‘Ayyaanan Dochennaagaa Gida’

“Intte oosuwan azalloppite. Ayyaanan dochennaageeta gidite. Yihoowayyo ashkkaradan oottite.”—ROOME 12:11, NW.

1. Israaꞌeelati mehiyaa yarshshuwaanne hara yarshshuwaa shiishshidoy aybissee?

A ASHKKARATI a siiqiyoogaanne a sheniyau haarettiyoogaa bessanau bantta dosan yarshshiyoobaa Yihooway xoqqu oottidi xeellees. I beni wode, dumma dumma mehiyaa yarshshuwaaninne hara yarshshotun ufayttiis. Israaꞌeeleti nagaray atto geetettanaadan koyiyoogaanne galatiyoogaa bessanau Muuse Higgiyan hegaa mala yarshshuwaa shiishshidosona. Kiristtaaneti hegaa mala yarshshuwaa shiishshanaadan Yihooway koyenna. Gidikkokka, PHauloosi Roome Kiristtaanetuyyo xaafido dabddaabbiyan, 12tta shemppuwan, nuunikka yarshshuwaa shiishshana koshshiyoogaa qonccissiis. Hegee ayba ogiyaanakko ane beꞌoos.

Deꞌo Yarshshuwaa

2. Nuuni Kiristtaane gidiyoogaadan ay mala deꞌo deꞌana koshshii? Hegee ay gujjii?

² Roome 12:1, 2, NW nabbaba.a Ayhuda gidin Ayhuda gidennaageeta gidin, tiyettida Kiristtaaneti Xoossaa sinttan xilliyoy oosuwaana gidennan ammanuwaana gidiyoogaa PHauloosi ba dabddaabbiyau koyro heeran loytti qonccissiis. (Roome 1:16; 3:20-24) Kiristtaaneti bantta goꞌꞌaa yarshshidi deꞌiyoogan galatiyoogaa bessana koshshiyoogaa PHauloosi shemppo 12n qonccissiis. Hegaadan oottanau, nu qofaa laammana koshshees. Laattido polotettaa pacaappe denddidaagan ‘nagaraanne hayquwaa higgiyau’ haarettoos. (Roome 8:2) Yaatiyo gishshau, nu koshshaa muleera laammiyoogan, nu “wozanainne qofai muleera ooraxxanau” woykko laamettanau koshshees. (Efisoona 4:23) Hegaadan muleera laamettana danddayiyoy Xoossaanne a ayyaanaa maaduwaa xalaalaana. Hegaa oottanau, “qoppiyo abbiyaa” goꞌettiyoogankka murttana koshshees. SHori baynna kanddoynne wodiyaa aattiyoobay, qassi geella qofay deꞌiyo ‘ha siraataa deꞌo maaraa qulliyaageeta’ gidennaadan nuuyyo danddayettidabaa ubbaa oottana koshshees.—Efisoona 2:1-3.

3. Kiristtaane oosota nuuni oottiyoy aybissee?

³ PHauloosi “loꞌꞌo, nashettiyaanne polo gidida Xoossaa sheniyaa shaakkidi eranau,” “qoppiyo abbiyaa” goꞌettanaadankka nuna shoobbiis. Nuuni Geeshsha Maxaafaa galla galla nabbabiyoy, nabbabidoban wotti denttidi qoppiyoy, woossiyoy, Kiristtaane shiiqotun shiiqiyoynne Kawotettaa mishiraachuwaa sabbakiyoy aybissee? Gubaaꞌiyaa cimati yootiyo goꞌꞌiya akeekissuwau galatiyaaba gidikkonne, nuuni hegaadan oottiyoy eti minttettiyo gishshataassa gidenna. SHin nuuni Kiristtaane oosuwaa oottiyoy Yihoowa wozanappe siiqiyoogaa bessanaadan Xoossaa ayyaanay denttettiyo gishshataassa. Hegaa bollikka, nuuni hegaa mala oosuwaa oottanaadan Xoossay koyiyoogaa ammanettoos. (Zakkaariyaasa 4:6; Efisoona 5:10) Tumu Kiristtaane gididi deꞌiyoogan Xoossaa ufayssana danddayiyoogaa eriyoogee, nuussi daro ufayssaanne woppaa demissiyaaba.

Dumma Dumma Imotaa

4, 5. Kiristtaane cimati bantta imotaa waatidi goꞌettana koshshii?

⁴ Roome 12:6-8 nabbaba. “Xoossai nuuyyo immido aaro kehatettan dumma dumma imoi” deꞌiyoogaa PHauloosi yootiis. PHauloosi yootido imotatuppe issoti issoti “mintti” kaalettanaadan zoree imettido cimata xeelliyaabata; minttettiyoogeenne aawatetta maatan kaalettiyoogee hegau leemiso.

⁵ PHauloosi cimati tamaarissiyoonne Kiristtaane “oosuwaa” oottiyo wode, hegaadan minttidi oottana koshshiyoogaa yootiis. PHauloosi ha sohuwan, “Issi bolla” gidida Kiristtaane gubaaꞌiyan oottiyo “oosuwaa” yootiyoogaa, yuushuwan deꞌiya qofay malaatiyaaba milatees. (Roome 12:4, 5) Oosuwaa 6:4n, kiitettidaageeti: “Nuuni Xoossaa woosaaninne qaalaa yootuwan minnana” yaagido ‘qaalaa yootuwaara’ he oosoy issi mala. Hegee ay gujjii? Kiristtaane cimati bantta imotaa gubaaꞌiyaa yameta minttettanau goꞌettoosona. Cimati gubaaꞌiyaa mintti kaalettananne tamaarissana bessees. Eti xannaꞌiyoogan, pilggiyoogan, tamaarissiyoogaaninne heemmiyoogan he oosuwaa suure poloosona. Cimati hegaa ubbaa oottiyo wode, bantta oosuwaa minnidi oottiyoogaa bessoosona. Cimati bantta imotaa akeekan goꞌettanaunne dorssatuyyo koshshiyaabaa “ufaissan” kunttanau bessees.—Roome 12:7, 8; 1 PHeexiroosa 5:1-3.

6. Ha huuphe yohoy baasettido Roome 12:11n deꞌiya zoriyaa nuuni kaallana danddayiyoy ayba ogiyaanee?

⁶ PHauloosi gujjidi: “Intte oosuwan azalloppite. Ayyaanan dochennaageeta gidite. Yihoowayyo ashkkaradan oottite” yaagiis. (Roome 12:11, NW) Nuuni nu oosuwaa mishettidi oottennaagaa akeekikko, nu xinaatiyaa meeziyaa zaaretti xeellanau, qassi Yihoowa ayyaanaa demmanau kaseegaappe aaruwan, minttidinne darotoo woossanau koshshana danddayees. Hegee nuuni azallatettaa agganaadaaninne zaarettidi mishettanaadan maaddana danddayees. (Luqaasa 11:9, 13; Ajjuutaa. 2:4; 3:14, 15, 19) Beni Kiristtaaneti “Xoossai oottido gita oosuwaa” yootanaadan geeshsha ayyaanay denttettiis. (Oosuwaa 2:4, 11) Hegaadan, “ayyaanan dochennaageeta” gididi, mishettidi haggaazanaadan nunakka denttettana danddayees.

Ba Huuphiyaa Kaushshiyoogaa

7. Nuuni nu huuphiyaa kaushshidi oottana koshshiyoy aybissee?

⁷ Roome 12:3 nabbaba. Nuuyyo deꞌiya imotay Yihooway “aaro kehatettan” immidoba. PHauloosi harasan, “nu danddayai Xoossaappe” yiyoogaa yootiis. (2 Qoronttoosa 3:5) Yaatiyo gishshau, nuuni nuussi sabaa demmanau baaxetana koshshenna. Nu haggaazuwan demmiyo ayfee ubbay nu qaratettaana gidennan, Xoossaa anjjuwaana gidiyoogaa nu huuphiyaa kaushshidi ammanana koshshees. (1 Qoronttoosa 3:6, 7) Hegaara moggiya hanotan PHauloosi: “Qoppanau bessiyaagaappe aattidi, otoruwan qoppoppite” yaagidi ubba Kiristtaanetussi yootiis. Nu huuphiyau loꞌꞌo xeelay deꞌiyoogeenne Yihoowayyo oottiyo oosuwan ufayttiyoogee bessiyaaba. Gidikkokka, nu huuphiyaa kaushshiyoogee woykko nuussi deꞌiya pacaa eriyoogee, odin ekkennaageeta gidennaadan maaddees. Yaaniyoogaappe, “wozannaama asadan” qoppanau koyoos.

8. Nuna nu “huuphen wozannaama giidi” qoppiyoogaappe waanidi haakkana danddayiyoo?

⁸ Nuuni oottidoban otorettiyoogee eeyyatetta. “Dichchiyaagee Xoossaa.” (1 Qoronttoosa 3:7) PHauloosi Xoossay gubaaꞌiyaa yametu ubbaassi “ammanuwaa” immidoogaa yootiis. Nuna xoqqu oottidi xeelliyoogaappe, harati banttau imettida ammanuwaa keenan oottiyoobaa ammanidi ekkana koshshees. PHauloosi gujjidi: “Inttessi qoppiyoogaadan haratussi qoppite; intte huuphiyaa xoqqu oottidi xeelloppite; shin inttena toochiyo xeelay inttessi deꞌo. Inttena intte huuphen wozannaama giidi qoppoppite” yaagiis. (Roome 12:16, NW) Kiitettidaagee xaafido hara dabddaabbiyan: “Inttena siiqiyoogan woikko ceeqettanau koyiyo hada amuwan issibaanne oottoppite; shin issoi issuwaappe gitatais yaagidi qoppennan, issoi issuwaayyo intte huuphiyaa kaushshite” yaagidi yootiis. (Piliphphisiyuusa 2:3) Nu ishatinne michoti ubbay issiban nuuppe aadhiyoogaa ammanidi ekkanau nu huuphiyaa kaushshanaunne wozanappe baaxetanau koshshees. Nu huuphiyaa kaushshiyoogee ‘nuna nu huuphen wozannaama giidi qoppiyoogaappe’ naagees. Nuuppe issoti issoti gubaaꞌiyan dumma maataa demmiyoogee harati eta bolli xeelaa wottanaadan oottana danddayikkonne, nu ‘huuphiyaa toochidi,’ asay darotoo xoqqu oottidi xeellenna oosuwaa oottiyoogan nuuni ubbay daro ufayssaa demmoos.—1 PHeexiroosa 5:5.

Gubaaꞌiyan Deꞌiya Issippetettaa

9. PHauloosi ayyaanan tiyettida Kiristtaaneta bollaa qommotun leemisidoy aybissee?

⁹ Roome 12:4, 5, 9, 10 nabbaba. PHauloosi ayyaanan tiyettida Kiristtaaneta eta Huuphiyaa, Kiristtoosappe garssan issippetettan oottiya, issi bollaa giddon deꞌiya bollaa qommotun leemisiis. (Qolasiyaasa 1:18) I issi bollan dumma dumma oosoy deꞌiyo daro bollaa qommoti deꞌiyoogaanne eti “daro asa gidikkokka, Kiristtoosa baggaara issi asa” gidiyoogaa ayyaanan tiyettida Kiristtaaneta hassayissiis. Hegaara issi mala hanotan, PHauloosi Efisoonan deꞌiya tiyettida Kiristtaaneta: “Nuuni siiqotettan . . . huuphe gidiya Kiristtoosakko ubbaban diccanau bessees. Bolla giddon de7iya dumma dumma shaahoti aani issippe ohettidosona; qassi kumetta bollai baayyo imettida shaya ubban issoi issuwaara gaittidi, issippe ohetti uttiis; he dumma dumma shaahoti oottanau bessiyaagaa oottiyo wode, kumetta bollai siiquwan dicceesinne bana keexxees” yaagidi zoriis.—Efisoona 4:15, 16.

10. ‘Hara dorssati’ ammanidi ekkana koshshiyo aawatettay awugee?

¹⁰ ‘Hara dorssati’ Kiristtoosa bollaa shaaho gidana xayikkokka, ha leemisuwaappe darobaa tamaarana danddayoosona. (Yohaannisa 10:16) Yihooway: “Ubbabaa Kiristtoosa tohuwaappe garssan haarissiis; qassi Xoossai i ubbaban ubbaappe bollaara Goda gidanaadan, woosa keettaayyo a immiis” yaagidi PHauloosi yootiis. (Efisoona 1:22) Ha wodiyan, hara dorssati Yihooway ba Naꞌaa haaruwaa garssan wottido “ubbabaa” shaaho. Qassi eti ‘ammanettida wozannaama ashkkaraassi’ Kiristtoosi immido ‘abaa’ geetettiyaabatu shaaho. (Maatiyoosa 24:45-47) Hegaa gishshau, saꞌan deꞌiyo hidootay deꞌiyoogeeti, Kiristtoosi bantta Huuphe gidiyoogaa ammanidi ekkanau, qassi ammanettida wozannaama ashkkarau, Bollaara Heemmiyaagaunne gubaaꞌiyan cima gididi sunttettidaageetussi haarettana koshshees. (Ibraawe 13:7, 17) Hegee Kiristtaanetu giddon issippetettay deꞌanaadan maaddees.

11. Nu issippetettay baasettidoy aybiinee? PHauloosi zorido hara zoree woygiyaagee?

¹¹ Hegaa mala issippetettay baasettidoy “ubbabaa issippe shiishshi qachchiya” siiquwaana. (Qolasiyaasa 3:14) PHauloosi Roome shemppo 12n, nuuni “asa bessanau” siiqettana koshshennaagaa, qassi “issoi issuwaara ishanttudan” siiqettana koshshiyoogaa yootiyoogan hegaa qonccissiis. Hegee issoy issuwaa bonchanaadan oottees. PHauloosi: “issoi issuwaa bonchchiyoogan ufaittite” yaagiis. Nuuni siiquwaa bessenna ogiyan kehiyoogaara walakkana koshshenna. Gubaaꞌee geeshsha gidanaadan nuuyyo danddayettidabaa ubbaa oottana koshshees. PHauloosi siiquwaa xeelliyaagan zorido zoriyan gujjidi: “Iitabaa ixxite; lo77obaa minttidi oiqqite” yaagiis.

Imattaa Mokkiyoogaa

12. Imattaa mokkiyoogaa xeelliyaagan, beni Maqidooniyan deꞌida Kiristtaanetuppe ayba timirtte demmiyoo?

¹² Roome 12:13 nabbaba. Nu ishata siiqiyoogee “geeshshata koshshiyaaban,” qassi nuuyyo danddayettiyaaban maaddanaadan nuna denttettees. Nuuni hiyyeesa gidikkokka, nuuyyo deꞌiyaabaa haratuura shaakkana danddayoos. PHauloosi Maqidooniyan deꞌiya Kiristtaanetubaa: “Eti aadhdhido waayiyan wolqqaama paaciyaa paacettidosona; shin eti hiyyeesa gidikkokka, bantta immiyooban daro kehoosonanne qassi gita ufaissaa ufaittoosona. Aissi giikko, eti bantta wolqqa keenaa qassi harai atto bantta wolqqaappekka dariyaagaa dosidi immidoogau taani markka. Eti [Yihudan deꞌiya] geeshshata maaddiyo lo77o oosuwaa nunaara oottanau nuna daro woossidosona” yaagidi xaafiis. (2 Qoronttoosa 8:2-4) Maqidooniyan deꞌiya Kiristtaaneti hiyyeesa gidikkokka, daro keha. Eti banttau deꞌiyaabaappe Yihudan deꞌiya bantta ishanttussi immiyoogaa maatadan xeellidosona.

13. ‘Imattaa mokkiyoogaa’ giyoogee woygiyoogee?

¹³ “Imattaa mokkite” geetettidi birshshettida Giriike qaalay kasetiyoogaa bessiya qofaa oyqqiis. Zi Niwu Jerusalem Baybil giyo maxaafay he qofaa, “imattaa mokkiyo injjiyaa koyite” yaagidi birshshiis. Imattaa mokkiyoogaa issi issitoo bessiyoy qumaa shoobbiyoogaana; qassi siiquwan hegaadan oottiyoogee galatissiyaaba. Hegaa bolli, nuuni kasetidi bessiyaaba oottikko, imatta mokkiyo daro hanotay deꞌana danddayees. Issi hanotay, wolqqa woy payyatetta pacay nuuni harata qumaa shoobbennaadan diggikko, tukkiyaa woy hara ushshaa shoobbiyoogeekka imattaa mokkiyo oge.

14. (a) ‘Imattaa mokkiyoogaa’ geetettidi birshshettida Giriike qaalay woygiya naaꞌꞌu qaalatuppe merettidee? (b) Hara biitta asau qoppiyoogaa nu haggaazuwan waatidi bessana danddayiyoo?

¹⁴ Imattaa mokkiyoogee harata nuuni xeelliyo hanotaa bessiyaaba. ‘Imattaa mokkiyoogaa’ geetettidi birshshettida Giriike qaalay “siiquwaa” giya qaalaappenne “imattaa” giya qaalaappe merettidaagaa. Imattaa woy hara dere asaa nuuni waatidi xeelliyoo? Bantta gubaaꞌiyaa moottan deꞌiya hara biitta asau mishiraachuwaa yootanau hara qaalaa tamaaranau baaxetiya Kiristtaaneti imattaa mokkiyaageeta geetettana danddayoosona. Nuuppe darotu hanotay hara qaalaa tamaaranau danddayissennaagee tuma. Gidikkokka, nuuni ubbay Ubba Deriyaa Asau Yootiyo Mishiraachuwaa giya Inggilizetto bukleetiyaa goꞌettiyoogan hara biitta asaa maaddana danddayoos. He bukleetiyaa huuphe yohoy Inggilizettuwaana gidikkokka, daro qaalan giigida Geeshsha Maxaafaa qofay an deꞌees. Ha bukleetiyaa haggaazuwan goꞌettiyoogan neeni demmido loꞌꞌo temokroy deꞌii?

Haratuyyo Qarettiyoogaa

15. Roome 12:15n deꞌiya zoriyaa Yesuusi waatidi oosuwan bessidee?

¹⁵ Roome 12:15 nabbaba. Ha xiqisiyan deꞌiya PHauloosa zoree, qarettiyoogaa bessa giya naaꞌꞌu qaalan qonccana danddayees. Ufayssa gidin azzano gidin, haratussi siyettiyaabaa nuuni akeekananne etaara etadan hanana koshshees. Nuuni ayyaanan dochennaageeta gidikko, haratuura issippe ufayttiyoogeenne etau qarettiyoogee qonccidi beettees. Kiristtoosi erissiyo ashkkarati, 70ti, sibikate zamachaappe ufayttiiddi simmidi, demmido loꞌꞌo temokruwaa yootido wode, Yesuusi ba huuphe ‘geeshsha ayyaanan ufayttiis.’ (Luqaasa 10:17-21) I etaara issippe ufayttiis. Hara baggaara, a laggee Alꞌꞌaazaari hayqqido wode, Yesuusi ‘yeekkiya asaara yeekkiis.’—Yohaannisa 11:32-35.

16. Nuuni haratussi qarettiyoogaa waatidi bessana danddayiyoo? Ubba qassi, hegaadan oottana koshshiyay oonee?

¹⁶ Yesuusi haratussi qarettiyoogaa bessido leemisuwaa nuuni kaallanau koyoos. Issi Kiristtaane ishay woy michiyaa ufayttiyo wode, nuunikka etaara ufayttanau koyoos. Hegaadankka, nu ishatinne michoti metootiyoonne azzaniyo wode, nuuni qarettana koshshees. Qofan unꞌꞌettida nu mala Kiristtaaneti yootiyoobaa qaretan ezggiyoogan eta keehippe woppissana danddayoos. Qassi issi issitoo wozanappe qarettidi afuxxanakka danddayoos. (1 PHeexiroosa 1:22) Ubba qassi cimati, qarettiyoogaa xeelliyaagan PHauloosi zorido zoriyaa kaallana koshshees.

17. Roome shemppo 12ppe hanno gakkanaassi ay tamaaridoo? Kaalliya huuphe yohuwan ay beꞌanee?

¹⁷ Kiristtaane gidiyoogaadan nu huuphessinne nu ishatuura deꞌiya gaytotettan oosuwan peeshshana danddayiyo zoriyaa, hanno gakkanaassi beꞌido, Roome shemppo 12n deꞌiya xiqisetuppe demmida. Kaalliya huuphe yohuwan he shemppuwaappe attida paydota beꞌana. Hegeeti, nuna yedettiyaageetanne ixxiyaageeta gujjin, Kiristtaane gubaaꞌiyaappe kareera deꞌiyaageeta waatidi xeellananne oyqqana koshshiyaakko yootoosona.

[Tohossa qofata]

Zaarettanau

• “Ayyaanan dochennaageeta” gidiyoogaa waatidi bessana danddayiyoo?

• Nu huuphiyaa kaushshidi Xoossaayyo oottana koshshiyoy aybissee?

• Nu mala Kiristtaanetussi kehatettaanne qaretaa bessana danddayiyoy ayba ogetuunee?

[Sinttaa 12n deꞌiya misiliyaa]

Ha Kiristtaane oosota nuuni oottiyoy aybissee?

[Sinttaa 14n deꞌiya misiliyaa]

Hara biitta asati Xoossaa Kawotettaabaa tamaaranaadan nuuni ubbay waatidi maaddana danddayiyoo?