Hulyo

An ngatanan nga ginsiring ngan ginbuhat ni Jesus, upod na an mga milagro nga iya ginhimo, perpekto nga nagpapakita han panhunahuna ngan inaabat han iya Amay. (Juan 14:9) Ano aton mahibabaroan ha mga milagro ni Jesus? Hi Jesus ngan an iya Amay nahigugma gud ha aton. Han nakanhi hi Jesus ha tuna, iginpakita niya an iya hilarom nga gugma ha mga tawo pinaagi ha paggamit han iya gahum basi buligan an mga nag-aantos. Makausa, duha nga buta nga lalaki an nakimalooy ha iya nga buligan hira. (Mat. 20:​30-34) Pansina nga gintambal hira ni Jesus “tungod ha kalooy.” Sugad han gin-gamit dinhi, an Griego nga berbo nga iginhubad nga “tungod ha kalooy” nagtutudlok ha duro nga pagpaid nga inaabat ha sulod han lawas. Iton hilarom nga pagpaid, nga ekspresyon han gugma, nagpagios liwat kan Jesus nga pakaunon an mga nagugutom ngan tambalon an usa nga may liprosi. (Mat. 15:32; Mar. 1:41) Makakasiguro kita nga hi Jehova, an Dios nga may “malumo nga pagpaid,” ngan an iya Anak nahigugma gud ha aton ngan nasasakit kon nag-aantos kita. (Luc. 1:78; 1 Ped. 5:7) Sigurado nga eksayted gud hira nga tanggalon an ngatanan nga kakurian nga nakakaapekto ha katawohan! w23.04 3 ¶4-5

Puydi ta himoon an aton pinakamaopay basi malikyan an pagbasa ngan pagpamati ha sayop nga mga ideya nga popular ha kalibotan ni Satanas. Puydi ta pun-on an aton hunahuna hin mag-opay nga ideya pinaagi ha pagbasa ngan pag-aram han Biblia. An pag-atender ha mga katirok ngan pakigbahin ha ministeryo magpuprotektar liwat ha aton panhunahuna. Ngan hi Jehova nagsasaad nga diri niya itutugot nga sulayon kita labaw han aton maiilob. (1 Cor. 10:​12, 13) Yana labaw kay ha kakan-o pa man, an tagsa ha aton kinahanglan mag-ampo basi makapabilin nga matinumanon kan Jehova hinin makuri nga kataposan nga mga adlaw. Karuyag ni Jehova nga ‘isumat ta an ngatanan nga aada ha aton kasingkasing’ pinaagi ha pag-ampo. (Sal. 62:8) Dayawa hi Jehova ngan pasalamati hiya ha ngatanan nga iya ginbubuhat. Hangyoa hiya nga buligan ka nga magin maisugon ha ministeryo. Pakimalooy ha iya nga buligan ka nga mailob an bisan ano nga problema ngan maatohan an bisan ano nga pagsulay nga bangin imo gin-aatubang. Ayaw tuguti an bisan ano o bisan hin-o nga makapugong ha imo ha regular nga pag-ampo kan Jehova. w23.05 7 ¶17-18

Kay ano nga naatender kita ha mga katirok? Siyahan, basi dayawon hi Jehova. (Sal. 26:12; 111:1) Naatender liwat kita ha mga katirok basi madasig naton an usa kag usa hinin makuri nga mga panahon. (1 Tes. 5:11) Kon naalsa kita han aton kamot ngan nakomento, nabulig kita nga matuman inin duha nga katuyoan. Pero bangin may makaulang ha aton ha pagkomento. Bangin ginkukulba kita nga magkomento, o bangin karuyag naton nga mas agsob kita makakomento pero usahay diri kita natatawag. Paonan-o ta malalamposan ini nga mga ulang? Hi apostol Pablo nagsiring nga angay kita magpokus ha ‘pagdinasigay ha usa kag usa.’ Kon ginhuhunahuna naton nga bisan an simple nga komento nga nagpapahayag han aton pagtoo puydi na makadasig ha iba, maiibanan an aton kakulba ha pag-alsa han aton kamot. Ngan kon diri kita agsob matawag, mahimo kita magin malipayon nga an iba ha kongregasyon magkakaada oportunidad nga magkomento.​—1 Ped. 3:8. w23.04 20 ¶1-3

May iginpahibaro an hadi! An mga Judio, nga bihag ha Babilonya hin mga 70 ka tuig, puydi na bumalik ha ira tuna, ha Israel. (Ezra 1:​2-4) Hi Jehova gud la an makakahimo hini. Kasagaran na nga diri ginbubuhian han mga taga-Babilonya an ira mga bihag. (Isa. 14:​4, 17) Pero an Babilonya napirde na, ngan an bag-o nga magmarando nagsiring ha mga Judio nga puydi na hira bumaya. An tagsa nga Judio, labi na an mga ulo han pamilya, kinahanglan magdesisyon kon mabaya ba ha Babilonya o magpapabilin didto. Bangin diri masayon an paghimo hito nga desisyon. Damu an lagas na gud salit diri na nira kaya iton makuri nga biyahe. Ngan tungod kay an kadam-an han mga Judio ha Babilonya na natawo, ito na gud an ira nagin urukyan. Para ha ira, an Israel tuna la han ira mga kaapoy-apoyan. An iba nga mga Judio posible nga nagin riko na gud ha Babilonya, salit bangin nakurian hira nga bumaya ha ira komportable nga mga balay o ha ira mga negosyo ngan bumalhin ha tuna nga diri nira kabisado. w23.05 14 ¶1-2

An Pulong han Dios nag-aaghat ha aton nga padayon nga kultibaron an pagpailob, pagpaid, ngan gugma. An Lucas 21:19 nasiring: “Pinaagi han iyo pagpailob matitipigan niyo an iyo kinabuhi.” An Colosas 3:12 nasiring: “Pagsul-ot kamo han . . . pagpaid.” Ngan an 1 Tesalonica 4:​9, 10 nasiring: “Kamo mismo gintutdoan han Dios nga higugmaon an usa kag usa. . . . Pero gin-aaghat namon kamo, mga kabugtoan, nga padayon nga buhaton niyo ito hin labaw pa.” Ito nga mga teksto iginsurat para ha mga disipulo nga nagpakita na hin pagpailob, pagpaid, ngan gugma. Pero kinahanglan padayon nira nga kultibaron ini nga mga kalidad. Ito liwat an dapat ta buhaton. Basi mabuligan ka, tagda kon paonan-o iginpakita han siyahan nga mga Kristiano ini nga mga kalidad. Katapos, makikita mo kon paonan-o mo masusubad ito nga mga disipulo, ngan sugad nga resulta, mapamatud-an nga andam ka ha daku nga kasakitan. Katapos, kon magtikang na an daku nga kasakitan, maaram ka na kon paonan-o magpapailob ngan magigin determinado nga padayon nga magpailob. w23.07 3 ¶4, 8

Kaapi man kita han mga dinihogan o han “iba nga mga karnero,” kinahanglan magpabilin kita ha “Dalan han Pagkabaraan” kay mabulig ito ha aton nga padayon nga makagsingba kan Jehova yana ngan magdadara ha aton ha tiarabot nga mga bendisyon han Ginhadian. (Juan 10:16) Tikang han 1919 C.E., minilyon nga kalalakin-an, kababayin-an, ngan kabataan an binaya na ha Babilonya nga Gamhanan, an imperyo han buwa nga relihiyon ha kalibotan, ngan nagtikang paglakat hito nga simboliko nga kalsada. Han an mga Judio binaya ha Babilonya, ginsiguro ni Jehova nga matanggal an mga ulang ha ira aragian. (Isa. 57:14) Kumusta man an “Dalan han Pagkabaraan” ha moderno nga panahon? Ha sulod hin ginatos ka tuig antes han 1919, gin-gamit ni Jehova an kalalakin-an nga may kahadlok ha iya basi bumulig paghawan han dalan tipagawas ha Babilonya nga Gamhanan. (Ikompara an Isaias 40:3.) Ginhimo nira an ginkikinahanglan nga pagpangandam—an espirituwal nga pag-ayad han kalsada—basi ha urhi magin posible para ha mga tawo nga tangkod an kasingkasing nga makabaya ha Babilonya nga Gamhanan ngan makasulod ha espirituwal nga paraiso, diin iginpahiuli na an putli nga pagsingba kan Jehova. w23.05 15-16 ¶8-9

Karuyag ni Jehova nga malipayon ngan kinaburut-on nga mag-alagad kita ha iya. (2 Cor. 9:7) Salit dapat ba kita magpadayon ha paningkamot nga kab-uton an aton espirituwal nga tumong bisan kon waray kita hingyap nga makab-ot ito? Pansina an ehemplo ni apostol Pablo. Hiya nagsiring: “Istrikto nga gindidisiplina ko an akon lawas ngan gin-uuripon ito.” (1 Cor. 9:​25-27, ftn.) Ginpirit ni Pablo an iya kalugaringon nga buhaton an tama bisan ha mga panahon nga bangin iba an iya karuyag buhaton. Gin-uyonan ba ni Jehova an pag-alagad ni Pablo? Oo! Ngan ginbalosan hiya ni Jehova tungod han iya mga paningkamot. (2 Tim. 4:​7, 8) Ha pariho nga paagi, nalilipay hi Jehova nga makita an aton paningkamot nga kab-uton an aton tumong bisan ha mga panahon nga waray kita hingyap nga buhaton ito. Nalilipay hiya kay bisan kon danay ginbubuhat ta ito diri tungod han aton gugma hito nga buruhaton, maaram hiya nga ginbubuhat ta ito tungod han aton gugma ha iya. Sugad la nga ginbendisyonan ni Jehova hi Pablo, bibendisyonan kita Niya tungod han aton mga pangalimbasog. (Sal. 126:5) Ngan kon nakakarawat naton an bendisyon ni Jehova, bangin hingyapon na naton nga makab-ot an aton tumong. w23.05 29 ¶9-10

Adton diri makakatalwas ha adlaw ni Jehova iginpariho ni apostol Pablo ha mga tawo nga nangangaturog. Waray hira sarabotan ha nahitatabo ha palibot o ha paglabay han panahon. Salit diri hira maaram kon may importante nga nahitatabo o kon ano an ira bubuhaton. An kadam-an nga tawo yana nakaturog ha espirituwal. (Roma 11:8) Diri hira natoo ha ebidensya nga nabubuhi na kita ha “kataposan nga mga adlaw” ngan hirani na an daku nga kasakitan. (2 Ped. 3:​3, 4) Kondi maaram kita nga an giniyahan nga sagdon nga magpabilin nga nagmamata nagigin mas importante gud ha kada adlaw nga nalabay. (1 Tes. 5:6) Salit, dapat kita magpabilin nga kalmado. Kay ano? Basi diri kita mahidabi ha mga isyu ha politika o ha komunidad. Samtang nagtitikahirani an adlaw ni Jehova, magtitikagrabe an presyur nga may dapigan hini nga mga isyu. Pero diri kita angay mabaraka kon ano an aton bubuhaton. An espiritu han Dios makakabulig ha aton nga magkaada kalmado nga hunahuna ngan makahimo hin maaramon nga mga desisyon.​—Luc. 12:​11, 12. w23.06 10 ¶6-7

Ano an imo nahuhunahuna kon nababatian mo an ngaran nga Samson? Bangin nahuhunahuna mo an usa nga makusog gud nga lalaki. Husto ka! Pero nakahimo hi Samson hin sayop nga desisyon nga nagresulta han iya damu nga pag-antos. Bisan pa hito, nagpokus hi Jehova ha ngatanan nga ginbuhat ni Samson ha pag-alagad ha Iya, ngan Iya igin-upod ito ha Biblia para ha aton kapulsanan. Gin-gamit ni Jehova hi Samson ha pagtuman hin urusahon nga mga butang basi buligan an Iya pinili nga katawohan, an Israel. Paglabay hin damu ka siglo katapos mamatay hi Samson, gin-giyahan ni Jehova hi apostol Pablo nga ig-upod an ngaran ni Samson ha lista han kalalakin-an nga may daku nga pagtoo. (Heb. 11:​32-34) An ehemplo ni Samson makakadasig ha aton. Sinarig hiya kan Jehova, bisan pa han magkuri nga sitwasyon. Mahibabaro kita kan Samson ngan an iya ehemplo makakadasig ha aton. w23.09 2 ¶1-2

Mapaparig-on ta an aton pagpailob pinaagi han agsob ngan sinsero nga pagsumat kan Jehova han aton mga kabaraka. (1 Tes. 5:17) Yana, bangin waray ka magbug-at nga problema. Pero nag-aampo ka ba kan Jehova ngan nangangaro han iya bulig kon nasusubo ka, nawuwurok, o diri maaram han bubuhaton? Kon yana pirme ka nadaop ha aton Dios para hin bulig ha imo mga problema ha adlaw-adlaw, diri ka mag-aalang pagdaop ha iya kon may mas dagku ka nga problema ha tiarabot. Ngan makakasiguro ka nga maaram gud hiya kon san-o ngan kon paonan-o hiya magios para ha imo. (Sal. 27:​1, 3) Posible nga mas mailob naton an tiarabot nga daku nga kasakitan kon mag-iilob kita han mga problema yana. (Roma 5:3) Kay ano nga nakasiring kita hito? Damu nga kabugtoan an nasiring nga ha kada panahon nga gin-iilob nira an magkuri nga sitwasyon nabulig ito ha ira nga mailob an sunod nga problema. Kon naiilob nira an usa nga problema ha bulig ni Jehova, nagigin mas marig-on an ira pagtoo nga karuyag hira buligan ni Jehova. Ngan ito nga pagtoo nabulig ha ira nga mailob an sunod nga problema.​—San. 1:​2-4. w23.07 3 ¶7-8

An pagin mapainubsanon ngan mapinairon ni Jehova nagpagios ha iya nga magin makatadunganon. Pananglitan, nakita an pagin mapainubsanon ni Jehova han hirani na niya bungkagon an magraot nga mga tawo ha Sodoma. Pinaagi han iya mga anghel, ginsidngan ni Jehova an matadong nga hi Lot nga pumalagiw ngadto ha kabukiran. Hi Lot nahadlok pagkadto. Salit naghangyo hiya nga hiya ngan an iya pamilya tugotan nga kumadto ha Zoar, usa nga gutiay nga bungto nga ginhukman na nga bungkagon. Puydi unta obligaron ni Jehova hi Lot nga sundon kon ano gud an iya instruksyon. Pero gintugotan ni Jehova hi Lot nga kumadto ha Zoar ngan waray niya bungkaga ito nga bungto. (Gen. 19:​18-22) Paglabay hin damu ka siglo, nagpakita hi Jehova hin pagpaid ha mga umurukoy han Nineve. Ginsugo niya hi propeta Jonas nga ipasamwak an tiarabot nga kabungkagan han syudad ngan han magraot nga umurukoy hito. Pero han nagbasol an mga taga-Nineve, ginpasaylo hira ni Jehova ngan waray bungkaga an syudad.​—Jon. 3:​1, 10; 4:​10, 11. w23.07 21 ¶5

Ano an mahibabaroan ta ha ehemplo ni Jehoas? Pariho hiya hin kahoy nga hamabaw an pagkagamot nga nakadepende ha suporta han usa nga tukod. Han an tukod—hi Jehoiada—nawara ngan an hangin han apostasya hinuyop, natumba hi Jehoas, siring pa. Nagpapakita gud ini nga an aton kahadlok ha Dios diri la dapat nakadepende ha maopay nga impluwensya han aton mga igkasi-Kristiano ngan han aton mga kapamilya. Basi magpabilin nga marig-on ha espirituwal, dapat parig-unon ta an aton mismo diosnon nga debosyon ngan kahadlok pinaagi ha regular nga pag-aram, pagpamalandong, ngan pag-ampo. (Jer. 17:​7,8; Col. 2:​6, 7) Diri ginpapabuhat ni Jehova an labaw han aton mahihimo. An iya iginpapabuhat amo an iginsumaryo ha Eclesiastes 12:13: “Kahadluki an tinuod nga Dios ngan sugta an iya mga sugo, kay ini an obligasyon han tawo.” Kon may kahadlok kita ha Dios, maaatubang ta an tiarabot nga mga pagsari ngan magigin marig-on. Waray makakaguba han aton pakigsangkay kan Jehova. w23.06 19 ¶17-19

An garantiya han Dios nagtitikang hini nga mga pulong: “An Dios nga nalingkod ha trono nagsiring.” (Pah. 21:5a) Espesyal ini nga mga pulong kay usa ini han tulo ka beses diin hi Jehova mismo an nagyakan ha libro han Pahayag. Salit ini nga garantiya iginhatag diri han usa nga gamhanan nga anghel, diri han binanhaw nga hi Jesus, kondi ni Jehova mismo! Ini nga kamatuoran nagpapamatuod nga masasarigan gud naton an sunod niya nga ginsiring. Kay ano? Tungod kay hi Jehova “diri makakagbuwa.” (Tito 1:2) Salit an mga pulong nga aton nabasa ha Pahayag 21:​5, 6 sigurado nga matutuman. Pansina an pulong nga “Kitaa!” An Griego nga pulong nga iginhubad nga “kitaa!” pauroutro nga gin-gamit ha libro han Pahayag. Ano an sunod nga ginsiring han Dios? Nagsiring hiya: “Ginhihimo ko nga bag-o an ngatanan nga butang.” Oo, an gintutudlok dinhi ni Jehova amo an tiarabot nga mga pagbag-o, pero tungod kay sigurado hiya nga matutuman ito nga saad, nagyayakan hiya nga sugad hin nahitatabo na ito.​—Isa. 46:10. w23.11 3-4 ¶7-8

Nakurian hi apostol Pedro tungod han iya mga kaluyahan. Tagda an pipira nga ehemplo. Han iginsaysay ni Jesus kon paonan-o hiya mag-aantos ngan mamamatay sugad nga katumanan han tagna ha Biblia, ginsaway hiya ni Pedro. (Mar. 8:​31-33) Pauroutro nga nagdiskusyon hira Pedro ngan an iba nga apostol kon hin-o ha ira an pinakalabaw. (Mar. 9:​33, 34) Ha ultimo nga gab-i antes mamatay hi Jesus, tigda nga gintigbas ni Pedro an talinga han usa nga lalaki. (Juan 18:10) Hito liwat nga gab-i, nagpadara hi Pedro ha iya kahadlok salit tulo ka beses nga iginnigar niya nga kilala niya an iya sangkay nga hi Jesus. (Mar. 14:​66-72) Sugad nga resulta, nagtangis hi Pedro tungod han duro nga kasubo. Waray pabay-i ni Jesus an iya nasusubo gud nga apostol. Katapos niya mabanhaw, gintagan niya hin higayon hi Pedro basi pamatud-an nga hinigugma la gihapon hiya ni Pedro. Ginsugo ni Jesus hi Pedro nga mapainubsanon nga atamanon an iya mga karnero. (Juan 21:​15-17) Andam hi Pedro nga buhaton an ginsugo ni Jesus. Salit nakadto hiya ha Jerusalem ha adlaw han Pentekostes ngan usa hiya han siyahan nga gindihogan pinaagi han baraan nga espiritu. w23.09 22 ¶6-7

Gin-aghat ni apostol Pedro an iya mga igkasi-tigurang: “Atamana an panon han Dios.” (1 Ped. 5:​1-4) Kon usa ka nga tigurang, maaram kami nga hinigugma mo an imo kabugtoan ngan karuyag mo nga atamanon hira. Pero usahay bangin inaabat mo nga busy ka gud o kapoy hinduro, salit diri mo na kaya matuman ito nga toka. Ano an mahimo mo buhaton? Isumat kan Jehova an imo mga inaabat. Hi Pedro nagsurat: “Kon nagsiserbi an bisan hin-o, buhaton niya ito sugad nga nasarig ha kusog nga iginhahatag han Dios.” (1 Ped. 4:11) An imo kabugtoan bangin may mga problema nga diri bug-os nga masusulbad dinhi hini nga sistema. Pero hinumdumi nga an “nangunguna nga paraataman,” hi Jesu-Kristo, mas makakabulig ha ira labaw kay han imo mahihimo. Mabubuhat niya ito yana ngan ha bag-o nga kalibotan. Ginhahangyo han Dios an mga tigurang nga higugmaon an ira kabugtoan, atamanon hira, ngan magin “mga susbaranan ha panon.” w23.09 29-30 ¶13-14

Kinahanglan likayan naton an tawhanon nga panhunahuna. Kon kikitaon naton an mga butang ha tawhanon nga panhunahuna, bangin maibalewaray naton hi Jehova ngan an iya mga suruklan. (1 Cor. 3:19) “An kinaadman hini nga kalibotan” agsob nga nakakaimpluwensya ha mga tawo nga diri sugton an Dios. May mga Kristiano ha Pergamo ngan Tiatira nga naimpluwensyahan han idolatroso ngan imoral nga panhunahuna nga komon hito nga mga syudad. Hi Jesus naghatag hin mapwersa nga sagdon hito nga duha nga kongregasyon tungod han ira pagkonsinter ha seksuwal nga imoralidad. (Pah. 2:​14, 20) Yana, naatubang kita hin presyur nga karawaton an sayop nga mga panhunahuna. May mga kapamilya kita ngan kasangkayan nga bangin magsiring ha aton nga sobra kita kaistrikto ngan mag-aghat ha aton nga magkompromiso. Pananglitan, bangin magsiring hira nga diri man importante nga magpabilin nga limpyo ha moral ngan daan na an mga suruklan han Biblia ha moral. Usahay, bangin mangatadongan kita nga an mga instruksyon nga iginhahatag ni Jehova diri gud sugad kaklaro. Bangin masulay pa ngani kita nga ‘pasobrahan an mga butang nga nahisurat.’—1 Cor. 4:6. w23.07 16 ¶10-11

Hi Maria nga nanay ni Jesus, nagkinahanglan hin kusog. Waray pa hiya asawa; pero magbuburod hiya. Waray pa hiya eksperyensya ha pagpadaku hin anak, pero kinahanglan niya atamanon an bata nga magigin Mesias. Ngan tungod kay waray pa hiya magkaada seksuwal nga relasyon, paonan-o niya isusumat ini ngatanan ha iya maarasawa nga hi Jose? (Luc. 1:​26-33) Paonan-o nagkaada hi Maria hin kusog? Nangaro hiya hin bulig ha iba. Pananglitan, nangaro hiya kan Gabriel hin dugang nga impormasyon may kalabotan ha iya toka. (Luc. 1:34) Waray pag-iha katapos hito, nagbiyahe hiya ngadto ha “bukiron nga rehiyon” han Juda basi bisitahon an iya paryente nga hi Elizabeth. Ginkumendasyonan ni Elizabeth hi Maria ngan gin-giyahan hiya ni Jehova ha pagsumat hin usa nga makaparig-on nga tagna mahitungod ha waray pa matawo nga anak ni Maria. (Luc. 1:​39-45) Hi Maria nagsiring nga “nagbuhat [hi Jehova] hin gamhanan nga mga butang pinaagi han iya butkon.” (Luc. 1:​46-51) Pinaagi kanda Gabriel ngan Elizabeth, ginparig-on ni Jehova hi Maria. w23.10 14-15 ¶10-12

May-ada limitado nga kadamu han mga disipulo han Kristo nga gindihogan han baraan nga espiritu, ngan may-ada hira espesyal nga relasyon kan Jehova. Ini nga 144,000 mag-aalagad sugad nga mga saserdote ha langit upod ni Jesus. (Pah. 14:1) An Baraan han tabernakulo nagrirepresentar han pag-ampon ha ira sugad nga espirituwal nga mga anak han Dios samtang aanhi pa hira ha tuna. (Roma 8:​15-17) An Pinakabaraan han tabernakulo nagrirepresentar han langit, diin naukoy hi Jehova. An “kurtina” nga nagbubulag han Baraan ngan han Pinakabaraan nagrirepresentar han unudnon nga lawas ni Jesus nga nakakaulang ha iya pagsulod ha langit sugad nga harangdon nga Hitaas nga Saserdote han espirituwal nga templo. Pinaagi ha paghalad han iya tawhanon nga lawas para ha katawohan, gin-abrihan ni Jesus an dalan tipakadto ha langitnon nga kinabuhi para ha ngatanan nga dinihogan nga Kristiano. Kinahanglan liwat nira bayaan an ira unudnon nga lawas basi makarawat an ira balos ha langit.​—Heb. 10:​19, 20; 1 Cor. 15:50. w23.10 28 ¶13

Hi Gideon kalmado han ginkompronta hiya han mga Efraimita. (Huk. 8:​1-3) Waray hiya bumaton nga nasisina. Nagpakita hiya hin pagin mapainubsanon pinaagi ha pagpamati han ira mga kabaraka, ngan mataktika nga ginpakalma niya an sitwasyon. Ginsusubad han maaramon nga mga tigurang hi Gideon pinaagi ha pagpamati hin maopay ngan pagpabilin nga kalmado kon may reklamo parte ha ira. (San. 3:13) Hito nga paagi, nabulig hira nga magkaada kamurayawan ha kongregasyon. Han gindayaw hi Gideon tungod han pagdaog ha Midian, iginhatag niya kan Jehova an kadayawan. (Huk. 8:​22, 23) Paonan-o masusubad han mga tigurang hi Gideon? Dapat ihatag nira kan Jehova an kadayawan ha ira mga nahihimo. (1 Cor. 4:​6, 7) Pananglitan, kon an usa nga tigurang ginkukumendasyonan tungod han iya abilidad ha pagtutdo, puydi hiya magyakan nga an Pulong han Dios an gintitikangan han instruksyon ngan tikang ha organisasyon ni Jehova an pagbansay nga aton nakakarawat. Ha panapanahon, puydi pamalandungon han mga tigurang kon an paagi ba han ira pagtutdo nag-aaghat ha iba nga dayawon hira imbes nga hi Jehova. w23.06 4 ¶7-8

Kon diri naton nakakarawat an aton igin-aampo, bangin kinahanglan naton pakianhan an aton kalugaringon, ‘Tama ba an akon igin-aampo?’ Kasagaran na nga naghuhunahuna kita nga maaram kita han pinakamaopay para ha aton. Pero an mga butang nga aton gin-aaro diri ngay-an makakaopay ha aton. Kon nag-aampo kita parte ha usa nga problema, bangin may-ada mas maopay nga solusyon kay han aton ginhahangyo. Ngan an pipira nga butang nga aton ginhahangyo bangin diri uyon ha kaburut-on ni Jehova. (1 Juan 5:14) Pananglitan, pansina an ehemplo han mga kag-anak nga nag-ampo kan Jehova nga siguruhon nga magpabilin ha kamatuoran an ira anak. Baga hin angayan ito nga hangyo. Pero diri ni Jehova ginpipirit an bisan hin-o ha aton nga mag-alagad ha iya. Karuyag niya nga pilion naton, pati na han aton mga anak, nga singbahon hiya. (Deut. 10:​12, 13; 30:​19, 20) Salit puydi lugod maghangyo an mga kag-anak kan Jehova nga buligan hira nga maabot an kasingkasing han ira anak basi mapagios hiya nga higugmaon hi Jehova ngan magin Iya sangkay.​—Prob. 22:6; Efe. 6:4. w23.11 21 ¶5; 23 ¶12

Kay ano nga an pagliaw ha iba usa nga importante nga kapahayagan han aton gugma? Sumala ha usa nga reperensya ha Biblia, an pulong nga gin-gamit ni Pablo para ha “pagliaw” nagpapasabot hin “pagtindog ha kagiliran han usa nga tawo ha pagdasig ha iya kon hiya nag-aantos hin makuri nga pagsari.” Salit pinaagi ha pagliaw ha aton igkasi-tumuroo nga nag-aantos, ginbubuligan naton hiya nga makapadayon ha pag-alagad kan Jehova. Ha kada panahon nga ginliliaw naton an usa nga bugto, iginpapakita naton nga hinigugma naton hiya. (2 Cor. 7:​6, 7, 13) An pagpaid ngan an paghatag hin pagliaw konektado gud. Ha ano nga paagi? An mapinairon nga tawo napapagios ha pagliaw ha iba ngan naniningkamot nga buligan hira. Salit ha siyahan napaid kita; katapos nagliliaw kita. Pansina kon paonan-o iginkonektar ni Pablo an pagpaid ni Jehova ha pagliaw nga Iya iginhahatag. Iginhulagway ni Pablo hi Jehova sugad nga “Amay han malumo nga kalooy ngan an Dios han ngatanan nga pagliaw.”​—2 Cor. 1:3. w23.11 9-10 ¶8-10

An ngatanan nga sumurunod han Kristo mahimo makaeksperyensya hin kasakitan. Tagda an ehemplo ni apostol Pablo. Ginsidngan niya an mga taga-Tesalonica: “Han kaupod pa kami niyo, ginsinidngan na namon kamo nga daan nga mag-aantos kita hin kasakitan, ngan ito an nahitabo.” (1 Tes. 3:4) Ngan nagsurat hiya ha mga taga-Corinto: “Diri namon karuyag nga diri niyo hibaroan an kasakitan nga amon naeksperyensyahan . . . Waray gud kami kasigurohan bisan ha amon kinabuhi.” (2 Cor. 1:8; 11:​23-27) An mga Kristiano liwat yana mahimo makaeksperyensya hin iba-iba nga kasakitan. (2 Tim. 3:12) Tungod kay natoo ka kan Jesus ngan nagsusunod ha iya, bangin gintatratar ka hin maraot han imo kasangkayan ngan paryente. Gintitimaraot ka ba ha imo trabaho tungod han imo determinasyon nga magin tangkod ha ngatanan nga butang? (Heb. 13:18) Ginkukontra ka ba han gobyerno tungod kay ginsasangyaw mo ha iba an imo paglaom? Pero anoman nga klase hin kasakitan an bangin gin-aatubang naton, hi Pablo nagsiring nga dapat kita malipay. w23.12 10-11 ¶9-10

Damu an problema ni Jacob. An duha han mga anak ni Jacob, hira Simeon ngan Levi, nagdara hin kaarawdan ha pamilya ngan ha ngaran ni Jehova. Dugang pa, an hinigugma nga asawa ni Jacob nga hi Raquel namatay samtang nanganganak ha ira ikaduha nga anak. Ngan tungod han grabe nga gutom, napiritan hi Jacob nga bumalhin ha tuna han Ehipto han lagas na hiya. (Gen. 35:​16-19; 37:28; 45:​9-11, 28) Bisan pa hito ngatanan, waray gud hi Jacob mawad-i hin pagtoo kan Jehova ngan ha Iya mga saad. Ngan iginpakita naman ni Jehova kan Jacob nga Iya gin-uuyonan hiya. Pananglitan, ginbendisyonan ni Jehova hi Jacob ha materyal nga paagi. Ngan sigurado nga mapasalamaton gud hi Jacob kan Jehova han nagkita hira utro ni Jose—an anak nga maiha na niya nga ginhuhunahuna nga patay! An duok nga pakigsangkay ni Jacob kan Jehova nakabulig ha iya nga makaya an iya mga problema. (Gen. 30:43; 32:​9, 10; 46:​28-30) Kon magpapabilin kita nga duok nga sangkay ni Jehova, makakaya liwat naton an diri ginlalaoman nga mga problema. w23.04 15 ¶6-7

An Salmo 23 usa nga kanta nga nagpapahayag han pagsarig ha gugma ngan pagpalangga ni Jehova. Iginsaysay ni David, nga nagsurat hini nga salmo, an iya marig-on nga relasyon ha iya Paraataman nga hi Jehova. Inabat ni David nga talwas hiya ha pagpagiya kan Jehova, ngan bug-os nga nakadepende hiya ha Iya. Maaram hi David nga pirme ipapakita ni Jehova nga hinigugma niya hiya ha ngatanan nga adlaw han iya kinabuhi. Kay ano nga nakakasiguro hiya hito? Inabat ni David nga inataman gud hiya hin maopay kay hi Jehova pirme nagtatagana han ngatanan niya nga panginahanglan. Maaram liwat hi David nga sangkay hiya ni Jehova ngan gin-uuyonan hiya. Salit sigurado hiya nga bisan ano an mahitabo, pirme ihahatag ni Jehova an ngatanan niya nga panginahanglan. Tungod kay hi David nasarig nga hinigugma hiya ni Jehova ngan aatamanon hiya, nakabulig ito ha iya nga diri mabaraka, lugod magin malipayon ngan kontento.​—Sal. 16:11. w24.01 29 ¶12-13

Tikang han Girra ha Kalibotan II, an katawohan ni Jehova nagkaada kagawasan ha pagsangyaw ha damu nga katunaan. Ngani, nag-uswag an buruhaton. Yana, an mga membro han Nagmamando nga Lawas padayon nga nasarig ha Kristo para hin giya. Karuyag nira nga an mga instruksyon nga ira iginhahatag ha mga kabugtoan nagpapakita han panhunahuna ni Jehova ngan ni Jesus ha mga butang. Ngan gin-gagamit nira an mga paramangno han sirkito ngan mga tigurang basi magtagana hin instruksyon ha mga kongregasyon. An dinihogan nga mga tigurang aada ha “too nga kamot” han Kristo. (Pah. 2:1) Syempre, ini nga mga tigurang diri perpekto ngan nakakasayop. May mga panahon nga hira Moises ngan Josue nakahimo hin mga sayop, pariho han mga apostol. (Num. 20:12; Jos. 9:​14, 15; Roma 3:23) Bisan pa hito, gin-gigiyahan gud han Kristo an matinumanon nga uripon ngan an pinili nga mga tigurang ngan padayon niya ito nga bubuhaton. Salit may-ada kita rason nga sumarig ha giya nga iya igintatagana pinaagi hadton iya ginpili nga manguna. w24.02 23-24 ¶13-14

Yana, mapapalipay ta hi Jehova pinaagi ha pag-istorya ha iba mahitungod ha iya ha paagi nga nagpapakita nga mapasalamaton gud kita ngan hinigugma gud naton hiya. Kon nagsasangyaw kita, an aton nangunguna nga katuyoan amo an pagpahirani han mga tawo kan Jehova, ngan pagbulig ha ira nga abaton an aton inaabat ha aton mahigugmaon nga Amay. (San. 4:8) Nalilipay kita nga ipakita ha mga tawo kon paonan-o iginhuhulagway han Biblia hi Jehova, an iya gugma, hustisya, kinaadman, gahum, ngan iba pa nga makaruruyag nga mga kalidad. Gindadayaw ngan ginpapalipay liwat naton hi Jehova pinaagi ha pangalimbasog nga subaron hiya. Kon buhaton ta ito, naiiba kita hinin maraot gud nga kalibotan. Bangin mapansin han mga tawo nga naiiba kita ngan maghunahuna hira kon kay ano. (Mat. 5:​14-16) Samtang nakikiistorya kita ha ira ha aton adlaw-adlaw nga pagkinabuhi, mahimo naton maisaysay kon kay ano nga sugad kita hito. Tungod hito, an mga sinsero naipapahirani ha aton Dios. Kon gindadayaw naton hi Jehova hini nga mga paagi, napapalipay naton an iya kasingkasing.​—1 Tim. 2:​3, 4. w24.02 10 ¶7

Basi magin hamtong nga Kristiano, kinahanglan mo mag-aram hin praktikal nga mga skill. Mabulig ini ha imo nga matuman an mga responsabilidad ha kongregasyon, basi makabiling hin trabaho nga makakasuporta ha imo o ha pamilya, ngan basi magkaada maopay nga relasyon ha iba. Pananglitan, pag-aram ha pagbasa ngan pagsurat hin maopay. An Biblia nasiring nga an malipayon ngan malampuson nga lalaki naggagahin hin panahon kada adlaw ha pagbasa han Pulong han Dios ngan ha pagpamalandong hito. (Sal. 1:​1-3) Pinaagi ha pagbasa han Biblia kada adlaw, mahibabaroan niya an panhunahuna ni Jehova nga mabulig ha iya nga maghunahuna hin klaro ngan mangatadongan hin maopay. (Prob. 1:​3, 4) An aton kabugtoan nanginginahanglan hin may kapas nga kalalakin-an nga makakahatag hin instruksyon ngan sagdon tikang ha Biblia. Kon nakakabasa ka ngan nakakasurat hin maopay, makakaandam ka hin impormatibo ngan makaparig-on ha pagtoo nga mga pahayag ngan komento. Makakahimo ka liwat hin mapulsanon nga nota nga mabulig ha imo nga maparig-on an imo pagtoo ngan madasig an iba. w23.12 26-27 ¶9-11

Kon nahahadlok ka, pamalandonga an bubuhaton ni Jehova ha tiarabot kon waray na hi Satanas. Iginpakita ha pasundayag han 2014 nga regional nga kombensyon an usa nga tatay nga naghihisgot ha iya pamilya kon ano unta an mababasa ha 2 Timoteo 3:​1-5 kon ito nga mga bersikulo nagtatagna han mahitatabo ha Paraiso. Hiya nagsiring: “Ha bag-o nga kalibotan maieksperyensyahan an pinakamakalilipay gud nga mga panahon. Kay an mga tawo magigin mahigugmaon ha iba, mahigugmaon ha espirituwal nga mga bahandi, diri hambog, mapainubsanon, nagpapasidungog ha Dios, masinugtanon ha mga kag-anak, mapasalamaton, maunungon, may daku nga gugma ha mga kapamilya, naruruyag pakigsabot, pirme nagyayakan hin maopay ha iba, may pagpugong ha kalugaringon, malumo, mahigugmaon ha kaopayan, masasarigan, makatadunganon, mapainubsanon ha hunahuna, mahigugmaon ha Dios imbes nga mahigugmaon ha kalipayan, ginpapagios pinaagi han totoo nga debosyon ha Dios; pakigsangkay gud hini nga mga tawo.” Gin-iiristoryahan ba niyo han iyo pamilya o han iyo igkasi-tumuroo kon ano an magigin kinabuhi ha bag-o nga kalibotan? w24.01 6 ¶13-14

Makapasarig gud hibaroan nga gin-uuyonan ni Jehova an iya katawohan sugad nga grupo! An Biblia nasiring: “Hi Jehova nalilipay ha iya katawohan.” (Sal. 149:4) Pero danay an iba nanluluya gud ngan bangin magpakiana, ‘Gin-uuyonan ba ako ni Jehova sugad nga indibiduwal?’ Ha panahon han Biblia, damu nga matinumanon nga magsiringba ni Jehova an nagkaada sugad hito nga pagruhaduha. (1 Sam. 1:​6-10; Job 29:​2, 4; Sal. 51:11) Klaro nga iginpapakita han Biblia nga an diri perpekto nga mga tawo mahimo makakarawat han pag-uyon, o pagkabuotan ni Jehova. Paonan-o? Kinahanglan kita magkaada pagtoo kan Jesu-Kristo ngan magpabawtismo. (Juan 3:16) Salit iginpapakita naton ha publiko nga nagbasol na kita ha aton mga sala ngan nagsaad ha Dios nga bubuhaton an iya kaburut-on. (Buh. 2:38; 3:19) Nalilipay gud hi Jehova kon ginbubuhat naton ito basi magkaada duok nga relasyon ha iya. Kon padayon naton nga ginbubuhat an aton pinakamaopay ha pagtuman han saad han nagdedikar kita, uuyonan kita ni Jehova ngan tatrataron sugad nga iya duok nga mga sangkay.​—Sal. 25:14. w24.03 26 ¶1-2

Masusubad ta an mga disipulo pinaagi ha padayon nga pagsangyaw bisan kon sugoon kita han gobyerno nga umundang. Makakasarig kita nga hi Jehova mabulig ha aton nga matuman an aton ministeryo. Salit pag-ampo para hin kaisog ngan kinaadman pati liwat han bulig ni Jehova basi mailob mo an imo mga problema. Damu ha aton an may sakit o problema ha emosyon, namatayan hin hinigugma, makuri an sitwasyon han pamilya, gintitimaraot, o may iba pa nga problema. Ngan damu hini nga mga problema an nagin mas makuri atubangon tungod han mga kahimtang sugad han pandemya ngan girra. Isumat kan Jehova kon ano gud an imo inaabat. Sumati hiya han imo sitwasyon sugad la nga isusumat mo ito ha duok nga sangkay. Sarig nga hi Jehova ‘magios para ha imo.’ (Sal. 37:​3, 5) An padayon nga pag-ampo mabulig ha aton nga “magpailob ha kasakitan.” (Roma 12:12) Maaram hi Jehova han gin-aagian han iya mga magsiringba—“namamati hiya han ira pangaraba para hin bulig.”​—Sal. 145:​18, 19. w23.05 5-6 ¶12-15

Kon maghihimo kita hin importante nga mga desisyon, kinahanglan naton masabtan “kon ano an kaburut-on ni Jehova” ngan katapos, gios uyon hito. (Efe. 5:17) Pinaagi ha pag-usisa han mga prinsipyo ha Biblia nga naaplikar ha aton kahimtang, iginpapakita naton nga ginbibiling ta an panhunahuna han Dios mahitungod hito. Katapos, samtang aton gin-aaplikar an iya mga prinsipyo, mas makakahimo kita hin mag-opay nga desisyon. Karuyag han aton kaaway nga hi Satanas, an “usa nga maraot,” nga magin busy gud kita ha mga buruhaton hini nga kalibotan basi waray na kita panahon ha pag-alagad ha Dios. (1 Juan 5:19) Magigin masayon gud la para ha usa nga Kristiano nga magpokus ha kwarta, sekular nga edukasyon, o trabaho imbes ha mga oportunidad ha pag-alagad kan Jehova. Kon ito an iya buhaton, iginpapakita niya nga naimpluwensyahan na hiya han panhunahuna han kalibotan. Syempre, diri man sayop ini nga mga butang, pero dapat diri gud ini an prayoridad ha aton kinabuhi. w24.03 24 ¶16-17