Ammanettida Kiitanchchatu Leemisuwa Kaalla

1-2. (a) Nuuni kiitanchchatuppe waani dummatiyoo? (b) Kiitanchchatuura nuna issi mala oottiyabati awugeetee?

NUUNI Yihoowa asaa gidiyo gishshawu, awu goynniya issoy issuwara siiqettiya A soo asa. Kumetta saꞌan deꞌiya ishanttanne michchontta gujjin, daro miiloone kiitanchchatikka A soo asa. (Dane. 7:9, 10) Nuuni kiitanchchatubaa qoppiyo wode, eti nuuppe keehi dummatiyogaa hassayana danddayoos. Leemisuwawu, asay merettanaappe daro wodiyappe kase kiitanchchati deꞌoosona. (Iyy. 38:4, 7) Wolqqan eti nuuppe daroosona. Qassi nuuni nagaranchcha gidiyo gishshawu eti nuuppe aaruwan geeshshanne xillo.—Luq. 9:26.

² Kiitanchchati nuuppe daroban dummatikkokka, nuna etaara issi mala oottiya unddennabati deꞌoosona. Leemisuwawu, kiitanchchatuugaadan nuuni ufayssiya Yihoowa eeshshata bessana danddayoos. Kiitanchchatuugaadan, nuussikka koyidobaa dooriyo maatay deꞌees. Etaagaadan nuuyyo buzo sunttay, eeshshaynne dumma dumma aawatettay deꞌees. Qassi nuunikka etaagaadan nuna Medhdhidaagawu goynnana koshshees.—1 PHe. 1:12.

3. Ammanettida kiitanchchatuppe nuuni ay tamaarana danddayiyoo?

³ Nuna kiitanchchatuura issi mala oottiya darobati deꞌiyo gishshawu eti oottidobay nuna minttettana danddayees. Qassi keehi koshshiya darobaa etappe tamaarana danddayoos. Nuuni ammanettida kiitanchchatuugaadan nuna ziqqi oottiyageeta, asaa siiqiyageeta, gencciyageetanne galchchaa geeshshatettaa naagiyageeta waani gidana danddayiyakko ha huuphe yohuwan beꞌana.

KIITANCHCHATI BANTTANA ZIQQI OOTTOOSONA

4. (a) Kiitanchchati banttana ziqqi oottiyogaa waati bessiyonaa? (b) Kiitanchchati banttana ziqqi oottiyoy aybissee? (Mazamure 89:7)

⁴ Ammanettida kiitanchchati banttana ziqqi oottoosona. Eti daro meezee deꞌiyogeeta, wolqqaamatanne hayyottiyageeta gidikkonne, Yihoowa azazota poloosona. (Maz. 103:20) Yihooway etawu immido aawatettaa poliyo wode, bantta oottidoban mule ceeqettokkona woy bantta wolqqaa goꞌettidi harati etan xeelaa wottanaadan oottokkona. Eta sunttaa harati mule erana xayikkokka, eti Yihooway azaziyoba ubbaa ufayssan oottoosona.a (Doo. 32:24, 29; 2 Kaw. 19:35) Yihoowawu bessiya bonchchuwa eti banttawu ekkana koyokkona. Kiitanchchati banttana ziqqi oottiyoy aybissee? Eti Yihoowa siiqiyonne wozanappe A bonchchiyo gishshataassa.—Mazamure 89:7 nabbaba.

5. Issi kiitanchchay Yohaannisa seeriyo wode bana ziqqi oottiyogaa waati bessidee? (Misiliyakka xeella.)

⁵ Kiitanchchati banttana ziqqi oottiyogaa bessiya issi taarikiya ane beꞌoos. Sunttay odettibeenna issi kiitanchchay 96 M.L., heeran keehi malaalissiya ajjuutaa kiitettida Yohaannisa bessiis. (Ajj. 1:1) He malaalissiya ajjuutaa beꞌido wode Yohaannisi waanidee? I kiitanchchawu goynnanawu maliis. Shin he kiitanchchay I hegaadan oottennaadan sohuwara diggiis; yaatidi hagaadan giis: “Hegaa oottoppa. Taani ne malanne . . . ne ishanttu ubbaa mala ashkkara. Xoossaayyo goinna.” (Ajj. 19:10) He kiitanchchay bana ziqqi oottiis! I sabettanawu koyibeenna. He kiitanchchay Yohaannisi Xoossaa Yihoowawu goynnanaadan sohuwara yootiis. I Yohaannisappe aadhdhiyabadan qoppibeenna. He kiitanchchay Yohaannisaagaappe daro wodiyawu Yihoowawu haggaazidaagaanne aagaappe aadhdhiya daro wolqqay deꞌiyogaa gidikkonne, I bana ziqqi oottidi Yohaannisa ba mala ashkkara yaagiis. Qassi I Yohaannisa seerana koshshikkokka, meqetti baynna ogiyan hegaadan oottibeenna. Ubba I kehatettan haasayissiis. Yohaannisi beꞌidoban keehi malaalettidoogaa I akeekennan aggenna.

6. Kiitanchchatuugaadan nuna waati ziqqi oottana danddayiyoo?

⁶ Kiitanchchatuugaadan nuna waati ziqqi oottana danddayiyoo? Nuunikka nu oottidoban ceeqettennan woy hegawu bonchchuwa koyennan aggiyogan nu aawatettaa polana danddayoos. (1 Qor. 4:7) Hegaa bollikka, nuuni adussa wodiyawu Yihoowawu haggaazido gishshawu woy haratussi baynna aawatettay nuussi deꞌiyo gishshawu nuuni etappe aadhdhoos giidi qoppana koshshenna. Nuussi daro aawatettay deꞌikko, nuuni haratuppe guuxxiyabadan qoppana koshshees. (Luq. 9:48) Kiitanchchatuugaadan nuuni harata haggaazanawu koyoos. Nuuni haratuppe aadhdhiyaba milatanawu koyokko.

7. Nuuni issi ura seerana woy zorana koshshikko nuna ziqqi oottiyogaa waati bessana danddayiyoo?

⁷ Leemisuwawu, nu mala Kiristtaaniya woy nu naꞌa zorana koshshiyo wode, nuna ziqqi oottiyogaa bessana danddayoos. Issi issitoo nuuni mintti zoriyogee koshshana danddayees. Shin Yohaannisa kehatettan seerida kiitanchchaadan, nuuni issi ura zoriyo wode he uri hidootaa qanxxanaadan oottenna ogiyan mintti zorana danddayoos. Nuuni haratuppe aadhdhiyabadan qoppennaba gidikko, bonchchuwaninne siiquwan Geeshsha Maxaafaappe zorana danddayoos.—Qol. 4:6.

KIITANCHCHATI ASAA SIIQOOSONA

8. (a) Kiitanchchati asaa siiqiyogaa Luqaasa 15:10y waati bessii? (b) Sabbakiyo oosuwan kiitanchchati nuna waati maaddiyonaa? (Misiliyakka xeella.)

⁸ Kiitanchchati asaa bolli haniyabaa xaasayi xeellokkona woy nuna pattenna asadan xeellokkona. Eti asaa siiqoosona. Gita nagaraa oottida uri zilꞌꞌettidi laamettiyo wode woy Yihoowawu haggaaziyogaa aggida uri zaarettidi awu haggaaziyo wode eti ufayttoosona. Eti issi uri Yihoowabaa tamaariyogaa doommiyo wodenne awu haggaazanawu ba deꞌuwan issi issibaa laammiyo wodekka ufayttoosona. (Luqaasa 15:10 nabbaba.) Qassi kiitanchchati nuuni sabbakiyo wode nuna maaddoosona. (Ajj. 14:6) Kiitanchchati asawu sabbakana xayikkonne, eti Yihoowabaa eranawu koyiya uraakko nuna kaalettana danddayoosona. Kiitanchchati ubba hanotatunkka nuna kaalettoosona gaana danddayokko. Ayssi giikko, Yihooway dumma dumma ogeta goꞌettana danddayees; leemisuwawu abaa eranawu koyiya asaa maaddanawu woy ba ashkkarata etakko kaalettanawu geeshsha ayyaanaa goꞌettees. (Oos. 16:6, 7) I kiitanchchatu baggaarakka nuna maaddees. Yaatiyo gishshawu, nuuni mishiraachchuwa yootiyo wode kiitanchchati nuna maaddiyogaa ammanettana danddayoos.—“Eti Bantta Woosaa Zaaruwa Demmidosona” giya saaxiniya xeella.

9. Kiitanchchatuugaadan asaa waati siiqana danddayiyoo?

⁹ Kiitanchchatuugaadan asaa waati siiqana danddayiyoo? Galchchaappe kiyida uri simmidoogaa erissoy odettiyo wode, nuuni kiitanchchatuugaadan ufayttana danddayoos. Nuuni nu ishaa siiqiyogaanne I zaarettidi Yihoowawu haggaaziyogan nu ufayttiyogaa bessana danddayoos. (Luq. 15:4-7; 2 Qor. 2:6-8) Nuuni sabbakuwa oosuwan nuussi danddayettida ubbabaa oottiyogankka kiitanchchatu leemisuwa kaallana danddayoos. (Era. 11:6) Qassi nuuni mishiraachchuwa yootiyo wode kiitanchchati nuna maaddiyogaadan, nuunikka haggaazuwan nu ishanttanne michchontta maaddiyo ogiya koyana danddayoos. Leemisuwawu, mata wode aassiyagaa gidida uraara nuuni haggaazana danddayoos. Woykko cimida woy sahettiya ishanttuuranne michchonttuura issippe haggaaziyogan eta maaddana danddayoos.

10. Saarippe nuuni ay tamaarana danddayiyoo?

¹⁰ Shin Yihoowa haggaazuwan nuuni koyiyogaa keena haggaazennaadan nu hanotay diggikko waatana danddayiyoo? Haggaazuwan kiitanchchatuura issippe oottiyo hara ogiya demmana danddayoos. Hindde biittan deꞌiya Saarob giyo michchee hanotaa beꞌa. Saara 20 gidiya layttawu aqinye gida haggaazaydda takkada keehi sahettaasu; qassi hiittaappe denddana danddayabeykku. A keehi unꞌꞌettaasu. Shin galchchan deꞌiya ishanttinne michchontti O maaddido gishshawunne A ubba galla Geeshsha Maxaafaa nabbabiyo gishshawu leddan leddan zaarettada ufayttana danddayaasu. A haggaaziyo hara ogeta meezetana koshshiis. A hiittaappe denddada dabddaabbiya xaafana danddayenna gishshawu silkke xalaalan markkatawusu. Yaaniyo gishshawu, A zaarettada oychchiyogeetussi dawaliyo wode eti Geeshsha Maxaafaa xannaꞌanawu koyiya haratubaa iyyo yootidosona. Kaallidi aybi hanidee? Saara Geeshsha Maxaafaa xannaꞌana koyiya 70 asaa amarida aginatun demmaasu! Hegaa gishshawu, A amaridaageeta galchchan deꞌiya haratussi immaasu. Etappe daroti haꞌꞌi shiiqota shiiqoosona. Saariigaadan sabbakuwa oosuwan banttawu danddayettida ubbabaa oottiya ishanttuuranne michchonttuura issippe oottiyogan kiitanchchati ay keena ufayttaneeshsha!

KIITANCHCHATI GENCCOOSONA

11. Ammanettida kiitanchchati gencciyogaa waati bessidonaa?

¹¹ Ammanettida kiitanchchati gencciyogan nuussi keehi loꞌꞌo leemiso. Eti daro shaꞌu layttawu pirdda pacaanne iitatettaa genccidosona. Issi wode etaara Yihoowawu haggaazida Seexaanaynne hara daro kiitanchchati Yihoowa bolli makkalishin eti beꞌidosona. (Doo. 3:1; 6:1, 2; Yih. 6) Iita ayyaanaara daro gallassawu baaxetida ammanettida kiitanchchaabaa Geeshsha Maxaafay yootees. (Dane. 10:13) Hegaa bollikka, asi deꞌido wode ubban kiitanchchati amarida asatu xalaalay Yihoowawu goynniyogaa beꞌidosona. Ha ubbabay deꞌishinkka, ammanettida kiitanchchati ubbatoo ufayssaaninne yeemuwan Yihoowawu haggaazoosona. Bessiya wodiyan Xoossay naaqo ubbaa xayssanaagaa eti eroosona.

12. Genccanaadan nuna aybi maaddana danddayii?

¹² Kiitanchchatuugaadan waani genccana danddayiyoo? Kiitanchchatuugaadan, pirdda pacay gakkishin nuuni beꞌana woy naaqoy nuna gakkana danddayees. Shin etaagaadan nuunikka Xoossay bessiya wodiyan iitatettaa ubbaa xayssanaagaa eroos. Yaatiyo gishshawu, nuuni ammanettida kiitanchchatuugaadan ‘loꞌꞌobaa oottiyogaa aggokko.’ (Gal. 6:9) Nuuni genccanaadan maaddanawu Xoossay qaalaa geliis. (1 Qor. 10:13) Yihooway nuuni danddayanchchanne ufayttiyageeta gidanaadan maaddiya ba geeshsha ayyaanaa immanaadan woossana danddayoos. (Gal. 5:22; Qol. 1:11) Naaqoy nena gakkikko shin? Yihoowan wozanappe ammanetta; qassi yayyoppa. Yihooway nena ubbatoo maaddananne minttana.—Ibr. 13:6.

KIITANCHCHATI UBBATOO GALCHCHAA GEESHSHATETTAA NAAGOOSONA

13. Wurssetta gallassatun kiitanchchatuyyo imettida dumma oosoy aybee? (Maatiyosa 13:47-49)

¹³ Ha wurssetta gallassatun, Yihooway kiitanchchatuyyo dumma oosuwa immiis. (Maatiyosa 13:47-49 nabbaba.) Kumetta saꞌan deꞌiya daro miiloone asay mishiraachchuwa siyanawu koyees. Etappe amaridaageeti tumu Kiristtaane gidanawu issi issiban laamettikkokka harati yaatibookkona. ‘Xillotu giddoppe nagaranchchata shaakkanaadan’ kiitanchchatuyyo aawatettay imettiis. Hegaa giyogee eti galchchaa geeshshatettaa naaganaadan sunttettidosona giyogaa. Shin hegee Yihoowawu haggaaziyogaa dumma dumma gaasotun aggidaageeti ubbay mule simmana danddayokkona giyogaa gidenna. Qassi hegee galchchan ayba metoynne merettenna giyogaakka gidenna. Shin kiitanchchati galchchaa geeshshatettaa naaganawu minni oottiyogaa ammanettana danddayoos.

14-15. Kiitanchchatuugaadan nuuni galchchaa geeshshatettaa naaganawu keehi koyiyogaa waati bessana danddayiyoo? (Misiliyakka xeella.)

¹⁴ Kiitanchchatuugaadan nuuni galchchaa geeshshatettaa naaganawu keehi koyiyogaa waati bessana danddayiyoo? Nuuni Yihoowara dabbotaa minttidi deꞌanawu loytti baaxetana koshshees. A siiqiyageetuura laggetiyogaaninne nuuni aara dabbotido dabbotaa mooriya aybippenne haakkiyogan hegaadan oottoos. Yaatiyogan, galchchay geeshsha gididi deꞌanaadan maaddoos. (Maz. 101:3) Qassi nu mala Kiristtaaneti Yihoowawu ammanettidi deꞌanaadankka maaddana danddayoos. Leemisuwawu, nu mala Kiristtaanee gita nagaraa oottidoogaa nuuni erikko waatana koshshii? Nuuni he ura siiqiyo gishshawu, he uri cimatuura haasayana koshshiyogaa yootana danddayoos. He uri yaatana xayikko, nuuni hegaabaa cimatussi yootana koshshees. Ayyaanaaban shuggida issi uri sohuwara maaduwa demmanaadan koyoos!—Yaaq. 5:14, 15.

¹⁵ Azzanttiyabay, gita nagaraa oottidaageetuppe amaridaageeti galchchaappe kiyoosona. Hegaa mala wodiyan, nuuni etaara ‘zuppettiyogaa aggoos.’c (1 Qor. 5:9-13) Ha giigissoy galchchay geeshsha gidanaadan maaddees. Hegaa bollikka, galchchaappe kiyidaageetuura zuppetennan aggiyogan etawu kehatettaa bessoos. Nuuni Yihoowawu azazettidi etaara zuppetennan aggiyogee eti Yihoowakko simmana koshshiyogaa akeekanaadan maaddana danddayees. Eti simmiyo wode, nuunikka Yihoowaranne A kiitanchchatuura keehi ufayttoos.—Luq. 15:7.

16. Neeni kiitanchchatu leemisuwa ayba ogetun kaallanawu baaxetay?

¹⁶ Yihooway nuuni kiitanchchatubaa eranaadaaninne etaara oottanaadan maataa immiyogan nuna keehi bonchchiis! Nuuni etaagaadan nuna ziqqi oottiyageeta, asaa siiqiyageeta, gencciyageetanne galchchay kandduwaninne ayyaanaaban geeshsha gidanaadan keehi koyiyageeta gidoos. Nuuni ammanettida kiitanchchatu leemisuwa kaallikko, merinawu Yihoowawu goynniya A so asaa gidana danddayoos.