Yihoowa Gubaaꞌiyaa Giddon Neeni Keehi Alꞌꞌo!

1. Nuuyyo deꞌiya maatay aybee?

YIHOOWA gubaaꞌiyaa shaaho gidiyoogee nuussi gita maata! Gubaaꞌiyan nu ishanttuuranne michchonttuura Yihoowawu goynniyo wode keehi ufayttidi saruwan deꞌoos. Gubaaꞌiyan neessi deꞌiya oosoy aybee?

2. Kiitettida PHawuloosi ayyaanay denttettin xaafido dabddaabbetuppe unddennaageetun ay leemisuwaa goꞌettidee?

² Kiitettida PHawuloosi ayyaanay denttettin xaafido dabddaabbetppe unddennaageetun goꞌettido leemisuwaappe Gubaaꞌiyan nuussi deꞌiya oosuwaabaa darobaa tamaarana danddayoos. He dabddaabbetu ubban PHawuloosi gubaaꞌiyaa asaa bollaara geeddarssiis. Qassi gubaaꞌiyan deꞌiya asaa ubbaa huuphiyan huuphiyan bolla qommotun geeddarssiis.—Roo. 12:4-8; 1 Qor. 12:12-27; Efi. 4:16.

3. Nuuni ha huuphe yohuwan xannaꞌana heezzu yohoti aybee?

³ Nuuni ubbay Yihoowa gubaaꞌiyaa giddon keehi alꞌꞌo. Nuuni ubbay gubaaꞌiyaa minttana danddayoos. Nu zaree, nu qommoy, nu aqoy, nuussi heeran deꞌiya hanotay, nu wogay woy nu timirttiyaa hanotay aybanne gidin, nuuni ubbay gubaaꞌiyan keehi alꞌꞌo. PHawuloosi yootido leemisuwaappe nuuni tamaarana danddayiyo keehi koshshiya heezzubaa ha huuphe yohuwan beꞌana. Koyruwan, nuuni ubbay Yihoowa gubaaꞌiyaa giddon keehi alꞌꞌob gidiyoogaa tamaarana. Naaꞌꞌanttuwan, Yihoowa gubaaꞌiyan nuuni oottanabaa akeekanawu metootikko, ay oottana danddayiyaakko beꞌana. Qassi heezzanttuwan, Yihooway nuussi gubaaꞌiyan immido oosuwaa ubbatoo minnidi oottana koshshiyoy aybissakko xannaꞌana.

YIHOOWA GUBAAꞌIYAN NUUNI UBBAY OOTTIYO GITABAY DEꞌEES

4. Roome 12:4, 5⁠ppe nuuni ay tamaariyoo?

⁴ PHawuloosa leemisuwaappe nuuni tamaarana danddayiyo koyrobay, nuuni ubbay Yihoowa keettan keehi alꞌꞌo gidiyoogaa. PHawuloosi ba leemisuwaa hagaadan giidi doommiis: “Nu issi bollaa giddon, daro bollaa qommoti de7oosona; he qommotu ubbaukka dumma dumma oosoi de7ees. Hegaadan, nuuni daro asa gidikkokka, Kiristtoosa baggaara issi asa; qassi nuuni issi asatettaa qommotudan, issoi issuwaara oiqetti uttida.” (Roo. 12:4, 5) PHawuloosi woyganawu koyidee? Nuussi ubbawu gubaaꞌiyaa giddon dumma dumma aawatettay deꞌikkokka, nuuni ubbay keehi alꞌꞌo.

5. Yihooway gubaaꞌiyawu immido ‘imotay’ aybee?

⁵ Neeni gubaaꞌiyan alꞌꞌo gididaageeta qoppiyo wode, neeyyo koyro hassayettiyaageeti sunttettida ishantta gidana danddayoosona. (1 Tas. 5:12; Ibr. 13:17) Yihooway Kiristtoosa baggaara, attuma asata “imota” oottidi gubaaꞌiyawu immidoogee tuma. (Efi. 4:8) “Imota” gidida he attuma asati Bolla Gididi Heemmiyaagaa yarata, Bolla Gididi Heemmiyaagaa Maaddiyaageeta, Macara Biiruwaa Konttiyaa yarata, woradaa xomoosiyaageeta, Geeshsha Maxaafaa timirtte keettatun tamaarissiyaageeta, cimatanne gubaaꞌiyawu oottiyaageeta. Ha ishantti ubbay Yihoowa alꞌꞌo dorssata heemmanawunne gubaaꞌiyaa minttanawu geeshsha ayyaanan sunttettidosona.—1 PHe. 5:2, 3.

6. Geeshsha ayyaanan sunttettida ishantti, 1 Tasalonqqe 2:6-8y yootiyoogaadan ay oottanawu baaxetiyoonaa?

⁶ Ishantti dumma dumma oosota oottanaadan Geeshsha ayyaanan sunttettidosona. Kushiyaanne tohuwaa mala dumma dumma bollaa qommoti kumetta bollaa maaddanawu oottiyoogaadan, geeshsha ayyaanan sunttettida ishantti kumetta gubaaꞌiyaa maaddanawu minni oottoosona. Eti haratun sabettanawu baaxetokkona. Yaatiyoogaappe eti bantta ishanttanne michchontta minttettanawu baaxetoosona. (1 Tasalonqqe 2:6-8 nabbaba.) Bantta koshshaappe haratu koshshaa kaseyiya he ishantta Yihooway nuussi immido gishshawu, A keehi galatoos.

7. Ubba wode haggaaziya daroti demmiyo anjjoy aybee?

⁷ Gubaaꞌiyan deꞌiya issoti issoti misoonaawee, dumma aqinye, woy ubba wode haggaaziyaageeta gididi oottanaadan sunttettana danddayoosona. Qassi, kumetta saꞌan deꞌiya ishanttinne michchontti sabbakiyoonne erissiyo ashkkara oottiyo oosuwaa ubba wode oottanawu kuuyidosona. Yaatiyoogan, Yesuus Kiristtoosi erissiyo ashkkara gidanaadan eti daro asaa maaddidosona. Yihoowawu ubba wode haggaaziya darotussi daro miishshay woy aqoy deꞌana xayikkonne, loꞌꞌobaa etawu Yihooway darobaa immiis. (Mar. 10:29, 30) He alꞌꞌo ishanttanne michchontta nuuni siiqoos; qassi eti gubaaꞌiyaa yarata gidiyo gishshawu keehi galatoos.

8. Kawotettaa mishiraachchuwaa aassiyaageeti ubbay Yihoowawu keehi alꞌꞌo gididoy aybissee?

⁸ Gubaaꞌiyan alꞌꞌo gididaageeti sunttettida ishanttunne ubba wode haggaaziyaageetu xallee? Eta xalla gidokkona! Kawotettaa mishiraachchuwaa aassiyaageeti ubbay Xoossawunne gubaaꞌiyawu keehi alꞌꞌo. (Roo. 10:15; 1 Qor. 3:6-9) Ayssi giikko, asay nu Goday Yesuus Kiristtoosi erissiyo ashkkara gidanaadan maaddiyoogee gubaaꞌiyaa waanna halchchotuppe issuwaa. (Maa. 28:19, 20; 1 Xim. 2:4) Xammaqettidaageeta gidin xammaqettibeennaageeta gidin, sabbakiya ubbay he oosoy bantta deꞌuwan aybippenne aadhdhiyaaba gidanaadan baaxetoosona.—Maa. 24:14.

9. Kiristtaane michchontti nuussi alꞌꞌo gididoy aybissee?

⁹ Yihooway michchonttussi gubaaꞌiyan keehi koshshiya oosuwaa immiyoogan eta bonchchiyoogaa bessees. I bawu ammanettidi haggaaziya machchota, aayota, amꞌꞌetanne aqo oyqqibeenna michchontta alꞌꞌobadan xeellees. Geeshsha Maxaafay Xoossaa ufayssida, leemiso gidiya daro maccaasatubaa yootees. Eti aadhdhida eratettan, ammanuwan, minnidi oottiyoogan, xalatettan, kehatettaaninne loꞌꞌo oosuwan leemiso gidiyo gishshawu nashettidosona. (Luq. 8:2, 3; Oos. 16:14, 15; Roo. 16:3, 6; Pili. 4:3; Ibr. 11:11, 31, 35) Hegaa mala loꞌꞌo eeshshati deꞌiyo Kiristtaane maccaasati nu gubaaꞌiyan deꞌiyo gishshawu Yihoowa wozanappe galatoos.

10. Cimidaageeti nuussi alꞌꞌo gididoy aybissee?

¹⁰ Cimida daroti gubaaꞌiyan deꞌiyoogeekka nuna ufayssiyaaba. Issi issi gubaaꞌetun bantta deꞌo laytta ubban Yihoowawu ammanettidi haggaazida cimida ishanttinne michchontti deꞌoosona. Cimida harati mata wode Yihoowa Markka gidennan aggokkona. Eta hanotay ayba gidikkonne, eti cimatettaara gayttida dumma dummabay sakkishin baaxetiiddi deꞌana danddayoosona. He metotu gaasuwan eti gubaaꞌiyaaninne sabbakiyo oosuwan oottana danddayennabati deꞌennan aggokkona. Gidikkonne, he cimidaageeti haggaazuwan banttawu danddayettida keenaa oottoosona; qassi harata minttettanawunne loohissanawu bantta wolqqaa ubbaa goꞌettoosona! Qassi eti eridobaappe nuuni goꞌettoos. Eti Yihoowawunne nuuyyo tumukka alꞌꞌo.—Lee. 16:31.

11-12. Ne gubaaꞌiyan deꞌiya yelagati nena waati minttettidonaa?

¹¹ Yelagatubaakka qoppa. Eti Seexaana Dabloosi hariyoonne A iita qofay kummido alamiyan dicciyo gishshawu daro metoy eta gakkees. (1 Yoh. 5:19) Gidikkokka, yelagati shiiquwan oyshaa zaariyoogaa, haggaaziyoogaanne bantta ammanuwawu xalidi exatiyoogaa beꞌiyo wode nuuni ubbay minettoos. Yelagatoo, Yihoowa gubaaꞌiyan intte keehi alꞌꞌo!—Maz. 8:2.

¹² SHin, issi issi ishanttinne michchontti gubaaꞌiyan eti keehi alꞌꞌo gidiyoogaa ammananawu metootoosona. Gubaaꞌiyan nuuni issoy issoy keehi alꞌꞌo gididabadan qoppanaadan nuna aybi maaddana danddayii? Ane beꞌoos.

GUBAAꞌIYAN NEENI ALꞌꞌO GIDIYOOGAA AKEEKA

13-14. Issoti issoti gubaaꞌiyan maaddennabadan qoppana danddayiyoy aybissee?

¹³ PHawuloosa leemisuwaappe nuuni tamaariyo naaꞌꞌanttobay ha wodiyan daroti metootiyo metuwaa nuuni qoppanaadan oottees. Daroti gubaaꞌiyan eti alꞌꞌo gidiyoogaa ammananawu metootoosona. PHawuloosi hagaadan giis: “Tohoi, ‘Taani kushe gidenna gishshau, bollaa qommo gidikke’ giikko, i hegaa giyoogee bollaa qommo gidiyoogaa digganee? Haittaikka, ‘Taani aife gidenna gishshau, bollaa qommo gidikke’ giikko, i hegaa giyoogee bollaa qommo gidiyoogaa digganee?” (1 Qor. 12:15, 16) PHawuloosi nuna tamaarissiyoobay aybee?

¹⁴ Neeni gubaaꞌiyan deꞌiya haratuura nena geeddarssikko, neeni gubaaꞌiyan alꞌꞌo gidennabadan qoppiyoogaa doommana danddayaasa. Gubaaꞌiyan deꞌiya issoti issoti tamaarissiyo imotay deꞌiyoogeeta, loytti darajjayiyaageeta, woy loytti heemmiyaageeta gidana danddayoosona. Etaagaadan loytta oottana danddayennabadan neessi siyettana danddayees. Hegee neeni nena ziqqi oottiyoogaa bessees. (Pili. 2:3) SHin naagetta. Neeni dumma eray deꞌiyoogeetuura nena ubbatoo geeddarssikko, hidootaa qanxxana. PHawuloosi yootidoogaadan neeni gubaaꞌiyan aynne maaddennabadan qoppana danddayaasa. Hegaa mala qofaa agganaadan nena aybi maaddana danddayii?

15. Koyro Qoronttoosa 12:4-11 yootiyoogaadan, nu imotay ayba gidikkonne nuuni akeekana koshshiyaabay aybee?

¹⁵ Hagaa qoppa: Yihooway koyro xeetu layttan deꞌida amarida Kiristtaanetussi maalaalissiya geeshsha ayyaanaa imotaa immikkonne, ubba Kiristtaanetussi issi mala imota immibeenna. (1 Qoronttoosa 12:4-11 nabbaba.) Yihooway etawu dumma dummabaa oottiyo imota immikkonne, he ubba Kiristtaanetikka alꞌꞌo. Ha wodiyan, maalaalissiyaabaa oottiyo geeshsha ayyaanaa imotay nuussi baawa. SHin kaallidi deꞌiya maaray haꞌꞌikka oottees. Nuussi ubbawu issi mala imotay deꞌennan aggana danddayees; shin nuuni ubbaykka Yihoowawu alꞌꞌo.

16. Kiitettida PHawuloosi zorido ayba zoriyaa uuni oosuwan peeshshana koshshii?

¹⁶ Nuuni hara Kiristtaanetuura nuna geeddarssiyoogaa aggidi kiitettida PHawuloosi geeshsha ayyaanay denttettin hagaadan giidi zoridoogaa oosuwan peeshshana koshshees: “Asai ubbai huuphiyan huuphiyan ba oosuwaa paacco; hegaappe guyyiyan, hara asaagaara giigissennan, ba huuphe ooso xalaalan ceeqettiyoobaa demmana.”—Gal. 6:4.

17. Nuuni PHawuloosa zoriyaa oosuwan peeshshikko waani goꞌettanee?

¹⁷ PHawuloosi geeshsha ayyaanay denttettin zoridobaa oosuwan peeshshikko qassi nu oosuwaa qorikko, haratuyyo baynna imotay nuussi deꞌiyoogaa akeekiyoogaa doommana danddayoos. Leemisuwawu, issi cimay madirakiyaappe tamaarissiyo wode gooba gidennan aggana danddayees; shin I erissiyo ashkkara oottiyo oosuwan keehi gooba gidana danddayees. Woy I ba gubaaꞌiyan deꞌiya hara cimati oottiyoogaadan loytti darajjayiyaagaa gidennan aggana danddayees; shin I kehanne siiqiyaagaa, qassi ishanttinne michchontti Geeshsha Maxaafaappe zoriya A oychchanawu deexxennaagaa gidana danddayees. Woy I imattaa mokkiyoogan loytti erettiyaagaa gidana danddayees. (Ibr. 13:2, 16) Nuuni nu imotaa loytti eriyo wode, gubaaꞌiyawu nu oottana danddayiyoobay deꞌiyo gishshawu ufayttana. Qassi nuugaappe dummatiya imotay deꞌiyo nu ishantta qanaatennan aggana danddayoos.

18. Nuuni loytti tamaarissiyaageeta waani gidana danddayiyoo?

¹⁸ Gubaaꞌiyan nuuyyo deꞌiya aawatettay ayba gidikkonne, nuuni ubbay kaseegaappe loytti haggaazanawunne nu eraa gujjanawu keehi koyana bessees. Nuuni kaseegaappe loytti oottana mala Yihooway ba dirijjitiyaa baggaara dumma ogiyan loohissiiddi deꞌees. Leemisuwawu, saaminttawu gidduwan shiiqiyo shiiquwan haggaazuwan loytti tamaarissiyaageeta waani gidanaakko tamaaroos. Neeni he shiiquwan loohidobaa oosuwan peeshshanawu baaxetaydda deꞌay?

19. Kawotettaa Mishiraachchuwaa Yootiyaageetu Timirtte Keettan tamaaranawu halchidobaa polanawu waatana danddayay?

¹⁹ Kawotettaa Mishiraachchuwaa Yootiyaageetu Timirtte Keettay nuuni loohiyo hara oge. Ha timirtte keettan tamaarana danddayiyaageeti ubba wode haggaaziyaageetanne eta layttay 23⁠ppenne 65⁠ppe gidduwan deꞌiyo ishanttanne michchontta. He halchchoy neeni mule polana danddayennaba milatana danddayees. SHin, neeni tamaarana danddayenna gaasuwaa xaafiyoogaappe neeni yan tamaaranawu koyiyo gaasuwaa xaafa. Yaatada tamaaranawu neeppe koyettiyaabaa kunttanawu maaddiyaabaa oottanawu halchcha. Yihoowa maaduwaaninne neeppe koyettiyaabaa minnada oottiyoogan, neeyyo danddayettennabaa milatiyaabaa ne oottana danddayaasa.

NE IMOTAA GUBAAꞌIYAA MINTTANAWU GOꞌETTA

20. Nuuni Roome 12:6-8n deꞌiya qofaappe ay tamaarana danddayiyoo?

²⁰ PHawuloosa leemisuwaappe nuuni tamaarana heezzanttobay Roome 12:6-8n deꞌees. (Nabbaba.) Ha xiqisiyan PHawuloosi gubaaꞌiyan deꞌiyaageetussi dumma dumma imotay deꞌiyoogaa zaarettidi yootiis. SHin haꞌꞌi nuuyyo deꞌiya ay imotanne goꞌettidi nuuni gubaaꞌiyaa minttananne minttettana koshshiyoogaa I qonccissiis.

21-22. Robertappenne Felisappe ay tamaarana danddayiyoo?

²¹ Roberta giyo ishaa hanotaa qoppa. I kare biittan haggaazi simmidi, ba biittan deꞌiya Beeteelen haggaazanaadan maddabettiis. I mooridobi aybinne baynnaagaa ishantti minttidi yootikkonne, I hagaadan giis: “Taani taassi imettida oosuwaa maara oottabeennabadan tawu siyettido gishshawu, daro aginawu azzanaas. Taani Beeteelen oottiyoogaa agganawu koyido wodeti deꞌoosona.” I zaarettidi waani ufayttidee? Haꞌꞌi nuuyyo imettida oosuwaa loytti oottanaadan kase imettida ooso ubban Yihooway nuna loohissidoogaa issi cima ishay A hassayissiis. Roberti kase aadhdhidabaa qoppiyoogaa aggidi, I haꞌꞌi oottana danddayiyoobaa xallaa qoppana bessiyoogaa akeekiis.

²² Felis Epeskopo giyo ishaa hegaa malabay gakkiis. Inne A keettaayiyaa 1956n Giiliyaadeppe anjjettidosona; qassi Boliviyan woradaa oosuwaa oottidosona. Eti 1964n naꞌa yelidosona. Felisi hagaadan giis: “Nuuni siiqiyo oosuwaa aggiyoogee keehi metiis. Taani azzanaydda issi laytta gidiyaagaa takkidoogaa hassayays. SHin Yihooway maaddin ta qofaa laammada, aawa gidiyo ta ooratta aawatettaa loytta qoppaas.” Robertaagaadan woy Felisaagaadan neeyyo siyettii? Kaseegaa mala haggaazo maatay neeyyo haꞌꞌi baynna gishshawu azzanadii? Yaanikko, neeni ne qofaa laammada Yihoowanne ne ishantta haggaazanawu ne haꞌꞌi oottaydda deꞌiyoobaa loytta qoppikko ufayttana. Neeyyo deꞌiya imotaanne eraa harata maaddanawu ubbatoo goꞌetta; yaatikko, gubaaꞌiyaa minttiyo wode neeni ufayttana.

23. Nuuni takki giidi waatana koshshii, qassi kaalliya huuphe yohuwan ay beꞌanee?

²³ Nuuni ubbay Yihoowawu alꞌꞌo. Nuuni A so asaa yara gidanaadan I koyees. Nuuni nu ishanttanne michchontta minttanawu oottana danddayiyoobaa takki giidi qoppikkonne hegaa oottanawu minnidi baaxetikko, gubaaꞌiyan nuuni alꞌꞌo gidennabadan nuuyyo siyettennan aggana danddayees. Gubaaꞌiyan deꞌiya harata nuuni xeelliyo xeelay shin? Nuuni eta siiqiyoogaanne bonchchiyoogaa waati bessana danddayiyoo? Kaalliya huuphe yohuwan, ha keehi koshshiya qofaa beꞌana.