Xoossaa Imotaa Ubbaappe Aadhiyaagaa Nashshiyoogaa Bessiyo Ogiyaa
1. Nuuni Yihoowa keehippe galatana koshshiyoy aybissee?
1 Yihoowa ‘loꞌꞌo imota’ ubbaappe aadhiyaagee, i ba siiqo Naꞌaa baggaara giigissido wozuwaa. (Yaaq. 1:17) Hegee nu nagaraa atto giissiyoogaa gujjin, daro anjjuwaa demissees. (Efi. 1:7) Hegau nuuni ubbatoo galatoos. Kiristtoosa Hayquwaa Hassayiyo Baalaa wode, ha alꞌꞌo imotaa wodiyaa immidi wotti dentti qoppoos.
2. Nuuninne nu soo asay wozuwaa keehippe nashshanaadan waatana danddayiyoo?
2 Nu Soo Asay Keehippe Nashshanaadan Maaddiyoogaa: Nu soo asay keehippe nashshanaadan maaddanau, Kiristtoosa Hayquwaa Hassayiyo Baalaa bonchiyo Laappune 30ppe kasetiya saaminttatun So Asaa Goynuwaa omarssan wozuwaara gayttida qofaa zaarettiyoogee loꞌꞌo. Kiristtoosa Hayquwaa Hassayiyo Baalaa wode Geeshsha Maxaafaappe galla galla nabbabanaadan imettidaagaakka so asay issippe nabbabite. Wozoy inttena waati goꞌꞌidaagaakko, qassi Yihoowa, intte huuphiyaa, haratanne sinttanaabaa xeelliyaagan intte qofaa waati bochidaakko wotti dentti qoppite. He Baalaa wode yexxiyo naaꞌꞌu mazamureta, paydo 8nne 5 yexxiyoogaa meezetiyoogeekka goꞌꞌees.—Maz. 77:12.
3. Nashshiyoogaa waatidi bessana danddayiyoo?
3 Nashshiyoogaa Bessiyo Ogeta: Wozuwaa nashshiyoogee nuuni Yihoowabaanne i ba Naꞌaa kiittidoogan bessido gita siiquwaabaa haratussi yootanaadan denttettees. (Maz. 145:2-7) Issi issi keetta asay bantta giddoppe guxxiis giishin issi uri Laappuniyan, Hosppuniyaaninne Uddufuniyan kaafiya aqinye gidanaadan oottiyoogan nashshiyoogaa bessoosona. Hegee danddayettana xayikko, haggaazuwan daro wodiyaa aattana danddayeetii? (Efi. 5:16) Nashshiyoogee haratikka nunaara Kiristtoosa Hayquwaa Hassayiyo Baalaa bonchanaadan maaddana mala denttettees. (Ajj. 22:17) Zaaretti oychiyoogeetu, xinaatetu, dabbotu, issippe oottiyaageetunne shoorotu sunttaa xaafi oyqqidi shoobbite; qassi shoobiyaa woraqataa asau gishiyo zamachan inttiyo danddayettida ubbaa oottite.
4. Ha Baalaa bonchiyo wodiyaa waatidi suure goꞌettana danddayiyoo?
4 Yihooway asaassi immido imotaa keehippe nashshiyoogaa bessanau Kiristtoosa Hayquwaa Hassayiyo Baalaa wodee loꞌꞌo injje. Wozuwaanne “zawai bainna Kiristtoosa duretettaa” ubbaa keehippe nashshiyoogaa bessanau he wodiyaa goꞌꞌettiyaageeta gidoos.—Efi. 3:8.