Kehatettaa—Nuuni Haasayiyoobaaninne Oottiyooban Qoncciya Eeshshaa

KEHATETTAN oottiyoobay keehi minttettees! Issi uri nuuyyo qoppiyoogaa akeekiyo wode, nuuni galatoos. Harati nuussi kehatettaa bessiyoogaa nuuni ubbay dosiyo gishshawu, waanidi keha gidana danddayiyoo?

Issi uri keha gidanawu haratussi wozanappe qoppana koshshees, qassi eta maaddiyaabaa yootiyoogaaninne oottiyoogan etawu qoppiyoogaa bessana koshshees. Kehatettay oottiyooban qoncciyo gishshawu, loꞌꞌo asa milatiyoogaa xallay gidenna. Tumuppe keha gidanawu wozanappe siiqananne qarettana koshshees. Qassi, hegaa mala kehatettay Kiristtaaneti bessanaadan odettida Xoossaa geeshsha ayyaanaa ayfiyaa macara. (Gal. 5:22, 23) Nuuni keha gidana bessiyo gishshawu, Yihoowaynne A Naꞌay he eeshshaa waati bessidaakko, qassi nuuni eta leemisuwaa waati kaallana danddayiyaakko ane pilggoos.

YIHOOWAY UBBAWU KEHA

Yihooway ‘galatennaageetanne iitata’ gujjin, ubbawu kehanne qarettiyaagaa. (Luq. 6:35) Leemisuwawu, Yihooway “iita asaukka lo77o asaukka . . . ba awaa awaxxissees; qassi xillotuyyookka nagaranchchatuyyookka ba iraa bukissees.” (Maa. 5:45) Yaatiyo gishshawu, Yihooway banttana medhdhidoogaa ammanennaageetikka I deꞌuwawu giigissidobaa goꞌettoosona, qassi ufayttana danddayoosona.

Yihooway Addaamessinne Hewaanissi oottidoban I daroppe keha gidiyoogaa akeekoos. Addaameenne Hewaana nagaraa ootti simmidi daro takkennan “ettaa giyo mittaa haittaa sikkidi, banttayyo menttuwan gixxidosona.” SHin, Edeneppe kiyin, biittay “agunttanne kinddiichchuwaa” mokkanaadan qanggettidosan etawu giiga maayoy koshshiyoogaa Yihooway erees. Hegaa gishshawu, Yihooway adussa “itiyaa” giigissidi kehatettan etawu koshshiyaabaa immiis.—Doo. 3:7, 17, 18, 21.

Yihooway “iita asaukka lo77o asaukka” keha gidikkonne, I ammanettida ba ashkkaratussi kehanawu keehi koyees. Leemisuwawu, hananabaa yootiya Zakkaariyaasa wodiyan, issi kiitanchchay asay Yerusalaamen deꞌiya beeta maqidasiyaa zaarettidi keexxiyoogaa muleera aggido gishshawu yiillotiis. Yihooway kiitanchchaa qofissidabaa siyidi, “lo77onne minttettiya qaalan” zaariis. (Zak. 1:12, 13) Yihooway hananabaa yootiya Eelaasawukka hegaadan oottiis. Hananabaa yootiyaagee issi wode hidootaa qanxxidi, bana Yihooway woranaadan woossiis. Yihooway Eelaasawu siyettiyaabaa akeekidi, issi kiitanchchay A minttettanaadan kiittiis. Hegaa bollikka, hananabaa yootiyaagee barkka attibeennaagaa Xoossay ayyo yootiis. Eelaasi he keha haasayaa siyi simmidinne koshshiya maaduwaa demmidi, kaseegaadankka ba oosuwaa oottana danddayiis. (1 Kaw. 19:1-18) Ufayssiya Yihoowa eeshsha gidida kehatettaa Xoossaa ashkkaratun ooppenne aaruwan bessiday oonee?

YESUUSI DARO KEHA ASA

Yesuusi saꞌan haggaaziyo wode kehanne qarettiyaagaa gidiyoogan erettees. I mule meqettaa iita woy naaqqiya asa gidenna. I qarettidi, “Daafuranchchatoo, deexuwaa tookkiyaageetoo, ubbati taakko haa yiite; taani inttena shemppissana” yaagiis. (Maa. 11:28-30) Asay Yesuusa kehatettaa gaasuwan, I awa biikkonne A kaalliis. Yesuusi etawu “qarettidi” eta miziis, sahettidaageeta pattiis, qassi eta ba Aawaabaa “darobaa” tamaarissiis.—Mar. 6:34; Maa. 14:14; 15:32-38.

Yesuusi haratu hanotaa akeekidi eta oyqqidoogee I daro keha gidiyoogaa bessees. Yesuusi baayyo injjetana xayikkonne, wozanappe bana koyiya ubbata I kehatettan mokki ekkiis. (Luq. 9:10, 11) Leemisuwawu, I yayyida maccaasiyo seeribeenna; he maccaasiyaa geeshsha gidana xayikkonne, goggiya suuttay aggana gaada ammanettido gishshawu, A maayuwaa bochchaasu. (Wog. 15:25-28) Yesuusi 12 layttawu waayettida he maccaaseeyyo qarettidi, O hagaadan giis: “Ta na7ee, nena ne ammanoi pattiis; saruwan ba, ne waayiyaappenne paxa.” (Mar. 5:25-34) Hegee keehi maalaaliya kehatettaa bessiyaaba!

NUUNI KEHA GIDANAWU HARATUYYO LOꞌꞌOBAA OOTTANA KOSHSHEES

Tumu kehatettay oosuwan qoncciyoogaa qommoora beꞌido leemisotuppe akeekoos. Yesuusi Samaare biittaa bitaniyaabaa yootido leemisuwan oosoy koshshiyoogaa qonccissiis. Samaare asay Ayhuda asaara morkke gidikkonne, he leemisuwan panggati bonqqidi, shocidi, ogiyan hayquwaappenne paxaappe gidduwan yeggidi biido bitaniyawu Samaare biittaa bitanee qarettiis. Kehatettay Samaare biittaa bitanee issibaa oottanaadan denttettiis. I he bitaniyaa masunttaa tiyidinne qachchidi imattay aqiyo sohuwaa A efiis. Samaare biittaa bitanee, qohettida bitaniyaa xeellanaadan imattay aqiyo sohuwaa naagiyaagaassi miishshaa immiisinne kessiyo hara miishshakka qanxxanaagaa yootiis.—Luq. 10:29-37.

Kehatettay darotoo oosuwan qoncciyaaba gidikkonne, wozanappe qoppidi minttettiyaabaa haasayiyoogankka bessana danddayettees. Hegaa gishshawu, “hirggiyoogee asa ufaissaa” diggikkonne, “shonggaara de7iya haasayai” ufayssiyoogaa Geeshsha Maxaafay yootees. (Lee. 12:25) Nuuni haratuyyo kehanne loꞌꞌo gidiyo wode, eta minttettiyaabaa haasayana, qassi hegee eti ufayttanaadan maaddana.a Nuuni kehabaa haasayiyoogee etassi qoppiyoogaa bessees. Eta hegee minttettin, gakkiya metuwan genccanaagee eta metenna.—Lee. 16:24.

WAANI KEHA GIDANA DANDDAYIYOO?

Asa ubbay “Xoossaa leemisuwan” merettido gishshawu, keha gidana danddayees. (Doo. 1:27) Leemisuwawu, kiitettida PHawuloosa naagidi Rooma efiida Rooma wotaaddaratu halaqay Yuuliyoosi Sidoona kataman “PHauloosassi kehidi a, ‘Ne dabboti nena maaddana mala, neeni etakko baanau danddayaasa’ yaagiis.” (Oos. 27:3) Amarida wodiyaappe guyyiyan, Maltta asay markkabee meqqin waayettida PHawuloosassinne haratussi “daro kehaa kehidosona.” Qohettidaageeti hoꞌꞌana mala, he haruuruwaa asati tamaa eettidosona. (Oos. 28:1, 2) Eti oottidobay galatissiyaaba; shin nuuni tumuppe keha gidanawu, issi issitoo haratuyyo kehabaa oottiyoogaa xallay gidenna.

Yihooway kehatettay nuussi eeshshanne nu deꞌuwan ubbatoo qoncciyaaba gidanaadan koyees. Yaatiyo gishshawu, nuuni kehatettaa ‘maayanaadan’ Yihooway nuussi yootees. (Qol. 3:12) SHin he loꞌꞌo eeshshaa ubbatoo bessanawu nuuni metootiyoogee qoncce. Aybissi? Nuuni dungguuxiyoogee, yayyiyoogee, woy asay nuna eqettiyoogee woy issi issitoo nu xallaa siiqiyoogee nuuni kehatettaa bessennaadan diggana danddayees. Gidikkokka, geeshsha ayyaanan ammanettiyoogaaninne Yihooway kehatettaa bessido ogiyaa kaalliyoogan hegaa mala metuwaa xooni kiyana danddayoos.—1 Qor. 2:12.

Nuuni kaseegaappe aaruwan kehana danddayiyo ogeta shaakki erana danddayiyoo? Nuuni nuna hagaadan oychchana koshshees: ‘Taani qaretan ezggiyaanaa? Taani haratuyyo koshshiyaabaa akeekiyaanaa? Nu so asa woy tawu mata lagge gidenna urawu taani wurssettan kehidoy awudee?’ Yaatidi, nunaara darotoo gayttiya asaa, ubba qassi Kiristtaane gubaaꞌiyan deꞌiyaageeta loytti eranawu halchchana danddayoos. Yaatiyoogan, eta hanotaanne etassi koshshiyaabaa shaakki erana danddayoos. Yaati simmidi, nuuni eta gidiyaakko asi nuussi kehanaadan koyiyo ogiyan nuuni etawu kehanawu baaxetana koshshees. (Maa. 7:12) Wurssettan, nuuni keha gidanaadan maaddana mala Yihoowa woossikko, I nuna maaddana.—Luq. 11:13.

KEHATETTAY HARATI TUMAA DOSANAADAN OOTTEES

PHawuloosi I Xoossaa ashkkara gidiyoogaa erissiyaabaa yootiiddi ‘kehatettaakka’ gujjiis. (2 Qor. 6:3-6) PHawuloosi kehatettan oottidobaaninne haasayidoban etawu qoppiyoogaa bessido gishshawu, asay akko shiiqiis. (Oos. 28:30, 31) Hegaadan, nuuni keha gidiyo wode asay tumaa dosana danddayees. Nuna eqettiyaageeta gujjin, nuuni ubba asawu kehiyo wode, hegee eta wozanaa denttettananne eta qofaa laammana danddayees. (Roo. 12:20) Guyyeppe, eti Geeshsha Maxaafaabaa ufayttidi tamaarana danddayoosona.

Gannate gidiya saꞌan hayquwaappe denddiya keehi daro asay tumu kehatettan ufayttanaagee qoncce; geella etawu hegee koyro beꞌiyooba gidana danddayees. Etikka hegaa nashshidi haratuyyo kehana. He wode, kehatettaa bessanawunne harata maaddanawu koyenna ooninne gannatiyan merinawu deꞌana danddayenna. Hara baggaara qassi, eti merinawu deꞌanaadan Xoossay koyido asati issoy issuwaa siiquwaaninne kehatettan oyqqana. (Maz. 37:9-11) He alamee woppu giidi sarotettan deꞌiyo keehi loꞌꞌo soho gidana! SHin, he maalaalissiya wodee yaana gakkanaashin, nuuni kehiyoogan haꞌꞌi waani goꞌettana danddayiyoo?

KEHIYOOGAA GOꞌꞌAA

Geeshsha Maxaafay, “Keha asi baassi lo77obaa oottees” yaagees. (Lee. 11:17) Asay keha ura dosees; qassi etikka awu kehanawu koyoosona. Yesuusi, “Intte harau immanau likkidi makkiyooban Xoossai [“izaawu,” NW] intteyyo likkidi immana” yaagiis. (Luq. 6:38) Hegaa gishshawu, keha asi loꞌꞌo lagge demmanawunne laggetettan deꞌanawu metoottenna.

Kiitettida PHawuloosi Efisoona gubaaꞌiyawu hagaadan giis: “Issoi issuwaayyo kehitenne qarettite, . . . issoi issuwaayyo atto giite.” (Efi. 4:32) Gubaaꞌiyan deꞌiya ubbay issoy issuwawu kehiyaanne issoy issuwaa maaddanawu koyiya qarettiya Kiristtaane gidiyo wode, gubaaꞌee goꞌettees. Eti qohiyaabaa haasayanawu, boranawu, woy cayanawu mule qoppokkona. Eti zigiriyoogaappe, bantta inxxarssan harata maaddanawu baaxetoosona. (Lee. 12:18) Hegaappe denddidaagan, gubaaꞌee minneesinne ufayssan Yihoowawu haggaazees.

Ee, kehatettay haasayiyoobaaninne oottiyooban qonccees. Nuuni kehiyo wode, siiqiyaanne keha gidida nu Xoossaa, Yihoowa leemisuwaa kaalloos. (Efi. 5:1) Yaatiyo wode, nu gubaaꞌee minnees, qassi harati geeshsha goynuwaa goynnana mala maaddoos. Simi yaakko, keha asa gidiyoogan ubbatoo erettoos!