Exodus

38 E use acacia wood make the altar of offering wey them de burn. Na square shape, e long reach five cubits,* e wide reach five cubits and e high reach three cubits. 2 Then e make im horns ontop the four corners. The horns dey together with-am. The next thing wey e do na say e cover-am with copper. 3 After that one, e make all the things wey them de use for the altar, the cans, the shovels, the bowls, the forks, and the things wey them de use hold fire. E use copper make all the things wey them de use for the altar. 4 E still make copper rods and cross them ontop each other to form copper net for the altar under im rim, and e go down reach the center of the altar. 5 E make four rings for the four corners near the copper sticks wey be like net, to hold the poles. 6 After that one, e use acacia wood make the poles and cover them with copper. 7 E put the poles wey them go de use carry the altar for inside the rings wey dey the sides of the altar. E use planks make the altar make e be like box wey get deep hole for middle.

8 Then e use copper make the basin and the basin stand; e use the mirrors* of the women wey them arrange to serve for the domot of the tent of meeting.

9 Then e make the compound. For the left side* of the compound, wey de face left,* e use quality linen wey them twist to make the curtains wey de hang, and na 100 cubits. 10 Na 20 pillars and 20 copper base dey there, and e use silver make the hooks of the pillars and the things wey them use connect them.* 11 And for the right side,* the curtains wey de hang na 100 cubits. E use copper make their 20 pillars and their 20 base. E use silver make the hooks of the pillars and the things wey them use connect them.* 12 But for the back,* the curtains wey de hang na 50 cubits. Ten pillars and ten base dey there, and e use silver make the hooks of the pillars and the things wey them use connect them.* 13 The front side* wey face the side wey sun de come out from, wide reach 50 cubits. 14 Curtains wey de hang wey reach 15 cubits dey for one side with three pillars and three base. 15 And for the other side of the domot of the compound, curtains wey de hang wey reach 15 cubits dey there with three pillars and three base. 16 E make all the curtains wey them hang around the compound with quality linen wey them twist. 17 E use copper make the base them for the pillars, e use silver make the hooks of the pillars and the things wey them use connect them.* E cover the top of the pillars with silver, and silver things wey them de use hold something together dey for all the pillars of the compound.

18 E weave the screen* of the domot of the compound with blue thread, purple wool, red material, and quality linen wey them twist. E long reach 20 cubits, e high reach 5 cubits. Na the same height with the curtains wey de hang for the compound. 19 E use copper make their four pillars and their four base. E use silver make their hooks, and e use silver cover the top of their pillars and the things wey them de use connect things* for the pillars. 20 All the tent pins wey them use for the tabernacle and around the compound, na copper them use make them.

21 This one na the list of the things wey them use build the tabernacle, wey be the tabernacle of the Testimony, wey Moses command make them record. Na the Levites get this work and them receive direction from Ith′a·mar the son of Aaron the priest. 22 Bez′al·el the son of U′ri wey be the son of Hur wey come from the tribe of Judah do everything wey Jehovah don command Moses. 23 O·ho′li·ab the son of A·his′a·mach wey come from the tribe of Dan dey with-am. Na person wey sabi use hand make things. E sabi make design for cloth, and e sabi weave with blue thread, purple wool, red material, and quality linen.

24 All the gold wey them use for all the work for the holy place, na the same amount of the gold for the offering wey them de wave, 29 talents* and 730 shekels,* according to the shekel wey them de normally use for the holy place.* 25 And the silver of the ones wey don register among the people na 100 talents and 1,775 shekels according to the shekel wey them de normally use for the holy place.* 26 The half shekel for each person na half shekel according to the shekel wey them de normally use for the holy place,* for every man wey dey among the people wey don register, wey their age na from 20 years go up, and them reach 603,550 men.

27 The amount wey them use make the base them of the holy place and the base them of the curtain reach 100 talents; 100 base equal to 100 talents, one talent for each base. 28 From the 1,775 shekels, e make hooks for the pillars and cover their tops and join them together.

29 The copper wey them use for the offering* na 70 talents and 2,400 shekels. 30 E use-am make the base them for the domot of the tent of meeting, the copper altar and im copper net wey them weave round, all the things wey them de use for the altar, 31 the base them around the compound, the base them of the domot of the compound, and all the tent pins of the tabernacle and all the tent pins around the compound.