Cimatettaa Wodiyan Ubbatoo Waana Ufayttana Danddayay?

1-2. Yihoowi cimida ba ashkkarata waati xeellii? (Mazamure 92:12-14; Misiliyakka xeella.)

KUMETTA alamiyan deꞌiya asay cimatettaa dumma dumma ogiyan xeellees. Leemisuwawu, ha hanotaa qoppa: Puulunttay neeyyo koyro kiyido wodiya hassayay? Hegaa hara uri beꞌanaappe kase shoddanawu malennan aggakka. Shin issi puulunttaa shoddiyogee haray daroy kiyennaadan diggennaagaa guyyeppe akeekadasa. Ha leemisoy daro asay cimanawu koyennaagaa bessiyaba.

² Shin, saluwan deꞌiya nu Aaway cimida ba ashkkarata hegaappe dumma ogiyan xeellees. (Lee. 16:31) Ayfiya mittan I eta leemisiis. (Mazamure 92:12-14 nabbaba.) Hegaa giyogee woygiyogee? Keehi daro layttaa takkida mittay A bolli daro bonccoy woy ciishshay deꞌiyo gishshawu, keehi loꞌꞌees. Leemisuwawu, Jaappaanen keehi daro layttaa deꞌida issi loꞌꞌiya mittaa qommoy deꞌees. He mittatuppe amaridaageetu layttay shaꞌaappe darees; qassi eti keehi loꞌꞌoosona. He mittatudan, cimida ammanettidaageeti Xoossaa sinttan keehi loꞌꞌoosona. Yihoowi cimidaageetuyyo deꞌiya keehi loꞌꞌiya eeshshata nashshees. Eti Ayyo daro layttaa haggaazidosona; qassi loꞌꞌo wodiyankka iita wodiyankka Awu ammanettidi deꞌidosona.

3. Yihoowi ba halchchuwa polanawu cimidaageeta waati goꞌettidaakko leemisuwa yoota.

³ Nuuni cimiyo wodekka Yihoowi nuna nashshiyogaa aggenna.a Yihoowi ba halchchuwa polanawu darotoo cimidaageeta goꞌettiis. Leemisuwawu, Yihoowi Saara gita kawotettawu aayo gidanaagaanne Masiyayyo mayzza aayo gidanaagaa yootido wode, A keehi cima. (Doo. 17:15-19) Muuseekka Israaꞌeelata Gibxxeppe kessanaadan Yihoowi A kiittido wode cima. (Kes. 7:6, 7) Qassi kiitettida Yohaannisi ichchashu Geeshsha Maxaafaa shaahota xaafanaadan Yihoowi A goꞌettido wode ikka keehi cimiis.

4. Leemiso 15:15y yootiyogaadan, cimidaageeti banttana gakkiya metota genccanaadan aybi maaddana danddayii? (Misiliyakka xeella.)

⁴ Cimidaageeta daro metoti gakkoosona. Daro asay “cimatettay meto” giyoy hegaassa. Shin ufayttiyogeeb cimatettaa gaasuwan yiya metota genccanaadan maaddana danddayees. (Leemiso 15:15 nabbaba.) Ha huuphe yohuwan, cimidaageeti ubbatoo ufayttanawu oottana danddayiyobata beꞌana. Qassi bantta galchchan deꞌiya cimida ishatanne michchota harati waati maaddana danddayiyakko beꞌana. Nuuni cimiyo wode ubbatoo ufayttiyogee metiyaba gidana danddayiyoy aybissakko ane koyro beꞌoos.

CIMATETTAY NEENI UFAYTTENNAADAN WAATI OOTTANA DANDDAYII?

5. Cimida amaridaageeti hidootaa qanxxanaadan oottana danddayiyabay aybee?

⁵ Neeni hidootaa qanxxanaadan oottana danddayiyabay aybee? Geella kase ne oottiyobata haꞌꞌi oottana danddayenna gishshawu, azzanennan aggakka. Qassi neeni yelaganne payya gidada deꞌido wodiya amottennan aggakka. (Era. 7:10) Leemisuwawu, Ruubo giyo michchiya hagaadan gaasu: “Tana sakkiyonne ta bollay kaseegaadan qaaxxana danddayenna gishshawu, maayuwa maayiyogeekka tana darotoo keehi metees. Kalssiya wottanawu ta gediya xoqqu oottiyogaa mala guuttabaykka tawu keehi deexxees. Kushee tana sakkiyo gishshawu, ta biradhdheta loytta qaattana danddayikke. Hegaa gishshawu, keehi guuttabata oottiyogeekka tana metees.” Qassi Beeteelen haggaazida Haarolddi hagaadan giis: “Kase oottiyo ufayssiya ubbabata taani haꞌꞌi oottana danddayenna gishshawu issi issitoo keehi yiillotays. Taani yelagatettan deꞌiyo wode keehi mino. Taani kase beezbool giyo ispporttiya kaassaa kaaꞌiyogaa keehi dosays. Harati, ‘Kuwaasiya Haarolddawu ola; ayssi giikko, I xoonanaadan nuna maaddana’ yaagoosona. Shin, taani haꞌꞌi haray atto kuwaasiyakka olana danddayiyaba milatenna.”

6. (a) Cimida amaridaageeti hidootaa qanxxanaadan oottana danddayiya harabati awugeetee? (b) Cimidaageeti kaamiya laaggiyogaa aggana koshshiyakko koshshennaakko kuuyanaadan aybi maaddana danddayii? (Ha maxeetiyan “Taani Kaamiya Laaggiyogaa Aggana Koshshii?” giya huuphe yohuwa xeella.)

⁶ Kase neeni nerkka oottiyo issi issibata haꞌꞌi oottana danddayenna gishshawu hidootaa qanxxennan aggakka. Ubba qassi hara ura maadoy neeyyo koshshikko, woy ne naatuppe issuwa soo baada neeni deꞌana koshshikko, hidootaa qanxxana danddayaasa. Geella neeni mino gidenna woy ayfee nena waayissiyo gishshawu, kaamiya laaggana, issi sohuwa nerkka baana, woy ne gaden oottana danddayakka; hegee neeni keehi azzananaadan oottana danddayees. Ne kase oottiyo darobata haꞌꞌi oottennan aggana danddayaasa. Shin, Yihoowikka haratikka nena keehi xoqqu ootti xeelliyogaa hassaya. Qassi Yihoowi nuuyyo siyettiyabaa akeekiyogaa ammanettana danddayoos. Yihoowi nuuni nu ishatanne michchota, qassi A ay keena siiqiyakko erees; qassi I hegaa xoqqu ootti xeellees.—1 Sam. 16:7.

7. Eti deꞌuwan deꞌishin ha iita alamee waayi xayana giidi azzaniyageeta aybi maaddana danddayii?

⁷ Geella neeni deꞌuwan deꞌishin ha iita alamee waayi xayana gaada azzanana danddayaasa. Ne hegaadan qoppikko, aybi maaddana danddayii? Yihoowi ha iita alamiya xayssanawu danddayan naagiyogaa hassayanawu baaxeta. (Isi. 30:18) Yihoowi danddayan naagiyoy aybissee? I danddayidoogee miilooniyan qoodettiya asay A eranawunne awu haggaazanawu wodiyanne qaadaa demmanaadan maaddiis. (2 Phe. 3:9) Yaaniyo gishshawu, neeni hidootaa qanxxikko, wurssettay yaanaappe kase Yihoowi danddayido gishshawu, ay keena daro asay goꞌettidaakko qoppanawu mala. Hegeetuppe issoti issoti ne dabbota gidana danddayoosona.

8. Cimidaageeti sahettiyo woy waayettiyo wode waanana danddayiyonaa?

⁸ Nuuni yelaga gidin cima gidin, sahettiyo woy waayettiyo wode, bessennabaa haasayana woykko oottana danddayoos. (Era. 7:7; Yaq. 3:2) Leemisuwawu, ammanettida bitanee Iyyoobi metoy gakkido wode, “xala” qaalaa haasayiis. (Iyy. 6:1-3) Qassi, cimidaageeti sahettiyogaa gaasuwan, iitabaa haasayana woy oottana danddayoosona. Shin nuuppe ooninne layttan woy payyatettan gaasoyidi, eriiddi iitabaa haasayana woy oottana koshshenna. Qassi nuuni issi ura bolli iitabaa haasayikko, sohuwara maarotaa oychchana koshshees.—Mat. 5:23, 24.

UBBATOO UFAYTTANAWU WAATANA DANDDAYAY?

9. Neeni harata maaduwa oychchana koshshiyoy aybissee? (Misiliyakka xeella.)

⁹ Harata maaduwa oychcha. (Gal. 6:2) Koyro heeran hegee neeyyo deexxana danddayees. Gireteelo giyo michchiya hagaadan gaasu: “Taani haratuyyo tooho gidanawu koyenna gishshawu, issi issitoo maaduwa eta oychchiyogee tawu deexxees. Ta qofaa laammanawunne tana ziqqi oottada maaduwa ekkanawu tawu wodiya koshshiis.” Harati nena maaddanaadan neeni eeno giyo wode, immiyogan eti ufayttanaadan oottaasa. (Oos. 20:35) Qassi harati nena siiqiyogaanne maaddanawu koyiyogaa neeni beꞌiyo wode ufayttanaagee qoncce.

10. Harata galatiyogaa bessana koshshiyoy aybissee? (Misiliyakka xeella.)

¹⁰ Harata galatiyogaa bessa. (Qol. 3:15; 1 Tas. 5:18) Harati issi loꞌꞌobaa nuuyyo oottiyo wode eta nashshoos. Shin, issi issitoo eta galatiyogaa dogana danddayoos. Gidoppe attin nuuni noocu giyabanne galatiyaba gidikko, eti oottidobaa nu nashshiyogaa nu laggeti akeekana danddayoosona. Beeteelen cimidaageeta maaddiyo kifiliyan oottiya Liyo giyo michchiya hagaadan gaasu: “Taani maaddiyo michchotuppe issinniya galatiyogaa qonccissiyabaa xaafada tawu immaasu. He michchiya xaafidobay qantta gidikkonne keehi minttettees. A tawu xaafidobaa nabbabiyogaa taani keehi dosays. Hegee A ta maaduwa nashshiyogaa qonccissiyo gishshawu keehi ufayttays.”

11. Harata waata maaddana danddayay? (Misiliyakka xeella.)

¹¹ Harata maaddanawu baaxeta. Neeni haratubaa qoppiyabanne eta maaddanawu baaxetiyaba gidikko, ne metuwabaa darin qoppakka. Cimidaageeta, keehi maaddiyabaa tamaarissiya maxaafatun leemisana danddayoos. Shin issi uri he maxaafata nabbabana xayikko, hegeetuppe tamaarana danddayenna. Hegaadankka, neeni yelagata haasayissennabanne ne eriyobaa etawu yootennaba gidikko, eti neeppe keehi koshshiyabaa tamaarana danddayokkona. Yelagata oyshata oychcha; qassi eti yootiyobaa ezgga. Yihoowa maaraadan deꞌiyogee ubbatookka loꞌꞌo gidiyogaanne ufayttanaadan maaddiyogaa eta tamaarissa. Yelagata neeni minttettiyo wode, ne ufayttanaagee qoncce.—Maz. 71:18.

12. Isiyaasa 46:4y yootiyogaadan, Yihoowi cimidaageetussi ay oottanawu qaalaa gelidee? (Misiliyakka xeella.)

¹² Minttettuwa demmanawu Yihoowa woossa. Asatettan woy qofan daafuridabadan niyo siyettana danddayees; shin, Yihoowi “daafurenna; woikko wolqqai au wurenna.” (Isi. 40:28) Yihoowi zawi baynna ba wolqqaa waati goꞌettii? I goꞌettiyo issi ogee cimida ammanettidaageeta minttettiyogaa. (Isi. 40:29-31) Yihoowi nena maaddanawu qaalaa geliis. (Isiyaasa 46:4 nabbaba.) Qassi I ba gelido qaalaa ubbatookka polees. (Yaa. 23:14; Isi. 55:10, 11) Neeni woossiyo wode, Yihoowi koshshiyaban nena maaddiyo gishshawu, I nena keehi siiqiyogaa ne akeekananne wozanappe ufayttana.

13. Naaꞌꞌantto Qoronttoosa 4:16-18y yootiyogaadan, nuuni ay hassayana koshshii? (Misiliyakka xeella.)

¹³ Neeni zaarettada yelaganaagaanne payya gidanaagaa hassaya. Nu metoy guutta wodiyassa gidiyogaa hassayikko, kaseegaappe aaruwan genccana danddayoos. Geeshsha Maxaafay ceegatettaynne harggee xayanaagaa yootees. (Iyy. 33:25; Isi. 33:24) Yaaniyo gishshawu, sinttappe neeni awudeegaappenne aaruwan payya, minonne puulanchcha gidanaagaa eriyo gishshawu ufayttana danddayaasa. (2 Qoronttoosa 4:16-18 nabbaba.) Shin harati waati maaddana danddayiyonaa?

HARATI WAATI MAADDANA DANDDAYIYONAA?

14. Cimidaageeta oychchiyogeenne etawu dawaliyogee keehi koshshiyoy aybissee?

¹⁴ Cimida ishatanne michchota oychchiyogaanne etawu dawaliyogaa aggoppa. (Ibr. 13:16) Cimidaageeti boorasana danddayoosona. Cimatettaa gaasuwan sooppe kiyana danddayenna Kamiila giyo ishay hagaadan giis: “Taani maalladoppe omarssi gakkanaashin sooppe kiyana danddayenna gishshawu, hegee tana keehi salettiis. Issi issitoo, dirssa giddon deꞌiya ceega gaammuwa mala gididabadan tawu siyettees. .” Nuuni cimidaageeta oychchiyo wode, eti nuussi koshshiyogaanne nu eta siiqiyogaa eti ammanettanaadan oottoos. Geella, nuuni ubbaykka nu galchchan deꞌiya cimidaageeta oychchanawu woy etawu dawalanawu issi issitoo koyoos; shin nuussi ubbawukka oosoy dariyo gishshawu dogichchoos. Yaatin cimidaageeta oychchiyogaa gujjin, “keehi koshshiyabay aybakko shaakki eranaadan” nuna aybi maaddana danddayii? (Plp. 1:10) Ne galchchan deꞌiya cimidaageetu sunttaa, etawu kiitaa kiittana woy dawalana gallassaa xaafa oyqqiyogee maaddana danddayees. Qassi eta awude oychchanaakko halchchuwa kessana danddayaasa; yaatada he gallassaa dogoppa.

15. Yelagatinne cimidaageeti issippe ay oottana danddayiyonaa?

¹⁵ Neeni yelaga gidikko, cimidaageetuura haasayanabaa woy etaara oottanabaa xeelliyagan hirggana danddayaasa. Shin neeni hirggana bessenna. Yaatiyogaappe, etassi loꞌꞌo lagge gidanawu baaxeta. (Lee. 17:17) Galchchaa shiiquwappe kase woy hegaappe simmin cimidaageetuura haasaya. Geella eti dosiyo xiqiseta woy naatettan eti oottido miichchiyabata yootanaadan oychchana danddayaasa. JW Brodkastingiya nenaara beꞌanaadankka shoobbana danddayaasa. Qassi eti oottana danddayennabaa oottiyogan maaddana danddayaasa. Leemisuwawu, eta silkkee loytti oottanaadan giigissa, qassi ooratta xuufeta etawu dawunloda. Kaarolo giyo michchiya hagaadan gaasu: “Nena ufayssiyabaa cimidaageeti nenaara oottanaadan shoobba. Taani cimidaba gidikkonne, haꞌꞌikka ta deꞌuwan ufayttanawu koyays. Giyaa baada issi issibata shammiyogaa, laggetuura issippe miyogaanne meretaa beꞌiyogaa dosays.” Mayiro giyo michchiya qassi hagaadan gaasu: “Ta laggetuppe issinniyyo layttay 90. A taappe 57 layttaa bayratawusu. Shin nuuni issippe miicciiddi kaaꞌiyonne biiduwa beꞌiyo gishshawu, A taappe hegaa keenaa bayratiyogaa darotoo hassayikke. Qassi nuna metoy gakkiyo wode issoy issuwa zoriya oychchoos.”

16. Cimidaageetussi akkamuwa keeroy deꞌiyo wode neeni etaara biyogee maaddana danddayiyoy aybissee?

¹⁶ Akkamuwa keeroy deꞌiyo wode etaara ba. Neeni hosppitaaliya eta efiyogaa xalaala gidennan, dottoree woy narssee eta maara akkamiyakko, qassi koshshiyagaadan eta maaddiyakkonne kaallanawu etaara takkana danddayaasa. (Isi. 1:17) Dottoree yootiyobaa xaafa oyqqiyogankka cimidaageeta maaddana danddayaasa. Ruuto giyo cima michchiya hagaadan gaasu: “Taani aakime keetta tarkka biyo wode, ta yootiyobaa dottoree darotoo wudidi siyenna. Dottoreti tana, ‘Ne bolli sahoy baa; shin neeni sahettidabadan qoppaasa’ gaana danddayoosona. Shin issi uri tanaara biikko dottoree tana loytti haasayissees. Tanaara aakime keetti biya ishatanne michchota keehi galatays.”

17. Cimidaageetuura ayba ogetun haggaazana danddayay?

¹⁷ Etaara issippe haggaaza. Cimida issotu issotussi sooppe soo biidi haggaazanawu abbee paccana danddayees. Shin geella xuufiya wottiyo gaariya goꞌettidi eti nenaara haggaazanaadan shoobbana danddayaasa. Qassi eti uttidi haggaazana mala oydiya etawu efaana danddayaasa. Woy cimida ishaa neeni xinaatiya shoobbana danddayaasa; ubba qassi A soo baada aara issippe xannaꞌissana danddayaasa. Cimidaageeti haggaazuwa metootennan kiyanaadan galchchaa cimati haggaazo citay eta son shiiqanaadan oottana danddayoosona. Cimidaageeta siiqiyogaanne bonchchiyogaa bessanawu nuuni oottiyo ubbaban Yihoowi ufayttees.—Lee. 3:27; Rom. 12:10.

18. Kaalliya huuphe yohuwan ay beꞌanee?

¹⁸ Ha huuphe yohoy Yihoowi cimidaageeta siiqiyogaanne xoqqu ootti xeelliyogaa nuna hassayissiis. Qassi galchchan deꞌiya ishatinne michchoti ubbaykka eta siiqoosonanne xoqqu ootti xeelloosona! Cimatettay waayissiyaba gidikkonne, Yihoowi maaddin ubbatoo ufayttana danddayeeta. (Maz. 37:25) Qassi intte awudeegaappenne aaruwan ufayttana wodiya yeemuwan naagana danddayeeta! Shin issi issi ishatanne michchota hegaappe dumma metoy gakkees. Eti cimida bantta soo asaappe issuwa, bantta guuttaa naꞌaa woy sahettiya bantta laggiya maaddoosona. Yaatin eti ubbatoo ufayttanawu waatana danddayiyonaa? Hegaa zaaruwa kaalliya huuphe yohuwan beꞌana.