Geeshsha Maxaafay Dumma Dumma Qaalaa Haasayiyogaabaa Woygii?
Geeshsha Maxaafay yootiyobaa
‘Dumma dumma qaalaa haasayiyogaa’ geetettidabay beni amarida Kiristtaaneti issi doonaa koyro meezetennan haasayana danddayido malaaliya imotaa bessiyaba. (Oosuwa 10:46) Haasayiyagee yootiyobaa he qaalaa eriya asi akeekees. (Oosuwa 2:4-8) Dumma dumma qaalaa haasayiyogee Xoossay beni Kiristtaanetuppe amaridaageetuyyo geeshsha ayyaanan immido imotatuppe issuwa.—Ibraawe 2:4; 1 Qoronttoosa 12:4, 30.
Dumma dumma qaalaa haasayiyogee doomettidoy awaanee, qassi awudee?
Ha malaaliyabay koyro hanidoy 33 M.Ln, Ayhudatu baalaa Phenxxaqosxxe gallassi maallado Yerusalaameena. He wode 120 gidiya, Yesuusa kaalliyageeti issippe shiiqidaashin “etan ubban geeshsha ayyaanay eelliis; . . . eti dumma dumma qaalaa haasayiyogaa doommidosona.” (Oosuwa 1:15; 2:1-4) “Kumetta saꞌan deꞌiya biitta ubbaappe yiida” cora asati shiiqidosonanne Yesuusa kaalliyageeti “eta qaalan qaalan haasayiyogaa” siyidosona.—Oosuwa 2:5, 6.
Dumma dumma qaalaa haasayido gaasoy aybee?
Xoossay Kiristtaaneta maaddiyogaa bessanaassa. Xoossay beni Muuse mala ammanettida asata maaddiyogaa bessanawu malaaliyabaa ootissiis. (Kessaabaa 4:1-9, 29-31; Qoodaabaa 17:10) Dumma dumma qaalaa haasayido gaasoykka hegaa mala; Xoossay ooratti eqqida Kiristtaane galchchaa maaddiyogaa bessanaassa. Kiitettida Phawuloosi, “Dumma dumma doonata haasayiyogee ammanennaageeti malaalettanaadan ootteesippe attin, ammaniyageetussa gidenna” yaagiis.—1 Qoronttoosa 14:22.
Kiristtaaneti poli markkattanaadan maaddanaassa. Yesuusa kaalliyageeti yootiyobaa Phenxxaqosxxe gallassi siyidaageeti, “Xoossay oottido malaaliyabata eti nu qaalan haasayishin siyoos” yaagidosona. (Oosuwa 2:11) Hegaa gishshawu, ha malaaliyabawu hara waanna gaasoy Kiristtaaneti “poli markkattanaadan,” qassi Yesuusi azazidoogaadan ‘dere ubban deꞌiya asay Yesuusa kaallanaadan’ maaddanaassa. (Oosuwa 10:42; Maatiyosa 28:19) He gallassi malaaliyabaa beꞌidanne odettidabaa siyida 3,000 gidiya asati Yesuusa kaalliyageeta gididosona.—Oosuwa 2:41.
Dumma dumma qaalaa haasayiyogee attennabee?
Akkay. Dumma dumma qaalaa haasayiyogaa gujjin, geeshsha ayyaanan imettiya imotati gamꞌꞌokkona. Geeshsha Maxaafay, “Xoossay erissidobaa yootiyo, woy dumma dumma doonata haasayiyo . . . imotati attana” yaagees.—1 Qoronttoosa 13:8.
Dumma dumma qaalaa haasayiyogee attidoy awudee?
Geeshsha ayyaanan imettiya imotay kiitettidaageeti deꞌiyo sohuwan, darotoo eti hara Kiristtaanetu bolli bantta kushiya wottin imettees. (Oosuwa 8:18; 10:44-46) Geeshsha ayyaanan imettiya imotaa kiitettidaageetuppe ekkidaageeti haratuyyo immidoba milatenna. (Oosuwa 8:5-7, 14-17) Leemisuwawu, kawotettay sunttido asi kaamiya laaggiyo piqaadiya issi urassi immana danddayees, shin piqaadiya ekkida he uri ooyyonne laaggiyo piqaade immiyo maati awu deꞌenna. Kiitettidaageetinne he imotaa etappe ekkidaageeti hayqqi simmin, dumma dumma qaalaa haasayiyogee attidaba milatees.
Ha wodiyan dumma dumma qaalaa haasayiyogee shin?
Dumma dumma qaalaa haasayiyo imotay koyro xeetu layttaa M.L. wurssettaa heeran attidoogee qoncce. Ha wodiyan Xoossaa wolqqana dumma dumma qaalaa haasayays gaana danddayiya asi mule baawa.
Tumu Kiristtaaneti waani erettana danddayiyonaa?
Yesuusi bana kaalliyageeti bantta goꞌꞌaa aggi bayiyo siiquwan erettanaagaa yootiis. (Yohaannisa 13:34, 35) Hegaadankka, kiitettida Phawuloosi siiqoy tumu Kiristtaaneta awudekka erissiyaba gidiyogaa yootiis. (1 Qoronttoosa 13:1, 8) I Xoossaa ayyaanay maaddin, Kiristtaanetuyyo ubbaa issippe ‘ayyaanay ayfiyoba’ giyo eeshshati deꞌanaagaa yootiis; he eeshshatuppe koyroy siiquwa.—Galaatiya 5:22, 23.
a “Dumma Dumma Qaalan Haasayiyoogee Xoossaa Imotee?” giya huuphe yohuwa xeella.