Neeni Yihoowa Sinttan Keehi Alꞌꞌo!

1-2. Yihoowa sinttan nuuni alꞌꞌo gidiyogaa ammanettanaadan nuna aybi maaddana danddayii?

YIHOOWA ashkkarati awu keehi alꞌꞌo. Shin etappe amaridaageeti banttana pattenna asadan xeelloosona. Geella issi uri eti banttana pattenna asadan xeellanaadan oottennan aggenna. Hegaa malabay nena gakki erii? Yaanikko, Yihoowa sinttan neeni alꞌꞌo gidiyogaa mintta ammanettanaadan nena aybi maaddana danddayii?

² Yihoowi nuuni asaa waati oyqqanaadan koyiyakko qonccissiya taariketa Geeshsha Maxaafaappe nabbabiyogee nena maaddana danddayees. A Naꞌay Yesuusi asaa bonchchuwaninne kehatettan oyqqiis. Yaatiyogan, banttana pattenna asadan xeelliyageeta inne A Aaway xoqqu ootti xeelliyogaa Yesuusi bessiis. (Yoh. 5:19; Ibr. 1:3) Ha huuphe yohuwan, (1) asay Yihoowa sinttan alꞌꞌo gidiyogaa akeekanaadan Yesuusi waati maaddidaakko, qassi (2) nuuni Xoossaa sinttan alꞌꞌo gidiyogaa waani ammanettana danddayiyakko beꞌana.—Hag. 2:7.

ASAY YIHOOWA SINTTAN ALꞌꞌO GIDIYOGAA AKEEKANAADAN YESUUSI WAATI MAADDIDEE?

3. Yesuusi maaduwa koyidi baakko yiida Galiilaa asaa waatidee?

³ Yesuusi Galiilan mishiraachchuwa yootiyo wode I tamaarissiyobaa siyanawunne bantta harggiyappe paxanawu daro asay akko yiis. Yesuusi, harati “eta naaqqiyogaanne heemmiya asi baynna dorssadan yeggi bayidoogaa beꞌiis.” (Mat. 9:36) Haymaanootiya kaalettiyageeti eta karoosona; ubba qassi ‘qanggettidaageeta’ giidi xeesoosona. (Yoh. 7:47-49) Shin Yesuusi wodiya bazzidi eta tamaarissiyogaaninne harggiyappe eta pattiyogan bonchchiyogaa bessiis. (Mat. 9:35) Hegaa bollikka, I darota maaddanawu, kiitettidaageeti mishiraachchuwa yootanaadan loohissiisinne hargganchchata pattanaadan azaziis.—Mat. 10:5-8.

4. Harati kariyo asata Yesuusi oyqqido ogiyappe nuuni ay tamaariyoo?

⁴ Yesuusi I yootiyobaa ezggiyageeta bonchchiyogaaninne kehatettan oyqqiyogan, harati darotoo kariyogeeta inne A Aaway alꞌꞌobadan xeelliyogaa bessiis. Neeni Yihoowawu haggaazaydda A sinttan alꞌꞌo gidiyogaa sirikko, Yesuusi baappe tamaaranawu koyidi yiidaageeta waati oyqqidaakko loytta qoppa. Yaatiyogee Yihoowa sinttan neeni keehi alꞌꞌo gidiyogaa akeekanaadan maaddana danddayees.

5. Galiilan Yesuusaara gayttida maccaasee hanotaa qonccissa.

⁵ Yesuusi daro asaa tamaarissiyogaa xalaala gidennan, asaa huuphiyan huuphiyankka maaddiis. Leemisuwawu, Yesuusi Galiilan mishiraachchuwa yootiyo wode 12 layttawu suuttay goggi wayssido issi maccaaseera gayttiis. (Mar. 5:25) Muuse Higgee yootiyogaadan, A tuna gidiyo gishshawu O bochchiya ooninne tuna gidees. Hegaappe denddidaagan, A haratuura gayttana danddayukku. Hegaa bollikka, A haratuura Yihoowawu goynnananne baalata bonchchana danddayukku. (Wog. 15:19, 25) Hegaa gishshawu, he maccaasiya sahettiyogaa xalaala gidennan, bana pattenna asadankka xeellennan aggukku.—Mar. 5:26.

6. Suuttay goggiyo maccaasiya paxanawu ay oottadee?

⁶ Keehi waayettiya he maccaasiya Yesuusi O pattanaadan koyaasu. Shin sittan bana pattanaadan oychchabeykku. Aybissi? A ba harggiyappe denddidaagan keehi yeellatido gishshawu gidennan aggenna. Woy Higgee yootiyogaadan A tuna gidaydda asaa giddo gelido gishshawu, Yesuusi O hanqqettana gaada yayyennan aggukku. Yaatiyo gishshawu, paxanaagaa ammanettada A maayuwa macaraa bochchaasu. (Mar. 5:27, 28) A mintta ammanido gishshawu ba sahuwappe paxaasu. Yesuusi bana bochchiday oonakko oychchido wode A ba oottido ubbabaa yootaasu. Yaatin Yesuusi waatidee?

7. Keehi waayettiya maccaasiyo Yesuusi waati maaddidee? (Marqqoosa 5:34)

⁷ Yesuusi he maccaasiyo kehatettaaninne bonchchuwan oyqqiis. A ‘yayyidoogaanne kokkoridoogaa’ I akeekiis. (Mar. 5:33) Yesuusi iyyo siyettiyabaa akeekidi O keehi minttettiis. Ubba I “ta naꞌꞌee” giidi O xeegiyogan bonchchiyogaa xalaala gidennan, iyyo qarettiyogaanne qoppiyogaa bessiis. (Marqqoosa 5:34 nabbaba.) Geeshsha Maxaafan Yesuusi maccaasaa “ta naꞌꞌee” giidi xeegidoy ha sohuwa xalaalaana. Ha hanotan I hagaadan xeegidoy A keehi yayyidoogaa akeekido gishshawu gidennan aggenna. A ay keena woppu giidaakko qoppa! Yesuusi hegaadan giidi haasayiyogan, maayuwa macaraa bochchido gishshawunne asaa giddo gelido gishshawu, bana mooranchchadan xeellennaadankka O minttettiis. Qassi saluwan deꞌiya siiqiya Aawaa sinttan A tumuppe alꞌꞌo gidiyogaa akeekanaadan Yesuusi O maaddiis.

8. Brazilen deꞌiya michchiyo gakkida paacee aybee?

⁸ Ha wodiyankka Xoossaa ashkkaratuppe amaridaageeti sahettiyo gishshawu unꞌꞌettananne banttana pattenna asadan xeellana danddayoosona. Brazilen ubba wode aqinye gidada haggaaziya Maariyaa yelettiyo wode naaꞌꞌu gedeenne haddirssa kushee iyyo baa. A hagaadan gaasu: “Ta bollaa pacaa gaasuwan timirtte keettan tana ubbatoo qilliiccoosona. Tanaara tamaariyageeti tana boriyogaa bessiya hara sunttaa tawu kessidosona. Haray atto, nu soo asaykka tana coo ixxees.”

9. Maariya Yihoowa sinttan alꞌꞌo gidiyogaa akeekanaadan O maaddidabay aybee?

⁹ Maariyo maaddidabay aybee? A Yihoowa Markka gidido wode, ishatinne michchoti O minttettidosona; qassi A Yihoowagaadan bana xeellanaadan maaddidosona. A hagaadan gaasu: “Tana daro ishatinne michchoti maaddidosona! Galchchan keehi loꞌꞌo so asaa tawu immido gishshawu Yihoowa wozanappe galatays.” Maariya Xoossaa sinttan alꞌꞌo gidiyogaa ammanettanaadan ishatinne michchoti O maaddidosona.

10. Magddala Mayraama waayettanaadan oottida metoy aybee? (Misiliyakka xeella.)

¹⁰ Yesuusi Magddala Mayraamo waati maaddidaakko akeeka. I bolli laappun daydanttati deꞌoosona! (Luq. 8:2) He daydanttati iyyo hara asaagaappe dummatiya eeshshay deꞌanaadaaninne asay ippe haakkanaadan oottennan aggokkona. Ooninne O siiqennabadaaninne maaddennabadan qoppada keehi yayyennan aggukku. Yesuusi Magddala Mayraamippe daydanttata kessin, A guyyeppe Yesuusa kaalliyaro gidaasu.

11. Magddala Mayraama Xoossaa sinttan alꞌꞌo gidiyogaa akeekanaadan Yesuusi waati maaddidee? (Misiliyakka xeella.)

¹¹ Magddala Mayraama Xoossaa sinttan alꞌꞌo gidiyogaa akeekanaadan Yesuusi O maaddanawu harabaa ay oottidee? Yesuusi mishiraachchuwa yootanawu Magddala Mayraamakka banaara baanaadan shoobbiis.b Hegaappe denddidaagan, I harata tamaarissiyo wode siyada goꞌettaasu. Qassi Yesuusi hayquwappe denddido gallassi iyyo qoncciis. Yesuusi he gallassi haasayissido A kaalliyageetuppe koyriya O. Haray atto Yesuusi hayquwappe denddidoogaa kiitettidaageetussi yootanaadan aawatettaa iyyo immiis. Yesuusi ha ubbabata oottiyogan Yihoowa sinttan A tumuppe alꞌꞌo gidiyogaa akeekanaadan O maaddiis!—Yoh. 20:11-18.

12. Lidiya harati bana siiqennabadan qoppanaadan oottidabay aybee?

¹² Magddala Mayraamiigaadan, ha wodiyan daroti ooninne banttana siiqana danddayennabadan qoppoosona. Isppeenen deꞌiya Lidiyo giyo michchiya I aayyiya O shaarido wode he shaaraa kesissanawu qoppidoogaa yootaasu. Lidiya guuttan deꞌishinkka I aayyiya O sheneho giyogaanne iyyo meqettaa iitiyogaa hassayawusu. A hagaadan gaasu: “Ta aayyiya tana siiqenna gishshawu harati tana siiqanaadaaninne ta lagge gidanaadan ubbatoo koyays. Ta aayyiya tana iita asa gaada ammanttido gishshawu, taani ay oottinkka harati tana mule siiqokkona gaada yayyaas.”

13. Lidiya Yihoowa sinttan alꞌꞌo gidiyogaa akeekanaadan O maaddidabay aybee?

¹³ Lidiya Geeshsha Maxaafaa xannaꞌiyogaa doomma simmin hanotay laamettiis. A Yihoowa woossiyogee, Geeshsha Maxaafaa nabbabiyogeenne ishatinne michchoti haasayiyobaaninne oottiyoban kehatettaa iyyo bessidoogee A Yihoowa sinttan alꞌꞌo gidiyogaa akeekanaadan O maaddiis. A hagaadan gaasu: “Ta keettaaway tana keehi siiqiyogaa darotoo tawu yootees. Taayyo deꞌiya loꞌꞌo eeshshata I tana ubbatoo hassayissees. Ta loꞌꞌo laggetikka hegaadan oottoosona.” Lideegaadan, Yihoowa sinttan alꞌꞌo gidiyogaa akeekanaadan maaddana koshshiyo uri intte galchchan deꞌikko, haasayiyobaaninne oottiyoban kehatettaa bessiyogan maaddana danddayaasa.

YIHOOWAGAADAN NUNA WAATI XEELLANA DANDDAYIYOO?

14. Koyro Sameela 16:7y nuuni nuna Yihoowagaadan xeellanaadan waati maaddii? (“Yihoowi Ba Asaa Alꞌꞌobadan Xeelliyoy Aybissee?” giya saaxiniyakka xeella.)

¹⁴ Yihoowi nena alamiya asaagaadan xeellennaagaa hassaya. (1 Sameela 16:7 nabbaba.) Yihoowi alamiya asaagaadan, ne meraa, deretettan neeyyo deꞌiya sohuwa, woy ne timirttiya xeellenna. (Isi. 55:8, 9) Yaaniyo gishshawu, alamiya asaagaadan gidennan, Yihoowagaadan nena xeellanawu baaxeta. Issi issitoo banttana pattenna asadan xeellida Eelaasa, Naaꞌoominne Haanni mala asatubaa Geeshsha Maxaafay yootees. Etabaa nabbabiyo wode, Yihoowi eta ay keena siiqidaakko akeeka. Yihoowi nena siiqiyogaanne nashshiyogaa bessido ne deꞌuwan hanidabata xaafanakka danddayaasa. Hegaa bollikka, Yihoowi nuna alꞌꞌobadan xeelliyogaa yootiya nu xuufetun deꞌiya qofata nabbabana danddayaasa.c

15. Yihoowi Daaneela alꞌꞌobadan xeellidoy aybissee? (Daaneela 9:23)

¹⁵ Neeni ammanettiyogee Yihoowa sinttan alꞌꞌo gidanaadan oottiyogaa hassaya. Xoossay erissidobaa yootiya Daaneelawu geella layttay 100 matido wode I keehi daafuriisinne hidootaa qanxxiis. (Dane. 9:20, 21) Yihoowi A waati minttettidee? Xoossay A keehi ‘dosiyogaa’ woy I alꞌꞌo gidiyogaanne A woosaa siyidoogaa Daaneela hassayissanawu kiitanchchaa Gabreela kiittiis. (Daaneela 9:23 nabbaba.) Daaneeli Xoossaa sinttan alꞌꞌo gidanaadan oottidabay aybee? Daaneeli xillonne ammanettiya asa. (Hiz. 14:14) Yihoowi nuna minttettanawu ha taarikee Geeshsha Maxaafan xaafettanaadan oottiis. (Rom. 15:4) Neeni xillobaa oottiyonne ammanettiyo gishshawu, Yihoowi nenakka alꞌꞌobadan xeellees. Qassi Yihoowi Daaneela woosaa siyidoogaadan ne woosaakka siyana.—Mik. 6:8; Ibr. 6:10.

16. Siiqiya Aawadan Yihoowa xeellanaadan nena aybi maaddana danddayii? (Misiliyakka xeella.)

¹⁶ Siiqiya Aawadan Yihoowa xeella. I nena maaddanawu koyeesippe attin, ne balaa qoranawu koyenna. (Maz. 130:3; Mat. 7:11; Luq. 12:6, 7) Hegaa wotti dentti qoppiyogee banttana pattenna asadan xeelliya darota maaddiis. Leemisuwawu, Isppeenen deꞌiya michchee Misheeli hanotaa beꞌa. Daro layttawu I azinay O kawushshidi cayido gishshawu, ooninne O siiqennabadan qoppaasunne bana pattenna asadan xeellaasu. A hagaadan gaasu, “Taani tana pattenna asadan xeelliyo wode ubban Yihoowi tana siiquwan idimmiyabadaaninne naagiyabadan qoppanawu baaxetays.” (Maz. 28:9) Tohossa Afirkkan deꞌiya michchiya Lawuriina hagaadan gaasu: “Yihoowi siiqo wodoruwan tana baakko kehatettan goochchidi ehiidaba, ha ubba layttatun aara dabbotada deꞌanaadan maaddidaba, qassi harata tamaarissanaadan tana goꞌettidaba gidikko, I tana alꞌꞌobadaaninne maaddiyabadan xeelliyogaa ammanettana danddayays.”—Hoo. 11:4.

17. Yihoowi nenan ufayttiyogaa ammanettanaadan aybi maaddana danddayii? (Mazamure 5:12) (Misiliyakka xeella.)

¹⁷ Yihoowi nenan ufayttiyogaa ammanetta. (Mazamure 5:12 nabbaba.) Yihoowi xillotun ufayttiyogaanne eta gita ‘gonddalliyadan’ naagiyogaa Daawiti yootiis. Yihoowi nenan ufayttiyogaanne I nena maaddiyogaa eriyogee neeni nena pattenna asadan xeelliyogaa agganaadan maaddana danddayees. Yihoowi nenan ufayttiyogaa waata erana danddayay? Qommoora beꞌidoogaadan nuuni hegaa ammanettanaadan, Yihoowi ba Qaalaa baggaara yootiis. Hegaa bollikka, I cimata, mata laggetanne harata goꞌettidi neeni A sinttan keehi alꞌꞌo gidiyogaa nena hassayissees. Harati nena minttettiyo wode ne ay oottana koshshii?

18. Harati nena galatiyo wode neeni ammanettada ekkana koshshiyoy aybissee?

¹⁸ Nena eriyanne dosiya asati nena wozanappe galatiyo wode ammanada ekka. Yihoowi nenan ufayttiyogaa neeni akeekanaadan maaddanawu he asata goꞌettana danddayiyogaa hassaya. Qommoora ibaa denttido Misheela hagaadan gaasu: “Harati kehatettan tana nashshiyogaa ammananawu leddan leddan baaxetaydda deꞌays. Hegaa ammaniyogee metiyaba, shin Yihoowi taani yaatanaadan koyiyogaa erays.” Misheela cimati siiquwan maaddidoogaappekka goꞌettaasu. A haꞌꞌi ubba wode aqinye gidada haggaazawusu; qassi sooppe Beeteele oosuwa maaddawusu.

19. Neeni Xoossaa sinttan keehi alꞌꞌo gidiyogaa ammanettana danddayiyoy aybissee?

¹⁹ Nuuni saluwan deꞌiya nu Aawaayyo keehi alꞌꞌo gidiyogaa Yesuusi kehatettan hassayissiis. (Luq. 12:24) Yaatiyo gishshawu, Yihoowi nuna alꞌꞌobadan xeelliyogaa ammanettana danddayoos. Hegaa mulekka dogennaageeta gidoos! Qassi harati Xoossaa sinttan keehi alꞌꞌo gidiyogaa akeekanaadan maaddanawu, nuussi danddayettida ubbabaa oottiyageeta gidoos!