1925—Xeetu Layttaappe Kase

NAAGIYOGAA AGGIBOOKKONA

Geeshsha Maxaafaa Tamaaretuppe daroti 1925n saꞌay Gannate gidana giidi qoppidosona. Hegaa xeelliyagan guyyeppe Oosuwa Kaalettiya Citan oottida Ishaa Albert Shiroderi hagaadan giis: “Tiyettida Kiristtaaneti 1925n saluwa baana, qassi Abrahaamanne Daawita mala ammanettida asati hayquwappe denddidi saꞌan sintta xeera gididi kaalettana giidi nuuni qoppida.” Hegaadan hanibeenna gishshawu amarida ishatinne michchoti azzanidosona.—Lee. 13:12.

Eti azzanikkokka, Geeshsha Maxaafaa Tamaaretuppe daroti mishiraachchuwa yootiyogaa aggibookkona. Qassi etawu keehi koshshiya oosoy Yihoowabaa markkattiyogaa gidiyogaa loytti akeekidosona. Leemisuwawu, eti eraadooniyan daro asawu waati markkattidaakko ane beꞌoos.

ERAADOONE XAABETA KEEXXIDOSONA

Daro asay 1924n WBBR giyo eraadoone xaabiya siyiis. Yaaniyo gishshawu, Geeshsha Maxaafaa Tamaareti 1925n Ilinoyen, Chikago matan hara wolqqaama eraadoone xaabiya keexxidosona. He ooratta eraadoone xaabiya sunttay WORD geetettees. He xaabiya keexxiyogan maaddida Ralf Lefileri, haahuwan deꞌiya daro sohotun asay “balgguwan qammi” he eraadoone xaabiya ezggiyogaa yootiis. Leemisuwawu, 5,000ppe dariya kilo meetire haakkiyasan, Alaskan, Paylet Isteshin giyo kataman deꞌiya issi keettaa asay koyro prograametuppe issuwa ezggiis. He keettaa asay hegaa ezggidi, he eraadoone xaabiyan oottiyageeti ayyaanaaban minttettiyabaa sissido gishshawu galatanawu dabddaabbiya xaafiis.

Tisaase 1, 1925 Wochchiyo Keelay he eraadoone xaabee keehi haahosan siyettana danddayidoy aybissakko qonccissiis. Hagaadan giis: “WORD eraadoone xaabee Amarkkan deꞌiya keehi wolqqaama xaabetuppe issuwa. Amarkkan arshshonne arggo bagga abbaa xanxxan, Kuuban qassi Alaskan huuphessa baggan haahuwan deꞌiya asay he xaabiya ezggana danddayees. Tumaa siyi erenna daro asay he xaabiya ezggidi gujjidi eranawu koyiis.”

He wode, Geeshsha Maxaafaa Tamaareti Kanaadankka mishiraachchuwa eraadooniyan yootanawu baaxetoosona. Saskachuwanen, Saskatune kataman, 1924n, Geeshsha Maxaafaa Tamaareti CHUC giyo eraadoone xaabiya keexxidosona. Hegee Kanaadan haymaanoote eraadoone xaabetu koyroogeetuppe issuwa. Eti 1925n, he eraadoone xaabiya aakkiya harasaa efaana koshshiis. Hegaa gishshawu, dirijjitee shammido Saskatunen deꞌiya, Rijent Bilding giyo beni tiyatire keettaa ooraxissidi ishati he eraadoone xaabiya yaa efiidosona.

He xaabiya gaasuwan Saskachuwanen qeeri katamatuuninne gaxariyan deꞌiya daroti mishiraachchuwa koyro siyidosona. Leemisuwawu, haaho sohuwan deꞌiya Gramo giyo maccaasiya issi prograamiya ezggada Geeshsha Maxaafaabaa yootiya xuufiya kiittanaadan dabddaabbiyan oychchaasu. Ishaa Jorj Nashi A keehi eesuwan maaddanaadan koyidaba milatido gishshawu, Istadis in ze Iskiripchers giyo maxaafata ubbaa kiittidoogaa yootiis. Hegaappe simmin daro takkennan, Grama Kawotettaa mishiraachchuwa keehi haahosaa gakkanaashin yootaasu.

KEEHI KOSHSHIYA TUMAA ERIDA

Laappune 1, 1925 Wochchiyo Keelan “Deree Yelettiyogaa” giya keehi koshshiya huuphe yohoy kiyiis. Ha huuphe yohoy keehi koshshiyoy aybissee? Geeshsha Maxaafaa Tamaareti Seexaanay daydanttata, worddo haymaanooteta, kawotettatanne zalꞌꞌiya dirijjiteta hariyogaa eridosona. Gidoppe attin, “ammanettida wozannaama ayllee” Seexaanaa dirijjitiyappe keehi dummatiyanne hegaa eqettiya dirijjitee Yihoowassikka deꞌiyogaa ishatinne michchoti akeekanaadan he huuphe yohuwa baggaara maaddiis. (Mat. 24:45) Qassikka, Xoossaa Kawotettay 1914n yelettidoogaanne he laytti ‘saluwan denddida olaa’ gaasuwan Seexaanaynne daydanttati saluwappe yibidettidoogaa, qassi haꞌꞌi saluwa simmana danddayennaagaa he ayllee qonccissiis.—Ajj. 12:7-9.

Issoti issoti ha ooratta qofaa maayanawu metootidosona. Hegaa gishshawu, he huuphe yohoy hagaadan giis: “Wochchiyo Keelaa nabbabiyageetuppe ha ooratti akeekido qofaa maayennaageeti deꞌikko, eti danddayan naagananne Yihoowayyo ammanettidi haggaazana koshshees.”

Shin Birttaaniyan deꞌiya Tom Iyire giyo kolpoltteree (haꞌꞌi aqinye geetettees) he huuphe yohuwan qonccida qofaa xeelliyagan Geeshsha Maxaafaa Tamaaretuyyo siyettidabaa hagaadan giis: “Ajjuutaa 12 hegaadan qonccissidoogee ishata keehi ufayssiis. Xoossaa Kawotettay saluwan eqqidoogaa nuuni eri simmidi, he mishiraachchuwa haratussi yootanawu keehi yeemottida. Hegee kaseegaappe gujjidi mishiraachchuwa yootanaadan denttettiisinne Yihoowi sinttappe oottana malaalissiyabaa nuuni akeekanaadan maaddiis.”

YIHOOWABAA MARKKATTIYOGAA

Ha wodiyan Yihoowa Markkati Isiyaasa 43:10n deꞌiya qofaa loytti eroosona; xiqisee: “GODAI hagaadan yaagees; ‘Intte ta markkata;’ . . . ‘Taani doorido ta ashkkarati inttena.’” Gidoppe attin, 1925ppe kase ha xiqisee nu xuufetun darotoo odetti erenna. Shin hanotay laamettiis. Wochchiyo Keelay 1925n Isiyaasa 43:10ninne 12n deꞌiya qofaa, 11 maxeetetun qonccissiis!

Geeshsha Maxaafaa Tamaareti 1925n Naase aginaa wurssettan, Indiyanan, Indiyanapolisen gita shiiquwa shiiqidosona. Ishaa Razerfordi he gita shiiquwa yiida asaa hashshu saro yiideta giyobaa xaafiis. I xaafidobay he shiiquwa prograamiyan attamettiis. Hagaadan gees: “Godaappe wolqqaa demmidi soo simmiyo wode abaa kaseegaappe aaruwan mishiraachchuwa yootanawu nuuni ha gita shiiquwa yiida.” He hosppun gallassa shiiqoy, shiiqidaageeti demmido injje ubban Yihoowabaa markkattanaadan minttettiis.

Qeera gallassi, Naase 29n, Ishaa Razerfordi “Denttettiyabaa” giya cuccuman haasayaa haasayiis. I he haasayan mishiraachchuwa yootiyogee keehi koshshiyogaa hagaadan qonccissiis: “Yihoowi ba asawu hagaadan gees: ‘Taani Xoossaa gidiyoogau taayyo intte markkata.’ Yaatidi, I eta hagaadan giidi mintti azaziis: ‘Asaayyo . . . banddiraa essite!’ Godaa ayyaanay deꞌiyonne hegaa gishshawu abaa markkattiya [A asaappe] haray ooninne saꞌan asaayyo banddiraa woy malaataa essenna.”—Isi. 43:12; 62:10.

Ishaa Razerfordi haasayaa wurssi simmin, asay ubbay Xoossaa Kawotettaa xalaalay “sarotettaa anjjuwawu, duretettawu, payyatettawu, merinaa deꞌuwawu, laꞌatettawunne merinaa ufayssawu” kane gidiyogaa qonccissiya “Hidootaa Kiitaa” maachchaa maacettiis. He maachchay guyyeppe daro doonaatun birshshettidi trakttedan attamettiis. Yaatin, 40 miiloone gidiya trakttee asawu imettiis.

Geeshsha Maxaafaa Tamaareti amarida layttay aadhdhanaashin Yihoowa Markkata geetettiichchibookkona. Shin eti Yihoowabaa markkattiyogee keehi koshshiyogaa he wode loytti akeekiyogaa doommidosona.

SIYANAWU KOYIYA ASATA ZAARETTI OYCHCHIYOGAA

Kumetta saꞌan Geeshsha Maxaafaa Tamaaretu qooday gujji gujji bin, mishiraachchuwa siyanawu koyida asata zaaretti oychchana mala dirijjitee minttettiis. Hidootaa Kiitaa giyo trakttiya zamachchan asawu immi simmin, Buletina giyo xuufee hagaadan giis: “Hara xuufiya immana xayikkonne, Hidootaa Kiitaa trakttiya immido keettata zaaretti biidi oychchite.”

Ichchashe 1925 Buletin xuufee Tekisasen, Plano kataman deꞌiya Geeshsha Maxaafaa Tamaaree yootidobaa hagaadan giis: “Ooratta moottan mishiraachchuwa yootiyogaappe aaruwan kase haggaazido moottan asaa zaaretti oychchiyo wode loꞌꞌo ayfee beettiyogan ufayttida. Aadhdhida tammu layttan nu haggaazo moottan issi guutta katamaa asaa ichchashutoo zaaretti oychchida. . . . Mata wode, Michchiya Hendrikisanne ta aayyiya zaaretti biidi asawu mishiraachchuwa yootidosonanne awudeegaappenne daro maxaafaa immidosona.”

Panama biittan deꞌiya issi kolpoltteree hagaadan giidi xaafiis: “Taani koyro mishiraachchuwa yootanawu bin siyanawu koyibeenna daroti, naaꞌꞌanttoo woy heezzanttoo biido wode bantta qofaa laammidosona. Ha laytti taani kase haasayissido asata darotoo zaaretta oychchaas; qassi etappe amaridaageetu zaaroy keehi ufayssees.”

SINTTANAABAA HALCHCHIYOGAA

Ishaa Razerfordi he layttaa wurssettan kolpoltteretu ubbaayyo xaafido dabddaabbiyan he laytti oosettidabaa odidi, sinttappe oottanawu halchchidobaa qonccissiis. I hagaadan giis: “Ha laytti, mishiraachchuwa yootiyogan azzanida darota intte minttettideta. Yaatiyogan keehi ufayttideta. . . . Yiya laytti, Xoossaabaanne A Kawotettaabaa intte markkattiyonne tumuppe ayyo goynniya asata gidiyogaa bessiyo qaadaa demmana. . . . Issippe gididi nu Xoossaanne nu Kawuwa sabbanawu yexxiyageeta gidoos.”

Ishati 1925 wurssettan, Birukiliine Beeteele keettaa aassidi keexxanawu halchchidosona. Dirijjitee 1926n, hegaappe kase keexxi erenna gita keettaa keexxiyogaa doommiis.