XINAATE 6

Yootiyoobaara Xiqisiyaa Dabboyiyoogaa

Yohaannisa 10:33-36

TAMAARANABAA: Xiqisiyaa nabbabada hara qofaakko pinna aggoppa. Neeni nabbabido xiqiseenne yootiyo qofay aybin dabbotiyaakko ezggiyaageeti akeekanaadan ootta.

WAATANA DANDDAYAY?

Koyettiya qaalata dummaya. Issi xiqisiyaa nabbaba simmada, ne yootiyo waanna qofaara gayttiya qaalata qonccissa. Yaatanawu, he qaalata zaarettada nabbabana woy waannatiya qaalata ezggiyaageeti akeekanaadan oottiya oyshaa oychchana danddayaasa.

Xiqisiyaa qofaa hara qaalatun qonccissidaba gidikko, Geeshsha Maxaafan deꞌiya qaalati neeni yootido waanna qofaara waani gayttiyaakko ezggiyaageeti akeekanaadan ootta.
Qofaa loytta qonccissa. Issi xiqisiyaa nabbabana koyiyo gaasuwaa kasetada yootikko, he xiqisiyan deꞌiya ayfettiya qaalati neeni yootidobaara waani gayttiyaakko qonccissa.

Xiqisiyaa qofaa qonccissiyo wode, Geeshsha Maxaafaa dooya oyqqa. Yaatiyoogee, ezggiyaageeti neeni yootido qaalata nabbabido xiqisiyaara gattidi qoppanaadan maaddees.
Akeekanawu metenna ogiyan qonccissa. Waanna qofaara gayttennaabaa qonccissoppa. Ezggiyaageeti he allaalliyaabaa ay eriyaakko qoppada, eti he qofaa loyttidi akeekanaadan ay keenaa qonccissana koshshiyaakko kuuya.