Nuuni Yihoowabaa Eriyoobay Aybee?

Yihoowabaa neeni ay qoppay? Issi issi asay Xoossay gitanne yashshiyaagaa gidiyo gishshawu aara haasayana danddayettenna giidi qoppees. I tumuppe deꞌiyaagaa gidennan, dadaa mala wolqqaamaba gaada qoppay? Yihoowi tumu ay malee? Geeshsha Maxaafay Yihoowa eeshshata yootees. I neessi qoppiyoogaakka yootees.

1. Nuuni Xoossaa beꞌana danddayennay aybissee?

“Xoossai ayyaana.” (Yohaannisa 4:24) Xoossawu deꞌiya bollay nuugaa mala gidenna. I nuuni beꞌana danddayenna sohuwan saluwan deꞌiya Ayyaana.

2. Yihoowa eeshshatuppe amaridaageeti awugeetee?

Nuuni Yihoowa beꞌana danddayennaba gidikkonne, A eeshshati nuuni A eriyo wode siiqanaadan oottoosona. Geeshsha Maxaafay, “GODAI xillobaa dosees. Xoossaa asata i yeggenna” yaagees. (Mazamure 37:28) Qassi I waayettiya asaa ‘keehi siiqeesinne eta maarees.’ (Yaaqooba 5:11) Yihoowi “wozanai me77idoogeetussi mataana; qassi bantta ayyaanan liiqidaageeta ashshees.” (Mazamure 34:18) Qassi nuuni oottiyooban Yihoowi ufayttana woy azzanana danddayiyoogaa eray? Iitabaa oottiya uri A yiilloyeesinne azzanttees. (Mazamure 78:40, 41) Gidoppe attin, loꞌꞌobaa oottiya uri A ufayssees.—Leemiso 27:11 nabbaba.

3. Yihoowi nuna siiqiyoogaa waati bessii?

Yihoowa eeshshatu ubbaappe aaruwan qoncciday siiquwaa. “Xoossai siiqo.” (1 Yohaannisa 4:8) Yihoowi Geeshsha Maxaafaa xallaana gidennan, ba medhdhidobatunkka ba siiquwaa qonccissiis. (Oosuwaa 14:17 nabbaba.) Leemisuwawu, I nuna waati medhdhidaakko qoppa. I nuuni loꞌꞌiya merata beꞌanaadan, ufayssiya cenggurssaa siyanaadaaninne malꞌꞌiya qumaa shaakki eranaadan oottidi medhdhiis. I nuuni nu deꞌuwan ufayttanaadan koyees.

LOYTTA AKEEKA

4. Geeshsha ayyaanay Xoossaa wolqqaa

Nuuni nu kushiyan oosuwaa oottiyoogaadan, Yihoowi ba geeshsha ayyaanaa goꞌettees. Geeshsha ayyaanay Xoossaa gidennan, Xoossay dumma dummabaa oottiyo wolqqaa gidiyoogaa Geeshsha Maxaafay yootees. Luqaasa 11:13​nne Oosuwaa 2:17 nabbabite; yaatidi ha oyshata tobbite:

• Xoossay geeshsha ayyaanaa immanaadan oychchiyaageetu bolli ba ayyaanaa “gussana.” Yaatiyo gishshawu, geeshsha ayyaanay Xoossaa gaada qoppayiyye Xoossaa wolqqaa gaada qoppay? Neeni hegaadan giyoy aybissee?

Yihoowi maalaalissiyaabata oottanawu ba geeshsha ayyaanaa goꞌettees. Mazamure 33:6​nne 2 PHeexiroosa 1:20, 21 nabbabite; yaatidi ha oyshaa tobbite:

• Yihoowi ba geeshsha ayyaanaa goꞌettido amarida ogeti aybee?

5. Yihoowawu ufayssiya eeshshati deꞌoosona.

Muusee Xoossawu ammanettidi oottida asa, shin I Xoossaabaa loytti eranawu koyiis. Hegaa gishshawu Muusee Xoossaa, “Taani nena erana . . . mala ne ogiyaa tana tamaarissa” yaagiis. (Kessaabaa 33:13) Yihoowi Ba eeshshaappe amaridaagaa Muusessi qonccissiis. Kessaabaa 34:4-6 nabbabite; yaatidi ha oyshata tobbite:

• Yihoowi Ba eeshshatuppe awugeeta Muusessi qonccissidee?

• Yihoowa eeshshatuppe nena keehi ufayssiyaageeti awugeetee?

6. Yihoowi asawu qoppees

Xoossaa asa gidida Ibraaweti, Gibxxen aylle gididi deꞌidosona. Eti waayettidoogee Yihoowi waananaadan oottidee? CENGGURSSAN GIIGIDAAGAA dooyidi siyite, woy Kessaabaa 3:1-10 nabbabite. Yaatidi kaallidi deꞌiya oyshata tobbite.

CENGGURSSAN GIIGIDAAGAA: Yihoowi Eta Waayiyaa Qoppiis (2:45)

• Asay waayettiyo wode Yihoowawu aybi siyettiyaakko ha taarikiyaappe ay akeekadii?—Paydo 7nne 8 xeella.

• Yihoowi asaa maaddanawu koyees, qassi maaddana danddayees gaada qoppay? Aybissi?

7. Yihoowi medhdhidobaappe A eeshshaabaa nuuni erana danddayoos

Yihoowi ba medhdhidobatun ba eeshshata qonccissees. BIIDUWAA beꞌite. Yaatidi Roome 1:20 nabbabite; qassi kaallidi deꞌiya oyshaa tobbite.

BIIDUWAA: Meretay Yihoowa Siiquwaa Qonccissees—Asaa Bollaa (1:57)

• Yihoowa eeshshatuppe awugeeta I medhdhidobatun akeekay?

AY AKEEKADII?

Yihoowa beꞌana danddayokko. Ayyo siiqoynne hara ufayssiya daro eeshshati deꞌoosona.

Zaaretuwaa

• Nuuni Yihoowa beꞌana danddayennay aybissee?

• Geeshsha ayyaanay aybee?

• Yihoowa eeshshatuppe amaridaageeti awugeetee?

PILGGA

Yihoowa waanna eeshshatuppe oyddatubaa loyttada era.

“Xoossay Ay Mala Xoossee?” (Wochchiyo Keelaa Paydo 1 2019)

Yihoowi ubbaban deꞌennaagaa qonccissiya naqaashaa beꞌa.

“Xoossay Ubbasankka Deꞌii?” (Nu websaytiyan deꞌiyaaba)

Geeshsha Maxaafay geeshsha ayyaanaa Xoossaa kushe giyoy aybissakko akeeka.

“Geeshsha Ayyaanay Aybee?” (Nu websaytiyan deꞌiyaaba)

Issi qooqe bitanee bana Xoossay siiqiyoogaa ammananawu metootiis. A qofaa aybi laammidaakko akeeka.

“Haꞌꞌi Harata Maaddana Danddayays Gaada Qoppays” (Wochchiyo Keelaa huuphe yohuwaa)