Hunyo

Ginbendisyonan ni Jehova an mga Kristiano ha siyahan nga siglo kay nagpahiuyon hira ha nagbabag-o nga mga kahimtang. Agsob hira pagtimarauton, usahay ha panahon nga diri gud nira ginlalaoman. Hunahunaa an nahitabo kanda Bernabe ngan apostol Pablo samtang nagsasangyaw hira ha Listra. Ha siyahan, malipayon nga gin-abiabi hira han mga namati ha ira. Pero ha urhi, “ginkombinse [han mga nakontra] an mga tawo,” ngan an iba ha ira nagbato kan Pablo ngan ginbayaan nira hiya kay kahuna nira nga patay na hiya. (Buh. 14:19) Pero hira Bernabe ngan Pablo padayon nga nagsangyaw ha iba nga lugar. Ano an nagin resulta? Nakahimo hira hin “damu nga disipulo,” ngan an ira mga pulong ngan ehemplo nagparig-on ha ira mga igkasi-tumuroo. (Buh. 14:​21, 22) Damu an nakabenepisyo kay hira Bernabe ngan Pablo waray umundang bisan pa han tigda nga pagtimaraot. Kon diri kita maundang ha buruhaton nga iginsusugo ni Jehova ha aton, bibendisyonan kita. w23.04 16-17 ¶13-14

Hi Hadi David inatubang hin damu nga peligroso nga kaaway ha bug-os niya nga kinabuhi, ngan agsob hiya mangaro han bulig ni Jehova pinaagi ha pag-ampo. Sigurado hi David nga ginpamatian ngan ginbaton ni Jehova an iya mga pag-ampo. Makakasarig ka liwat hito. An Biblia nagpapasarig ha aton nga maihahatag ha aton ni Jehova an kinaadman ngan kusog nga ginkikinahanglan ta basi makailob. Puydi niya gamiton an aton espirituwal nga pamilya o bisan adton diri pa nagsisingba ha iya ha pagkayana basi buligan kita ha anoman nga paagi. An paagi han pagbaton ni Jehova ha aton mga pag-ampo bangin diri pirme amo an aton ginlalaoman, pero maaram kita nga babatunon niya ito. Ihahatag niya kon ano gud an aton ginkikinahanglan ngan ha panahon nga ginkikinahanglan ta gud ito. Salit padayon nga mag-ampo nga may pagtoo, ngan sarig nga aatamanon ka ni Jehova yana ngan iya ‘tatagbawon an hingyap han tagsa nga buhi nga linarang’ ha tiarabot nga bag-o nga kalibotan.​—Sal. 145:16. w23.05 8 ¶4; 13 ¶17-18

Maopay nga magpokus ha mga bendisyon nga nakakarawat han pagkab-ot han imo tumong. Ano nga mga bendisyon an puydi mo pokusan? Kon tumong mo nga pauswagon an imo pagbasa han Biblia o pag-ampo, hunahunaa kon paonan-o hito mapaparig-on an imo pakigsangkay kan Jehova. (Sal. 145:​18, 19) Kon tumong mo nga magkultibar hin Kristiano nga kalidad, pagpokus ha kon paonan-o hito mapapauswag an imo relasyon ha iba. (Col. 3:14) Puydi mo ilista an tanan nga rason kon kay ano nga karuyag mo makab-ot an imo tumong. Regular nga kitaa ito nga lista. Sugad man, pakig-upod hadton magdadasig ha imo nga kab-uton an imo tumong. (Prob. 13:20) Pero an tinuod, may mga panahon nga waray kita gana nga kab-uton an aton tumong. Karuyag sidngon ba nga waray kita mahihimo para makab-ot ito? Diri. Puydi la gihap kita maningkamot nga makab-ot an aton tumong bisan ha mga panahon nga waray kita hingyap. Bisan kon magkikinahanglan ito hin disiplina ha kalugaringon, sulit an mga resulta. w23.05 27-28 ¶5-8

An paghibaro nga may baratunon kita ha aton mga desisyon makakapagios ha aton nga isumat an aton mga sala, tadungon an aton mga sayop, ngan diri na ito utruhon. An pagbuhat hito nga mga butang mabulig ha aton nga makapabilin ha rumba han kinabuhi. Kon nakahimo ka hin sayop nga desisyon, ano an imo puydi buhaton? Ayaw pagkaragi an imo panahon ngan kusog basi pamatud-an nga tama ka o basulon an imo kalugaringon o an iba. Lugod, karawata an imo mga sayop ngan pangalimbasog nga himoon an imo pinakamaopay yana. Kon nakukonsensya ka tungod han imo sayop nga nabuhat, mapainubsanon nga dumaop kan Jehova ha pag-ampo, isumat an imo sayop, ngan pangaro hin pasaylo ha iya. (Sal. 25:11; 51:​3, 4) Pangaro hin pasaylo ha mga tawo nga bangin nasakitan mo, ngan kon kinahanglan, pagpabulig ha mga tigurang. (San. 5:​14, 15) Mahibaro hin leksyon tikang ha imo mga sayop, ngan pangalimbasugi nga diri na ito mautro. Kon hihimoon mo ito, makakasiguro ka nga hi Jehova magpapakita hin kalooy ha imo ngan maghahatag hin bulig nga imo kinahanglan.​—Sal. 103:​8-13. w23.08 28-29 ¶8-9

Ginbuligan ni Jehoiada hi Hadi Jehoas nga magin maopay nga tawo. Sugad nga resulta, karuyag han batan-on nga hadi nga lipayon hi Jehova. Pero han namatay hi Jehoiada, hi Jehoas namati ha apostata nga mga prinsipe. (2 Cron. 24:​4, 17, 18) Bisan kon nasubo gud hi Jehova, ‘padayon nga nagsugo hiya hin mga propeta ngada ha ira basi ibalik hira ha iya, pero diniri hira ha pagpamati.’ Waray ngani hira mamati ha anak ni Jehoiada nga hi Zacarias, nga diri la propeta ni Jehova ngan saserdote kondi patod liwat ni Jehoas. Ginpatay pa ngani ni Hadi Jehoas hi Zacarias. (2 Cron. 22:11; 24:​19-22) Waray tipigi ni Jehoas an angayan nga kahadlok kan Jehova. Hi Jehova nagsiring: “Tatamayon an mga nagtatamay ha akon.” (1 Sam. 2:30) Ha urhi, ginpirde han gutiay la nga sundalo han mga Siryano an “damu hinduro nga sundalo” ni Jehoas ngan ‘ginsamaran hiya hin grabe.’ (2 Cron. 24:​24, 25) Ginpatay hi Jehoas han iya mismo mga surugoon kay ginpatay niya hi Zacarias. w23.06 18-19 ¶16-17

Hi apostol Pablo nakadto ha Efeso hin pipira ka panahon, nga nagsasangyaw ngan nanunutdo han maopay nga sumat. (Buh. 19:​1, 8-10; 20:​20, 21) Hinigugma gud niya an iya kabugtoan ngan karuyag niya buligan hira nga magpabilin nga matinumanon kan Jehova. An mga taga-Efeso nga ginsuratan ni Pablo nagin uripon hadto han buwa nga mga katutdoan han relihiyon ngan natoo ha madyik. An mga taga-Efeso kilala nga imoral gud ngan may mapasiparahon nga panggawi. Komon nga nababatian an malaw-ay nga mga istorya ha mga teatro ha syudad ngan bisan pa ngani ha relihiyoso nga mga piyesta. (Efe. 5:3) Damu nga taga-Efeso an “diri na . . . maaram han mga suruklan ha moral,” ito nga mga pulong literal nga nangangahulogan hin “diri na nasasakitan.” (Efe. 4:​17-19) Antes mahibaro kon ano gud an tama o sayop, an mga taga-Efeso diri na gud naabat hin kakonsensya. Salit iginhulagway hira ni Pablo sugad nga “madulom an . . . panhunahuna ngan nahibulag ha kinabuhi nga tikang ha Dios.” Pero an pipira han taga-Efeso waray magpabilin ha kasisidman. w24.03 20 ¶2, 4; 21 ¶5-6

An toka ni Gideon sugad nga hukom nagkinahanglan hin daku nga kusog. Han pinalagiw an mga Midianita ha araway ha katutnga han gab-i, ginlanat hira ni Gideon tikang ha Walog han Jezreel tubtob ha Salog Jordan. (Huk. 7:22) Umundang ba hi Gideon ha Jordan? Waray! Bisan kon kinakapoy, hiya ngan an iya 300 nga sundalo tinabok ngan nagpadayon paglanat. Ha urhi, naabtan nira ngan ginpirde an mga Midianita. (Huk. 8:​4-12) Sinarig hi Gideon nga papakusgon hiya ni Jehova, ngan ginbuhat gud ito ni Jehova. (Huk. 6:​14, 34) Makausa, ginlanat ni Gideon ngan han iya kasundalohan an duha nga Midianita nga hadi; hira nagdadalagan la pero an mga hadi posible nga nakasakay ha mga kamelyo. (Huk. 8:​12, 21) Pero ha bulig han Dios, nagdaog an mga Israelita. Makakasarig liwat an mga tigurang kan Jehova, nga ‘diri gud nanluluya o ginugol-an.’ Ihahatag niya ha ira an kusog kon kinahanglan nira ito.​—Isa. 40:​28, 29. w23.06 6 ¶14, 16

Mahimo kita magkaada marig-on nga kasingkasing anoman nga problema an bangin naton atubangon. Salit sarig kan Jehova. Pansina kon paonan-o naglampos hi Barak tungod han pagsarig ha instruksyon ni Jehova. Hito nga panahon, an mga Israelita diri andam pakiggirra. Waray ngani hira mga armas. Pero ginsugo ni Jehova hi Barak nga makiggirra ha armado nga kasundalohan han Canaan ngan han ira lider nga hi Sisera. (Huk. 5:8) Ginsidngan ni propetisa Debora hi Barak nga lumugsad ha kapatagan basi tapoon hi Sisera ngan an iya 900 nga karuwahe. Bisan kon pabor ha mga karuwahe an pakiggirra ha kapatagan, sinugot hi Barak. Samtang nalugsad tikang ha Bukid Tabor an mga sundalo, nagpabunok hi Jehova. An mga karuwahe ni Sisera nanhilubong ha lapok, ngan gintagan ni Jehova hin kadaogan hi Barak. (Huk. 4:​1-7, 10, 13-16) Ha pariho nga paagi, tatagan kita ni Jehova hin kadaogan kon sumarig kita ha iya ngan ha instruksyon nga iya iginhahatag pinaagi han iya mga representante. w23.07 19 ¶17-18

An pagkapasensyoso importante ha aton katalwasan. Pariho han matinumanon nga mga surugoon han naglabay, dapat mapailubon nga maghulat kita nga tumanon han Dios an iya mga saad. (Heb. 6:​11, 12) Ha Biblia, iginkukompara an aton sitwasyon ha sitwasyon han usa nga parag-uma. (San. 5:​7, 8) An parag-uma maduruto gud nga nagtatanom ngan nananaribo han iya mga tanom, pero diri hiya maaram han eksakto nga panahon han pagtubo hito. Salit mapailubon hiya nga naghuhulat ngan naglalaom nga may aanihon hiya. Ha pariho nga paagi, nagpapabilin kita nga busy ha espirituwal nga mga buruhaton bisan kon “diri [kita] maaram kon ano nga adlaw maabot an [aton] Ginoo.” (Mat. 24:42) Naghuhulat kita hin mapailubon ngan nasarig nga ha itinanda nga panahon ni Jehova, tutumanon niya an ngatanan nga iya iginsaad. Kon diri kita magigin pasensyoso, bangin kapuyon kita paghinulat ngan hinay-hinay nga bumaya ha kamatuoran. Bangin maningkamot liwat kita nga makuha dayon an mga butang nga aton ginhihingyap. Pero kon pasensyoso kita, makakailob kita tubtob ha kataposan ngan matatalwas.​—Mic. 7:7. w23.08 22 ¶7

Pinaagi ha pagkompara han tagna ha Daniel 2:​41-43 ha iba pa nga tagna ha libro han Daniel ngan Pahayag, makakasiring kita nga an mga tiil nagsisimbolo ha Anglo-Amerikano nga alyansa, an pinakagamhanan nga mga gobyerno ha kalibotan yana. May kalabotan hini nga gahum ha kalibotan, hi Daniel nagsiring nga ‘an ginhadian may bahin nga makusog ngan may bahin nga maluya.’ Kay ano nga may bahin nga maluya? Kay ginpapaluya han mga tawo, nga nagrirepresentar ha mahumok nga lapok, an abilidad hito nga gumios nga may sugad-puthaw nga kusog. May nahibaroan kita nga pipira nga importante nga kamatuoran tikang ha paghulagway ni Daniel ha estatwa ha inop. Siyahan, iginpakita han Anglo-Amerikano nga Gahum ha Kalibotan nga gamhanan ito. Pananglitan, upod hira ha nagdaog ha Girra ha Kalibotan I ngan ha Girra ha Kalibotan II. Pero ini nga gahum ha kalibotan nagluya ngan padayon nga nagluluya tungod kay kontra han mga sakop hito an usa kag usa ngan pati na an gobyerno. Ikaduha, ini nga alyansa an magigin ultimo nga gahum ha kalibotan nga magmamando antes tapuson han Ginhadian han Dios an ngatanan nga ginhadian han tawo. w23.08 10-11 ¶12-13

May mga panahon nga naistres hi David tungod han ngatanan nga problema ngan kakurian nga iya gin-atubang. (Sal. 18:​4, 5) Pero an malumo nga gugma ngan pag-ataman ni Jehova nakarepresko ha iya. Gin-giyahan ni Jehova an iya kapoy na nga sangkay ngadto ha “magrabong nga mga panabsaban” ngan “mga pahuwayan nga damu an tubig.” Salit nahibalik an kusog ni David ngan nakapadayon hiya ha pag-alagad kan Jehova nga malipayon. (Sal. 18:​28-32; 23:2) Sugad man yana, “tungod han maunungon nga gugma ni Jehova waray kita umabot ha aton kataposan” han inatubang kita hin mga problema ngan kakurian. (Pag. 3:22; Col. 1:11) Agsob mameligro an kinabuhi ni David, ngan damu an iya gamhanan nga kaaway. Pero tungod han gugma ni Jehova, inabat niya nga talwas hiya ngan protektado. Naaabat ni David nga kaupod niya hi Jehova ha tagsa nga sitwasyon, ngan nagpasarig ito ha iya. Tungod hito, nakagkanta hiya: “Gintalwas [ako ni Jehova] ha ngatanan ko nga nahahadlokan.” (Sal. 34:4) Tinuod an mga ginkakahadlokan ni David, pero an gugma ni Jehova mas makusog kay han iya mga ginkakahadlokan. w24.01 30 ¶15-17

Mahibaro tikang ha magraot nga desisyon ni Jehoas. Kamatay han hitaas nga saserdote nga hi Jehoiada, nagpili hi Jehoas hin magraot nga kasangkayan. (2 Cron. 24:​17, 18) Namati hiya ha sagdon han mga prinsipe han Juda nga diri nahigugma kan Jehova. Posible nga mauyon ka nga dapat ginlikyan unta ni Jehoas iton magraot nga kasangkayan. Pero namati lugod hiya ha ira. Ngani, han ginsaway hi Jehoas han iya patod nga hi Zacarias, iya iginpapatay hi Zacarias. (2 Cron. 24:​20, 21; Mat. 23:35) Kalurongan gud adto! Ha tinikangan maopay hi Jehoas, pero makasurubo kay nagin apostata hiya ngan parapamatay. Ha urhi, ginpatay hiya han iya mismo mga surugoon. (2 Cron. 24:​22-25) Iba gud unta an iya nagin kinabuhi kon padayon la hiya nga namati kan Jehova ngan ha mga nahigugma ha Iya! w23.09 9 ¶6

Maaram hi Jesus nga mahimo magpabilin nga matinumanon hi apostol Pedro. Salit may pagkabuotan nga ginsidngan ni Jesus hi Pedro nga “ayaw na kahadlok.” An pagtapod ni Jesus kan Pedro may daku nga epekto ha iya. Ha urhi, ginbayaan nira Pedro ngan han iya bugto nga hi Andres an ira negosyo nga pagpangisda ngan nagin bug-os-panahon nga sumurunod han Mesias. Tungod hito, ginbendisyonan hira ni Jehova ha damu nga paagi. (Mar. 1:​16-18) Damu an mag-opay nga eksperyensya ni Pedro sugad nga sumurunod han Kristo. Nakita niya hi Jesus nga nanambal hin may sakit, nagpagawas hin mga demonyo, ngan nagbanhaw pa ngani. (Mat. 8:​14-17; Mar. 5:​37, 41, 42) Nakita liwat ni Pedro an urusahon nga bisyon ha tiarabot nga papel ni Jesus sugad nga Hadi han Ginhadian han Dios. Waray gud hingalimti ni Pedro ini nga panhitabo. (Mar. 9:​1-8; 2 Ped. 1:​16-18) Oo, nakakita hi Pedro hin mga butang nga waray unta niya makita kon waray hiya sumunod kan Jesus. Sigurado nga nalipay gud hiya nga nalamposan niya an negatibo nga mga pagbati ngan naeksperyensyahan ini ngatanan nga bendisyon! w23.09 21 ¶4-5

Ha siyahan nga surat ni apostol Pedro, gin-gamit niya an mga pulong nga “hilarom nga gugma.” An sugad nga gugma diri la nagtatabon hin pipira nga sala, kondi hin “damu nga sala.” (1 Ped. 4:8) Posible, nahinumdoman ni Pedro an leksyon parte ha pagpasaylo nga igintutdo ha iya ni Jesus damu ka tuig na an naglabay. Hito nga panahon, posible nga naghunahuna hi Pedro nga maopay gud hiya nga tawo han nagsiring hiya nga papasayloon niya an iya bugto “tubtob ha pito ka beses.” Pero hi Jesus nagtutdo ha iya—ngan pati ha aton—nga magpasaylo “tubtob ha 77 ka beses,” karuyag sidngon waray limitasyon. (Mat. 18:21) Kon nakukurian ka nga iaplikar ini nga sagdon, ayaw kahulop! An ngatanan nga diri perpekto nga surugoon ni Jehova may mga panahon nga nakukurian ha pagpasaylo. An importante nga butang yana amo an paghimo han ginkikinahanglan nga mga pitad basi pasayloon an imo bugto ngan makigmurayaw ha iya. w23.09 29 ¶12

Ha tiyan han isda, nagbasol hi Jonas ngan may pagtoo nga pamamatian ni Jehova an iya pag-ampo ngan gin-abat niya nga bubuligan hiya ni Jehova. Ha urhi, nakabalik hi Jonas ha mamara nga tuna, ngan andam na hiya pagkarawat ngan pagtuman han iya sunod nga toka. (Jon. 2:10–3:4) Kon nagkakaproblema ka, may panahon ba nga diri mo naisusumat hin maopay kan Jehova an imo mga inaabat? O inaabat mo ba nga waray ka na kusog para mag-aram? Hinumdumi nga nasasabtan gud ni Jehova an imo sitwasyon. Salit bisan kon simple la an imo pag-ampo, makakasiguro ka nga ihahatag niya kon ano gud an imo kinahanglan. (Efe. 3:20) Kon nakukurian ka pagbasa ngan pag-aram tungod kay may sakit ka, kinakapoy, o sobra nga nababaraka, puydi mo pamatian an audio rekording han Biblia o han aton mga publikasyon. Puydi ka liwat mamati ha usa han aton mga kanta o magkita hin video ha jw.org. Pinaagi ha pag-ampo kan Jehova ngan pagpamiling hin baton dida ha espirituwal nga mga tagana nga iya iginhahatag, gin-aaghat mo hiya nga pakusgon ka. w23.10 13 ¶6; 14 ¶9

An tabernakulo ngan an mga templo nga gintukod ha urhi ha Jerusalem puropariho an porma. Ha sulod hito may duha nga kwarto—“an Baraan nga Lugar” ngan “an Pinakabaraan”—nga ginbulag pinaagi han kurtina nga may burda. (Heb. 9:​2-5; Ex. 26:​31-33) Ha sulod han Baraan may-ada bulawan nga burutangan han lampara, halaran para ha pagsunog hin insenso, ngan lamesa para ha halad nga mga tinapay. An “gindihogan nga mga saserdote” la an gintutugotan ha sulod han Baraan basi buhaton an ira sagrado nga mga toka. (Num. 3:​3, 7, 10) Ha Pinakabaraan aadto an bulawan nga arka han kasabotan nga nagrirepresentar han presensya ni Jehova. (Ex. 25:​21, 22) An hitaas nga saserdote la an puydi lumahos ha kurtina ngadto ha Pinakabaraan makausa kada tuig ha Adlaw han Pagpara han Sala. (Lev. 16:​2, 17) Nasulod hiya dida hito nga may dara nga dugo han mga hayop para ha pagpara han iya kalugaringon nga mga sala ngan ha mga sala han bug-os nga nasud. Ha urhi, ginklaro ni Jehova an tinuod nga ginrirepresentaran hini nga mga bahin han tabernakulo.​—Heb. 9:​6, 7. w23.10 27 ¶12

Ha Pulong han Dios, pauroutro nga makikita naton an sugo nga “higugmaon . . . an usa kag usa.” (Juan 15:12; Roma 13:8; 1 Tes. 4:9; 1 Ped. 1:22; 1 Juan 4:11) Pero an gugma usa nga kalidad han kasingkasing, o sulod nga pagkatawo, ngan waray tawo nga makakakita hito. Salit paonan-o naton maipapakita an aton gugma ha usa kag usa? Pinaagi han aton mga pulong ngan mga buhat. Damu an paagi nga maipapakita naton ha aton kabugtoan nga hinigugma naton hira. Ini an pipira nga ehemplo: “Magyakan kamo han kamatuoran ha usa kag usa.” (Zac. 8:16) “Makigmurayaw ha usa kag usa.” (Mar. 9:50) Manguna kamo ha “pagpasidungog ha usa kag usa.” (Roma 12:10) “Abiabihon niyo an usa kag usa.” (Roma 15:7) “Padayon . . . nga magpasaylo ha usa kag usa.” (Col. 3:13) “Padayon nga dad-on niyo an mga dinara han usa kag usa.” (Gal. 6:2) “Padayon nga liawa niyo an usa kag usa.” (1 Tes. 4:18) “Padayon nga . . . parig-unon an usa kag usa.” (1 Tes. 5:11) “Ig-ampo an usa kag usa.”​—San. 5:16. w23.11 9 ¶7-8

Kada adlaw, naghihimo kita hin mga desisyon nga nagkikinahanglan hin marig-on nga pagtoo. Pananglitan, naghihimo kita hin mga desisyon parte ha aton mga kaupod, kaliawan, edukasyon, pag-asawa, mga anak, ngan sekular nga trabaho. Maopay nga pakianhan ta an aton kalugaringon: ‘Nakikita ba ha akon mga desisyon nga sigurado ako nga temporaryo la ini nga sistema ngan hirani na ini saliwnan han bag-o nga kalibotan han Dios? O an akon ba mga desisyon impluwensyado han mga tawo nga nagkikinabuhi nga sugad hin an kamatayon an kataposan han ngatanan?’ (Mat. 6:​19, 20; Luc. 12:​16-21) Hihimoon naton an pinakamaopay nga mga desisyon kon paparig-unon ta an aton pagtoo nga hirani na an bag-o nga kalibotan. Naatubang liwat kita hin mga problema nga nagkikinahanglan hin marig-on nga pagtoo. Bangin pagtimarauton kita, magkaada grabe nga sakit, o umatubang hin iba nga sitwasyon nga puydi makapaluya ha aton. Ha siyahan, bangin abaton ta nga kaya naton mailob an aton problema. Pero kon mag-iiha ito—sugad han agsob mahitabo—magkikinahanglan kita hin marig-on nga pagtoo basi makailob ngan padayon nga makag-alagad kan Jehova hin malipayon.​—1 Ped. 1:​6, 7. w23.04 27 ¶4-5

Ginlalaoman ni Jehova nga magios kita uyon ha aton mga pag-ampo. Pananglitan, an usa nga brother bangin mag-ampo kan Jehova nga buligan hiya nga maka-leave ha iya sekular nga trabaho basi makaatender ha regional nga kombensyon. Paonan-o posible batunon ni Jehova ito nga pag-ampo? Puydi hiya tagan ni Jehova hin kaisog nga iya ginkikinahanglan basi makiistorya ha iya employer. Pero dapat la gihapon hiya kumadto ha iya employer ngan maghangyo. Bangin kinahanglan nga pauroutro nga maghangyo hiya. Posible pa ngani makigbalyo hiya hin eskedyol ha iya katrabaho o diri magpabayad ha iya pag-leave. Ginlalaoman ni Jehova nga mag-aampo kita hin pauroutro mahitungod han mga butang nga importante ha aton. Iginpapakita ha ginsiring ni Jesus nga diri dayon ihahatag an pipira naton nga hangyo. (Luc. 11:9) Salit ayaw pag-undang! Pag-ampo hin sinsero ngan pauroutro. (Luc. 18:​1-7) Kon ito an aton bubuhaton, iginpapakita naton kan Jehova nga seryoso gud kita ha aton ginhahangyo. Iginpapakita liwat naton an aton pagtoo ha iya abilidad ha pagbulig ha aton. w23.11 22 ¶10-11

Nagsaad hi Jehova ha iya sangkay nga hi Abraham nga bibendisyonan an ngatanan nga nasud ha tuna pinaagi han iya tulin. (Gen. 15:5; 22:18) Tungod kay hi Abraham may hilarom nga pagtoo ha Dios, kombinsido hiya nga matutuman an Iya saad. Bisan pa hito, han hi Abraham 100 anyos na ngan an iya asawa 90 anyos, ito nga matinumanon nga mag-asawa waray la gihapon anak. (Gen. 21:​1-7) Pero an Biblia nasiring: “Basado ha paglaom, may pagtoo [hi Abraham] nga magigin amay hiya han damu nga nasud uyon ha ginsiring.” (Roma 4:18) Maaram ka nga natuman an paglaom ni Abraham. Nagin tatay hiya han iya anak nga maiha na niya nga ginpinamulat, hi Isaac. Ano an basihan han pagsarig ni Abraham? Tungod kay hi Abraham may duok nga relasyon kan Jehova, “kombinsido gud hiya nga matutuman . . . han Dios an iya iginsaad.” (Roma 4:21) Gin-uyonan ni Jehova hi Abraham ngan gintawag hiya nga matadong tungod han iya pagtoo.​—San. 2:23. w23.12 8 ¶1-2

An batan-on nga lalaki nga masasarigan seryoso gud nga nagtutuman han ngatanan niya nga responsabilidad. Pansina an perpekto nga ehemplo ni Jesus. Waray gud hiya magpabaya o magin iresponsable. Lugod, gintuman niya an mga toka nga iginhatag ha iya ni Jehova, bisan pa kon makuri ito buhaton. Hinigugma niya an mga tawo—labi na an iya mga disipulo—ngan kinaburut-on nga ginhatag niya an iya kinabuhi para ha ira. (Juan 13:1) Ha pagsubad kan Jesus, paningkamuti nga tumanon an bisan ano nga toka nga iginhatag ha imo. Kon diri ka sigurado kon paonan-o ito bubuhaton, magin mapainubsanon ngan mangaro hin bulig ha hamtong nga mga brother. Ayaw kakontento nga basta mo la nga natuman an iginpapabuhat ha imo. (Roma 12:11) Lugod, taposa an imo toka, buhata ito nga sugad hin “para kan Jehova, ngan diri para ha mga tawo.” (Col. 3:23) Syempre, diri ka perpekto, salit magin mapainubsanon ngan akseptara an bisan ano nga sayop nga imo nabubuhat.​—Prob. 11:2. w23.12 26 ¶8

Usa nga kalipay an mabawtismohan ngan magin bahin han pamilya ni Jehova. Adton may sugad nga pribilehiyo mauyon ha salmista nga hi David: “Malipayon hiya nga imo ginpipili [Jehova] ngan ginpapahirani ha imo basi umukoy ha imo mga bungsaran.” (Sal. 65:4) Diri gintutugotan ni Jehova nga kumadto ha iya bungsaran an bisan hin-o la. Ginpipili niya adton nagpapamatuod nga karuyag nira magkaada duok nga relasyon ha iya. (San. 4:8) Kon igindidedikar mo an imo kalugaringon kan Jehova ngan nagpapabawtismo, makakasiguro ka nga ‘magbubuhos hiya ngada ha iyo hin bendisyon tubtob nga waray bisan ano nga kulang.’ (Mal. 3:10; Jer. 17:8) An bawtismo tinikangan pa la. Kinahanglan mo himoon an imo pinakamaopay nga magkinabuhi uyon ha imo saad han nagdedikar ka, bisan pa kon umatubang ka hin mga pagsulay o pagsari han imo pagtoo. (Ecles. 5:​4, 5) Sugad nga disipulo ni Jesus, kinahanglan mo sundon hin maopay an iya ehemplo ngan mga sugo tubtob nga posible.​—Mat. 28:​19, 20; 1 Ped. 2:21. w24.03 8 ¶1-3

Pero ano man kon kamo han imo padis diri nag-i-enjoy ha pagkaada panahon nga magkaupod? Ano an iyo mahihimo? Hunahunaa an usa nga campfire. Diri dayon nadaku an kalayo hito. Kinahanglan hinay-hinay nga sung-an ito hin dagku nga sungo. Ha pariho nga paagi, puydi kamo magtikang pinaagi ha pagkaada haglipot nga takna nga magkaupod kamo kada adlaw. Siguroha nga hihimoon niyo an pariho niyo mai-enjoy. (San. 3:18) Kon magtitikang kamo ha gudtiay nga butang, puydi niyo mapalaga utro an iyo gugma. Importante ha pag-asawa an respeto. Pariho ito han oxygen nga nakakabulig basi dumaku gud an laga han campfire. Kon waray oxygen, madagmit nga mapaparong an kalayo. Ha pariho nga paagi, kon waray respeto, an gugma han mag-asawa bangin malaksi nga magtugnaw. Ha luyo nga bahin, an mag-asawa nga nangangalimbasog nga ipakita an respeto ha usa kag usa naniningkamot nga tipigan nga buhi an ira gugma. Pero hinumdumi nga an importante, diri kon naghuhunahuna ka nga nagpapakita ka hin respeto, lugod kon gin-aabat ba han imo padis nga ginrirespeto hiya. w23.05 22 ¶9; 24 ¶14-15

Ha Biblia, may matinumanon nga mga surugoon han Dios nga nag-unabi hin mga panahon nga duro an ira kabaraka ngan pangurog tungod han ira mga kaaway o iba nga mga problema. (Sal. 18:4; 55:​1, 5) Mahimo liwat kita umatubang hin pagkontra ha eskwelahan, ha trabaho, ha aton pamilya, o ha gobyerno. Mahimo pa ngani kita mahadlok nga mamatay tungod han sakit. Hito nga mga sitwasyon, bangin abaton naton nga sugad kita hin bata nga waray mahihimo. Paonan-o hi Jehova nabulig ha aton ha sugad hini nga mga sitwasyon? Ginliliaw ngan ginpapakalma kita niya. Salit regular nga makig-upod kan Jehova—pag-ampo ha iya ngan pagbasa han iya Pulong. (Sal. 77:​1, 12-14) Kon ini an imo ginbubuhat, posible nga an imo siyahan nga bubuhaton kon naiistres ka amo an pangaro hin bulig ha imo langitnon nga Amay. Isumat kan Jehova an imo mga ginkakahadlokan ngan ginkakabarak-an. Tuguti hiya nga magyakan ngan magliaw ha imo pinaagi han Kasuratan.​—Sal. 119:28. w24.01 24-25 ¶14-16

Importante gud an pagkaada daku nga hingyap basi makab-ot an espirituwal nga mga tumong. Kon may-ada ka hito nga hingyap, maniningkamot ka gud nga makab-ot an imo tumong. Ngan kon mas daku an aton hingyap, mas daku an posibilidad nga makab-ot ta an aton mga tumong. Salit ano an imo mahihimo basi magkaada mas daku nga hingyap? Pag-ampo nga madugangan an imo hingyap. Magagamit ni Jehova an iya espiritu basi pagiuson ka nga kab-uton an imo tumong. Danay naghihimo kita hin tumong kay maaram kita nga dapat ta ito himoon. Maopay ito. Pero bangin waray gud kita hingyap ha pagkab-ot hito. Pamalandonga an ginbubuhat ni Jehova para ha imo. (Sal. 143:5) Ginpamalandong ni apostol Pablo an diri matupngan nga pagkabuotan ni Jehova ha iya, ngan nagpagios ito ha iya nga magin maduruto ha pag-alagad kan Jehova. (1 Cor. 15:​9, 10; 1 Tim. 1:​12-14) Ha pariho nga paagi, kon mas ginpapamalandong mo an ginbubuhat ni Jehova para ha imo, mas hihingyapon mo nga makab-ot an imo tumong.​—Sal. 116:12. w23.05 27 ¶3-5

Napapalipay naton an aton langitnon nga Amay kon gindadayaw naton an iya ngaran. (Sal. 119:108) Pero nangangahulogan ba ini nga an makagarahum-ha-ngatanan nga Dios pariho ha diri perpekto nga mga tawo nga naghihingyap hin pagdayaw kay kinahanglan nira hin pasarig? Diri. Kon gindadayaw naton an aton langitnon nga Amay, nakakabulig kita nga pamatud-an nga sayop an usa pa nga gin-akusar ni Satanas parte ha aton. Nagsiring hi Satanas nga waray tawo nga maunungon nga magdidepensa ha ngaran han Dios. Siring niya nga kon sarihan an mga tawo, waray magpapabilin nga matinumanon ha Dios. Nasiring hiya nga kita ngatanan maundang ha pag-alagad ha Dios kon abaton naton nga mas makakaopay ito para ha aton. (Job 1:​9-11; 2:4) Pero ginpamatud-an han matinumanon nga hi Job nga buwaon hi Satanas. Magigin matinumanon ka ba liwat ha Dios? An tagsa ha aton may-ada pribilehiyo nga depensahan an ngaran han aton Amay ngan lipayon hiya pinaagi ha matinumanon nga pag-alagad ha iya. (Prob. 27:11) Daku gud ito nga kadungganan. w24.02 8-9 ¶3-5

Han namatay hira Moises ngan Josue, nagpili hi Jehova hin mga hukom basi giyahan an iya katawohan. Katapos, ha panahon han mga hadi, nagpili hi Jehova hin mga propeta basi giyahan an iya katawohan. Ginsunod han matinumanon nga mga hadi an sagdon han mga propeta. Pananglitan, mapainubsanon nga ginkarawat ni Hadi David an pagtadong ni propeta Nathan. (2 Sam. 12:​7, 13; 1 Cron. 17:​3, 4) Sinarig hi Hadi Jehosafat kan propeta Jahaziel para hin giya ngan gin-aghat an katawohan han Juda nga ‘tumoo ha mga propeta’ han Dios. (2 Cron. 20:​14, 15, 20) Han naiistres hi Hadi Hezekias, nagpabulig hiya kan propeta Isaias. (Isa. 37:​1-6) Ha kada panahon nga ginsusunod han mga hadi an paggiya ni Jehova, ginbibendisyonan niya hira ngan ginpuprotektaran an iya katawohan. (2 Cron. 20:​29, 30; 32:22) Sigurado nga gin-gagamit ni Jehova an iya mga propeta ha paggiya ha iya katawohan. w24.02 21 ¶8

Karuyag ni Satanas nga makig-upod kita ha mga tawo nga makakaimpluwensya ha aton basi makurian kita ha pagsunod han mga suruklan ni Jehova. Pero dapat kita magin mas maikmat pa ngani kay yana puydi kita makig-upod ha mga tawo diri la ha personal kondi pati liwat ha social media. Dapat naton atohan an panhunahuna han kalibotan nga okey la an imoral nga panggawi. Maaram kita nga sayop ito. (Efe. 4:​19, 20) Bisan pa hito, maopay nga pakianhan ta an aton kalugaringon: ‘Ginlilikyan ko ba an ngatanan nga diri ginkikinahanglan nga pakig-upod ha mga katrabaho, klasmeyt, o ha iba pa nga diri narespeto ha magtadong nga suruklan ni Jehova? Maisugon ba ako nga nagsusunod ha mga suruklan ni Jehova bisan pa kon an iba magsiring nga panatiko ako tungod hito?’ Sugad han makikita ha 2 Timoteo 2:​20-22, bangin kinahanglan liwat naton magin maikmat kon nagpipili hin kasangkayan ha sulod han Kristiano nga kongregasyon. Hinumdoman naton nga an iba bangin diri makabulig ha aton ha pagpabilin nga matinumanon ha aton pag-alagad kan Jehova. w24.03 22-23 ¶11-12

Gin-imadyin mo na ba kon ano an hitsura ni Jehova? Bisan kon diri nakikita hi Jehova, iginhuhulagway hiya han Biblia ha iba-iba nga paagi. Gintatawag hi Jehova nga “usa nga adlaw ngan usa nga taming” ngan “usa nga nakakaugtang nga kalayo.” (Sal. 84:11; Heb. 12:29) An iya presensya iginpapariho ha bato nga sapiro, nagraranggat nga metal, ngan malamrag nga balangaw. (Ezek. 1:​26-28) Tungod kay diri naton nakikita hi Jehova, bangin makurian kita nga tumoo nga hinigugma kita niya. An iba naghuhunahuna nga diri gud hira hihigugmaon ni Jehova tungod han ira naglabay nga mga eksperyensya. Naiintindihan ni Jehova an sugad nga mga pag-abat ngan kon paonan-o ito nakakaapekto ha aton. Basi buligan kita, iginsumat niya an iya maopay nga personalidad pinaagi han iya Pulong. An usa nga pulong nga naghuhulagway gud hin maopay kan Jehova amo an gugma. An Biblia nasiring nga an Dios gugma. (1 Juan 4:8) An ngatanan nga iya ginbubuhat tungod han gugma. An gugma han Dios hilarom ngan gamhanan gud ngan iya pa ngani ito iginpapakita bisan hadton diri nahigugma ha iya.​—Mat. 5:​44, 45. w24.01 26 ¶1-3

Ginpili ni Jehova hi Moises nga manguna ha mga Israelita ha paggawas ha Ehipto, ngan sugad nga nakikita nga ebidensya nagtagana Hiya hin harigi nga dampog ha adlaw ngan hin harigi nga kalayo ha gab-i. (Ex. 13:21) Ginsundan ni Moises an harigi, nga naggiya ha iya ngan ha mga Israelita ngadto ha Dagat nga Pula. Pero ginlanat han mga Ehiptohanon an mga Israelita. Salit an mga Israelita nahadlok gud kay kahuna nira nga papatayon na hira han mga Ehiptohanon. Pero waray hiya magsayop. Gintuyo ni Jehova nga giyahan an iya katawohan ngadto, pinaagi kan Moises. (Ex. 14:2) Ngan gintalwas hira han Dios ha pinakaurusahon nga paagi. (Ex. 14:​26-28) Paglabay hin 40 ka tuig, padayon nga sinarig hi Moises ha harigi nga dampog ha paggiya ha katawohan han Dios ha kamingawan. (Ex. 33:​7, 9, 10) Tikang hito nga harigi hi Jehova nakiistorya kan Moises, katapos iginsumat ni Moises ha katawohan ni Jehova an Iya mga instruksyon. Klaro nga nakita han mga Israelita nga gin-gagamit ni Jehova hi Moises ha paggiya ha ira. w24.02 21 ¶4-5