Exodus

37 Then Bez′al·el use acacia wood make the Ark. E long reach two and half cubits* and e wide reach one and half cubit and e high reach one and half cubit. 2 E cover the inside and outside with pure gold and use gold make design* round-am for the up part. 3 After that one, e make four rings with gold for-am to put them for the top of the four legs, two rings for one side and two rings for the other side. 4 The next thing wey e do na say, e use acacia wood make poles and cover them with gold. 5 Then e put the poles inside the rings wey dey the sides of the Ark to carry the Ark.

6 E use pure gold make the cover for the Ark. E long reach two and half cubits and wide reach one and half cubit. 7 Then e make two cherubs. E use gold form them with hammer for the two ends of the cover. 8 One cherub dey one end and the other cherub dey the other end. E make the cherubs for the two ends of the cover. 9 The two cherubs spread their wings go up, and cover the cover with their wings. Them face each other and their face turn face the cover.

10 Then e use acacia wood make the table. E long reach two cubits, e wide reach one cubit, and e high reach one and half cubit. 11 And e cover-am with pure gold, and use gold make design* round-am for the up part. 12 The next thing wey e do na say, e make rim to go round-am wey wide reach one handbreadth* and e make design* around the rim with gold. 13 Another thing be say e make four rings with gold for-am and put the rings for the four corners where the four legs dey. 14 The rings dey near the rim, to hold the poles wey them de use carry the table. 15 Then e use acacia wood make the poles wey them go de use carry the table and cover them with gold. 16 After that one, e use pure gold make the things wey dey ontop the table—im plates, im cups, im bowls, and im jugs wey them go de use pour drink offerings.

17 Then e use pure gold make the lampstand. Na hammer e use do the work for the lampstand. The down of the lampstand, the stem, the cups, the knobs, and the flowers na one piece of gold. 18 Na six branches come out from the stem. Three branches of the lampstand come out from one side, and three branches come out from the other side. 19 Three cups wey get the shape of almond flowers dey one side of the branches, the knobs and the flowers de follow each other one after the other, and three cups wey get the shape of almond flowers dey the other set of branches. The knobs and the flowers de follow each other, one after the other. E do this one for the six branches wey come out from the stem of the lampstand. 20 And the stem of the lampstand get four cups wey get the shape of almond flowers, and the knobs and the flowers follow each other one after the other. 21 One knob dey under the first two branches wey come out from the stem, and one knob dey under the next two branches, and another knob dey under the next two branches. Na so e be for the six branches wey come out from the stem of the lampstand. 22 E make the knobs and the branches and the whole lampstand to be one piece of pure gold wey them use hammer form. 23 Then e make im seven lamps and the things wey them de use hold the lamp thread* and the things wey them de use hold the fire, with pure gold. 24 E use one talent* make-am together with all the things wey them de use for the lampstand.

25 So e use acacia wood make the altar of incense. Na square shape, e long reach one cubit, e wide reach one cubit, and e high reach two cubits. The horns dey together with the altar. 26 E cover-am with pure gold, the top part and all the sides around-am and the horns, and e use gold make design* round-am for the up part. 27 E make two rings with gold for-am under the design,* two for one side and two for the other side, to hold the poles wey them go de use carry-am. 28 After that one, e use acacia wood make the poles and cover them with gold. 29 E still make the holy anointing oil and the pure perfume incense, e really mix-am well.*