Joshua

18 Then all the people of Israel gather together for Shi′loh, and them put the tent of meeting for there, because the land don dey under them now. 2 But seven tribes still dey among Israel people wey them never share their property for them. 3 So Joshua tell Israel people say: “How long una go delay to go take the land as una own, the land wey Jehovah the God of una papa-papa them don give una? 4 Give me three men from each tribe make I send them go; make them go waka for the whole land and make map according to their property, then make them come back to me. 5 Them must share-am among theirself to seven parts. Judah go remain for im area wey dey the south side, and the children-children of Joseph go remain for their area wey dey the north side. 6 As for una, make una make map of the land and divide the land to seven parts, bring them come meet me for here and I go cast lots here for una for front of Jehovah our God. 7 But them no go share property for the Levites among una, because the work wey them de do as priests of Jehovah na their property; and Gad, Reu′ben, and the half tribe of Ma·nas′seh don already collect their property for the east side of River Jordan, wey Moses the servant of Jehovah don give them.”

8 The men ready to go, and Joshua command people wey de go make map of the land say: “Make una go, waka round the land, and make map of the land then come back to me, and I go cast lots for una here for front of Jehovah for Shi′loh.” 9 So the men go, them waka round the land and make map of the land, and divide-am to seven parts according to the cities, then them write-am for inside book. After that one, them go back go meet Joshua for the camp wey dey Shi′loh. 10 Then Joshua cast lots for them for Shi′loh for front of Jehovah. For there, Joshua share the land for Israel people according to wetin them suppose get.

11 The lot fall for the tribe of Benjamin according to their families, and the land wey them use lot give them dey between the people of Judah and the people of Joseph. 12 For the north side, their boundary start for River Jordan, and the boundary go up go reach the hill of Jer′i·cho for the north side and go up pass ontop the mountain de go west side, and e stretch go reach the wilderness of Beth-a′ven. 13 And the boundary continue de go from there go reach Luz, for the hill wey dey south side of Luz, wey be Beth′el; the boundary go down go reach At′a·roth-ad′dar ontop the mountain wey dey south side of Lower Beth-ho′ron. 14 And them mark the boundary for the west side and go round de go the south side from the mountain wey face Beth-ho′ron go reach the south side; e end for Kir′i·ath-ba′al, wey be Kir′i·ath-je′a·rim, wey be city of Judah. This one na the west side.

15 The south side na from the end part of Kir′i·ath-je′a·rim, and the boundary stretch de go west side; e continue go the direction of the water wey de come out from ground for Neph·to′ah. 16 The boundary go down go reach the end part of the mountain wey face the Lowland of the Son of Hin′nom, wey dey for the Lowland* of Reph′a·im for the north side and e go down go reach the Lowland of Hin′nom, de go the hill of Je′bus people for the south side, and go down reach En-ro′gel. 17 And them mark-am de go north side and e stretch reach En-she′mesh and continue go reach Gel·i′loth, wey dey front of the hill of A·dum′mim, and e go down go reach the stone of Bo′han the son of Reu′ben. 18 And e continue de go the hill for north side wey dey front of Ar′a·bah and go down reach the Ar′a·bah. 19 And the boundary continue de go the hill for north side of Beth-hog′lah, and the boundary end for the north side of the edge of the Salt Sea* for the end of the south side of River Jordan. Na this one be the boundary for south side. 20 And na River Jordan be im boundary for the east side. This one na the property of the children-children of Benjamin according to their families, according to im boundaries for all the sides.

21 And the cities of the tribe of Benjamin according to their families na: Jer′i·cho, Beth-hog′lah, E′mek-ke′ziz, 22 Beth-ar′a·bah, Zem·a·ra′im, Beth′el, 23 Av′vim, Pa′rah, Oph′rah, 24 Che′phar-am′mo·ni, Oph′ni, and Ge′ba—12 cities and their village them.

25 Gib′e·on, Ra′mah, Be·er′oth, 26 Miz′peh, Che·phi′rah, Mo′zah, 27 Re′kem, Ir′pe·el, Tar′a·lah, 28 Ze′lah, Ha-e′leph, Je·bu′si, wey be Jerusalem, Gib′e·ah, and Kir′i·ath—14 cities and their village them.

Na this one be the property of the children-children of Benjamin according to their families.