Yohaannisi Beꞌido Ajjuutaa

Kiitettida Yohaannisi Paaximo giyo haruuruwan qashettido wode, 16 ajjuutatun woy misiletun Yesuusi sinttappe hananabaa a bessiis. He ajjuutati Yihoowa sunttay waani geeyanaakko, a Kawotettay waani yaanaakko, qassi a shenee saluwan hanidoogaadan saꞌan waani hananaakko qonccissidosona.

Issi ajjuutan, Yohaannisi Yihoowa saluwan a boncho araatan beꞌiis; bootta maayuwaa maayidi worqqa kallachaa bantta huuphiyan wottida 24 cimati a araataa yuushuwan deꞌoosona. Wolqqanttaa pooꞌoynne dadaa gunttay araataappe kiyees. He 24 cimati Yihoowa sinttan gulbbatidi ayyo goynnoosona. Hara ajjuutan, dere ubbaappe, yara ubbaappenne qaala ubbaappe Yihoowawu goynniya zawi baynna asaa Yohaannisi beꞌiis. Dorssay, woykko Yesuusi eta heemmidi, deꞌo haattaakko efees. Guyyeppe, hara ajjuutan, Yesuusi Kawo gididi 24 cimatuura issippe saluwan haariyoogaa doommees. Kaalliya ajjuutan, Yesuusi miimminttiyaa Seexaanaaranne Daydanttatuura olettiyoogaa Yohaannisi beꞌiis. Yesuusi eta saluwaappe duge saꞌaa oliis.

Kaallidi Yohaannisi Dorssaynne doorettida 144,000ti Xiyoone Deriyaa bolli eqqidoogaa loꞌꞌiya misiliyan beꞌiis. I asay Xoossaayyo yayyanaadaaninne A bonchanaadan yootiiddi saꞌaappe bollaara paalliya issi kiitanchakka beꞌiis.

Kaalliya ajjuutay Armmageedoona olaa bessees. He olaa wode, Yesuusinne a olanchati Seexaanaa iita alamiyaa xoonoosona. Wurssetta ajjuutan, Yohaannisi saluwaaninne saꞌan issippetettay deꞌiyoogaa beꞌiis. Seexaanaynne a zerettay muleera xayiis. Saluwankka saꞌankka deꞌiyaageeti ubbay Yihoowa sunttaa geeshsha ootti xeelloosonanne a xallawu goynnoosona.