Mga Kabugtoan nga Kalalakin-an—Magpugas ha Espiritu Ngan Pagkab-ot hin mga Pribilehiyo!
‘An magpugas ngadto ha espiritu mag-aani hin kinabuhi nga waray kataposan.’—GAL. 6:8.
1, 2. Paonan-o natutuman an Mateo 9:37, 38, ngan tungod hito, ano an ginkikinahanglan ha mga kongregasyon?
NAKIKITA mo yana an mga hitabo nga diri gud hingangalimtan ha kadayonan! Natutuman an buruhaton nga igintagna ni Jesus ngan nag-uuswag gud ito. “An babrion banos, kondi an magbabari talagsa,” siring ni Jesus. “Busa mag-ampo kamo ha Ginoo han babrion, basi hiya magsugo hin mga magbabari ha iya babrion.” (Mat. 9:37, 38) Ginbabaton ni Jehova nga Dios an sugad hito nga mga pag-ampo ha paagi nga waray pa mahitabo hadto. Han 2009 nga tuig han pag-alagad, an mga kongregasyon han mga Saksi ni Jehova ha bug-os nga kalibotan nadugangan hin 2,031 salit inabot na hin 105,298. Kada adlaw, 757 an aberids nga nababawtismohan!
2 Tungod hito nga pag-uswag, ginkikinahanglan an kwalipikado nga kalalakin-an nga mangunguna ha pagtutdo ngan pagmangno ha mga kongregasyon. (Efe. 4:11) Han naglabay nga katuigan, gin-gamit ni Jehova an kwalipikado nga kalalakin-an ha pagmangno ha panginahanglan han iya panon, ngan makakasarig kita nga padayon nga bubuhaton niya ito. An tagna ha Mika 5:5 nagpapasarig ha aton nga ha kataposan nga mga adlaw, an katawohan ni Jehova magkakaada ‘pito nga magbarantay hin kakarnerohan’ ngan ‘walo nga punoan,’ nagpapasabot nga magkakaada damu nga kwalipikado nga kalalakin-an nga mangunguna ha ira.
3. Isaysay kon ano an iginpapasabot han ‘pagpugas ngadto ha espiritu.’
3 Kon bawtismado ka nga lalaki, ano an makakabulig ha imo nga maghingyap hin pribilehiyo ha kongregasyon? Usa nga importante nga bulig amo an ‘pagpugas ngadto ha espiritu.’ (Gal. 6:8) Nag-uupod ito hin pagpagiya ha baraan nga espiritu han Dios ha imo pagkinabuhi. Magin determinado nga diri ‘magpugas ngadto ha unod.’ Ayaw pabay-i nga an kahimyang, pagpahalibway, ngan kaliawan makaiban han imo hingyap nga buhaton an ngatanan ha pag-alagad ha Dios. An ngatanan nga Kristiano sadang ‘magpugas ngadto ha espiritu,’ ngan maabot an panahon nga an kalalakin-an nga nagbubuhat hito bangin magin kwalipikado ha pagkaada mga pribilehiyo ha kongregasyon. Tungod kay daku an panginahanglan hin mga ministeryal ngan tigurang yana, ini nga artikulo igintagana labi na para ha Kristiano nga kalalakin-an. Salit mga kabugtoan nga kalalakin-an, gin-aaghat namon kamo nga pamalandungon ngan ig-ampo gud ini.
Mangalimbasog ha Pagkab-ot hin “Maopay nga Buhat”
4, 5. (a) Ano nga mga pribilehiyo ha kongregasyon an sadang pangalimbasogan nga makab-ot han bawtismado nga kalalakin-an? (b) Ano an sadang buhaton han usa basi magin kwalipikado?
4 An Kristiano nga lalaki diri awtomatiko nga nagigin paramangno. Kinahanglan magtalinguha hiya nga makab-ot inin “maopay nga buhat.” (1 Tim. 3:1) Nahiuupod hito an pagserbi ha mga igkasi-tumuroo pinaagi han sinsero nga pagmangno han ira mga panginahanglan. (Basaha an Isaias 32:1, 2.) An nangangalimbasog nga magin kwalipikado nga may husto nga motibo diri ambisyoso. Lugod, may-ada hiya diri hakugnon nga hingyap nga buligan an iba.
5 Maipapakita han usa nga karuyag gud niya magin ministeryal o paramangno pinaagi han pangalimbasog nga maabot an mga kwalipikasyon nga gin-unabi ha Kasuratan. (1 Tim. 3:1-10, 12, 13; Tito 1:5-9) Kon bawtismado ka nga lalaki, pakianhi an imo kalugaringon: ‘Nakikigbahin ba ako hin bug-os ha pagsangyaw, ngan nabulig ba ako ha iba nga buhaton ito? Ginpaparig-on ko ba an akon mga igkasi-tumuroo pinaagi ha pagpakita hin sinsero nga interes ha ira kaopayan? Kilala ba ako nga mauyatom mag-aram han Pulong han Dios? Nagtatalinguha ba ako nga magtikaopay an akon mga komento? Maduruto ba ako ha pagtuman han mga toka nga igintatapod ha akon han mga tigurang?’ (2 Tim. 4:5) Ini nga mga pakiana sadang hunahunaon hin maopay.
6. Ano pa an makakabulig ha imo nga magin kwalipikado ha pagkaada mga responsabilidad ha kongregasyon?
6 Usa pa nga sadang buhaton basi magin kwalipikado ha mga responsabilidad ha kongregasyon amo an ‘pagpakusog han tawo ha sulod ha gahum tungod ha espiritu han Dios.’ (Efe. 3:16) An usa diri nagigin ministeryal o tigurang ha kongregasyon tungod kay iginbutos hiya. Makakab-ot la ito pinaagi han pag-uswag ha espirituwal. Paonan-o ka mag-uuswag ha espirituwal? An usa nga paagi amo an padayon nga ‘paggawi sugad ha espiritu’ ngan pagkultibar han bunga hito. (Gal. 5:16, 22, 23) Samtang imo iginpapakita an espirituwal nga mga kalidad nga ginkikinahanglan basi magkaada dugang nga mga pribilehiyo ngan samtang imo ginsusunod an sagdon kon paonan-o mag-uuswag, ‘an imo kauswagan maipapahayag ha ngatanan.’—1 Tim. 4:15.
Ginkikinahanglan an Pagsakripisyo ha Kalugaringon
7. Ano an nahiuupod ha pagserbi ha iba?
7 An pagserbi ha iba nag-uupod hin pagin maduruto ngan nagkikinahanglan hin pagsakripisyo ha kalugaringon. Tungod kay an Kristiano nga mga paramangno sugad hin mga magbarantay hin karnero, nababaraka gud hira ha mga problema han panon. Tagda kon ano an inabat ni apostol Pablo ha iya mga responsabilidad ha pagmangno han panon. Hiya nagsiring ha iya mga igkasi-tumuroo ha Korinto: “Tikang ha damu nga kagol-anan ngan kabidoan han kasingkasing nagsurat ako ha iyo upod an damu nga mga luha; diri nga magkabibido kamo, kondi nga basi niyo hibaroan an daku nga paghigugma ko ha iyo.” (2 Kor. 2:4) Matin-aw nga kinasingkasing nga gintuman ni Pablo an iya mga responsabilidad.
8, 9. Paghatag hin mga ehemplo ha Biblia han kalalakin-an nga nagmangno ha panginahanglan han iba.
8 Tikang pa hadto, an pagsakripisyo ha kalugaringon usa gud nga pangirilal-an han kalalakin-an nga nagmamangno ha katawohan ni Jehova. Pananglitan, diri gud naton mahuhunahuna nga hi Noe nagsiring ha iya pamilya: ‘Sumati na la ako kon matapos na an arka basi makaupod ako ha iyo.’ Hi Moises waray magsiring ha mga Israelita ha Ehipto: ‘Pagkirita na la kita ha Dagat nga Pula. Kamo na la an pag-igo kon diin kamo maagi.’ Hi Josue waray gud magsiring: ‘Sumati ako kon narumpag na an pader han Jeriko.’ Ngan hi Isaias waray magtudlok hin iba nga tawo ngan sumiring: ‘Adto man hiya, amo it sugoa.’—Isa. 6:8.
9 An aton gimaopayi nga susbaranan nga nagpagiya ha espiritu ni Jehova amo hi Jesu-Kristo. Kinaburut-on nga ginkarawat niya an toka nga magin Manunubos han katawohan. (Juan 3:16) Diri ba an nagsasakripisyo nga gugma ni Jesus sadang magpagios liwat ha aton nga magsakripisyo? Usa nga maiha na nga tigurang an nagsaysay han iya inaabat para ha panon: “Napapagios gud ako han ginsiring ni Jesus kan Pedro nga pasabsabon an Iya mga karnero. Ha paglabay han mga tuig, nasabtan ko nga bisan an pipira la nga mahigugmaon nga pulong o gutiay nga buhat nga nagpapakita hin pagkabuotan makakadasig na ha iba. Nalilipay gud ako pagmangno ha kabugtoan pinaagi han pagbisita ha ira.”—Juan 21:16.
10. Ano an makakapagios ha Kristiano nga kalalakin-an nga subaron hi Jesus ha pagserbi ha iba?
10 Ha pagmangno han panon han Dios, sigurado nga karuyag han dedikado nga kalalakin-an nga subaron an disposisyon ni Jesus, nga nagsiring: “Akon kamo tatagan hin pagpahuway.” (Mat. 11:28) An pagtoo ha Dios ngan gugma ha kongregasyon nagpapagios ha Kristiano nga kalalakin-an nga kab-uton inin maopay nga buhat ngan diri hunahunaon nga daku gud ito nga sakripisyo o makuri ito hinduro. Kondi, ano man kon an usa diri naghihingyap nga magkaada pribilehiyo? Mahimo ba niya kultibaron an hingyap nga magserbi ha kongregasyon?
Kultibara an Hingyap nga Magserbi
11. Paonan-o makukultibar an hingyap nga magserbi ha iba?
11 Kon ha imo pag-abat waray ka kapas salit diri ka nangangalimbasog pagkab-ot hin mga pribilehiyo, husto gud nga mag-ampo ngan mangaro hin baraan nga espiritu. (Luk. 11:13) An espiritu ni Jehova mabulig ha imo nga malamposan ito nga kabaraka. Tikang ha iya an hingyap nga magserbi ha iba, tungod kay an iya espiritu an nag-aaghat ha usa nga mangalimbasog pagkab-ot hin pribilehiyo ngan naghahatag han kusog nga ginkikinahanglan ha sagrado nga pag-alagad. (Fil. 2:13; 4:13) Salit angayan gud nga mangaro hin bulig kan Jehova basi magkaada ka hingyap nga karawaton an mga pribilehiyo ha pag-alagad.—Basaha an Salmo 25:4, 5.
12. Paonan-o an usa magkakaada igo nga kinaadman ha pagtuman han mga responsabilidad nga igintatapod ha iya?
12 An usa nga Kristiano bangin diri mangalimbasog ha pagkab-ot hin pribilehiyo tungod kay naoobserbahan niya nga baga hin maguol ngan komplikado an pagmangno han mga panginahanglan han panon. O bangin nahuhunahuna niya nga kulang hiya hin kinaadman ha pagtuman han mga responsabilidad. Kon sugad hito an kahimtang, mahimo hiya magkaada kinaadman pinaagi han mas maduruto nga pag-aram ha Biblia ngan ha mga publikasyon nga basado hito. Maopay liwat nga pakianhan niya an iya kalugaringon, ‘Naggagahin ba ako hin panahon ha pag-aram han Pulong han Dios, ngan nag-aampo ba ako nga magkaada kinaadman?’ An disipulo nga hi Jakobo nagsurat: “Kon may-ada ha iyo an nakulang hin kaaram, mangaro hiya ha Dios, nga mahatagon ha ngatanan ngan diri mabadlungon; ngan ito ihatag ha iya.” (Jak. 1:5) Natoo ka ba hinin giniyahan nga mga pulong? Sugad nga baton ha pag-ampo ni Salomon, gintagan hiya han Dios hin “makinaadmanon ngan masinabuton nga kasingkasing” nga nakabulig ha iya nga hibaroan kon hain an maopay o maraot kon naghuhukom. (1 Hadi 3:7-14) Oo, naiiba an kahimtang ni Salomon. Kondi, makakasarig kita nga an Dios maghahatag hin kinaadman ha kalalakin-an nga gintataporan hin mga responsabilidad ha kongregasyon basi mamangnoan nira hin husto an iya panon.—Prob. 2:6.
13, 14. (a) Isaysay kon ano an nagin epekto kan Pablo han “gugma ni Kristo.” (b) Ano an sadang magin epekto ha aton han “gugma ni Kristo”?
13 Usa pa nga makakabulig ha imo nga makultibar an hingyap nga magserbi ha iba amo an pamalandong han ngatanan nga ginbubuhat ni Jehova ngan han iya Anak para ha aton. Pananglitan, tagda an 2 Korinto 5:14, 15. (Basaha.) Ha ano nga paagi ‘an gugma ni Kristo naglulugos [o nagpapagios] ha aton’? Daku gud an gugma nga iginpakita ni Kristo han namatay hiya para ha aton uyon ha kaburut-on han Dios salit samtang mas nasasabtan ngan naaapresyar naton ito, nababantad gud an aton kasingkasing. Gugma ni Kristo an nakaimpluwensya ha paggawi ni Pablo. Nakabulig ito ha iya nga diri magin makikalugaringon ngan nagpagios ha iya nga himoon nga prayoridad an pag-alagad ha Dios ngan pagserbi ha mga tawo ha sulod ngan ha gawas han kongregasyon.
14 An pamalandong ha gugma ni Kristo ha katawohan nagpapagios ha aton nga magin mapasalamaton. Tungod hito, nasasantop naton nga sayop gud an padayon nga ‘pagpugas ngadto ha unod’ pinaagi han pag-una hin hakugnon nga mga tumong ngan pagkinabuhi nga gintatagbaw la an aton kalugaringon nga mga hingyap. Lugod, naghihimo kita hin mga pagbag-o basi unahon an buruhaton nga igintoka han Dios. Napapagios kita nga magserbi ha aton kabugtoan tungod han gugma. (Basaha an Galasia 5:13.) Kon gintatagad naton an aton kalugaringon sugad nga mga uripon nga mapainubsanon nga nagbubuhat para ha dedikado nga katawohan ni Jehova, tatrataron naton hira nga may dignidad ngan pagtahod. Diri gud kita magigin kritiko o madagmit maghukom, nga amo an disposisyon nga igin-aaghat ni Satanas.—Pah. 12:10.
Pangalimbasog han Pamilya
15, 16. Paonan-o makakabulig an mga membro han pamilya basi an Kristiano nga lalaki magin kwalipikado nga ministeryal o tigurang?
15 Kon an usa nga bugto nga lalaki inasaw-an ngan may mga anak, gin-uusisa an kahimtang han iya pamilya antes magdesisyon kon kwalipikado ba hiya magin ministeryal o tigurang. Oo, an espirituwalidad ngan reputasyon han iya pamilya nakakaapekto gud ha pagpilia ha iya. Ginpapabug-atan hini nga importante an suporta han pamilya ha bana ngan amay samtang nangangalimbasog hiya nga magserbi ha kongregasyon sugad nga ministeryal o tigurang.—Basaha an 1 Timoteo 3:4, 5, 12.
16 Nalilipay hi Jehova kon nagbuburublig an bug-os nga pamilya. (Efe. 3:14, 15) An ulo han pamilya kinahanglan magin timbang ha pagtuman han iya mga responsabilidad ha kongregasyon ngan ha pagdumara “hin maopay” han iya pamilya. Salit importante nga an tigurang o ministeryal mag-aram han Biblia upod han iya asawa ngan mga anak kada semana durante han ira Pagsingba han Pamilya basi makapahimulos hira ngatanan. Kinahanglan regular nga makigbahin hiya ha ministeryo upod han iya pamilya. Ha luyo nga bahin, importante liwat nga makigkooperar an mga membro han pamilya ha pangalimbasog han ulo han pamilya.
Mahimo Ka ba Magserbi Utro?
17, 18. (a) Kon an usa nga bugto diri na kwalipikado ha iya pribilehiyo, ano an bangin kinahanglan niya buhaton? (b) Ano an maopay nga magin disposisyon han usa nga nawad-an hin pribilehiyo sugad nga tigurang o ministeryal?
17 Hadto bangin usa ka nga tigurang o ministeryal, kondi yana diri na. Hinigugma mo hi Jehova ngan makakasarig ka nga hinigugma ka pa gihapon niya. (1 Ped. 5:6, 7) Ginsidngan ka ba nga may-ada ka kinahanglan bag-uhon? Magin andam ha pagkarawat han imo sayop ngan pangalimbasugi nga malamposan ito ha bulig han Dios. Ayaw pagdumot. Magin maaramon ngan positibo. Usa nga bugto nga maiha na nga tigurang kondi nawad-an hito nga pribilehiyo an nagsiring: “Determinado ako nga ipadayon an regular nga pagtambong ha mga katirok, pagsangyaw, ngan pagbasa han Biblia sugad han akon ginbubuhat han tigurang pa ako, ngan nahimo ko ito. Nagin mapailubon ako tungod kay kahuna ko nga paglabay hin usa o duha la ka tuig maibabalik na ako ha pagin tigurang, kondi inabot hin haros pito ka tuig antes ako magin tigurang utro. Durante hito nga panahon, nakabulig gud ha akon an pagdasig nga diri manluya kondi magpadayon ha pangalimbasog nga magin kwalipikado utro.”
18 Kon sugad hito an imo kahimtang, ayaw panluya. Pamalandonga kon paonan-o ginbibendisyonan ni Jehova an imo ministeryo ngan an imo pamilya. Parig-ona an espirituwalidad han imo pamilya, bisitaha an magsakit, ngan dasiga an magluya. Labaw ha ngatanan, pabilhi an imo pribilehiyo nga dayawon an Dios ngan ipasamwak an maopay nga sumat han Ginhadian sugad nga Saksi ni Jehova.a—Sal. 145:1, 2; Isa. 43:10-12.
Usisaha an Imo Kahimtang
19, 20. (a) Ano an igin-aaghat ha ngatanan nga bawtismado nga kalalakin-an? (b) Ano an hihisgotan ha sunod nga artikulo?
19 Labaw kay ha kakan-o pa man, mas daku gud yana an panginahanglan hin mga paramangno ngan ministeryal. Salit gin-aaghat namon an ngatanan nga bawtismado nga kalalakin-an nga usisahon an ira kahimtang ngan pakianhan an ira kalugaringon, ‘Ano an mga hinungdan nga diri ako nagigin ministeryal o tigurang?’ Pangaro han bulig han espiritu han Dios basi magkaada ka husto nga panhunahuna mahitungod hinin importante nga butang.
20 An ngatanan nga membro han kongregasyon magpapahimulos ha nagsasakripisyo nga pangalimbasog han ira mga igkasi-tumuroo. Kon nagpapakita kita hin pagkabuotan ngan nagsasakripisyo para ha iba, magigin malipayon kita tungod kay nagsiserbi kita ha iba ngan nagpupugas ha espiritu. Kondi, sugad han hihisgotan ha sunod nga artikulo, kinahanglan diri naton pagsakiton an baraan nga espiritu han Dios. Paonan-o naton ito malilikyan?
[Footnote]
Ano an Imo Baton?
• Ano an iginpapasarig ha aton han tagna ha Mika 5:5?
• Isaysay kon ano an nahiuupod ha pagsakripisyo ha kalugaringon.
• Paonan-o makukultibar an hingyap nga magserbi ha iba?
• Mationan-o kaimportante an suporta han pamilya basi an usa nga Kristiano nga lalaki magin kwalipikado nga ministeryal o tigurang?
[Mga Retrato ha pahina 25]
Ano an imo sadang buhaton basi magkaada pribilehiyo?