Taani Waanada Yihoowa Markka Gidana Danddayiyaanaa?
Yihoowa Markka gidanawu oottana koshshiyaabaa Yesuusi Maatiyoosa 28:19, 20n yootiis. He xiqisee, Kiristtoosi erissiyo ashkkara gidanawu issi uri oottana koshshiyaabaa yootees; hegee Yihoowaabaa asawu yootiyoogaa woy markkattiyoogaa gujjees.
Oottiyoobaa 1: Geeshsha Maxaafay yootiyoobaa tamaara. Yesuusi, ‘asaa A kaalliyaageeta oottanaadaaninne tamaarissanaadan’ ba erissiyo ashkkarata azaziis. (Maatiyoosa 28:19, 20) ‘Kaalliyaagaa’ geetettida qaalay “tamaariyaagaa” giyoogaa. Geeshsha Maxaafan, ubba qassi A giddon deꞌiya Yesuusi tamaarissidoban, neeni ufayttanaadaaninne loꞌꞌo deꞌuwaa deꞌanaadan maaddiya qofay deꞌees. (2 Ximootiyoosa 3:16, 17) Nuuni miishsha qanxxissennan Geeshsha Maxaafaa xannaꞌissiyo prograamiyan neeni Geeshsha Maxaafaa eranaadan maaddanawu keehi koyoos.—Maatiyoosa 10:7, 8; 1 Tasalonqqe 2:13.
Oottiyoobaa 2: Ne tamaaridobaa oosuwan peeshsha. Yesuusi, tamaariyaageeti I “azazidobaa ubbaa . . . naagana” koshshiyoogaa yootiis. (Maatiyoosa 28:20) Hegaa giyoogee, neeni Geeshsha Maxaafaa coo tamaariyoogaappe aadhdhiyaabaa oottana koshshees; giishin ne qoppiyoobaanne ne eeshshaa laammiyoogee koshshana danddayees. (Oosuwaa 10:42; Efisoona 4:22-29; Ibraawe 10:24, 25) Hegaappe simmin, Yesuusa azazuwaa azazettiyaageeti banttana Yihoowawu sheedhdhiyoogan, A kaallanawu kuuyoosona.—Maatiyoosa 16:24.
Oottiyoobaa 3: Xammaqetta. (Maatiyoosa 28:19) Geeshsha Maxaafan, xammaqettiyoogee moogettiyoogan leemisettiis. (Roome 6:2-4ra gatta xeella.) Hegee kase deꞌuwawu hayqqidi ooratta deꞌuwaa doommiyoogawu leemiso. Yaatiyo gishshawu neeni xammaqettiyoogee, Yesuusi yootido qommoora odettida naaꞌꞌubata neeni polidoogaanne geeshsha kahaa demmanawu Xoossaa oychchiyoogaa asawu bessiyaaba.—Ibraawe 9:14; 1 PHeexiroosa 3:21.
Taani xammaqettanawu giigettidaakkonne aybin eranee?
Gubaaꞌe cimata haasayissa. Eti hegee woygiyoogaakko neeni akeekidoogaa, ne tamaaridobaa oosuwan peeshshiyoogaanne nena ne dosan Xoossawu sheedhdhidoogaa eranawu nenaara haasayana.—Oosuwaa 20:28; 1 PHeexiroosa 5:1-3.
Yihoowa Markkatu naatikka hegaadan oottana koshshii?
Ee. Geeshsha Maxaafay azaziyoogaadan, nuuni nu naata Yihoowa “seeraaninne zoriyan” dichchoos. (Efisoona 6:4) Gidoppe attin, eti xammaqettanaappe kase naatettaappe doommidi bantta dosan Geeshsha Maxaafay tamaarissiyoobaa erana, ammanana qassi oosuwan peeshshana koshshees. (Roome 12:2) Wurssettan, goynuwaa xeelliyaagan ubba asay bawu kuuyana bessees.—Roome 14:12; Galaatiyaa 6:5.