiyye, oottanaabaa kuuyiichchidi A qofaara maayettiya ura koyiiddi deꞌii? Nu wozanay cimmiyogaa nuuni hassayana koshshees. (Erm. 17:9) Nuuni dosenna zoree nuussi imettikkokka, issi issitoo nuussi koshshiya zoree hegaa.

HARATI TAASSI KUUYANAADAN OYCHCHANA KOSHSHII?

15. Nuuni oottana koshshennabay aybee, qassi aybissi?

¹⁵ Yihoowi nuuni nuussi kuuyanaadan koyees. (Gal. 6:4, 5) Nuuni beꞌidoogaadan, akeekanchcha asi oottanabaa dooranaappe kase Xoossaa Qaalaappenne kayma Kiristtaanetuppe zoriya demmanawu koyees. Gidikkokka, nuuni harati nuussi kuuyanaadan oychchana koshshenna. Issoti issoti eti bonchchiyo ura, “Taagaa mala hanotay gakkiyakko neeni ay oottuutee?” giidi oychchana danddayoosona. Harati qassi bantta hanotaabaa loytti qoppennan hara asi kuuyidoogaara issi malabaa kuuyana danddayoosona.

16. Eeqawu yarshshettida ashuwara gayttidaagan Qoronttoosan aybi hanidee, qassi he ashuwa maanawu woy agganawu kuuyiyo aawatettay oogee? (1 Qoronttoosa 8:7; 10:25, 26)

¹⁶ Eeqawu yarshshettida ashuwara gayttidaagan, Qoronttoosa galchchan deꞌiya Kiristtaaneti kuuyana koshshidabaa qoppa. Phawuloosi he Kiristtaanetussi hagaadan giis: “Eeqi aynne maaddennaagaanne issi Xoossaappe attin, hara Xoossi baynnaagaa eroos.” (1 Qor. 8:4) Galchchan deꞌiya amaridaageeti ha qofaa eriyo gishshawu, eeqawu yarshshetti simmidi giyaa kiyida ashuwa shammidi maanawu kuuyidosona. Harati qassi bantta kahaa gaasuwan he ashuwa meennan agganawu kuuyidosona. (1 Qoronttoosa 8:7; 10:25, 26 nabbaba.) Hegee issi uri bawu kuuyiyoba. Phawuloosi Qoronttoosa asati haratussi kuuyanaadan woy harati kuuyidobaa kaallanaadan mule zoribeenna. Eti ubbaykka “haasayidobawunne oottidobawu Xoossaa sinttan pirddawu eqqana.”—Roo. 14:10-12.

17. Nuuni harati oottiyobaa kaallidi oottikko aybi hanana danddayii? Leemisuwa yoota. (Misiliyakka xeella.)

¹⁷ Ha wodiyan hegaa malabay waani hanana danddayii? Suuttawu suuppa kifiletuura gayttidabaa qoppa. Ha suuppa kifileta issi Kiristtaanee ekkanawu woy agganawu bawu kuuyana bessees.b Ha allaallee akeekanawu metiyaba gidana danddayikkokka, hegaara gayttidaagan nuuni nuussi kuuyana koshshees. (Roo. 14:4) Nuuni hara asi kuuyidobaa kaallidi kuuyikko, nu kahay minnennaadan oottana danddayoos. Nuuni nu kahaa meezeyananne loohissana danddayiyoy an goꞌettiyogaa xalaalaana. (Ibr. 5:14) Yaatin nuuni kayma Kiristtaaniya zoriya oychchana koshshiyoy awudee? Nuuni nuuyyo pilggi simminkka, Geeshsha Maxaafay yootiyo maarati nu hanotaara waani gayttiyakko akeekanawu nuussi maadoy koshshana danddayees.

ZORIYA KOYIYOGAA AGGOPPA

18. Yihoowi nuussi oottidobay aybee?

¹⁸ Nuuni nubaa kuuyanaadan paqqadiyogan Yihoowi nunan loytti ammanettiyogaa bessiis. I nuussi ba Qaalaa, Geeshsha Maxaafaa immiis. Qassi Geeshsha Maxaafay yootiyo maarata loytti akeekanaadan nuna maaddana danddayiya loꞌꞌo laggeta immiis. Yihoowi yaatiyogan siiqiya aawadan nuussi koshshiyabaa kunttees. (Lee. 3:21-23) Nuuni A galatiyogaa bessanawu waatana danddayiyoo?

19. Nuuni ubbatoo Yihoowa waati ufayssana danddayiyoo?

¹⁹ Hagaa qoppa: Yelidaageeti bantta naati dicciyogaa, qassi akeekanchchanne harata maaddiya Yihoowa ashkkara gidiyogaa beꞌiyo wode keehi ufayttoosona. Hegaadankka, Yihoowi nuuni ayyaanaaban kayma gidanawu, zoriya koyanawunne A bonchchissiya loꞌꞌobaa kuuyanawu ubbatoo baaxetiyogaa beꞌiyo wode ufayttees.