LAAPPUNE 23-29, 2026
MAZAMURE 18 Wozuwa Gishshawu Galatiyogaa
Wozuwa Gishshawu Galatiyogaa Waata Bessana Danddayay?
“Kiristtoosa siiqoy nuna giddees.”—2 QOR. 5:14.
TAMAARANABAA
Wozuwa gishshawu galatiyogaa nuuni ubbay waati bessana danddayiyakko beꞌana.
1-2. Yesuusa wozuwa yarshshoy nuuni ay oottanaadan denttettana bessii, qassi aybissi? (2 Qoronttoosa 5:14, 15) (Misiliyakka xeella.)
POOQEE ne bolli kunddin issi uri nena hegaappe kessidi ashshikko neeyyo aybi siyettanee? Nena ashshido gishshawu, neeni A keehi galataasa, wozanappe nashshiyogaa yootaasa, qassi I oottidobaa mulekka dogakka.
2 Nuuni nu baaxiyan nagaraappenne hayquwappe laꞌa kiyana danddayennaagaa hagaappe kasetiya huuphe yohuwan beꞌida. Shin, Yesuusa wozuwa yarshshoy, (1) nu nagaray atto geetettanaadan, (2) nuuni wottiyobi baynnaageeta gidanaadan, qassi (3) Xoossaara sigettanaadan oottiyogan nuna ashshana danddayees. Hegaappe denddidaagan, Yihoowi ehaana ooratta alamiyan merinawu deꞌiyo hidootay nuussi deꞌees. Yesuusi ba deꞌuwa yarshsho oottidi nuussi immiyogan nuna keehi siiqiyogaa bessiis. Qassi I ha saꞌaa yaanaappe adussa layttaappe kasekka asaa siiqees. (Lee. 8:30, 31) Kiitettida Phawuloosi ‘Kiristtoosa siiqoy nuna giddiyogaa’ yootiis. (2 Qoronttoosa 5:14, 15 nabbaba.) Hegaa giyogee Yesuusi nuna siiqido siiqoy nuuni A galatanaadan denttettana besseesinne I oottidobaa nuuni mule dogana bessenna giyogaa.
Pooqee nu bolli kunddin woy nu laattido nagaraappe nuna ashshidaagaa, nuuni galatana koshshees (Mentto 1-2 xeella)
3. Wozuwa gishshawu galatiyogaa bessiyo ogee issuwagee haraagaappe dummatana danddayiyoy aybissee?
3 Wozuwa gishshawu neeni galatiyogaa waata bessana danddayay? Ne zaaroy haraagaappe dummatana danddayees. Leemisuwawu, heezzu asati issi sohuwa gakkanawu dumma dumma katamaappe denddidosona gaada ane qoppa. Eti he sohuwa gakkanawu dumma dumma ogiyara boosona. Hegaadankka, neeni gakkiyo sohoy woy halchchoy wozuwa gishshawu galatiyogaa bessiyogaa. Shin, neeni galatiyogaa bessiyo ogee haratuugaappe dummatana danddayees. Ha huuphe yohuwan kaallidi deꞌiyageeta xeelliyagan pilggana: (1) Geeshsha Maxaafaa xannaꞌiyageeta, (2) haattan muukettida Kiristtaaneta, qassi (3) Yihoowa wudiyappe haakkida dorssata.
GEESHSHA MAXAAFAA XANNAꞌIYAGEETA
4. Geeshsha Maxaafaa xannaꞌiyageeta xeelliyagan Yihoowawu aybi siyettii?
4 Neeni Geeshsha Maxaafaa xannaꞌiyagaa gidikko hagaa qoppa: Neeni mishiraachchuwa siyanawu koyiyogee Yihoowi banaara dabbotanaadan baakko shiishshiyo asatu giddon neenikka deꞌiyogaa bessees. (Yoh. 6:44; Oos. 13:48) ‘Yihoowi asaa wozanaa paaccees’ woy qorees. Hegaa giyogee Yihoowi neeni abaa tamaaranawu baaxetiyogaa akeekees; qassi I kessido maaraadan deꞌanawu neeni issi issiban laamettiyogaa beꞌidi ufayttees giyogaa. (Lee. 17:3; 27:11) Wozoy neeni Yihoowara dabbotanaadan oottees. (Rom. 5:10, 11) Hegaa mule xaasaya xeelloppa.
5. Piliphphisiyusa 3:16n deꞌiya zoriya Geeshsha Maxaafaa xannaꞌiyageeti waati oosuwan peeshshana danddayiyonaa?
5 Neeni Geeshsha Maxaafaa xannaꞌaydda deꞌiyaba gidikko, wozuwa gishshawu galatiyogaa waata bessana danddayay? Issi ogee, kiitettida Phawuloosi Piliphphisiyusa Kiristtaaneta “nuuni ay keena diccidaba gidikkokka, simi he maaran ubbatoo sinttawu hemettoos” giidi zoridobaa oosuwan peeshshiyogaa. (Plp. 3:16) Hara Geeshsha Maxaafaa birshshettay ha xiqisiya hagaadan gees: “Nuuni haꞌꞌi biyo ogiyan aggennan sinttawu baana bessees.” Yaaniyo gishshawu, merinaa deꞌuwa ogiyan hemettiyogaa aybinne woy ooninne nena digganaadan oottoppa.—Mat. 7:14; Luq. 9:62.
6. Geeshsha Maxaafaa xinaateti issi timirttiya ammananawu woy laamettanawu metootikko waatana danddayiyonaa? (Zaarettido Wogaa 30:11-14) (Misiliyakka xeella.)
6 Mata wode neeni xannaꞌido Geeshsha Maxaafaa timirttiya ammananawu metootikko waatana danddayay? He timirttiyara gayttidaagan gujjada pilgga; qassi hegaa loytta akeekanaadan Yihoowi maaddana mala woossa. (Maz. 86:11) Neeni he timirttiya haꞌꞌikka akeekanawu metootikko, haꞌꞌissawu hegaa aggaaga; shin Geeshsha Maxaafaa xannaꞌiyogaa essoppa. Yihoowa ufayssenna issi issibata oottiyogaa agganawu metootikko waatana danddayay? Nuuni danddayennabaa oottanaadan Yihoowi mule oychchennaagaa hassaya. Yaatiyo gishshawu, I kessido maaraadan neeni deꞌana danddayaasa. (Zaarettido Wogaa 30:11-14 nabbaba.) Yihoowi nena maaddanawu qaalaa geliis. (Isi. 41:10, 13; 1 Qor. 10:13) Yaaniyo gishshawu, hidootaa qanxxoppa. Neeyyo paace gididabaa ubbatoo qoppiyogaa aggada, wozuwa gujjin Yihoowi neeyyo oottido ubbabaa qoppa. Neeni Yihoowa kaseegaappe aaruwan siiqiyo wode, “A azazoti keehi wayssiyabata” gidennaagaa akeekana.—1 Yoh. 5:3.a
Nuuni danddayennabaa oottanaadan Yihoowi mule oychchenna. I kessido maaraadan deꞌanaadan nuna maaddana (Mentto 6 xeella)
7. Tumaa keettan diccida naati ay wotti dentti qoppana danddayiyonaa?
7 Tumaa keettan diccida naatoo, inttebaa shin woygana danddayiyo? Inttekka Geeshsha Maxaafaa xinaateta. Inttena yelidaageetuyyo intte ooppenne aadhdhiya xinaate gidiyogee qoncce. Geeshsha Maxaafay, “Xoossaakko shiiqite, qassi I inttekko shiiqana” yaagees. (Yaq. 4:8; 1 Odi. 28:9) Intte Yihoowakko shiiqanawu maaddiyabata oottiyo wode, ikka inttekko shiiqana. Yihoowi inttena wudidi xeelliyoy intte A dabbo gidanaadan I koyiyo gishshaassappe attin, tumaa keettan intte diccido gishsha xallaassa gidenna. Yihoowi intte aara dabbotanaadan ay oottidee? Wozuwa giigissiis; intte hegaa mule xaasayi xeellana koshshenna. (Rom. 5:1, 2) Yaaniyo gishshawu, ha laytti Godaa Kahuwa baalaa bonchchanawu shiiqanaappe kase, Yesuusa hayqoy inttena waati maaddidaakko wotti dentti qoppite. Yaatiyogee Yihoowi giigissido wozuwa gishshawu galatiyogaa bessanawu ayyaanaabaa halchchota kessanaadan inttena denttettana.b
HAATTAN MUUKETTIDA KIRISTTAANETA
8. Haattan muukettida Kiristtaaneti wozuwan ammaniyogaa waati bessidonaa?
8 Neeni haattan muukettida Kiristtaane gidikko, wozuwan ammaniyogaa daro ogetun bessadasa. Leemisuwawu, Yihoowawu mata dabbo gidanawunne I kessido maaraadan deꞌanawu issi issibata oottadasa. Neeni mishiraachchuwa yootiyogan, qassi Yihoowabaanne Yesuusabaa harata tamaarissiyogan Yesuusi azazidobaa oottadasa. Nena Yihoowawu sheedhdhada haattan muukettadasa. Tumu goynuwawu exatido gishshawu nena yedetay gakkidee? (2 Xim. 3:12) Yaanikko, neeni ammanettada gencciyogee Yihoowa ne siiqiyogaanne I giigissido wozuwa nashshiyogaa bessees.—Ibr. 12:2, 3.
9. Haattan muukettida Kiristtaaneti naagettana koshshiyabati awugeetee?
9 Nuuni haattan muukettida Kiristtaaneta gidiyo gishshawu, nu naagettana bessiyabati deꞌiyogaa akeekana koshshees. Nuuni naagettana xayikko, wozuwa nashshiyogaa loddan loddan aggana danddayoos. Hegee waani hanana danddayii? Koyro xeetu layttan Efisoonan deꞌida Kiristtaanetubaa qoppa. Eti darobaa genccido gishshawu Yesuusi eta galatiis. Shin I etawu hagaadan giis: “Neban tana ufayssennabay hagaa: neeni ne koyro siiquwa aggadasa.” (Ajj. 2:3, 4) Yesuusi yootidobay bessiyogaadan issi Kiristtaanee naagettana xayikko, shaahettida wozanan goynniyogaa doommana danddayees. Hegaa mala uri coo meeziyan woossana, shiiqota shiiqananne haggaazana danddayees. Shin he uri hegaa oottiyoy siiqoy denttettiina gidenna. Neeni Yihoowa siiqiyo siiqoy kaseegaadan mino gidennaagaa akeekikko, waatana danddayay?
10. Neeni Yihoowa oosota oottiyo wode ‘yuushsha qoppiyagaanne tishsha’ gidanawu waatana danddayay? (1 Ximootiyosa 4:13, 15)
10 Ximootiyosi Yihoowa oosota oottiyo wode ‘yuushshi qoppiyagaanne tishsha’ gidanaadan kiitettida Phawuloosi zoriis. (1 Ximootiyosa 4:13, 15 nabbaba.) Neenikka Yihoowayyo ubbatoo minnada oottanawu waatana danddayiyakko qoppa. (Rom. 12:11) Leemisuwawu, galchchaa shiiqotuyyo neeni loytta giigettiyogan shiiqota kaseegaappe aaruwan wudada kaallana danddayaasa. Woy neeni buzo xinaatiya xannaꞌiyo wode xannaꞌidobaa wotta dentta qoppanawu injjetiya sohuwa dooriyogan hegaappe loytta goꞌettana danddayaasa. Tamay tololattidi eexxanaadan mittaa gujjiyogaadan, neeni wozuwanne Yihoowi neessi oottido hara ubbabaa gishshawu galatiyogaa bessanawu hageeta ubbatoo oottana koshshees. Qassi Godaa Kahuwa baalaappe kasetiya saaminttatun, neeni Yihoowa Markka gidiyo gishshawu demmido dumma anjjota wotta dentta qoppa. Hegaadan oottiyogee neeni Yihoowara dabbotanaadan oottida wozuwa gishshawu, kaseegaappe aaruwan A galatanaadan nena maaddana.
11-12. Yihoowawu minna haggaaziyogaa guutta wodiyawu aggadasa giyogee I ba ayyaanaa neeyyo immiyogaa aggiis giyogee? Qonccissa. (Misiliyakka xeella.)
11 Yihoowawu kaseegaadan minnada oottiyogaa guutta wodiyawu aggidabadan neeyyo siyettikko, hidootaa qanxxoppa woy Yihoowi ba ayyaanaa neeyyo immiyogaa aggiis gaada qoppoppa. Kiitettida Phawuloosi ba haggaazuwa xeelliyagan Qoronttoosa Kiristtaanetussi xaafidobaa hassaya. I hagaadan giis: “Taani koyennan oottiyakkokka, Xoossay tawu ha oosuwa hadaraa immiis.” (1 Qor. 9:17) Nuuni appe ay tamaarana danddayiyo?
12 Phawuloosi issi issitoo sabbakanawu koyibeenna. Shin hegaadan awu siyettiyo wodetunkka, I ubbatoo haggaazanawu murttiis. Neenikka hegaadan murttana danddayaasa. Neeyyo koshshay baynna wodekka suurebaa oottanawu murtta. Yaaniyo gishshawu, “koshshaanne oottanawu wolqqaa” neeyyo immanaadan woossa. (Plp. 2:13) Yihoowakko shiiqada deꞌanaadan maaddiyabata oottiyogaa aggoppa. Yaatikko, neeni amarida wodiyappe simmin, Yihoowa kaseegaadan mintta siiqanaagaanne ayyo loytta oottanaagaa ammanettana danddayaasa.
Neeyyo issi issitoo koshshay xayiyo wodekka Yihoowakko shiiqada deꞌanaadan maaddiyabata ootta (Mentto 11-12 xeella)
13. Nuuni “ammanuwan deꞌiyakkonne” ubbatoo nuna waati paaccana danddayiyo?
13 Nuuni 2 Qoronttoosa 13:5n deꞌiya maaraadan, issi issitoo nuna qoriyogee loꞌꞌo: “Intte ammanuwan deꞌiyakkonne ubbatoo paaccite; intte ay mala asakko eranawu ubbatoo inttena paaccite.” Leemisuwawu, neeni nena hagaadan oychchana danddayaasa: ‘Taani ta deꞌuwan Xoossaa Kawotettaabaa kaseyiyanaa?’ (Mat. 6:33) ‘Taani allaxxanawu dooriyobay iitaa ixxiyogaa bessii?’ (Maz. 97:10) ‘Taani galchchan sarotettaynne issippetettay deꞌanaadan maaddiyabaa haasayanawunne oottanawu baaxetiyanaa?’ (Efi. 4:2, 3) Godaa Kahuwa baalaa wodee Yihoowi giigissido wozuwabaa wotti dentti qoppanaadan, qassi nuuni nuna qoranaadaaninne nuussi gidennan, Kiristtoosawu deꞌiyakko shaakki eranaadan maaddiya loꞌꞌo wode.
YIHOOWA WUDIYAPPE HAAKKIDA DORSSATA
14. Issi issi Kiristtaaneti Yihoowa wudiyappe haakkanaadan oottiyabay ayba gidana danddayii?
14 Issi issi Kiristtaaneti amarida aginatussi woy ubba daro layttawu Yihoowawu ammanettidi haggaazi simmidi, galchchaara shiiqiyogaa aggidosona. Aybissi? Issoti issoti ‘deꞌuwassi koshshiyabawu hirggiyo’ gishshawu, hidootaa qanxxidosona. (Luq. 21:34) Harati galchchan deꞌiya issi uri haasayidoban woy oottidoban xubettidosona. (Yaq. 3:2) Harati qassi gita nagaraa oottidi maaduwa oychchanawu yayyidosona. Gaasoy aybanne gidin, neeni Yihoowa wudiyappe haakkidaba gidikko, ay oottana danddayay? Yihoowi siiquwan giigissido wozoy neeni ay oottanaadan denttettana danddayii?
15. Wudiyappe haakkida dorssatussi Yihoowi qoppiyogaa waati bessii? (Hizqqeela 34:11, 12, 16)
15 Wudiyappe haakkida dorssata xeelliyagan Yihoowawu aybi siyettiyakko qoppa. Yihoowi eta sheneho geenna. I bayida dorssata koyees. I etawu koshshiyaba kunttees; qassi baakko simmanaadan eta maaddees. (Hizqqeela 34:11, 12, 16 nabbaba.) Yihoowi neessikka hegaadan oottana danddayii? Ee! Neeni ha huuphe yohuwa nabbabiyogee ne haꞌꞌikka A ufayssanawu koyiyogaa bessees. Yihoowi ne wozanaa beꞌidi tumaakko nena ehiidoogaadan, haꞌꞌikka neeni akko simmanaadan oottana danddayees.
16. Bayida dorssati Yihoowakko simmanaadan aybi maaddana danddayii? (Misiliyakka xeella.)
16 Yihoowakko Simma giya brooshuree kaallidi deꞌiya minttettiya qofaa yootees: “Neeni akko simmiyo wode, Yihoowi nena maaddanaagaa ammanetta. Nena unꞌꞌissiyabaa genccanaadaaninne qohidabaa giigissanaadan, qassi qumꞌꞌenna kahaa demmada ufayttanaadaaninne woppu gaanaadan Yihoowi maaddana. Yaatin, neeni hara Yihoowa Markkatuura kaseegaadan Yihoowayyo oottanawu koyana.” Cimatikka nena maaddanawu keehi koyiyogaa hassaya. Eti neeyyo ‘carkkuwaappe geemmiyonne gotiyaappe baqatiyo soho’ mala gidana. (Isi. 32:2) Wozuwa gishshawu galatiyogaa bessanawu nena hagaadan oychcha: ‘Yihoowakko simmanawu haꞌꞌi ay oottana danddayiyanaa?’ (Isi. 1:18; 1 Phe. 2:25) Leemisuwawu, Shiiquwa Addaraashaa baada shiiqana danddayay? Neeni Yihoowakko simmanawu maaduwa koyiyogaa issi cimawu yootana danddayay? Yaatikko, amarida wodiyawu issi uri nena Geeshsha Maxaafaa xannaꞌissanaadan I hanotaa giigissana danddayees. Neeni wozuwa gishshawu galatiyogaa bessanawu wozanappe baaxetiyogaa Yihoowi anjjanaagaa ammanettana danddayaasa.
Nena hagaadan oychcha: ‘Yihoowakko simmanawu haꞌꞌi ay oottana danddayiyanaa?’ (Mentto 16 xeella)
NEENI AY OOTTANA KOSHSHII?
17-18. Ha laytti Godaa Kahuwa baalaa bonchchanaappe kase nuuni nu wodiya akeekan waati goꞌettana danddayiyo?
17 Yihoowi wozuwa giigissidoy A “Naꞌaa ammaniya ubbay merinaa deꞌuwa demmanaappe attin, xayenna mala” gidiyogaa Yesuusi yootiis. (Yoh. 3:16) Wozoy Yihoowi nuna nagaraappenne hayquwappe laꞌa kessanawu giigissidoba. Nuuppe ooninne hegaa xaasayi xeellana koshshenna. (Rom. 3:23, 24; 2 Qor. 6:1) Godaa Kahuwa baalaa bonchchanaappe kasetiya gallassatun, Yihoowinne Yesuusi bessido siiquwabaa wotta dentta qoppa. Hegee eti bessido siiquwa gishshawu galatanaadan nuna denttettana.
18 Wozuwa gishshawu neeni galatiyogaa waata bessana danddayay? Ne zaaroy haraagaappe dummatana danddayees. Shin neenikka ‘banttawu hayqqidaagawu deꞌanaappe attin, banttawu deꞌiyogaa aggida’ kumetta saꞌan deꞌiya miilooniyan qoodettiya ishanttunne michchonttugaadan baaxetiyo baaxiya Yihoowi anjjanaagaa ammanettana danddayaasa.—2 Qor. 5:15.
MAZAMURE 14 Saꞌaa Ooratta Kawuwa Sabbiyogaa
a Neeni Geeshsha Maxaafaappe tamaaridobaa oosuwan peeshshanaadan maaddana mala Merinawu Ufayttada Deꞌa! giyo maxaafan timirtte ubbaa wurssettan deꞌiya “Halchchanabaa” giya saaxiniya goꞌetta.
b Ayyaanaaban ne waana diccana danddayiyakko maaddiya qofaa demmanawu, Tisaase 2017 Wochchiyo Keelan “Yelagatoo—‘Intte Atotettaa Polanau’ Ubbatoo Baaxetite” giya huuphe yohuwa beꞌa.