Gujji Gujji Biya Boorasiya Qohuwa—Geeshsha Maxaafay Woygii?

Kumetta saꞌan mata wode xannaꞌidobaya qonccissiyogaadan, oyddu asaappe issoy boorasees.

• “Layttay ay keenanne gido, woy deꞌiyo sohoy awanne gido, ooninne haratuppe shaahettana danddayees.”—Chido Pemba, Alamiya Payyatettaa Dirijjitiya Deretettaa Duussaa Komishiniya sima kaalettiyagaa.

Daroti qoppiyogaappe dumma hanotan, boorasee cimidaageetu woy asaappe shaahettidi deꞌiyageetu xallaa gidennan, yelagata, payya asata, ubbabay ushachchidoogeetanne eketti gelettidaageetakka qohees. Haratuppe shaahettiyogeenne boorasee issi ura payyatettaanne qofaa keehi qohana danddayees.

• Amarkkaa asaa payyatettaa halaafee, Dottoriya Vivek Murtti, “boorasee coo iitabay siyettiyogaa xalaala gidennaagaa” yootiis. I gujjidi hagaadan giis: “Haratuppe shaahettiyageeti hayqqana danddayiyo hanotay issi gallassan 15 sijaaraa uyiyageeti hayqqana danddayiyo hanotaara issi mala.”

Geeshsha Maxaafay Woygii?

Nuna Medhdhidaagee nuuni haratuppe shaahettanaadan koyenna. Xoossay asay haratuura ubbatoo issippetettan woppu giidi deꞌanaadan koyees.

• Geeshsha Maxaafay yootiyo maaraa: “Xoossai, ‘Bitanee barkka de7iyoogee lo77o gidenna . . .’ yaagiis.”—Doomettaabaa 2:18.

Xoossay nuuni aara dabbotaa minttanaadan koyees. Nuuni akko shiiqanawu baaxetiyo wode, ikka nuukko shiiqanawu qaalaa geliis.—Yaaqooba 4:8.

• Geeshsha Maxaafay yootiyo maaraa: “Ayyaanaabaa saamettiyageeti ufayttoosona; ayssi giikko, saluwa Kawotettay etassa.”—Maatiyosa 5:3.

Xoossay nuuni haratuura issippe awu goynnanaadan koyees. Yaatiyo wode, nuuni keehi ufayttoos.

• Geeshsha Maxaafay yootiyo maaraa: “Issoi issuwaara waani siiqettanaakkonne qassi lo77o oosuwaa waati oottanaakko, issoi issuwau qoppoos. . . . Issippe shiiqiyoogaa aggokko; shin . . . issoi issuwaa minttettoos.”—Ibraawe 10:24, 25.

Boorasiya aggiyogee aybissi maaddiyakko gujjada eranawu, “Cora Asaara Gattiyabati Kumido Alamiyan Boorasiyogaa” giya huuphe yohuwa nabbaba.