Harata Waati Zorana Danddayiyoo?

1. Zorana koshshiyay oonee, qassi aybissi?

HARATA zoriyogaa xeelliyagan neeyyo aybi siyettii? Issoti issoti zoriyogan ufayttoosona. Shin amaridaageeti harata zoranawu mammottoosona woy yayyiiddi zoroosona. Hanotay ayba gidinkka, nuuni ubbay issi issitoo zorana bessees. Aybissi? Hegee nuuni nu ishanttanne michchontta siiqiyogaa bessiyo oge gidiyo gishshataassa. Yesuusi nuuni A kaalliyageeta gidanawu koyikko, issoy issuwa siiqana koshshiyogaa yootiis. (Yoh. 13:35) Qassi nuuni loꞌꞌo zoriya zoriyo wode nu laggetettay minniyogaa Geeshsha Maxaafay yootees.—Lee. 27:9.

2. Cimati waatana koshshii, qassi aybissi? (“Saaminttawu Gidduwan Shiiqiyo Shiiquwan Imettiya Zoriya” giya saaxiniyakka xeella.)

² Cimati harata waati loytti zoranaakko erana koshshees. Yihoowinne Yesuusi galchchaa heemmanaadan ha attumaageeta sunttidosona. (1 Phe. 5:2, 3) Cimati yaatiyo ogetuppe issoy galchchan haasayata haasayiyo wode Geeshsha Maxaafaappe zoriyogaa. Qassi eti wudiyappe haakkidaageeta gujjin, ubba dorssata huuphiyan huuphiyan zorana koshshees. Cimatinne nuuni ubbay loꞌꞌo zoriya waati zorana danddayiyoo?

3. (a) Harata loꞌꞌo zoriya zoriyageeta waani gidana danddayiyoo? (Isiyaasa 9:6; “Zoriyo Wode Yesuusa Milata” giya saaxiniyakka xeella.) (b) Ha huuphe yohuwan ay beꞌanee?

³ Geeshsha Maxaafan etabay odettido issoti issoti waati zoridaakko pilggiyogan nuuni loꞌꞌo zoriya waati zoranaakko tamaarana danddayoos. Yesuusi ubbatookka keehi loꞌꞌo zoriya zoriis. Ayyo imettida bonchcho sunttatuppe issoy “Maalaalissiyaabaa zoriyaagaa.” (Isiyaasa 9:6 nabbaba.) Ha huuphe yohuwan, issi uri zoriya oychchiyo wode nuuni waati zorana danddayiyakko, qassi issi uri zoriya oychchana xayikkokka nuuni A zorana koshshiyo wode waatana danddayiyakko beꞌana. Likke wodiyaninne likke ogiyan zoriyogee ay keena koshshiyakkokka beꞌana.

ISSI URI NUNA ZORIYA OYCHCHIYO WODE

4-5. Issi uri nuna zoriya oychchiyo wode nuuni kasetidi nuna woygi oychchana koshshii? Leemisuwa yoota.

⁴ Issi uri nuna zoriya oychchiyo wode nuuni oottana koshshiya koyrobay aybee? I nunan ammanettidoogan ufayttidi sohuwara maaddanawu koyana danddayoos. Shin koyruwan nuna hagaadan oychchana koshshees, ‘Ha allaalliyara gayttidaagan taani zorana danddayiyanaa?’ Issi issitoo nuuni maaddana danddayiyo keehi loꞌꞌo ogee zoriyogaappe, he allaalliyara gayttidaagan loytti zorana danddayiya uraara izaawu gayttanaadan oottiyogaa.

⁵ Leemisuwawu, ne mata laggee keehi sahettiis. I akkamettana danddayiyo akkamo qummotubaa pilggiyogaa doommidoogaa yootidi, neeni keehi loꞌꞌo gaada qoppiyogee awugaakko yootanaadan oychchiis. Neeni issi akkamuwa doorana danddayiyaba gidikkonne, dottore gidakka woy he sahuwa waata akkamanaakko loohabaakka. Hegaa mala hanotan ne laggiya maaddana danddayiyo keehi loꞌꞌo ogee A maaddana danddayiya ura I demmanaadan oottiyogaa.

6. Nuuni zoranaappe kase waatiyogee loꞌꞌoo?

⁶ Issi issitoo nuuni nu laggiya zorana danddayiyabadan qoppana danddayoos. Shin sohuwara zorennan aggiyogee loꞌꞌo gidana danddayees. Aybissi? Leemiso 15:28y ‘xillo asi haasayanaappe kasetidi qoppiyogaa’ yootees. Yaatiyo gishshawu nuuni woyganaakko eriyabadan qoppikkokka, nu zoriyo allaalliya xeelliyagan kasetidi pilggiyogee, woossiyogeenne loytti qoppiyogee loꞌꞌo gidana danddayees. Yaatikko nu zoree nuuni yootanaadan Yihoowi koyiyobaara keehi maayettana. Xoossay erissidobaa yootiya Naataanabaa beꞌa.

7. Xoossay erissidobaa yootiya Naataana hanotaappe neeni ay tamaaray?

⁷ Kawuwa Daawiti Xoossay erissidobaa yootiya Naataanaara haasayiyo wode, Yihoowayyo garuwa keexxanawu koyidoogaa yootiis. I yaatanaadan Naataani sohuwara zoriis. Gidoppe attin, Naataani wodiya bazzidi, kasetidi Yihoowa oychchana koshshees shin. Aybissi? Yihoowi ba garuwa Daawiti keexxanaadan koyibeenna gishshataassa. (1 Odi. 17:1-4) Ha hanotay bessiyogaadan, issi uri nuna zoriya oychchiyo wode nuuni ‘haasayanawu eesotennan’ aggiyogee loꞌꞌo.—Yaaq. 1:19.

8. Nuuni zoriyobaa loytti qoppana koshshiyo hara gaasoy awugee?

⁸ Nuuni zoranaappe kasetidi loytti qoppana koshshiyo hara gaasoy hagaa: Nuuni issi ura balabaa zorin hegee iitabaa kaalettikko, amarida hanotan nuunikka oyshettana danddayoos. Nuuni zoranaappe kase loytti qoppana koshshiyo loꞌꞌo gaasoy deꞌiyogee qoncce.

ZORIYA OYCHCHIBEENNA URA NUUNI ZORIYO WODE

9. Cimati zoranaappe kase shaakki erana koshshiyabay aybee? (Galaatiya 6:1)

⁹ Issi issitoo, ‘wora simmiya’ issi ishaa woy michchiyo cimati zorana koshshees. (Galaatiya 6:1 nabbaba.) Issi uri guyyeppe gita nagaraa oottanaadan gaaso gidana danddayiya balabata kuuyana danddayees. Cimatu halchchoy he uri merinaa deꞌuwawu efiya ogiyan ubbatoo deꞌanaadan maaddiyogaa. (Yaaq. 5:19, 20) Shin eti loꞌꞌo zoriya zoranawu he uri tumuppe wora simmidaakkonne kasetidi shaakki erana koshshees. Nuuni ubbay nu kahaa goꞌettidi kuuyanaadan Yihoowi paqqadiis. (Roo. 14:1-4) Shin cimati issi uri Yihoowara dabbotido dabbotaa moorana danddayiyabaa oottidoogaa akeekikko, waati zorana danddayiyonaa?

10-12. Zoriya oychchibeenna ura zoriyo wode cimati waatana koshshii? Leemisuwa yoota. (Misiliyakka xeella.)

¹⁰ Zoriya oychchibeenna ura zoriyogee issi issitoo cimatuyyo metiyaba gidana danddayees. Aybissi? Issi uri akeekennan wora simmana danddayiyogaa kiitettida Phawuloosi yootiis. Yaatiyo gishshawu, he ura zoranaappe kasetidi I zoriya metootennan ekkanaadan cimati oottana koshshiyo issi issibati deꞌoosona.

¹¹ Ha leemisuwa beꞌa: Issi goshshanchchay mino biittan mittaa dichchanawu malees. I mittaa ayfiya biittan mooganaappe kase, biittaa liiqissidi giigissees. Yaatidi he ayfiya moogees. Wurssettan he ayfee mokkanaadan haattaa ushshees. Hegaadankka, issi ishay zoriya metootennan ekkanaadan issi cimay oottana danddayiyobati deꞌoosona. Leemisuwawu, I injjetiya wodiya naagees; yaatidi he ishawu qoppiyogaanne aara haasayanawu koyiyobay deꞌiyogaa yootees. Zoriya izaawu siiqiyogaaninne kehiyogan loꞌꞌo sunttay deꞌiyogaa gidikko, harati A zoriya siyanawu metootokkona.

¹² He cimay A haasayissiyo wode, ubba asay baliyogaanne issi issitoo zoree koshshiyogaa A hassayissiyogankka zoriya metootennan ekkanaadan oottana danddayees. (Roo. 3:23) He uri waanidi wora simmidaakko cimay liiqo qaalaaninne bonchchuwan Geeshsha Maxaafaa goꞌettidi ayyo qonccissees. He ishay balidoogaa ammanikko, I hegaa giigissanawu waatana koshshiyakko akeekanawu metenna ogiyan cimay yootiyogan “mittaa ayfiya moogees.” Wurssettan he cimay, he ishaa wozanappe galatiyogaaninne aara woossiyogan moogettida mittaa ayfiya “haattaa ushshees.”—Yaaq. 5:15.

13. Cimati izaawu zoriya akeekidaakkonne waati shaakki erana danddayiyonaa?

¹³ Issi issitoo, zoriya uri yootiyobaynne zoriya ekkiya uri siyiyobay dumma dumma. Hegaadan hanennaadan cimati waatana danddayiyonaa? He uri zoriyanne hegaa waati oosuwan peeshshana danddayiyakko akeekidaakkonne he cimati shaakki eranawu kehatettan oyshata oychchana danddayoosona.—Era. 12:11.

LIKKE WODIYANINNE LIKKE OGIYAN ZORIYOGAA

14. Nuuni hanqqetti uttidi zorana koshshii? Qonccissa.

¹⁴ Nuuni ubbay nagaranchcha gidiyo gishshawu, issi issitoo harata yiilloyiyabaa oottoos woy haasayoos. (Qol. 3:13) Issi uri haasayiyobay woy oottiyobay issi issitoo nuna hanqqetissana danddayiyogaa Geeshsha Maxaafay yootees. (Efi. 4:26) Shin nuuni hanqqetti uttidi zorana koshshenna. Aybissi? “Asi hanqqettiyo wode, Xoossaa sinttan suurebaa oottenna” gishshataassa. (Yaaq. 1:20) Nuuni hanqqetti uttidi zorikko, hanotay yaa iitanaadan oottana danddayoos. Hegaa giyogee nuna hanqqetissida urawu nu qofaanne nuuyyo siyettiyabaa mule qonccissana koshshenna giyogaa gidenna. Shin nuuni woppu gaanaashin naagikko, loꞌꞌo ogiyan haasayana danddayoos. Iyyooba loꞌꞌobaa zorida Elihuppe nuuni tamaarana danddayoos.

15. Elihuppe nuuni ay tamaariyoo? (Misiliyakka xeella.)

¹⁵ Iyyooba worddo laggeti abaa yootidobay bala gidiyogaa I qonccissiyo wode, Elihu danddayan ezggiis. Qassi Elihu Iyyoobawu qarettiis. Shin Iyyoobi bana xillo kessidi Yihoowabaa likke gidennabaa yootido gishshawu Elihu keehi hanqqettiis. Gidikkokka, Elihu ba kayay gakkanaashin naagiis; yaatidi Iyyooba zoriyo wode ashkketettaaninne bonchchuwan haasayiis. (Iyy. 32:2; 33:1-7) Elihu oottidobay keehi koshshiya tumaa nuna tamaarissees: Zoree likke wodiyaninne likke ogiyan, hegeekka bonchchuwaninne siiquwan imettikko keehi loꞌꞌo.—Era. 3:1, 7.

ZORIYOGAANNE ZORIYA EKKIYOGAA AGGOPPA

16. Mazamure 32:8​ppe neeni ay tamaaray?

¹⁶ Ha huuphe yohuwawu waanna xiqisee ‘Yihoowi nuna zoriyogaanne naagiyogaa’ yootees. (Mazamure 32:8 nabbaba.) Ha qofay I nuna ubbatoo maaddiyogaa qonccissees. I nuna zoriyogaa xalla gidennan, hegaa oosuwan peeshshanaadankka maaddees. Nuuni Yihoowa milatana danddayoos. Nuuni harata zorana koshshiyo wode, eta ubbatoo minttettananne eti loꞌꞌobaa kuuyanaadan maaddanakka danddayoos.

17. Cimati nuna Geeshsha Maxaafaappe zoriyo wode nuuyyo aybi siyettanaadan oottiyonaa? (Isiyaasa 32:1, 2)

¹⁷ Nuuni awudeegaappenne aaruwan ha wodiyan, harata loꞌꞌo zoriya zorananne etappe loꞌꞌo zoriya siyana koshshees. (2 Xim. 3:1) ‘Mela sohuwan goggiya haattay’ issi ura gazddissana danddayiyogaadan, Geeshsha Maxaafaappe qoncciyan zoriya cimati nuuni ubbatoo Yihoowawu haggaazanaadan minttettoosonanne maaddoosona. (Isiyaasa 32:1, 2 nabbaba.) Nuuni siyanawu koyiyobaa erikkokka, nuuni siyana koshshiyabaa yootiyageeti “biraa bolli tigido worqqaa alleequwaa mala” alꞌꞌo imotaa immoosona. (Lee. 25:11) Nuuni ubbaykka loꞌꞌo zoriya zoriyogaanne ekkiyogaa ubbatoo tamaariyageeta gidoos.