Exodus
10 Then Jehovah tell Moses say: “Go meet Phar′aoh, because I don allow im heart and the hearts of im servants make e no move them to change, so that I go show this my signs for im front, 2 and so that una go fit tell una children and una grandchildren how I really handle Egypt and the signs wey I do among them; and una go surely know say I be Jehovah.”
3 So Moses and Aaron go meet Phar′aoh and tell-am say: “Na wetin Jehovah the God of Hebrew people talk be this, ‘How long you go continue to dey stubborn to me? Allow my people make them go so that them fit serve me. 4 Because if you no still gree to allow my people make them go, see, I go bring locusts inside your land tomorrow. 5 And them go cover everywhere for the ground, and una no go fit see anything for ground. Them go chop anything wey the ice block no destroy wey remain for una, and them go chop all una trees wey de grow for bush. 6 Them go full your house them, the house of all your servants and all the house for Egypt, reach the level wey your papa them and your papa-papa them no ever see from the time wey them don dey this land come reach today.’” As Moses talk this one finish, e turn and comot from where Phar′aoh dey.
7 Then Phar′aoh servants tell-am say: “How long this man go continue to put us for danger?* Allow the men to go, so that them fit go serve Jehovah their God. You never still see say Egypt don scatter finish?” 8 So Phar′aoh call Moses and Aaron back and tell them say: “Go, make una go serve Jehovah una God. But who and who go go?” 9 Then Moses talk say: “We go go with our young people, our old people, our sons, our daughters, our sheep, and our cows, because we go do festival to honor Jehovah.” 10 E tell them say: “If I ever allow una with una children to go, then e mean say true-true, Jehovah dey with una! E dey clear say una plan to do wicked thing. 11 No! Na only una men go fit go serve Jehovah, because na wetin una ask for.” So with that one, them drive them comot from Phar′aoh front.
12 Then Jehovah tell Moses say: “Stretch your hand come out ontop the land of Egypt make locusts come, so that them go cover the whole land of Egypt and chop all the plants for the land, everything wey the ice block no destroy.” 13 Moses no waste time, e stretch im stick face the land of Egypt, and Jehovah make breeze to blow from east for the land for the whole day and the whole night. And when morning reach, the breeze from the east don bring the locusts. 14 And the locusts full all the land of Egypt and cover everywhere for Egypt. E really serious no be small. Plenty locusts like that never dey before, and e no go ever plenty reach like that again. 15 Them cover the whole land, and them make the land dark. Them chop all the plants finish for the land, and all the fruits for the trees wey the ice block no destroy. Them no leave any green leaf for the trees, or for the plants wey dey bush for the whole land of Egypt.
16 So quick-quick, Phar′aoh call Moses and Aaron and talk say: “I don sin against Jehovah una God and against una. 17 Now, abeg, forgive me my sin just this time, and help me beg Jehovah una God make e remove this punishment wey fit kill person from me.” 18 So e* comot from Phar′aoh front and beg Jehovah. 19 Then Jehovah make the breeze to change direction, and the strong breeze start to blow from the west, then e carry the locusts comot and blow them enter inside the Red Sea. No single locust remain for all the land of Egypt. 20 But, Jehovah allow Phar′aoh heart to strong like stone, and e no allow Israel people go.
21 So Jehovah tell Moses say: “Stretch your hand face the heavens so that darkness fit cover the land of Egypt, darkness wey really thick sotey person fit feel-am.” 22 Quick-quick, Moses stretch im hand face the heavens, and thick darkness cover all the land of Egypt for three days. 23 Them no see each other, and nobody among them get up from where e dey for three days; but all Israel people get light for where them de stay. 24 Then Phar′aoh call Moses and talk say: “Go, make una go serve Jehovah. Na only una sheep and una cows go remain for here. Even una children fit go with una.” 25 But Moses talk say: “Na you go still give us* the things wey we go sacrifice and the offerings wey them de burn, and we go give them to Jehovah our God. 26 We go still go with our animals. We no go leave any animal* for here, because we go use some of them to worship Jehovah our God, and we no know wetin we go give as sacrifice to worship Jehovah until we reach there.” 27 So Jehovah allow Phar′aoh heart strong like stone, and e no gree make them go. 28 Phar′aoh tell-am say: “Comot from my front! Make sure say you no try to see my face again, because the day wey you go see my face, I go kill you.” 29 So Moses talk say: “Just as you don talk-am, I no go try to see your face again.”