Bansaya an Iba nga Magkab-ot hin mga Pribilehiyo
“An natutdoan hin maopay magigin pariho ha iya magturutdo.”—LUK. 6:40, NW.
1. Ha pagministeryo ni Jesus dinhi ha tuna, paonan-o niya ginhimo an pundasyon han usa nga makatirigamnan nga kongregasyon?
HA KATAPOSAN han Ebanghelyo ni apostol Juan, hiya nagsurat: “Damu pa man nga iba nga mga bagay, nga ginbuhat ni Jesus, nga kon iginsurat ha usa kag usa, akon pinakakasiring, nga an mga basahon nga panunuraton diri sadang hisulod ha bug-os nga kalibotan.” (Juan 21:25) Usa han nahimo ni Jesus durante han iya halipot kondi madasigon gud nga pagministeryo amo an pamiling, pagbansay, ngan pag-organisa hin kalalakin-an nga mangunguna ha pagpadayon han buruhaton nga iya gintikangan. Pagbalik niya ha langit han 33 K.P., nahimo na niya an pundasyon han usa nga makatirigamnan nga kongregasyon nga madagmit nga nagin yinukot an membro.—Buh. 2:41, 42; 4:4; 6:7.
2, 3. (a) Kay ano nga daku gud an panginahanglan hin kabugtoan nga kalalakin-an nga magkab-ot hin mga pribilehiyo ha kongregasyon? (b) Ano an hihisgotan hini nga artikulo?
2 Yana, may-ada na sobra pito ka milyon nga aktibo nga magwarali ha sobra 100,000 nga kongregasyon ha bug-os nga kalibotan salit padayon nga nagkikinahanglan hin kalalakin-an nga mangunguna hito nga mga kongregasyon. Pananglitan, daku an panginahanglan hin mga tigurang. Darayawon an kabugtoan nga nangangalimbasog pagkab-ot hini nga pribilehiyo, kay ‘maopay nga buhat an ira ginbibiling.’—1 Tim. 3:1.
3 Kondi an mga lalaki diri awtomatiko nga nagigin kwalipikado ha mga pribilehiyo ha kongregasyon. Diri edukasyon, eksperyensya, ngan abilidad an nag-aandam han usa nga lalaki para hini nga buruhaton. Kinahanglan may-ada hiya espirituwal nga mga kwalipikasyon. Paonan-o mabubuligan an kabugtoan nga kalalakin-an nga magin kwalipikado? “An natutdoan hin maopay magigin pariho ha iya magturutdo,” siring ni Jesus. (Luk. 6:40, NW) Hini nga artikulo, hihisgotan naton an pipira nga paagi nga gin-gamit han Bantogan nga Magturutdo nga hi Jesu-Kristo basi buligan an iya mga disipulo nga magin kwalipikado ha dagku nga responsabilidad, ngan aton uusisahon kon ano nga mga leksyon an aton hibabaroan ha iya ginbuhat.
‘Ako Nagtatawag ha Iyo nga Kasangkayan’
4. Paonan-o iginpakita ni Jesus ha iya mga disipulo nga tinuod hiya nga sangkay?
4 Gintratar ni Jesus an iya mga disipulo sugad nga kasangkayan, diri sugad nga ubos ha iya. Nakig-upod hiya ha ira, tinapod ha ira, ngan nagsumat ha ira han ‘ngatanan nga iya napamatian ha iya Amay.’ (Basaha an Juan 15:15.) Handurawa an ira kalipay han ginbaton ni Jesus an ira pakiana: “Ano an tigaman han imo pagkanhi, ngan ha kataposan han kalibotan?” (Mat. 24:3, 4) Iginsumat liwat niya ha ira an iya panhunahuna ngan pagbati. Pananglitan, han gab-i nga gintraydoran hiya, iya igin-upod hira Pedro, Jakobo, ngan Juan ha hardin han Getsemani, diin nag-ampo gud hiya tungod han duro nga kasákit. Bangin waray mabatii han tulo nga apostol an gin-aampo ni Jesus, pero sigurado nga inabat hira nga duro gud an iya kasákit hito nga panahon. (Mar. 14:33-38) Antes pa hito, ginparig-on niya hira han ‘nagbalhin hiya hin dagway ha ira atubangan.’ (Mar. 9:2-8; 2 Ped. 1:16-18) An duok nga pakigsangkay ni Jesus ha iya mga disipulo nakabulig gud ha ira nga magin marig-on ha pagtuman hin importante nga mga toka ha urhi.
5. Paonan-o an mga tigurang nabulig ha kabugtoan?
5 Pariho kan Jesus, an mga tigurang yana nakikigsangkay ngan nabulig ha kabugtoan. Hinigugma nira an ira mga igkasi-tumuroo ngan iginpapakita nga interesado gud hira ha ira. Maaram an mga tigurang nga kinahanglan diri nira isumat an kompidensyal nga mga butang, pero nasarig hira ha kabugtoan ngan nag-iistorya han ira hinbabaroan ha Kasuratan. Diri gud ginhuhunahuna han mga tigurang nga mas labaw hira ha usa nga ministeryal nga batan-on pa. Lugod, gintatagad nira hiya sugad nga espirituwal nga tawo nga may potensyal nga mag-uswag ngan nagbubuhat hin mga buruhaton nga mapulsanon ha kongregasyon.
‘Gintagan Ko Kamo hin Susbaranan’
6, 7. Isaysay an susbaranan nga iginpakita ni Jesus ha iya mga disipulo ngan an epekto hito ha ira.
6 Bisan kon ginpapabilhan han mga disipulo ni Jesus an espirituwal nga mga butang, usahay an ira panhunahuna naiimpluwensyahan han ira gintikangan ngan kultura. (Mat. 19:9, 10; Luk. 9:46-48; Juan 4:27) Kondi hi Jesus waray magbusa o magtarhog ha ira. Waray niya ipabuhat ha ira an diri nira maaakos ngan waray liwat hiya magsugo ha ira nga buhaton an mga butang nga hiya mismo diri magbubuhat. Lugod, gintutdoan niya hira pinaagi han iya susbaranan.—Basaha an Juan 13:15.
7 Ano nga susbaranan an iginpakita ni Jesus ha iya mga disipulo? (1 Ped. 2:21) Gintipigan niya nga simple an iya kinabuhi basi magamit niya an iya panahon ha pagbulig ha iba. (Luk. 9:58) Mapainubsanon hiya ngan pirme niya iginbabasar ha Kasuratan an iya igintututdo. (Juan 5:19; 17:14, 17) Buotan hiya ngan masayon madaop. Gugma an pirme nagpapagios ha iya ha ngatanan nga iya ginhihimo. (Mat. 19:13-15; Juan 15:12) An iya susbaranan nagkaada maopay nga epekto ha iya mga apostol. Pananglitan, hi Jakobo maisugon ngan maunungon nga nag-alagad ha Dios tubtob han ginpatay hiya. (Buh. 12:1, 2) Hi Juan nagin matinumanon ha sulod hin sobra 60 ka tuig.—Pah. 1:1, 2, 9.
8. Paonan-o an mga tigurang magigin susbaranan ha batan-on nga kalalakin-an ngan ha iba?
8 An mga tigurang nga nagsasakripisyo, mapainubsanon, ngan mahigugmaon nagpapakita hin maopay nga susbaranan ha batan-on nga kalalakin-an. (1 Ped. 5:2, 3) Dugang pa, an mga tigurang nga susbaranan ha pagtoo, pagtutdo, pagkinabuhi sugad nga Kristiano, ngan ha ministeryo malilipay ha paghibaro nga mahimo subaron han kabugtoan an ira pagtoo.—Heb. 13:7.
‘Gintugon Hira ni Jesus Ngan Ginsugo’
9. Kay ano nga masisiring naton nga ginbansay ni Jesus an iya mga disipulo nga magsangyaw?
9 Katapos han duha ka tuig nga madasigon nga pagsangyaw ni Jesus, ginpahaluag niya ito nga buruhaton pinaagi ha pagsugo han iya 12 nga apostol nga magsangyaw. Pero antes hito, naghatag hiya ha ira hin mga instruksyon. (Mat. 10:5-14) Antes pakaunon ni Jesus ha milagroso nga paagi an yinukot nga katawohan, naghatag hiya hin instruksyon ha iya mga disipulo kon paonan-o gugrupuhon an katawohan basi mapakaon hira ngatanan. (Luk. 9:12-17) Matin-aw nga ginbansay ni Jesus an iya mga disipulo pinaagi ha paghatag ha ira hin klaro ngan espisipiko nga mga instruksyon. Tungod hini nga paagi han pagbansay ngan ha bulig han baraan nga espiritu, naorganisa han mga apostol an haluag hinduro nga pagsangyaw nga nagtikang han 33 K.P.
10, 11. Paonan-o mababansay han mga tigurang ngan han iba an bag-ohan nga kalalakin-an nga magserbi ha kongregasyon?
10 Yana, an pagtutdo ha usa nga lalaki nagtitikang kon gindudumarahan hiya hin pag-aram ha Biblia. Bangin kinahanglan naton hiya buligan nga mahibaro pagbasa hin maopay. Samtang padayon nga nag-aaram hiya, ginbubuligan naton hiya ha iba pa nga paagi. Kon regular na hiya nga natambong ha mga katirok, magpapadayon an pagbansay ha iya samtang nakikigbahin hiya ha Teokratiko nga Eskwelahan ha Ministeryo ngan nagigin diri-bawtismado nga magwarali. Katapos han iya bawtismo, an pagbansay ha iya mag-uupod han mga buruhaton sugad han pagmintinar han Kingdom Hall. Maabot an panahon nga mabubuligan hiya nga makasabot kon ano an sadang niya buhaton basi magin kwalipikado sugad nga ministeryal nga surugoon.
11 Kon gintutokahan an usa nga bugto nga lalaki, malipayon nga iginsasaysay ha iya han mga tigurang kon paonan-o ito ginbubuhat ngan gintatagan hiya hin mga instruksyon kon ano an bubuhaton. Kinahanglan masabtan niya kon ano an ginlalaoman ha iya. Kon nakukurian hiya ha iginpapabuhat ha iya, an mahigugmaon nga mga tigurang diri dayon naghuhunahuna nga diri hiya kwalipikado. Lugod, may pagkabuotan nga iginsasaysay utro nira kon ano an sadang niya buhaton ngan kon paonan-o ito bubuhaton. Nalilipay an mga tigurang kon an kabugtoan nga kalalakin-an nakarawat han ira pagbansay ngan nakakaeksperyensya han kalipay nga resulta han pagserbi ha iba.—Buh. 20:35.
“Hiya nga Makinaadmananon Namamati han Sagdon”
12. Kay ano nga epektibo an sagdon ni Jesus?
12 Ginbansay ni Jesus an iya mga disipulo pinaagi ha pagsagdon ha ira uyon ha ira panginahanglan. Pananglitan, iya ginsaway hira Jakobo ngan Juan han karuyag nira magpalusad hin kalayo tikang ha langit basi bungkagon an mga Samaritano nga waray kumarawat ha iya. (Luk. 9:52-55) Han an nanay nira Jakobo ngan Juan naghangyo kan Jesus nga hatagan an iya mga anak hin hitaas nga mga katungdanan ha Ginhadian, maaram hi Jesus nga hira nga magbugto an naghihingyap hito, salit ginsidngan niya hira: “An paglingkod ha akon too ngan ha akon wala, diri akon paghatag, kondi tungod han mga gin-andaman hini han akon Amay.” (Mat. 20:20-23) An sagdon ni Jesus pirme matin-aw, praktikal, ngan marig-on nga iginbasar ha mga prinsipyo han Dios. Gintutdoan niya an iya mga disipulo nga mangatadongan uyon hito nga mga prinsipyo. (Mat. 17:24-27) Ginkilala liwat niya an ira mga limitasyon ngan waray maglaom nga diri gud hira magsasayop. Tinuod nga gugma an nagpagios ha iya nga magsagdon ha ira.—Juan 13:1.
13, 14. (a) Hin-o an nagkikinahanglan hin sagdon? (b) Ano an pipira nga ehemplo han sagdon nga mahimo ihatag han mga tigurang ha usa nga bugto nga lalaki nga diri nag-uuswag ha espirituwal?
13 An kabugtoan nga kalalakin-an nga naghihingyap hin mga responsabilidad ha kongregasyon nagkikinahanglan hin sagdon tikang ha Biblia ha panapanahon. “Hiya nga makinaadmananon namamati han sagdon,” siring han Proberbios 12:15. “An pinakamakuri ha akon amo an pagkarawat han akon mga kaluyahan,” siring han usa nga batan-on nga bugto nga lalaki. “An sagdon han usa nga tigurang nakabulig ha akon nga magkaada timbang nga panhunahuna mahitungod hito.”
14 Kon naoobserbaran han mga tigurang nga an kwestyonable nga paggawi nakakaulang ha usa nga bugto nga mag-uswag ha espirituwal, nangangalimbasog dayon hira nga buligan hiya ha malumo nga paagi. (Gal. 6:1) May mga panahon nga ginkikinahanglan an sagdon basi mabag-o an diri maopay nga kinaiya. Pananglitan, kon an usa nga bugto baga hin diri nagbubuhat han iya bug-os nga mahihimo, puydi hiya dasigon han usa nga tigurang nga hunahunaon an susbaranan ni Jesus ha pagin madasigon nga parasamwak han Ginhadian ngan an Iya sugo ha Iya mga sumurunod nga manhimo hin mga disipulo. (Mat. 28:19, 20; Luk. 8:1) Kon an usa nga bugto baga hin ambisyoso, mahimo isaysay ha iya han usa nga tigurang kon paonan-o ginbuligan ni Jesus an iya mga disipulo nga masabtan an peligro han paghingyap nga magin prominente. (Luk. 22:24-27) Ano man kon an usa nga bugto nakukurian pagpasaylo? Makakabulig gud an ilustrasyon mahitungod han uripon nga nadiri pagpasaylo han nakautang ha iya hin gutiay bisan kon hiya mismo ginpasaylo ha iya mas daku gud nga utang. (Mat. 18:21-35) Kon ginkikinahanglan an sagdon, maopay nga buhaton ito dayon han mga tigurang.—Basaha an Proberbios 27:9.
“Pahiaraa an Imo Kalugaringon”
15. Paonan-o an pamilya han usa nga bugto nga lalaki makakabulig ha iya nga magserbi ha kongregasyon?
15 An mga tigurang an nangunguna ha pagbansay ha kalalakin-an nga magkab-ot hin pribilehiyo ha kongregasyon, kondi an iba makakabulig liwat ha ira pangalimbasog. Pananglitan, an pamilya han usa nga bugto nga lalaki mahimo sumuporta ha iya pangalimbasog nga magkab-ot hin pribilehiyo, ngan sadang nira buhaton ito. Ngan kon tigurang na hiya, daku gud an maibubulig han iya mahigugmaon nga asawa ngan mga anak. Nasasabtan nira nga kinahanglan maghatag hiya hin panahon ngan kusog para ha iya mga responsabilidad ha kongregasyon. An ira pagsakripisyo nakakapalipay ha iya ngan gin-aapresyar gud han iba.—Prob. 15:20; 31:10, 23.
16. (a) Hin-o an sadang magpakita hin hingyap nga magserbi ha iba? (b) Paonan-o an usa nga bugto nga lalaki magkakab-ot hin pribilehiyo ha kongregasyon?
16 Bisan kon an usa nga bugto nga lalaki mabubuligan han iba, hiya mismo an sadang magpakita nga karuyag niya magserbi ha iba. (Basaha an Galasia 6:5.) Syempre, diri kinahanglan nga magin ministeryal o tigurang anay an usa basi makabulig ha iba ngan bug-os nga makigbahin ha pagsangyaw. Kondi basi magkaada hin mga pribilehiyo, kinahanglan mangalimbasog hiya nga maabot an mga kwalipikasyon nga iginsasaysay ha Biblia. (1 Tim. 3:1-13; Tito 1:5-9; 1 Ped. 5:1-3) Salit kon an usa diri pa ministeryal o tigurang kondi ginhihingyap niya ito, sadang niya hunahunaon hin maopay kon ano an kinahanglan niya pauswagon basi magin kwalipikado. Ginkikinahanglan hini an regular nga pagbasa han Biblia, maduruto nga pag-aram, pamalandong, kinasingkasing nga pag-ampo, ngan madasigon nga pakigbahin ha ministeryo. Hito nga mga paagi masusunod niya an sagdon ni Pablo kan Timoteo: “Pahiaraa an imo kalugaringon para han diosnon nga kinabuhi.”—1 Tim. 4:7, Maopay nga Sumat.
17, 18. Ano an mahimo buhaton han usa nga bugto nga lalaki kon nakakaulang ha iya an kabaraka, pag-abat hin kawaray kapas, o an kawaray hingyap ha pagserbi?
17 Pero ano man kon an usa diri nangangalimbasog nga magkab-ot hin pribilehiyo tungod kay nababaraka hiya o naabat hin kawaray kapas? Maopay nga iya pamalandungon kon ano kadaku an ginbubuhat ni Jehova nga Dios ngan ni Jesu-Kristo para ha aton. Hi Jehova ‘nagpapas-an han aton kabug-atan kada adlaw.’ (Sal. 68:19) Salit an aton langitnon nga Amay makakabulig ha usa nga bugto nga kumarawat hin mga responsabilidad ha kongregasyon. Makakabulig liwat ha usa nga bugto nga diri ministeryal o tigurang an paghunahuna nga daku an panginahanglan hin hamtong nga kalalakin-an nga kumarawat hin mga pribilehiyo ha organisasyon han Dios. An pamalandong hito makakapagios ha iya nga mangalimbasog nga malamposan an negatibo nga pagbati. Mahimo hiya mag-ampo para han bulig han baraan nga espiritu tungod kay upod han bunga hito an kamurayawan ngan pagpugong ha kalugaringon—mga kalidad nga ginkikinahanglan basi malamposan an kabaraka o pag-abat hin kawaray kapas. (Luk. 11:13; Gal. 5:22, 23) Ngan makakasiguro gud hiya nga bibendisyonan ni Jehova an ngatanan nga nangangalimbasog pagkab-ot hin pribilehiyo nga may husto nga motibo.
18 Posible ba nga an kawaray hingyap nga magserbi ha kabugtoan an nakakaulang ha usa nga bugto nga lalaki nga magkab-ot hin pribilehiyo ha kongregasyon? Ano an makakabulig ha iya? Hi apostol Pablo nagsurat: “An Dios tungod ha iya karuyagan amo an naghihimo ha sulod niyo ha pagbuot ngan pagbuhat.” (Fil. 2:13) An Dios an nabulig ha usa nga magkaada hingyap ngan kusog ha pagserbi ha iba ngan pagbuhat han Iya kaburut-on. (Fil. 4:13) Dugang pa, an usa mahimo mag-ampo ha Dios nga buligan hiya nga buhaton an husto.—Sal. 25:4, 5.
19. Ano an iginpapasarig ha aton han pagkaada “mapito nga magbarantay hin kakarnerohan, ngan mawalo nga mga punoan”?
19 Ginbibendisyonan ni Jehova an pangalimbasog han mga tigurang nga bansayon an iba. Ginbibendisyonan liwat niya an mga nangangalimbasog pagkab-ot hin mga pribilehiyo ha kongregasyon. Ginpapasarig kita han Biblia nga ha katawohan han Dios magkakaada “mapito nga magbarantay hin kakarnerohan, ngan mawalo nga mga punoan”—an ginkikinahanglan nga kadamu han kwalipikado nga kalalakin-an—basi manguna ha organisasyon ni Jehova. (Mika 5:5) Bendisyon gud nga damu hinduro nga Kristiano nga kalalakin-an an ginbabansay ngan mapainubsanon nga nagkakab-ot hin mga pribilehiyo para ha kadayawan ni Jehova!
Ano an Imo Baton?
• Paonan-o ginbuligan ni Jesus an iya mga disipulo nga magin kwalipikado ha dagku nga responsabilidad?
• Paonan-o masusubad han mga tigurang hi Jesus samtang ira ginbubuligan an kabugtoan nga kalalakin-an nga manguna ha kongregasyon?
• Paonan-o an pamilya han usa nga bugto nga lalaki makakabulig ha iya ha pagkab-ot hin pribilehiyo?
• Ano an sadang buhaton han usa nga bugto nga lalaki basi magkab-ot hin pribilehiyo?
[Mga Retrato ha pahina 31]
Paonan-o mo babansayon an imo gindudumarahan hin pag-aram ha Biblia samtang nangangalimbasog hiya nga mag-uswag?
[Retrato ha pahina 32]
Paonan-o maipapakita han kabugtoan nga kalalakin-an nga karuyag nira magkab-ot hin mga pribilehiyo?