Joshua

13 Now Joshua don really old. So Jehovah tell-am say: “You don really old, but plenty part of the land still remain wey una go take as una own.* 2 This one na the land wey remain: all the areas of Phi·lisʹti·a people and all the areas of Gesh′ur people 3 (from the branch of River Nile* wey dey east side of* Egypt go up reach the boundary of Ek′ron for north side, wey people be know as area of Ca′naan people) plus the areas of the five lords of Phi·lisʹti·a people—Ga′za people, Ash′dod people, Ash′ke·lon people, Git′tite people, and Ek′ron people; the area of Av′vim people 4 for the south side; all the land of Ca′naan people; Me·ar′ah, wey be Si′don people own go reach A′phek, to the boundary of Am′or·ite people; 5 the land of Ge′bal people and the whole of Leb′a·non for the east side, from Ba′al-gad wey dey the down of Mount Her′mon to Le′bo-ha′math;* 6 all the people wey de live for the areas wey mountains dey from Leb′a·non to Mis′re·photh-ma′im; and all Si′don people. I go drive them comot* for front of Israel people. You go only share-am for Israel people as their property just as I don command you. 7 Now you must share this land to the nine tribes and the half tribe of Ma·nas′seh as their property.”

8 The other half tribe of Ma·nas′seh, the tribe of Reu′ben and the tribe of Gad take their own property wey Moses give them for the east side of River Jordan, just as Moses the servant of Jehovah don give them: 9 from A·ro′er, wey dey the edge of the Lowland of Ar′non,* and the city wey dey the middle of the lowland, and all the flat land* of Med′e·ba go reach Di′bon; 10 and all the cities of Si′hon, wey be king of Am′or·ite people wey rule for Hesh′bon, go up reach the boundary of Am′mon people; 11 and Gil′e·ad and the area of Gesh′ur people and Maʹa·cath people and the whole of Mount Her′mon and the whole of Ba′shan go reach Sal′e·cah; 12 the whole kingdom of King Og for Ba′shan, wey rule for Ash′ta·roth and for Ed′re·i. (Na one of the last Reph′a·im people wey be dey alive.) Moses win them and drive them comot.* 13 But Israel people no drive Gesh′ur people and Maʹa·cath people comot,* so Gesh′ur people and Ma′a·cath people live among Israel people come reach today.

14 Na only the tribe of the Levites e no give property. The offerings wey them do with fire to Jehovah the God of Israel na their property, just as e don promise them.

15 Then Moses give property to the tribe of Reu′ben according to their families, 16 and their area na from A·ro′er, wey dey the edge of the Lowland of Ar′non,* and the city wey dey the middle of the lowland, and all the flat land near Med′e·ba; 17 Hesh′bon and all the towns for there wey dey ontop the flat land, Di′bon, Ba′moth-ba′al, Beth-ba′al-me′on, 18 Ja′haz, Ked′e·moth, Meph′a·ath, 19 Kir·i·a·tha′im, Sib′mah, and Ze′reth-sha′har wey dey ontop the mountain for the lowland,* 20 Beth-pe′or, the hills of Pis′gah, Beth-jesh′i·moth, 21 all the cities wey dey the flat land, and all the kingdoms of King Si′hon of Am′or·ite people wey rule for Hesh′bon. Moses win-am and the chiefs of Midʹi·an people wey be E′vi, Re′kem, Zur, Hur, and Re′ba, them be kings wey dey under Si′hon and them be de stay for the land. 22 Ba′laam wey de use demon power know wetin people no know, wey be the son of Be′or, na one of the people wey Israel people use sword kill together with other people. 23 The boundary of the tribe of Reu′ben na River Jordan; and na the tribe of Reu′ben according to their families get this area as property, together with the cities and their villages.

24 Another thing be say, Moses give property to the tribe of Gad, the people wey come from the tribe of Gad according to their families, 25 and part of their territory na Ja′zer and all the cities of Gil′e·ad and half of the land of Am′mon people go reach A·ro′er, wey face Rab′bah; 26 and from Hesh′bon to Ra′math-miz′peh and Bet′o·nim, and from Ma·ha·na′im to the boundary of De′bir; 27 and for the lowland,* Beth-ha′ram, Beth-nim′rah, Suc′coth, and Za′phon, the rest of the kingdoms of King Si′hon of Hesh′bon, and na River Jordan be the boundary from the low end of the Sea of Chin′ne·reth* wey dey the east side of River Jordan. 28 This one na the property of the tribe of Gad according to their families, with the cities and their villages.

29 Another thing be say, Moses give property to the half tribe of Ma·nas′seh, to half of the tribe of Ma·nas′seh according to their families. 30 And their area stretch from Ma·ha·na′im and cover the whole of Ba′shan, all the kingdoms of King Og of Ba′shan, and all the small-small villages wey dey Ja′ir for Ba′shan, and all of them together na 60 towns. 31 Them give half of Gil′e·ad, and Ash′ta·roth and Ed′re·i, the cities of the kingdom of King Og for Ba′shan, to the sons of Ma′chir wey be the son of Ma·nas′seh, to half of the sons of Ma′chir according to their families.

32 This one na the property them wey Moses give them for the level lands wey dey the desert of Mo′ab after River Jordan, for the east side of Jer′i·cho.

33 But Moses no give any property to the tribe of the Levites. Na Jehovah the God of Israel be their property, just as e promise them.