John
2 For the third day, them come de do one marriage party for Caʹna wey dey Galʹi·lee, and Jesus mama be dey there. 2 Them still invite Jesus and im disciples to the marriage party.
3 When the wine don de finish, Jesus mama come tell-am say: “Them no get wine again.” 4 But Jesus tell-am say: “Woman, how that one take concern me and you?* My time never reach.” 5 E mama come tell the people wey de serve say: “Make una do anything wey e tell una.” 6 That time, six big water pot wey them make with stone dey there, so that the people go clean theirself just as the law of Jew people talk. Each water pot fit contain about 44 or 66 liter* of water. 7 Jesus come tell them say: “Make una full the water pots with water.” So them full them reach mouth. 8 Then e tell them say: “Now, make una collect some go give the person wey de direct the party.” Them come collect-am. 9 When the person wey de direct the party taste the water wey Jesus don turn to wine, and e no know where the wine come from (but the servants wey collect the water know), the person wey de direct the party come call the man wey de marry 10 and tell-am say: “Other people de bring better wine first, and when people don dey drunk, them go bring the one wey no too sweet, but you don keep the better wine until this time.” 11 Jesus do this one for Caʹna wey dey Galʹi·lee, and na this one e use start im miracles, and e* make people see im power. Im disciples come put faith for-am.
12 After this one, Jesus and im mama and im brothers and im disciples go Ca·perʹna·um, but them no stay there for many days.
13 Now the time of the Passover for Jew people don near, and Jesus go Jerusalem. 14 When e enter the temple, e see people wey de sell cow, sheep, and doves, and the people wey de change money for where them sitdown. 15 So e use ropes do cane, and pursue all the people wey dey with sheep and cow comot from the temple, and e scatter the coins of the people wey de change money and turn their table upside down. 16 E come tell the people wey de sell the doves say: “Make una comot this things from here! Make una stop to turn my Papa house to market!” 17 Im disciples come remember say them write-am say: “The love wey I get for your house go be like fire wey de burn inside my heart.”
18 So the Jew people come ask-am say: “Which sign you go show us to prove say you get the right to do this things?” 19 Jesus come answer them say: “Make una scatter this temple, and I go use three days build-am again.” 20 The Jew people come talk say: “Na 46 years them take build this temple, na im you go use three days build?” 21 But na im body be the temple wey e de talk about. 22 So when God don bring-am back to life, im disciples remember this thing wey e be de talk, them come believe the word of God, and wetin Jesus don talk.
23 But when e dey Jerusalem, for the time of the festival of the Passover, many people put faith for im name when them see the miracles wey e de do. 24 But Jesus no trust them finish, because e know all of them, 25 and because e no need anybody to tell-am about people, and that na because e know wetin dey the heart of everybody.