LAAPPUNE 16-22, 2026
MAZAMURE 20 Ne Alꞌꞌo Naꞌaa Immadasa
Wozoy Nuussi Koshshiyoy Aybissee?
“Tana ha hayquwawu efiya asatettaappe ashshanay oonee?”—ROM. 7:24.
TAMAARANABAA
Wozoy nu nagaray atto geetettanaadan, nuuni wottiyobi baynnaageeta gidanaadaaninne Xoossaara sigettanaadan waati maaddiyakko beꞌana.
1-2. Ashshiyagee nuussi koshshiyoy aybissee? (Roome 7:22-24) (Misiliyakka xeella.)
ISSI hanotaa beꞌa. Issi bitanee son deꞌishin pooqee A bolli kunddiis. I paxa deꞌikkonne, hara asi maaddennan hegaappe kiyana danddayenna. I oottana danddayiyobay maaduwawu waassiyogaanne hara asi yiidi ashshana danddayees giidi hidootiyogaa xalaala.
2 Nu ubbaa hanotaykka hegaara issi mala. Ayba ogiyan? Addaamee Yihoowa bolli makkalido wode nagaranchcha gidiis. Guyyeppe, nu ubbaykka A zare gidiyo gishshawu nagaranchcha gidida. Hegaappe denddidaagan, nuuni ubbaykka laattido nagaran oyqettida; qassi hegaappe nurkka laꞌa kiyana danddayokko. Kiitettida Phawuloosi Roomen deꞌiya Kiristtaanetussi xaafido dabddaabbiyan nagaray nuna ubbaakka omooddidoogaa yootiis. (Roome 7:22-24 nabbaba.) I, “Tana ha hayquwawu efiya asatettaappe ashshanay oonee?” giidi oychchiis. Phawuloosi nagaraa laattido gishshawu hayquwappe attennaagee qoncce. (Rom. 6:23) Nuunikka hegaa mala iita hanotan deꞌoos. Ashshiyagee nuussikka koshshees!
Pooqee A bolli kunddin kiyana danddayibeenna bitaniyagaadan, nuunikka laattido nagaraappe laꞌa kiyana danddayenna gishshawu ashshiyagee nuussi koshshees (Mentto 1-2 xeella)
3. Wozoy nuna ashshana danddayiyo ogeti awugeetee?
3 Phawuloosi nagaraa xeelliyagan iitabaa haasayidi aggiigibeenna. I, “Tana ha hayquwawu efiya asatettaappe ashshanay oonee?” gi oychchi simmidi, hagaadan giis: “Nu Godaa Yesuus Kiristtoosa baggaara tana ashshiya Xoossawu galatay gido!” (Rom. 7:25) Phawuloosi ha xiqisiyan Yesuusa wozuwa yarshshuwabaa yootiiddi deꞌees. Wozoy, (1) nu nagaray atto geetettanaadan, (2) nuuni wottiyobi baynnaageeta gidanaadan, qassi (3) Xoossaara sigettanaadan oottiyogan nuna ashshana danddayees. Nuuni hageeta pilggiyo wode, “hidootaa immiya” Xoossaa Yihoowa kaseegaappe aaruwan siiqana. (Rom. 15:13) Qassi “nuuni A baggaara wozettidi laꞌa” kiyido Yesuusakka kaseegaappe aaruwan nashshana.—Qol. 1:14.
WOZOY NU NAGARAY ATTO GEETETTANAADAN OOTTEES
4-5. Nuussi ubbawu wozoy koshshiyoy aybissee? (Eranchchaa 7:20)
4 Nu nagaray atto geetettanaadan wozoy nuussi koshshees. Nuuni ubbay oottiyoban woy haasayiyoban nagaraa oottoos. (Eranchchaa 7:20 nabbaba.) Issi issi nagaray keehi gita. Leemisuwawu, Muuse Higgee issi Israaꞌeela uri shaaramuxiyaba woy asa woriyaba gidikko, I hayqqana koshshiyogaa yootees. (Wog. 20:10; Qoo. 35:30, 31) Shin daro nagaray hegaa keena gita gidana xayikkonne, nagara. Leemisuwawu, mazamuraawee Daawiti hagaadan giis: “Ta inxxarssan nagara oottennaadan, ta ogiyaa naagana.” (Maz. 39:1) Issi issitoo nuuni haasayiyobaykka nagara gidana danddayees.—Yaq. 3:2.
5 Neeni kase haasayidobatanne oottidobata ane qoppa. Neeni haratu bolli bessennabaa haasaya simmada, haasayennan aggarkkinaashsha ga eray? Neeni oottido balan zilꞌꞌetta eray? Ha naaꞌꞌu oyshatussikka neeni ee gaada zaaridoogee qoncce. Geeshsha Maxaafay hagaadan gees: “Nuuni, ‘Nunan nagari baawa’ giikko, nuna cimmoos, qassi tumay nunan baawa.”—1 Yoh. 1:8.
6-7. Yihoowi nu nagaray atto geetettanaadan ay oottidee? (Misiliyakka xeella.)
6 Wozoy nu nagaraa Yihoowi atto gaanaadan oottees. (Efi. 1:7) Shin, wozuwa baggaara Yihoowi nu nagaraa atto gees giyogee, nuuni nagaraa oottikko I hegaa xaasayi xeellees giyogaa gidenna. Nuuni nagaraa oottanaadan Yihoowi koyenna. (Isi. 59:2) Yihoowi suure pirddiyo gishshawu, nu nagaraa atto gaanawu issibaa oottana koshshiis.
7 Muuse Higgee Israaꞌeelati bantta nagaray atto geetettanaadan mehiya yarshshota yarshshana koshshiyogaa yootees. (Wog. 4:27-31; 17:11) He mehiya yarshshoti ubbaappe aadhdhiya Yesuusa yarshshuwassinne hegee demissiyo anjjotussi eesho. Yesuusa yarshshoy Yihoowi nu nagaraa atto gaanaadan oottiis. Phawuloosi Qoronttoosan deꞌiya Kiristtaanetussi xaafido dabddaabbee I Yesuusa yarshshoy demissiyo goꞌꞌaa akeekidoogaa bessees. I eti kase oottido nagaraa yooti simmidi etawu hagaadan giis: “[Intte] Godaa Yesuus Kiristtoosa sunttaaninne nu Xoossaa ayyaanan geeyideta, Xoossawu dummatideta, qassi xillo geetettideta.”—1 Qor. 6:9-11.
Nagaray atto geetettanaadan yarshshiyo mehiya yarshshoy Yesuusa wozuwa yarshshuwassinne hegee demissiyo anjjotussi eesho (Mentto 6-7 xeella)
8. Ha laytti Godaa Kahuwa baalaa bonchchanawu giigettiyo wode neeni ay qoppana danddayay?
8 Neeni ha laytti Godaa Kahuwa baalaa bonchchanawu giigettiyo wode, Yihoowi neessi atto giidoogan neeni ay keena goꞌettidaakko wodiya bazzada wotta dentta qoppa. Leemisuwawu, wozuwa gaasuwan neeni zilꞌꞌettada laamettaychchido kase oottido nagarawu nena mooranchchadan xeellana woy hidootaa qanxxana koshshenna. Hegee atto geetettidoogaa neeni ammananawu metootikko shin? Geella hagaadan gaana danddayaasa: ‘Yihoowi tawu atto gaana danddayiyogaa erays; shin taani tawu atto gaana danddayikke.’ Neessi hegaadan siyettikko hagaa hassaya: Nuussi atto gaana danddayiyay Yihoowa; qassi I nu bolli pirddanaadan ba Naꞌawu maataa immiis. Shin Yihoowi atto giyoy woy geennay oossakko kuuyiyo maataa neeyyo woy hara ay asawunne immibeenna. Geeshsha Maxaafay hagaadan gees: “[Yihoowi] pooꞌuwan deꞌiyogaadan nuuni pooꞌuwan hemettikko, . . . A Naꞌaa Yesuusa suuttay nagara ubbaappe nuna geeshshees.” (1 Yoh. 1:6, 7) Hara Geeshsha Maxaafaa timirttiyadan hageekka tuma gidiyogaa ammanettana danddayoos. Wozuwa gaasuwan Yihoowi nuussi atto gaanawu awu maatay deꞌees; qassi Geeshsha Maxaafay I ‘atto gaanawu’ giigi uttidoogaa yootees.—Maz. 86:5.
WOZOY NUUNI WOTTIYOBI BAYNNAAGEETA GIDANAADAN OOTTEES
9. Geeshsha Maxaafan nagaraa giyo qaalay ay qonccissii? (Mazamure 51:5)
9 Geeshsha Maxaafan “nagaraa” giyo qaalay, nuuni oottiyo balaa xalaala gidennan, yelettiyo wode laattido nagaraakka qonccissees. (Mazamure 51:5 nabbaba.) Nuuni laattido nagaray, issi issitoo iitabaa qoppanaadan nuna oottiyogaa xalaala gidennan, nu bollay Yihoowi nuna koyro medhdhidoogaadan hanennaadan oottees; qassi nuuni sahettoos, cimoosinne hayqqoos. Ayba nagaraanne oottibeenna gacino naatikka sahettiyoy woy ubba hayqqiyoy hegaassa. Qassi iita asaykka loꞌꞌo asaykka waayettiyoynne hayqqiyoy hegaassa gidiyogaa akeekana danddayoos. Addaame zare ubbay nagaraa laattiis.
10. Addaameenne Hewaana nagaraa ootti simmidi waanidonaa?
10 Addaameenne Hewaana nagaraa ootti simmidi waanidaakko qoppa. Nagaray etawu iitabay siyettanaadan oottiis. Addaameenne Hewaana nagaraa ootti simmin sohuwara ‘eta kahay eta qumꞌꞌiyogaa’ doommiis. (Rom. 2:15) Eti balabaa oottidoogaa akeekidosona. Eti bantta kalluwa kammanawunne banttana Medhdhida Xoossaappe qosettanawu qoppidosona. (Doo. 3:7, 8) Addaameenne Hewaana koyro wodiyawu banttana mooranchchadan xeellidosona, unꞌꞌettidosona, woppaa xayidosonanne yeellatidosona. Qassi eti hayqqana gakkanaashin hegaadan hanidosona.—Doo. 3:16-19.
11. Nagaray nuna waati qohii?
11 Nagaray koyro azinaanne machchiyo qohidoogaadan nunakka qohees. Nu nagaraappe denddidaagan nuuni unꞌꞌettoosinne waayettoos. Nuuni nu hanotaa giigissanawu ay keenaa baaxetikkonne nurkka hegaadan oottana danddayokko. Ayssi giikko, Geeshsha Maxaafay, “Meretay ubbay hada deꞌo deꞌiis” yaagees. (Rom. 8:20) Issi asa xalaala gidennan, asa ubbay hegaadan deꞌiis. Leemisuwawu, ha wodiyan kawotettati bantta heeraa loyttanawu, qassi makkalaa, hiyyeesatettaanne olaa xayssanawu banttawu danddayettida keenan baaxetoosona. Shin, eti he metota xayssana danddayibookkona. Wozoy nagaraappe nuna waati ashshana danddayii?
12. Wozoy nuussi ayba hidootay deꞌanaadan oottidee?
12 Wozoy “meretay ubbay musiya bollaa” aylletettaappe laꞌa kiyiyo hidootay deꞌanaadan oottees. (Rom. 8:21) Nuuni gannatiyan wottiyobi baynnaageeta gidiyo wode, mule sahettokko woy unꞌꞌettokko. Qassi mulekka zaarettidi yeellatokko woy hirggokko. Hegaa bollikka, nuussi wozuwa qanxxida “Sarotettaa Halaqay” Yesuusi nuna haarana. Yaatidi asay xayssana danddayibeenna meto ubbaa I xayssana.—Isi. 9:6, 7.
13. Ha laytti Godaa Kahuwa baalaa bonchchanawu giigettiyo wode neeni harabaa ay qoppana danddayay?
13 Nagaraa aylletettaappe laꞌa kiyiyogee nena ay keena maaddanaakko qoppa. Neeni ubba galla xiskkuwappe denddaydda ufayttana; qassi neeni woy ne siiqiyogeeti namisettana, sahettana, woy hayqqana gaada mule hirggennaagaa qoppa. Neeni ha wodiyankka sinttanaa hidootaabaa wodiya bazzada wotta dentta qoppikko, woppu gaana danddayaasa. (Ibr. 6:18, 19) He hidootaabaa neeni ubbatoo qoppiyogee ne ammanuwa minttananne ha wodiyan nena gakkiya ay metuwakka genccanaadan maaddana danddayees. Yihoowi “bana wozanappe koyiyageetuyyo woytuwa immiyagaa gidiyogaa” mintta ammanettana danddayaasa. (Ibr. 11:6) Neeni haꞌꞌi minettana danddayidoynne sinttanaa hidootay neessi deꞌiyoy wozuwappe denddidaagaana.
WOZOY NUUNI XOOSSAARA SIGETTANAADAN OOTTEES
14. Nagaray nuuni Xoossaara dabbotido dabbotaa waati mooridee, qassi aybissi?
14 Addaameenne Hewaana nagaraa oottido gishshawu asay Xoossaappe haakkiis. Qassi asay Xoossaara morkkettidoogaakka Geeshsha Maxaafay yootees. (Rom. 8:7, 8; Qol. 1:21) Aybissi? Yihoowi wottiyobi baynnaagaa gidiyo gishshaassanne nagaraa xaasayi xeellana danddayenna gishshataassa. Yihoowabaa Geeshsha Maxaafay hagaadan gees: “Ne aifeti daro geeshsha gidiyo gishshau, iitabaa xeellanau dosokkona.” (Imb. 1:13) Hegaa gishshawu nagaray asay Xoossaappe duuxxanaadan oottiis. Hegee giigana xayikko, ooninne Yihoowara sigettananne dabbotana danddayenna. Wozoy nuuni Xoossaara sigettanaadan oottees.
15. Yesuusa hayqoy asay Xoossaara zaarettidi dabbotanaadan waati oottidee?
15 Yesuusi “nuna Xoossaara sigettanawu nu nagaraa gishshawu [yarshshettidogaa]” Geeshsha Maxaafay yootees. (1 Yoh. 2:2) Yesuusa yarshshoy nuuni Xoossaara sigettanaadan waati maaddidee? Wozoy Yihoowi suure pirddawu kessido maaray polettanaadan oottiis. I asay banaara zaarettidi dabbotanaadan hanotaa giigissiis. (Rom. 3:23-26) Ubba qassi I Kiristtoosi hayqqanaappe kase ammanettidi bawu goynnidaageeta xillodan xeellana danddayees. (Doo. 15:1,6) Aybissi? Yihoowi ba Naꞌay Yesuusi wozuwa qanxxanaagaa keehi ammanettido gishshataassa. (Isi. 46:10) Wozoy asay Xoossaara sigettanaadan oottiis.
16. Ha laytti Godaa Kahuwa baalaa bonchchanawu giigettiyo wode neeni harabaa ay qoppana danddayay? (Misiliyakka xeella.)
16 Neeni Xoossaara sigettidoogan ay keena goꞌettidaakko qoppa. Leemisuwawu, Yesuusi tamaarissidoogaadan Yihoowa ta “Aawawu,” gaada xeesana danddayaasa. (Mat. 6:9) Issi issitoo, neeni Yihoowa ta “Dabbuwa” gaadakka xeesana danddayaasa. Nuuni Yihoowa nu “Aawaa” woy nu “Dabbuwa,” giidi xeesiyo wode, wozanappe A bonchchananne nuna ziqqi oottana koshshees. Ayssi giikko, nuuni nagaranchcha gidiyo gishshawu nu baaxiyan Yihoowakko shiiqana danddayokko. Wozuwappe denddidaagan nuuni Yihoowara dabbotana danddayida. Yihoowi nuna ‘banaara sigettanawu’ ba Naꞌaa aattidi immiis. (Qol. 1:19, 20) Nuuni haꞌꞌi nagaranchcha gidikkonne, Yihoowara dabbotana danddayidoy hegaassa.
Asay zaarettidi Yihoowara dabbotanaadan oottiyay Yesuusa hayquwa xaalaala (Mentto 16 xeella)
WOZOY YIHOOWA MAAROTAA QONCCISSEES
17. Wozoy Yihoowa maarotaa waati qonccissii? (Efisoona 2:4, 5)
17 Wozoy Yihoowa “maarotay gita” gidiyogaa qonccissees. “Nagaran nuuni hayqqi uttidaashinkka I nuuyyo deꞌuwa [immiis].” (Efisoona 2:4, 5 nabbaba.) “Merinaa deꞌuwawu suure xeelay deꞌiyogeeti” laattido nagaran oyqettidoogaanne hegaappe laꞌa kiyana koshshiyogaa akeekiyo gishshawu maaduwawu waassoosona. (Oos. 13:48) Yihoowi eti anne A Naꞌaa Yesuusa eranaadan Kawotettaa mishiraachchuwa baggaara eta maaddees. (Yoh. 17:3) Addaameenne Hewaana nagaraa oottido gishshawu, Xoossaa halchchoy polettenna giidi Seexaanay qoppidaba gidikko keehi baliis.
18. Nuuni wozuwa qoppiyo wode ay hassayana koshshii?
18 Wozoy demissido goꞌꞌaa nuuni wotti dentti qoppiyo wode, Yihoowi wozuwa nuussi giigissido waanna gaasuwa nu hassayana koshshees. I nuussi wozuwa giigissidoy nuna ashshana xalaalaassa gidennan, hegaappe aarobaa oottanaassa. Wozoy Seexaanay Edene gannatiyan denttido oyshaa Yihoowi zaariyo oge gidiyogaa nu hassayana koshshees. (Doo. 3:1-5, 15) Yihoowi wozuwa baggaara cashsha ubbaappe ba sunttaa geeshshees. Qassi I siiqo Xoossaa gidiyogaa bessanawu nuna nagaraappenne hayquwappe ashshees. Nuuni nagaranchcha gidikkonne, Seexaanay worddanchcha gidiyogaa nu bessanaadan Yihoowi laggetiyabi baynna ba kehatettan nuussi paqqadiis. (Lee. 27:11) Wozuwa nashshiyogaa waata bessana danddayay? Kaalliya huuphe yohuwan ha oyshaa zaarana.
MAZAMURE 19 Godaa Kahuwa