Joshua
17 Then the lot fall for the tribe of Ma·nas′seh, because e be Joseph firstborn. Since Ma′chir, wey be the firstborn of Ma·nas′seh and Gil′e·ad papa, na man wey sabi fight war, them give-am Gil′e·ad and Ba′shan. 2 And the lot fall for the rest of the children-children of Ma·nas′seh according to their families, for the sons of Abi-e′zer, the sons of He′lek, the sons of As′ri·el, the sons of She′chem, the sons of He′pher, and the sons of She·mi′da. This ones na the children-children of Ma·nas′seh the son of Joseph, the men according to their families. 3 But Ze·lo′phe·had the son of He′pher, wey be the son of Gil′e·ad, the son of Ma′chir, the son of Ma·nas′seh, no get sons, na only daughters e get and the names of im daughters na: Mah′lah, Noah, Hog′lah, Mil′cah, and Tir′zah. 4 So them come meet El·e·a′zar the priest, Joshua the son of Nun, and the chiefs, and talk say: “Na Jehovah command Moses to give us property among our brothers.” So just as Jehovah be command, e give them property among their papa brothers.
5 Them still give ten portions of land to Ma·nas′seh apart from the land of Gil′e·ad and Ba′shan, wey dey the other side* of River Jordan, 6 because the daughters of Ma·nas′seh receive property together with im sons, and the land of Gil′e·ad come be the property of the rest of the children-children of Ma·nas′seh.
7 And the boundary of Ma·nas′seh na from Ash′er go reach Mich·me′thath, wey face She′chem, and the boundary continue de go the south side* go reach the land of the people of En-Tap′pu·ah. 8 The land of Tap′pu·ah come be Ma·nas′seh own, but na the children-children of E′phra·im get the city of Tap′pu·ah wey dey the boundary of Ma·nas′seh. 9 And the boundary go down reach the Lowland* of Ka′nah, for the south side of the lowland. Cities of E′phra·im dey among the cities of Ma·nas′seh, and the boundary of Ma·nas′seh dey the north side of the lowland, and e end for the sea. 10 Na E′phra·im get the south side and na Ma·nas′seh get the north side and na the sea be im boundary, and for the north side, their land* reach Ash′er, and for the east side, e reach Is′sa·char.
11 For the areas of Is′sa·char and Ash′er, them give Ma·nas′seh Beth-she′an and the towns wey surround-am, Ib′le·am and the towns wey surround-am, the people for Dor and the towns wey surround-am, the people for En-dor and the towns wey surround-am, the people for Ta′a·nach and the towns wey surround-am, and the people for Me·gid′do and the towns wey surround-am, three of the places wey be hills.
12 But the children-children of Ma·nas′seh no fit take this cities as their own; Ca′naan people wey dey there hold their ground say them go continue to stay for this land. 13 When Israel people don strong, them force Ca′naan people to work for them, but them no drive them comot* finish.
14 The children-children of Joseph tell Joshua say: “Why you use lot give us* only one area and share only one portion for us as property? We plenty no be small, because Jehovah don bless us come reach now.” 15 Joshua answer them say: “If una really plenty, make una go up go clear place for forest for unaself for the land of Per′iz·zite people and Reph′a·im people, since the area wey mountains dey for E′phra·im too small for una.” 16 Then the children-children of Joseph talk say: “The area wey mountains dey no dey enough for us, and all Ca′naan people wey de live for the land wey get the lowland,* get war chariots wey get long iron knives for the wheels,* both the ones wey dey for Beth-she′an and the towns wey surround-am and the ones wey dey for the Lowland* of Jez′re·el.” 17 So Joshua talk to the children-children of Joseph, wey be, the tribe of E′phra·im and Ma·nas′seh say: “Una be people wey really plenty, and una get power no be small. Una no go only receive one part of the land, 18 but the area wey mountains dey, go still be for una. Even though say na forest, una go clear-am and e go be the end part of una land. Because una go drive Ca′naan people comot, even though say them strong and them get war chariots wey get long iron knives for the wheels.”*