Kiristtaane So Asau —‘Giigi Uttite’

“Taani Asa Na7ai, intte qoppenna wodiyan yaana gishshau, inttekka qassi giigi uttanau bessees.”—LUQ. 12:40.

1, 2. ‘Giigi uttanaadan’ Yesuusi zorido zoriyaa wozanan wottana koshshiyoy aybissee?

“ASA Na7ai, . . . bonchchuwan yiyo wode,” qassi “asaa naa77u” kessidi shaakkiyo wode, inttenne intte soo asay waananee? (Maa. 25:31, 32) Hegee nuuni qoppenna wodiyan gakkiyaaba gidiyo gishshau, ‘giigi uttite’ yaagiya Yesuusa zoriyaa wozanan wottiyoogee keehippe koshshiyaaba!—Luq. 12:40.

² So asaa yameti ubbay bantta huuphe oosuwaa loyttidi poliyoogan, so asa ubbay ayyaanaaban beegottidi deꞌanaadan waati maaddana danddayiyaakko hagaappe kase deꞌiya huuphe yohuwan beꞌida. Nu soo asay ayyaanaaban tishsha gidanaadan nuuni maaddana danddayiyo hara ogeta ane beꞌoos.

Intte Ayfee Ubbatoo “Payya” Gido

3, 4. (a) Kiristtaane so asay aybippe naagettana koshshii? (b) Nu ayfee ubbatoo “payya” gidanaadan oottiyoogaa giyoogee woygiyoogee?

³ So asay Kiristtoosi yiyo wode giigi uttidaageeta gidanau, tumu goynuwaara gayttidabaappe wora simmenna mala naagettana bessees. Eti qofaa laaliyaaban wora simmenna mala naagettana koshshees. Miishshaa siiqiyoogee daro so asay oyqettido pire gidiyo gishshau, nu ayfee payya gidanaadan Yesuusi yootidobaa qoppite. (Maatiyoosa 6:22, 23 nabbaba.) Xomppee nu ogiyaa pooꞌissidi nuuni kunddennan hemettanau maaddiyoogaadan, ayfiyan leemisettida nu ‘wozanay’ akeekiyoobay nuuni xubettennan simerettanaadan maaddiyoogan nu wozanay dooyettanaadan oottana danddayees.—Efi. 1:18.

⁴ Ayfee loyttidi xeellanau, payya gidananne xeelliyoobaa tishshi oottidi xeellana bessees. Wozanaa ayfeekka hegaappe dummatenna. Leemiso hanotan payya gidida ayfee deꞌiyoogee issiba xallaa halchiyoogaa giyoogaa. Aquwaabaa kaseyiyo deꞌuwaa deꞌiyoogaappenne so asau aquwaaban koshshiyaabaa xallau bichaariyoogaappe, ubbatoo nu xeelaa ayyaanaaban wottoos. (Maa. 6:33) Hegee, nuussi deꞌiyaabay gidana giyoogaa; qassi Xoossaayyo haggaaziyoogaa nu deꞌuwan kaseyoos giyoogaa.—Ibr. 13:5.

5. Issi yelagiyaa Xoossau haggaaziyoogan ba xeelaa wottidoogaa waatada bessadee?

⁵ Naatussi payya ayfee deꞌanaadan loohissiyoogee loꞌꞌobaa demissees. Toophiyan deꞌiya, layttay 18 heera gidido naꞌee leemisuwaa qoppite. A gooba tamaare gidiyo gishshau, naaꞌꞌantto xekka timirttiyaa wurssiyo wode gujo timirttiyaa miishshaa qanxxennan tamaaranaadan shoobettaasu. Gidikkokka, a Yihoowayyo haggaaziyoogan ba xeelaa wottido gishshau, he shoobiyaa ekkennan ixxaasu. Hegaappe simmin takkennan, aginan aginan 69,000 gidiya biraa demmiyo oosuwaa oottanaadan shoobettaasu; hegee Toophiyan daro asay demmiyo damoozaappe keehi daro. SHin naꞌiyaa aqinye gidiyoogan ba xeelaa wottaasu. A he oosuwaa shoobiyaa ixxanau bana yelidaageeta zoriyaa oychanau koyabeykku. Bantta naꞌiyaa oottidobaa erido wode, o yelidaageetussi aybi siyettidee? A oottidoban eti keehi ufayttidi, hegaa iyyo yootidosona.

6, 7. Nuuni ayba daafaappe ‘naagettana’ koshshii?

⁶ Yesuusi, Maatiyoosa 6:22, 23n yootidoban, yaaretiyoogaa xeelliya akeekissoykka deꞌees. Yesuusi “payya” ayfiyaa giyaagaa ‘payya gidenna’ ayfiyaara geeddarssiis. ‘Payya gidenna’ ayfiyaa geetettidi birshshettida Giriiketto qaalay qanaatiyaagaa, qaaqqatiyaagaa woykko yaaretiyaagaa geetettana danddayees. Qaaqqatiyoogaa woykko yaaretiyoogaa Yihooway aybidan xeellii? Geeshsha Maxaafay, “Intte giddon shaaramuxiyoogeenne tunatetta ubbai, woi miishsha amottiyoogee [woy qaaqqatiyoogee] mulekka siyettoppo” yaagees.—Efi. 5:3.

⁷ Issi uri haray yaaretiyoogaa akeekanau metootana xayikkonne, baagaa akeekanau metootana danddayees. Hegaa gishshau, Yesuusi, “Amo ubbaappekka inttena naagite” yaagidi zorido zoriyaa oosuwan peeshshiyoogee eratetta. (Luq. 12:15) Hegaadan oottanau, nu wozanan ubbatoo qoppiyoobay aybakko qorana koshshees. Kiristtaane so asay wodiyaa aattiyooban, allaxxiyoobaaninne aqo gujjanau giidi wurssiyo wodiyaanne miishshaa akeekan qoppana koshshees.

8. Issibaa shammiyoogaa xeelliyaagan nuuni ‘naagettana’ danddayiyoy ayba ogiyaanee?

⁸ Issibaa shammiyoogee hegaa shammanau danddayiyaakko woy danddayennaakko qofaa qachiyoogaappe aadhiyaabaa gujjees. Kaallidi deꞌiyaagaa mala hanotaa qoppite: ‘Hegaa ubbatoo goꞌettanaunne loytta oyqqanau taayyo wodee deꞌii? Hegaa loyttada goꞌettiyoogaa eranau ay keena wodiyaa koshshii?’ Yelagatoo, shammiyoobaa xeelliyaagan ha alamee erissiyo ubbabaa ammanoppite; hegaadan erissiyo issi issibay keehippe alꞌꞌo. Intte amuwaa teqqite. Issibaa shammiyoogee, asa Naꞌay yiyo wodiyau intte soo asay giigi uttennaadan waati digganaakkokka qoppite. Yihooway, “Taani nena mulekka yeggikke woikko aggikke” yaagidi gelido qaalan ammanettite.—Ibr. 13:5.

Ayyaanaabaa Hoolliyaa Gakkanau Baaxetite

9. Ayyaanaabaa hoolliyaa gakkanau baaxetiyoogee so asaa waatidi maaddana danddayii?

⁹ Son deꞌiya asa ubbay ammanuwan minnanaadaaninne ayyaanaaban tishsha gidanaadan so asaa yame gidida uri maaddiyo hara ogee, ayyaanaabaa hoolliyaa kessiyoogaanne hegaa gakkanau baaxetiyoogaa. Hegee so asay Yihoowayyo ay keena loytti oottiyaakko akeekanaadaaninne etau keehi koshshiya oosoti awugeetakko kuuyanaadan maaddana danddayees.—Piliphphisiyuusa 1:10 nabbaba.

10, 11. Intte soo asay gakkanau issippe baaxetiyo ayyaanaabaa hoollee aybee, qassi sinttappe gakkiyo ayba hoolliyaa kessanau koyeetii?

¹⁰ So asay huuphiyan huuphiyan qantta wodiyan gakkana danddayiyo hoolliyaa kessiyoogeekka keehippe maaddana danddayees. Leemisuwau, gallassa xiqisiyaa ubba galla tobbiyo hoolliyaa qoppite. So asaa yameti yootiyo qofay eti Yihoowanne tumaa ay keena siiqiyaakko so asau huuphe gididaagee eranaadan maaddana danddayees. So asay Geeshsha Maxaafaa ubbatoo issippe nabbabiyo hoolliyaa kessiyoogee, naati loyttidi nabbabanaadaaninne Geeshsha Maxaafaa qofaa loyttidi akeekanaadan keehi maaddees. (Maz. 1:1, 2) Nuuni kaseegaappe muruta woosaa woossanau halchana bessennee? Geeshsha ayyaanaa ayfiyaa macarata loyttidi ayfiyoogeekka nuuni kessana danddayiyo loꞌꞌo hoolle. (Gal. 5:22, 23) Woy haggaazuwan nunaara gayttiyaageetuyyo qarettiyoogaa xeelliyaagan shin? So asay hegaadan oottanau baaxetiyoogee naati qarettiyaageeta gidanaadan maaddana danddayees; qassi eti kumetta wode aqinye woy misoonaawe gidanau koyana danddayoosona.

¹¹ Inttenne intte soo asay gakkanau baaxetana danddayiyo amarida hoolleta aybissi qoppekketii? Intte soo asay kaseegaappe daro wodiyau haggaazanau hoolliyaa kessana danddayii? Silkkiyan, ogiyan woykko zalꞌꞌe sohuwan sabbakanau yayyiyoogaa agganau baaxetana danddayeetii? Kawotettaabaa aassiyaageeti keehi koshshiyo sohuwan oottiyoogaa xeelliyaagan shin? So asaappe issoy hara biittaa asau mishiraachuwaa yootanau eta qaalaa tamaarana danddayii?

12. So asau huuphe gididaageeti bantta soo asay ayyaanaaban diccanaadan waati maaddana danddayiyoonaa?

¹² So asau huuphe gididaageeti, intte soo asay ayyaanaaban diccana danddayiyo ginaa shaakki erite. Yaatidi, he qoppidobaa polanau maaddiya hoolliyaa kessite. Intte soo asay kessiyo hoollee gakkana danddayiyoogaa, qassi intte hanotaaranne intte abbiyaara moggiyaagaa gidana bessees. (Lee. 13:12) Kessana bessiya, maaddiya hoolliyaa gakkanau baaxetiyoogee wode ekkiyaaba gidiyoogee tuma. Hegaa gishshau, televizhiiniyaa xeellanau goꞌettiyo wodiyaappe ayyaanaabau goꞌettanau baaxetite. (Efi. 5:15, 16) Intte soo asau intte kessido hoolliyaa gakkanau minnidi oottite. (Gal. 6:9) Ayyaanaabaa hoolliyaa gakkanau baaxetiya so asaa “dichchai asa ubbau” qonccees.—1 Xim. 4:15.

So Asaa Xinaatiyaa Aggennan Xannaꞌite

13. Saaminttan saaminttan shiiqiyo gubaaꞌiyaa shiiquwaa prograamiyan laamettiday aybee, qassi nuuni wotti dentti qoppana koshshiyo oyshati awugeetee?

¹³ Ichashe 1, 2009ppe doommidi gubaaꞌe shiiquwaa prograamee laamettidoogee, so asay, asa Naꞌay yiyo wodiyau ‘giigi uttanaadan’ keehippe maaddiyaaba. Kase Gubaaꞌe Maxaafaa Xinaatiyaa geetettiya shiiquwau issi gallassi shiiqiyoogee aattin, Tiꞌokiraase Haggaazo Timirtte Keettaaranne Haggaazo SHiiquwaara issippe shiiqoos. Hegaadan laamettidoy Kiristtaane so asay saaminttaa giddon issi omarssaa so asaa goynuwau bazzidi, ayyaanaaban minnanaadan hanotay injjetanaadan oottanaassa. Hegee laamettoosappe amarida wodee aadhido gishshau, nuna hagaadan giidi oychana danddayoos: ‘He injjetida wodiyaa so asaa xinaatiyau woy buzo xinaatiyau goꞌettiyaanaa? He giigissuwaa halchettidaagaadan goꞌettiyaanaa?’

14. (a) So asaa xinaatiyaa woy buzo xinaatiyaa ubbatoo xannaꞌiyo waanna halchoy aybee? (b) Xinaatiyau issi omarssaa bazziyoogee keehi koshshiyoy aybissee?

¹⁴ So asaa xinaatiyaa woy buzo xinaatiyaa ubbatoo xannaꞌiyo waanna halchoy Xoossaakko shiiqanaassa. (Yaaq. 4:8) Nuuni Geeshsha Maxaafaa ubbatoo xannaꞌiyo wodenne Medhidaagaa loyttidi eriyo wode aara deꞌiya dabbotay minnees. Nuuni kaseegaappe aaruwan Yihoowakko shiiqiyo wode, ‘nu kumetta wozanaappe, nu kumetta shemppuwaappe, nu kumetta qofaappe, nu kumetta wolqqaappe’ a siiqanau keehippe koyoos. (Mar. 12:30) Nuuni Xoossau azazettanaunne a leemisuwaa kaallanau amottiyoogee erettidaba. (Efi. 5:1) Yaatiyo gishshau, so asaa xinaatiyaa ubbatoo xannaꞌiyoogee nuuni kasetidi odettida ‘iita waayiyaa’ naagiyo wode, so asa ubbay ayyaanaaban ‘giigi uttanaadan’ maaddiya waannaba. (Maa. 24:21) Bashshaappe attanau hegee keehippe koshshiyaaba.

15. So Asaa Goynuwaa omarssay so asaa giddon deꞌiya gaytotettau waati maaddana danddayii?

¹⁵ So Asaa Goynuwaa giigissuwau hara halchoykka dees; hegeekka so asay issoy issuwaara keehi matattanaadan maaddiyoogaa. Saaminttan saaminttan ayyaanaabaa issippe tobbiyoogan wodiyaa aattiyoogee so asaa giddon deꞌiya gaytotettau keehippe maaddees. Aqo laggeti issippe Geeshsha Maxaafaa xannaꞌiyoogan ufayttiyo wode, kaseegaappe aattidi issippetettaa medhoosona. (Eranchchaa 4:12 nabbaba.) Issippe xannaꞌiya yelidaageetinne naati “ubbabaa issippe shiishshi qachchiya” siiquwan issuwaa gidana danddayoosona.—Qol. 3:14.

16. Gubaaꞌiyan deꞌiya heezzu michoti Geeshsha Maxaafaa xannaꞌanau issi omarssaa bazziyoogan waanidi goꞌettidaakko yoota.

¹⁶ Gubaaꞌiyan deꞌiya heezzu michoti Geeshsha Maxaafaa xinaatiyau issi omarssaa bazziyo giigissuwaappe waanidi goꞌettidaakko qoppite. Issi kataman deꞌiya ha heezzu amꞌꞌe cima maccaasati dabbo gidana xayikkonne, daro layttau mata lagge gididi deꞌidosona. Eti kaseegaappe aaruwan issippe gayttanaunne coo issoy issuwaa oychiyoogaappe, ayyaanaaban goꞌettanau Geeshsha Maxaafaa xannaꞌana mala issi omarssaa bazzanau qofaa qachidosona. Xoossaa Kawotettaabaa ‘Loyttidi Markkattiyoogaa’ (Wolayttattuwan birshshettibeenna) giya maxaafaa goꞌettidi hegaadan oottiyoogaa doommidosona. Etappe issinniyaa hagaadan gaasu: “Nuuni keehippe ufayttiyo gishshau, xinaatee darotoo issi saatiyaappe dariya wodiyaa ekkees. Koyro xeetu layttan deꞌida nu ishanttu hanotaa qoppanau maloos; qassi nuna hegaa malabay gakkiyaakko ay oottanaakko tobboos. Yaatidi, he tobbidobaappe akeekidobaa haggaazuwan goꞌettanau baaxetoos. Hegaadan oottiyoogee Kawotettaabaa sabbakiyoogaaninne erissiyo ashkkara oottiyo oosuwan awudeegaappenne aaruwan ufayttanaadaaninne murutanaadan nuna maaddiis.” Hegee eti ayyaanaaban loytti akeekanaadan maaddidoogaappekka harabay, he heezzu loꞌꞌo laggeti issoy issuwaara keehi matattanaadan oottiis. Eti, “Nuuni ha giigissuwaa xoqqu oottidi xeelleettees” yaagidosona.

17. So Asaa Goynuwaa omarssay ushachchanaadan maaddana danddayiyay aybee?

¹⁷ Intte shin? So Asaa Goynuwau woy buzo xinaatiyau issi omarssaa bazziyoogan ayba ogiyan goꞌettiiddi deꞌeetii? Xombban xombban xannaꞌiyaaba gidikko, he giigissuwan halchettidabay polettenna. Son deꞌiya ubbay keerido saatiyan xannaꞌanau giigi uttana koshshees. He omarssan pattennabay kelttiyaa gelanaadan paqqadana koshshenna. Hegaa bollikka, intte soo asaa galla galla deꞌuwan goꞌꞌiya qofaa xannaꞌanaadan maaddiya xuufiyaa doorana koshshees. He xinaate wodee ufayssiyaagaa gidanaadan intte ay oottana danddayeetii? Murutanaadan maaddiya hiillaa goꞌettidi tamaarissite; qassi bonchonne ufayssiya hanotan xannaꞌite.—Yaaq. 3:18.a

‘Beegottidi’ Deꞌitenne ‘Giigi Uttite’

18, 19. Asa Naꞌay mata wodiyan yiyoogaa eriyoogee inttenanne intte soo asaa ayba ogiyan maaddana koshshii?

¹⁸ Nu wodiyaa dummayidi erissiya, yaa iiti iiti biya alamiyaa hanotay 1914ppe doommidi, Seexaanaa iita alamee wurssetta gallassan deꞌiyoogaa sirennaadan oottees. Armmageedoona olau attida wodee he keena. Mata wode asa Naꞌay iita asaa bolli Yihoowa pirddaa ehaana. (Maz. 37:10; Lee. 2:21, 22) Hegaa eriyoogee inttenanne intte soo asaa maaddana koshshennee?

¹⁹ Yesuusi intte ayfee ubbatoo “payya” gidanaadan zorido zoriyaa oosuwan peeshshiiddi deꞌeetii? Ha alamiyaa asay duretanau, hayttatanau woy sunttettanau baaxetiyaaba gidikkonne, intte soo asay ayyaanaabaa hoolliyaa gakkanau baaxetiiddi deꞌii? So Asaa Goynuwaa omarssaa giigissoy woy buzo xinaatiyaa wodee inttena maaddiiddi deꞌii? Halchettidabaa poliiddi deꞌeetii? Hagaappe kase huuphe yohuwan beꞌidoogaadan azina, macho, woy naꞌa gidiyoogan, Geeshsha Maxaafay yootiyoogaadan intte gishshaa gishshaa poliiddi deꞌeetii? Yaatiyoogan, so asa ubbay ‘beegottidi’ deꞌanaadan maaddiiddi deꞌeetii? (1 Tas. 5:6) Hegaadaana gidikko, asa Naꞌay yiyo wodiyau ‘giigi uttideta.’

[Tohossa qofaa]

Ay Tamaaradii?

• Kiristtaane so asay ‘giigi uttanau’ . . .

“Payya” ayfee deꞌiyoogeeta gidiyoogee waatidi maaddana danddayii?

Ayyaanaabaa hoolliyaa kessiyoogeenne hegaa gakkanau baaxetiyoogee waatidi maaddana danddayii?

So asaa xinaatiyaa aggennan xannaꞌiyoogee waatidi maaddana danddayii?

[Sinttaa 15n deꞌiya misiliyaa qonccissuwaa]

“Payya” ayfee, alamiyan deꞌiya, qofaa laaliyaabaa nuuni eqettanaadan denttettees