The Song of Solomon
3 “For ontop my bed for the nights,
I find the person wey I love.*
I find-am, but I no see-am.
2 I go stand up and waka round inside the city;
For the streets and for the public place them wey dey the city,
Allow me make I go find the person wey I love.*
I find-am, but I no see-am.
3 The watchmen wey de go round the city see me.
‘Una don see the person wey I love?’*
4 I never even pass them go far
When I see the person wey I love.*
I hold-am tight, I no let-am go
Until I bring-am come inside my mama house,
Come the room wey dey inside-inside the house of the woman wey born me.
5 I want make una swear, O daughters of Jerusalem,
Make una use the gazelles* and the female deer* wey dey bush swear to me:
Make una no try to wake the love inside me or make-am hungry me until e come by imself.”
6 “Wetin be this thing wey de come up from the wilderness wey be like thick smoke,
Wey get the fine scent of myrrh and frankincense,
With all the scent from the powders of businessman?”
7 “See! Na Solʹo·mon chair.
Sixty strong men surround-am,
From the strong men of Israel,
8 All of them carry sword,
Them don train all of them for war,
Each of them carry im own sword for im side
To give protection because of the dangers for night.”
9 “Na the special chair* of King Solʹo·mon
Wey e make for imself from the trees of Lebʹa·non.
10 E use silver make the pillars,
Them use gold make the things wey de support-am.
Them use purple wool make the seat;
Them decorate the inside well because of love
And na the daughters of Jerusalem do-am.”
11 “Go outside, O daughters of Zion,
Look King Solʹo·mon
As e wear the wedding crown* wey im mama make for-am
For the day wey e marry,
For the day wey im heart de sweet-am.”