Tumaa Kehatettan Yoota

1. Yihoowa so asaa yara gidanawu nuuni ay oottana bessii?

NUUNI nu mala Kiristtaanetuura koyro gayttiyo wode “tumaa waata siyadii?” giidi darotoo issoy issuwa oychchoos. Amaridaageeti “tumaa keettan diccaas” giidi zaaroosona. Harati qassi “tumaa keettaa mati yaas” giidi zaarana danddayoosona. Nuuni hegaadan giidi zaariyoy Xoossaa Qaalan deꞌiya tumay nu deꞌuwa muleera laammido gishshataassa. Ayssi giikko, nuuni Yihoowa so asaa yara gidanawu tumaa siiqananne hegaa oosuwan peeshshana koshshiyogaa eroos. Yaatanawu nuuni haasayiyobaaninne oottiyoban tumanchcha gidana koshshees.—Maz. 15:1-3.

2. (a) Yesuusi aybin erettii? (b) Yesuusi tamaarissido tumay asay waananaadan oottidee?

² Yesuusi haasayido ubbabaykka tuma. A morkketi I yootidobaa dosana xayikkonne, I tumaa haasayiyogaa yootidosona. (Mat. 22:16) Yesuusi tamaarissiyo tumay asay waananaadan oottanaakko bana kaalliyageetuyyo yootiis; I hagaadan giis: “Ta gaasuwan naꞌay ba aawaara, naꞌiya ba aayeera, qassi naꞌaa machchiya ba bolloteera, eti issoy issuwara ooyettana mala yaas.” (Mat. 10:35) Yesuusi inne A kaalliyageeti yootiyo mishiraachchuwa asay eqettanaadan koyibeennaba gidikkonne, hegee hananaagaa I erees. (Mat. 23:37) Yesuusi yootiyo mishiraachchuwa amaridaageeti dosana, harati qassi ixxana.—2 Tas. 2:9-11.

3. Nuuni ha huuphe yohuwan ay beꞌanee?

³ Nuuni tumaa haasayiyogaa gaasuwan asay nuna dosenna wodekka, Yesuusaagaadan ubbatoo tumanchcha gidanawu baaxetoos. Qassi nu yootiyobay amaridaageeta yiilloyana danddayikkonne, Geeshsha Maxaafaa tumaa haratussi yootoosinne eta tamaarissoos. Hegaa giyogee nuuni tumaa awude woy waatidi yootanaakko qoppana koshshenna giyogee? Akkay! Ha huuphe yohuwan koyro, tumaa awuppe demmana danddayiyo? giya keehi koshshiya oyshaa zaaruwa beꞌana. Yaatidi, nuuni haratussi tumaa aybissi, waatidi, qassi awude yootana koshshiyakko pilggana. Ha oyshatu zaaroy nuuni tumaa haratussi kehatettan, woykko hiillaaninne bessiya wodiyan kaseegaappe aaruwan loytti yootanaadan nuna maaddana.

TUMAA AWUPPE DEMMANA DANDDAYIYO?

4. Nuuni Yihoowi tumawu Pultto giyoy aybissee?

⁴ Yihoowi tumawu Pultto. I yootiyo ubbabaykka tuma. Leemisuwawu, likkebaanne likke gidennabaa xeelliyagan I yootiyobay tuma. (Maz. 19:9; 119:142, 151) Sinttanaa xeelliyagan I yootido ubbabay polettees. (Isi. 55:10, 11) I ba gelido qaalaa polennan mule aggenna. (Qoo. 23:19) Ayssi giikko, Yihoowi worddotana danddayenna! (Ibr. 6:18) Yaaniyo gishshawu, Yihoowi ‘tumaa Xoossaa’ geetettidoy aybissakko nuuni metootennan akeekana danddayoos.—Maz. 31:5.

5. Xoossaa eriyogee wayissiyaba gidennay aybissee? Qonccissa. (Oosuwa 17:27)

⁵ Daro asay Yihoowi baawa, qassi I deꞌiyakkokka A eriyogee wayissiyaba gees. Shin hegee bala. Merettida ubbabay Xoossay deꞌiyogaa bessees. (Rom. 1:20) Kiitettida Phawuloosi Ateenan deꞌiya Giriike eranchchatuura haasayido wode, ‘Xoossay nuuni A demmanaadan koyiyogaanne nuussi ubbaassi matan’ deꞌiyogaa yootiis. (Oosuwa 17:27 nabbaba.) Yihoowi tumaa eranawu koyiya ashkke asata baakko shiishshiyogee qoncce.—Yoh. 6:44.

6. (a) Geeshsha Maxaafan deꞌiya tumatuppe amaridaageeti awugeetee? (b) He tumata erido gishshawu neeni galatiyoy aybissee?

⁶ Nuuni Yihoowabaa erana danddayiyo issi ogee Geeshsha Maxaafaa xannaꞌiyogaa. Geeshsha Maxaafaa xaafida attuma asata Xoossaa ayyaanay kaalettiis. (2 Phe. 1:20, 21) Yaaniyo gishshawu, Geeshsha Maxaafan deꞌiya ubbabay tuma; qassi nuuni hegan ammanettana danddayoos. Leemisuwawu, saloy saꞌay waani merettidaakko, qassi saꞌan deꞌoy waani doommidaakko I yootiyobaa nuuni ammanettana danddayoos. (Doo. 1:1, 26) Nuuni ubbay nagaranchcha gidido gaasuwa, qassi waayeenne hayqoy daridoy aybissakko I yootiyobaa ammanana danddayoos. (Rom. 5:12; 6:23) ‘Wordduwawu aawa’ gidida Seexaanay gattido qoho ubbaa Yihoowi ba Naꞌaa baggaara muleera xayssanawu yootidoogaa ammanettana danddayoos. (Yoh. 8:44; Rom. 16:20) Qassi Yesuusi iitata xayssanaagaa, hayqqidaageeta denttanaagaa, saꞌaa gannate oottanaagaanne nuuni wottiyobi baynnaageeta gidanaadan I maaddanaagaa xeelliyagan Geeshsha Maxaafay yootiyo hidootankka ammanettana danddayoos. (Yoh. 11:25, 26; 1 Yoh. 3:8) Yihoowi nuussi keehi gita maataa immiis! I nuna tumaa tamaarissiis; qassi hegaa harata tamaarissiyo aawatettaa nuussi immiis.—Mat. 28:19, 20.

NUUNI TUMAA YOOTANA KOSHSHIYOY AYBISSEE?

7-8. Tumaa haratussi yootanaadan nuna denttettiyabay ayba gidana koshshii? Leemisuwa yoota. (Marqqoosa 3:11, 12) (Misiliyakka xeella.)

⁷ Qommoora denttidoogaadan, nuuni Yihoowa so asaa yara gidana koyikko tumaa haasayana bessees. Shin, A ufayssanawu tumaa haasayiyogaappekka aarobaa oottana koshshees. Hegaa gishshawu, nuuni tumaa haasayiyoy aybissakko Yihoowi xoqqu ootti xeellees. Yesuusi saꞌan haggaaziyo wode aybi hanidaakko beꞌa. (Marqqoosa 3:11, 12 nabbaba.) Yesuusi Galiilaa abbaa matan sabbakiyo wode, daro asay akko yiis. Etappe amaridaageeta daydanttati oyqqido gishshawu, Yesuusa sinttan kunddidi, “Neeni Xoossaa Naꞌaa” yaagidi waassidosona. Daydanttati Yesuusabaa tumaa haasayidoy aybissee? Eti giidobaa siyida asati eta ammananaadaaninne guyyeppe Yihoowawu haggaaziyogaa agganaadan eti koyido gishshataassa. Daydanttati haasayidobay tuma gidikkonne, eti bantta xallaa siiqiyo gishshawu hegaa haasayidosona. Eti Yesuusa cimmanawu woy ufayssanawu danddayokkona. Ayssi giikko, Yesuusi daydanttati abaa markkattennaadan azaziis.

⁸ Ha taarikiyappe nuuni ay tamaarana danddayiyo? Tumaa yootanaadan nuna denttettidabaa Yihoowi xoqqu ootti xeellees. Yaaniyo gishshawu, tumaa haratussi yootanaadan nuna denttettida gaasoy Yihoowa siiqiyogaa gidana bessees; qassi bonchcho ubbaa Yihoowassi immana koshsheesippe attin nuussi ekkana koshshenna!—Mat. 5:16; Oosuwa 14:12-15ra gatta xeella.

9. Nuuni waatennaadan naagettana koshshii, qassi aybissi?

⁹ Nuuni nuussi bonchchuwa ekkanawu koyennaadan naagettana bessiyogaa qonccissiya hara hanotaa ane beꞌoos. Leemisuwawu, issi galchchaa cimay nuussi xuurabaa yootin, hegaa haratussi yootida giidi ane qoppoos. Nu yootido asati hegee tuma gidiyogaa akeekidi nuuni hegaa eridoogan malaalettananne nu ubbatookka xuura gididabaa eriyabadan eti qoppana danddayoosona. Hegee asaa malaalissana danddayees; shin Xoossay hegan ufayttenna. (Lee. 11:13) Ayssi giikko, nu yootidobay tuma gidikkonne, hegaa yootiyo maati nuuyyo baawa; qassi nu yootanaadan nuna denttettida gaasoy bala.

NUUNI TUMAA WAATI YOOTANA KOSHSHII?

10. “Kehabaa” haasayiyogaa giyogee woygiyogee? (Qolasiyasa 4:6)

¹⁰ Qolasiyasa 4:6 nabbaba. Kiitettida Phawuloosi Qolasiyasan deꞌiya Kiristtaaneti ‘ubbatoo kehabaa haasayanaadan’ eta hassayissiis. Hegaa giyogee woygiyogee? Hagan odettida Giriiketto qaalay nuuni harata goꞌꞌiyabaa haasayana koshshiyogaa xalla gidennan, kehanne ufayssiya ogiyan haasayana bessiyogaa qonccissees.

11-12. Nuuni harata tumaa tamaarissiyo wode naagettana koshshiyoy aybissee? Leemisuwa yoota. (Misiliyakka xeella.)

¹¹ Nuuni harata tumaa tamaarissiyo wode, kehabaa haasayanaadan Phawuloosi zoridobaa oosuwan peeshshana koshshees. Geeshsha Maxaafan deꞌiya tumati shemppuwanne ayyaanaa shaakkana danddayiya qara mashshan leemisettidosona. Hegaa giyogee tumuppe nuussi siyettiyabaanne nu koshshaa qonccissana danddayoosona giyogaa. (Ibr. 4:12) Shin, nuuni Geeshsha Maxaafaa hiillan goꞌettennaba gidikko, asay yiillotanaadan woy nunaara palamettanaadan oottana danddayoos. Hegee waani hanana danddayii?

¹² Ane ha hanotaa qoppa. Leemisuwawu, misiletukko ubbatoo woossiyanne ba soo asaara Ufayssa Masqqalaa bonchchiya issi ashkke ura haggaazuwan demmida gaada qoppa. Misileta woossiyogee eeyyatetta gidiyogaanne Ufayssa Masqqalay eeqa goynuwappe yiidoogaa Geeshsha Maxaafaappe he bitaniya bessana danddayoos. (Isi. 44:14-20; 2 Qor. 6:14-17) Nuuni koyro A haasayissido wode hegaadan oottikko, nu yootidobay tuma gidana danddayees, shin Xoossaa Qaalaa hiillan goꞌettibookko.

13. Nu haasayiyobaa maxiniya yeggido qumaadan waati malꞌꞌettana danddayiyo?

¹³ Nuuni haasayiyobay maxiniya yeggido qumaadan malꞌꞌiyagaa gidana koshshiyogaa Phawuloosi yootiis. Hegaa giyogee nuuni tumaa bala ogiyan yootanawu woy genttanawu malana koshshenna giyogaa. Shin nu yootiyobaa siyiyageetuyyo Geeshsha Maxaafaa tumaa ufayssiya ogiyan yootanawu nu haasayay ‘malꞌꞌiyagaa’ gidanaadan I nuna minttettiis. (Iyy. 12:11) Yaatiyogee metiyaba gidana danddayees. Nuna malꞌꞌiya qumay haratakka malꞌꞌana giidi qoppana danddayoos. Hegaadankka, nu haasayissiyo ogee ubba asaakka ufayssana giidi qoppana danddayoos. Shin hegee ubba asaa ufayssana danddayeenna. Leemisuwawu, issi issi wogatun diccidaageeti banttappe bayratiyageetuura haasayiyo wodekka, bantta qofaa aynne yayyennan qonccissana danddayoosona. Shin hara wogatun diccidaageeti hegaa mala haasayaa likke gidennabadan, ubba qassi yiilloyiyabadan qoppana danddayoosona. Phawuloosi nuuni “asa ubbawu waati zaaranaakko” erana koshshiyogaa yootiis. Hegaa giyogee nuna ufayssiya ogiyan woy nu wogaadan gidennan, nu yootiyobaa siyiyageeta ufayssiya ogiyan haasayana koshshees giyogaa.

NUUNI TUMAA AWUDE YOOTANA KOSHSHII?

14. Yesuusi saꞌan deꞌiyo wode I eriyo ubbabaa bana kaalliyageeta tamaarissidee? Qonccissa.

¹⁴ Yesuusi bana kaalliyageeta ubbatoo kehatettan haasayissiisinne eta darobaa tamaarissiis. (Mar. 6:34) Shin eti haꞌꞌikka tamaarana koshshiya darobay deꞌees. Yesuusi ba eriyo ubbabaa eta tamaarissibeenna. I eti danddayennabay deꞌiyogaa akeekiis. I hegee issi issi tumata tamaarana danddayiyo wode gidennaagaa eriis. I eti he tumata he wode akeekana danddayennaagaa yootiis. (Yoh. 16:12) Nuuni hegaappe ay tamaariyo?

15. Nu eriyo ubbabaa nu xinaateta issi kuntti tamaarissana koshshii? Qonccissa. (Leemiso 25:11) (Misiliyakka xeella.)

¹⁵ Yesuusa leemisoy bessiyogaadan nuuni eriyo tumaa ubbaa issi kutti tamaarissana koshshees giyogaa gidenna. Nuuni Yesuusa leemisuwa waati kaallana danddayiyo? Nuuni asaa hanotaa akeekana bessees. Ba soo asaara Ufayssa Masqqalaa bonchchiyogan ufayttiya bitaniyabaa ane zaarettada qoppa. He baalatussi denddoy eeqa goynuwa gidiyogaanne eti Xoossaa ufayssennaageeta gidiyogaa eroos. Shin Ufayssa Masqqalaa bonchchanawu issi woy naaꞌꞌu saaminttay attidaashin he bitaniya Geeshsha Maxaafaa xannaꞌissiyogaa doommadasa gaada ane qoppa. Nuuni he baalatuyyo denddoy eeqa goyno gidiyogaa Geeshsha Maxaafaappe A bessiyaba gidikko, woy Ufayssa Masqqalaa bonchchiyogaa I sohuwara aggana koshshees giidi nuuni qoppikko, kehatettan haasayissida giyogaa gidenna. Issi issi xinaateti Geeshsha Maxaafaappe tamaarido ubbabaa sohuwara oosuwan peeshshana danddayiyogee tuma. Shin, harati qoppiyobaaninne oottiyoban laamettanawu daro wodee koshshees. Nu xinaateti erana koshshiyabaa bessiya wodiyan woy eti akeekana danddayiyo wodiyan nuuni yootiyaba gidikko, koshshiyaban eti laamettanaadan maaddana danddayoos.—Leemiso 25:11 nabbaba.

16. Nu xinaateti ‘tumaa ogiyan hemettanaadan’ waati maaddana danddayiyo?

¹⁶ Harati Yihoowabaa eranaadan maaddiyogaa keena ufayssiyabi keehi guutta. Nuuni kaallidi deꞌiyageeta oottiyaba gidikko, eti “tumaa ogiyan hemettiyogaa” aggennaadan maaddana danddayoos: Ubbatoo etawu loꞌꞌo leemiso gida. (3 Yoh. 3, 4) Geeshsha Maxaafan odettida, Xoossay qaalaa gelidobati polettanaagaa ammaniyogaa ne deꞌuwan bessa. Neeni suurebaa qoppada tumaa haratussi yoota. Harata tumaa tamaarissiyo wode ufayssiyanne minttettiya qaalaa goꞌettiyogan kehabaa haasaya. Qassi neeni oottiyoban Yihoowi sabettanaadan ootta. Yaatiyo wode, tumaa Xoossaa Yihoowawu goynniyogaa bessaasa.