Study Book for Our Life and Preaching Meeting
© 2024 Watch Tower Bible and Tract Society of Pennsylvania
MAY 6-12
FINE-FINE LESSON FROM BIBLE PSALMS 36-37
“No Vex Because of Wicked People”
w17.04 10 ¶4
Wetin Go Comot When God Kingdom Come?
4 How the things wey wicked people de do de affect us now? After apostle Paul don talk say for this our time, “serious hard time wey no go dey easy to handle, go dey,” e still write say: “Wicked people and people wey de pretend go de worse more-more.” (2 Tim. 3:1-5, 13) You de see this things wey e talk de happen? Many of us don suffer from wicked people hand, like people wey like to fight, people wey hate us, and armed robbers. Some of them no de hide do wicked things, but others de pretend to be better people just to hide the wicked things wey them de do. Even if no be we them attack, the bad things wey them de do still de affect us. E de pain us reach bone when we hear the kind bad things wey them de do. Fear de catch us when we hear of how them de do bad things to children, old people, and people wey no get who fit help them. Wicked people de behave like wicked animal and their character just be like Devil own. (Jas. 3:15) But e sweet us say Bible get better news for us.
Jehovah De Bless People Wey De Forgive
10 When we continue to carry person for mind, we de give ourself problem. When we carry person for mind, e de be like say we carry heavy load, and Jehovah want make we comot that load so that we go get peace. (Read Ephesians 4:31, 32.) E encourage us say make we “stop to vex and troway hot temper.” (Ps. 37:8) If we follow that advice, e go help us. When we continue to vex for wetin person do us, e fit affect our body and the way we de think. (Prov. 14:30) If person drink poison, e no go expect say na another person e go affect. For the same way, if you continue to vex for person, na you e go de affect, no be the person. So, when we forgive other people, na ourself we de help. (Prov. 11:17) This one de help us get peace of mind and we go continue to serve Jehovah well.
w03 12/1 13 ¶20
“Make You De Happy Because of Jehovah”
20 Then, “God go give humble people the earth.” (Psalm 37:11a) But who be this “humble people”? The word wey them translate as humble for here come from one word wey mean “to cause pain, humble, to make person shame.” Yes, “humble people” na people wey de carry body down de wait for Jehovah to correct all the bad-bad things wey people de do them. “Them go happy well-well because peace go dey everywhere.” (Psalm 37:11b) Even now, we still de happy well-well and de enjoy peace for our Christian congregation.
Fine-Fine Things Wey You See for Bible
it-2 445
Mount, Mountain
E strong, e no de shake, or e high well-well. When them de describe mountain, them de talk about-am as something wey really strong and wey no de shake. (Isa 54:10; Hab 3:6; compare Ps 46:2.) So when the person wey write psalm talk about Jehovah righteousness say e be like mountain of God (Ps 36:6), e fit be say e de talk say Jehovah righteousness no fit shake and e no de change. Or, since mountain na something wey high well-well, this one fit de talk about how God righteousness really high pass man own. (Compare Isa 55:8, 9.) When Bible de talk about the seventh bowl wey them pour, Revelation 16:20 talk say: “Them no see any mountain.” This one mean say even things wey high like mountain no go fit escape when God start to really vex.—Compare Jer 4:23-26.
MAY 13-19
FINE-FINE LESSON FROM BIBLE PSALMS 38-39
No Allow Your Conscience Continue to Over Worry You
“De Look Straight” Go the Future
12 Read 1 John 3:19, 20. Our conscience de judge us sometimes. For example, some people conscience de judge them because of things wey them do before them start to serve Jehovah. For other people, their conscience de worry them because of the bad things wey them do after them baptize. Plenty people de feel like that. (Rom. 3:23) The thing be say, we want do the correct thing. But “all of us de make mistake many times.” (Jas. 3:2; Rom. 7: 21-23) Na true say we no de like-am when our conscience de worry us for wetin we don do before, but this one fit still help us. Why? Na because when our conscience de worry us, this one fit make us change some things for our life, and make us do our best make we no do the same mistake again.—Heb. 12:12, 13.
13 But e dey possible say our conscience fit de over worry us, even after we don repent and Jehovah don show say e don forgive us. When we de feel like this, e fit affect us for bad way. (Ps. 31:10; 38:3, 4) Why we talk so? Make we talk about one sister wey e conscience continue to worry-am because of the bad things wey e don do before. The sister talk say: “I be feel say e dey useless to work hard for Jehovah because e don too late.” Many of us fit understand how this sister de feel. So e go good make we no allow our conscience de over-worry us because of wetin we don do before. Why? Na because Satan go over-glad if we tire for ourself, when Jehovah never tire for us!—Compare 2 Corinthians 2:5-7, 11.
w02 11/15 20 ¶1-2
How We Fit Live Our Life for the Way Wey Jehovah Want?
THE days of our life dey short and e no de last. David wey write Psalm think about how life short and this one come move-am to write say: “O Jehovah, help me know how my life go end, and how my life go long reach, so that I go fit know how my life short reach. See, you don make my days short; and the days of my life be like nothing for where you dey.” Wetin dey David mind na to live im life for way wey go make God happy, both for the things wey e de talk and do. To show say e really depend on God, e talk say: “Na you be my only hope.” (Psalm 39:4, 5, 7) Jehovah listen to-am. Jehovah really check the things wey David do and e bless-am.
E easy for us to dey busy everytime and to get plenty things wey we need to do each day. This plenty things wey we get to do and the small time wey we get to do-am, and the things wey we de face fit make us start to worry-worry. Wetin we want na the same thing with wetin dey David mind—to live our life for way wey go make God happy? E good make we de sure say Jehovah de see and e de sofri check each of us. About 3,600 years ago, Job, wey be person wey de fear God agree say Jehovah see the way e live im life and everything wey e do. Job come ask one question say: “Wetin I fit do when God judge me? Wetin I fit answer-am when e question me.” (Job 31:4-6, 14) We fit live our life for way wey go make Jehovah happy when we de put things wey concern our worship as number one for our life, de obey the things wey God command, and de use our time well. Make we talk more about this matters.
Make Your Friendship With Jehovah Strong Again
De always talk to Jehovah. Jehovah wey be your Papa understand say if your heart continue to condemn you for the bad thing wey you do, this one fit make-am hard for you to pray. (Rom. 8:26) Even with that one, make you ‘no tire to pray.’ De tell Jehovah say you really want be e friend. (Rom. 12:12) Andrej remember wetin happen before, e talk say: “My heart really condemn me and shame catch me no be small. But any time wey I pray finish, I no de too feel like that again. I get peace of mind more.” If you no know wetin you go pray for, think about the things wey King David pray about when e repent, wey dey Psalms 51 and 65.
Fine-Fine Things Wey You See for Bible
Show Say You Be Person Wey People Fit Trust
16 If we want other people to trust us, e really dey important to de control ourself. That fine character de help us to dey quiet when body de push us to talk wetin person tell us wey we no suppose tell other people. (Read Proverbs 10:19.) E fit dey hard to control ourself especially when we de use internet. If we no dey careful, we fit spread matter wey other people no suppose know to plenty people. And once we don send the message for internet, we no go fit control how people go use-am or the problem wey e fit cause. Self-control fit help us to dey quiet when people wey hate us de try make us talk wetin go put our brothers and sisters for problem. This one fit happen when police for the area wey them ban our work de ask us questions about them. For this and other situation, we fit follow this advice for Bible wey talk say make we “use something cover [our] mouth.” (Ps. 39:1) When we de do things with our family people, our friend them, our brothers and sisters, or any other person, make we do our best to show say we be people wey them fit trust. And for us to be that kind person, we need to de control ourself.
MAY 20-26
FINE-FINE LESSON FROM BIBLE PSALMS 40-41
Why E Good to Help Other People?
People Wey Get Open-Hand Na Happy People
16 People wey really get open-hand no de give so that people go pay them back. Na the thing wey Jesus get for mind when e talk say: “When you de do party, make you invite poor people, people wey no fit use their hand or leg, people wey no fit waka, people wey blind, and you go happy because them no get anything to use pay you back.” (Luke 14:13, 14) One Bible verse talk say “God go bless the person wey get open-hand.” Another Bible verse talk say: “Any person wey de help people wey need help go dey happy.” (Prov. 22:9; Ps. 41:1) True-true, make we de give because e de sweet us to help other people.
17 Jesus talk say “na when person de give e go happy pass when e de receive.” When Paul quote wetin Jesus talk, Paul no de only talk about things wey we de dash people. E still de talk about to encourage and advice people from Bible, and any other thing wey we fit do to help them. (Acts 20:31-35) Apostle Paul show us good example with wetin e talk and do. Im example teach us say e dey important to care for people, show them love, use our power to help them and spend time with them.
18 Science people don find out say to give de make person happy. For inside one book, “people talk say them de get more joy after them do good things for other people.” Science people still talk say when we help other people, we de feel say we don use our life well. So, some of them de advice people make them de do volunteer work, because e de help their health and make them happy more. But this one no surprise us, because Jehovah, the Person wey make us don already tell us for Bible.—2 Tim. 3:16, 17.
w15 12/15 24 ¶7
Jehovah Go Support You
7 Still, if we de sick, we fit trust God to comfort us, give us better sense, and support us, as e do for people wey worship-am before our time. King David write say: “Any person wey de help people wey need help go dey happy; Jehovah go save the person for the day of trouble. Jehovah go protect the person and E go save e life.” (Ps. 41:1, 2) We know say person wey help another person wey need help for David time, no continue to dey alive, e still die. So wetin David de talk no mean say miracle go happen to person wey help another person, so that e go continue to dey alive and de live forever. We fit gree say wetin e de talk be say, God go help person wey de care for other people and de help them. How? David explain say: “Jehovah go help the person when e dey for e sickbed. When e de sick you go change e bed finish.” (Ps. 41:3) Yes, person wey help people wey need help fit de sure say God know the things wey e de do, and the better way e de live im life. And the way God don make im body to fit de repair imself, fit make-am well again.
w17.09 12 ¶17
De Pity People Like Jehovah
17 We no de pity for people and help them just because of say e go make us happy, and say e go make us feel say we don use our life well. The main reason why we de do-am na because we want be like Jehovah and we still want make people praise-am, because na im be the number one example of person wey de show love and pity. (Prov. 14:31) Jehovah don show us better example. So make we do our best to copy im example. Make we de do our part to make love dey between our brothers, and to get peace with our neighbors as we de show them pity.—Gal. 6:10; 1 John 4:16.
Fine-Fine Things Wey You See for Bible
it-2 16
Jehovah
The main story for Bible na about the right and authority wey Jehovah get to rule, and this one help us see the thing wey Jehovah get for mind, wey be to make im name dey holy. And to make that name holy, all the lie-lie wey them don talk and believe about God go need to comot. But the one wey pass that one be say, both the angels and everybody for this earth go de honor im name as something wey dey holy. This one mean say, them go know say na only Jehovah get the authority and right to rule and them go de respect-am. Them go de do this one with all their heart, them go really want serve-am, and them go de happy to do-am because them love-am. The prayer wey David pray to Jehovah for Psalm 40:5-10 show this kind character and how Jehovah name fit dey clean. (See how the apostle Paul take use wetin dey this psalm talk about Jesus for Heb 10:5-10.)
MAY 27–JUNE 2
FINE-FINE LESSON FROM BIBLE PSALMS 42-44
De Really Gain From the Things Wey Jehovah De Teach Us
w06 6/1 9 ¶4
Lessons From the Book Two of Psalms
42:4, 5, 11; 43:3-5. If something wey pass our power happen and we no come fit dey with the Christian congregation for some time, wetin fit help us endure na when we de remember the better time wey we spend with them. Na true say when this kind thing first happen, e fit really pain us say we dey alone. But e go still help us remember say na God de protect us and say we go need to wait for-am to help us.
w12 1/15 15 ¶2
Make Your Study Time Sweet and Gain From-Am
1 PRAY: The first thing to do na to pray. (Ps. 42:8) Why? Make we see our study of God Word as part of our worship. So, we need to beg Jehovah make e give us holy spirit and help us put mind for wetin we want study. (Luke 11:13) Barbara wey don be missionary for longtime talk say: “I de always pray before I read or study Bible. After that one, I go just feel say Jehovah dey with me and say e de happy for wetin I de do.” To de pray before we study de open our mind and heart to accept all the better things wey we want learn.
w16.09 5 ¶11-12
“No Allow Your Hand Come Down.”
11 Jehovah still de make us strong with the things wey e de teach us for our meeting, assembly, convention, and all the school wey we get. This training wey we de get fit help us serve God with better mind, help us plan how we go do more for Jehovah Organization, and to do wetin we suppose do as people wey de serve God. (Ps. 119:32) You really want make this training make you strong?
12 Jehovah help Israel people to win Amalek and Ethiopia people, and e give Nehemiah and the people wey dey with-am power to fit do the building work for Jerusalem finish. For the same way, God go give us power to fit continue to preach even if people dey against us, different kind of wahala de make us worry, or people hate us. (1 Pet. 5:10) We no de expect say Jehovah go do miracle for us. Instead make we do wetin we suppose do. This one mean say we go de read Bible everyday, de prepare for meeting and de always go meeting, de do Bible study and family worship, and de pray to Jehovah everytime. Make we no ever allow other things wey we de do for life affect the different way wey Jehovah de use encourage us and make us strong. If you see say your hand don de come down for any of this things wey we talk about, pray make Jehovah help you. Then see how im spirit go make una strong, move una to want do wetin Jehovah like and give una the power to do-am. (Phil. 2:13) But, wetin you fit do to make other people hand strong?
Fine-Fine Things Wey You See for Bible
it-1 1242
Jackal
For Bible, when them talk about jackal, them de always use-am represent something. When Job de describe the pain wey e de feel, e talk say e don be brother to jackals. (Job 30:29) When the person wey write Psalm de talk about how them win God people for battle, and how jackals de gather de chop the body of people wey die for battle (compare Ps 68:23), e cry say: “You don destroy us for where the jackals de stay.” (Ps 44:19) The attack for Babylon for 607 B.C.E. cause hunger well-well sotey mama them come de treat their children for bad way. So e make sense for Jeremiah to compare how the way jackals de care for their young children take different from the way im people don dey wicked.—La 4:3, 10.
JUNE 3-9
FINE-FINE LESSON FROM BIBLE PSALMS 45-47
One Song About One King Marriage
w14 2/15 9-10 ¶8-9
De Happy for the Marriage of the Lamb!
8 Read Psalm 45:13, 14a. Them talk about the bride say e fine well-well and e really fit for the royal wedding. For Revelation 21:2, them compare the bride to one city wey be New Jerusalem, and say e “don ready to meet im husband.” The city for heaven get “the glory of God” and e de shine “like stone wey fine well-well, like jasper stone wey de shine and clear like crystal.” (Rev. 21:10, 11) The book of Revelation describe the way New Jerusalem de shine and fine well-well. (Rev. 21:18-21) No wonder the person wey write the book of psalm talk about the bride say e fine finish and e de shine! And another thing be say na heaven the wedding de happen.
9 The person wey them de carry the bride give na the man wey de marry—the King of God Kingdom. E don de prepare the bride since, “de use the word as water to clean-am.” And the bride don “dey holy with no comma.” (Eph. 5:26, 27) The bride must still wear better cloth wey fit the occasion. And na so e be! Yes, them design im cloth with gold, and na really better cloth e wear go take go meet the king. For the marriage of the lamb, “them don allow-am make e wear clean fine linen cloth wey de shine—because the fine linen cloth de represent the correct things wey the holy ones don do.”—Rev. 19:8.
Wetin Revelation Talk About Your Future?
10 Wetin Jehovah go do about this wicked attack? E tell us say: “I go really vex.” (Ezek. 38:18, 21-23) Revelation chapter 19 talk the next thing wey happen. Jehovah send Im Son make e protect Im people and win their enemies. “The army them for heaven” wey be the faithful angels and the 144,000, go join Jesus for this war to fight Gog of Magog. (Rev. 17:14; 19:11-15) Wetin go be the result of this war? Jehovah go destroy everybody and all organization wey no dey im side!—Read Revelation 19:19-21.
11 Just think how faithful servants of God for earth go feel as them survive that war wey God go use destroy e enemies kpatakpata! That time go really sweet our heart no be small! Na true say heaven go over glad when God don destroy Babylon the Great. But another thing go happen wey go even bring more joy. (Rev. 19:1-3) This thing wey go happen na really important thing for the book of Revelation. Bible call-am the time wey the “Lamb” go “marry.”—Rev. 19:6-9.
12 When the marriage go happen? All the 144,000 go dey for heaven before the war of Armageddon go start. But no be that time the Lamb go marry. (Read Revelation 21:1, 2.) The Lamb go marry after the war of Armageddon don finish and God don destroy all e enemies.—Ps. 45:3, 4, 13-17.
it-2 1169
War
When the war end, the earth go enjoy peace for one thousand years. One place for the book of psalm talk say: “[Jehovah] de end all war for the whole earth. E de break the bow and scatter the spear; e de use fire burn the wagon wey them de use for fight.” This thing wey this verse talk first happen when God bring peace for Israel land as e destroy all the things wey their enemy de use fight war. After Christ win the war for Har–Magedon, people for everywhere for this earth go enjoy real peace. (Ps 46:8-10) People wey go get life wey no go end go be people wey “go use their sword make plowshare and . . . their spear make pruning shear.” “Because na Jehovah of armies don use e mouth talk-am.”—Isa 2:4; Mic 4:3, 4.
Fine-Fine Things Wey You See for Bible
w17.04 11 ¶9
Wetin Go Comot When God Kingdom Come?
9 Wetin go replace the different-different bad organization for this world? After Armageddon, any organization go still dey for this earth? Bible tell us say: “But new heavens and new earth dey wey we de wait for as e don promise, and na wetin correct for God eye them go always do for there.” (2 Pet. 3:13) The old heavens and old earth wey be bad government and the bad people wey de support them, go comot. Wetin go replace them? Na “the new heavens and new earth.” “The new heavens” na the new government or God Kingdom wey go rule this earth, and the “new earth” na the good people wey that government go de rule. Na Jesus go be King for that Kingdom and e go do like Jehovah, the God wey no want make things scatter. (1 Cor. 14:33) That one mean say Jesus go arrange the ‘new earth’ well. Better people wey go take care of things go dey there. (Ps. 45:16) Na Jesus and the 144,000 wey go join-am rule, go de direct them. Think about how life go be when all this bad governments no go dey again, wey only one government wey no fit do bad, and wey be say the people wey de rule get one mind!
JUNE 10-16
FINE-FINE LESSON FROM BIBLE PSALMS 48-50
Papa and Mama—Help Your Family Trust Jehovah Organization More-More
True Worship Go Give You More Joy
11 We de worship Jehovah when we de study Bible and teach our children about-am. Israel people no de work for Sabbath day. Them de use that day to make their friendship with Jehovah de strong more. (Ex. 31:16, 17) The ones wey hold Jehovah tight among them teach their children about Jehovah and the good things wey e de do. Today too, we must bring out time to read and study Bible. This na one way wey we de worship Jehovah, and this one de help us near Jehovah more. (Ps. 73:28) And when we de study Bible together as family, we fit help our children to get tight friendship with Jehovah our Papa for heaven wey love us.—Read Psalm 48:13.
w11 3/15 19 ¶5-7
You Get Reason to De Happy
“March around zion, waka round everywhere; count the towers wey e get. Take time think about the strong walls wey them use support the fence of the city to protect-am. Check the strong towers well, so that una go use-am teach una future generation.” (Ps. 48:12, 13) The person wey write this psalm de encourage Israel people to look Jerusalem well. You fit think about the sweet-sweet things wey people wey don travel go the holy city for the festival wey them de do every year go don see for the big temple wey fine well-well? These things wey them see go don move them to ‘use-am teach their future generation.’
Think about the queen of Sheba, wey no first believe the things wey e hear about the better way wey Solomon de rule and the kind better sense wey e get. Wetin really make-am dey sure say the things wey e hear na true? The queen of Sheba talk say: “I no believe the things wey I hear until I come see-am with my own eye.” (2 Chron. 9:6) Yes, the things wey we see with our own eye fit affect us well-well.
How you fit help your children to see the wonderful things wey Jehovah organization de do with their “own eyes”? If branch office of Jehovah Witness people dey near you, try make una visit-am. For example, Mandy and Bethany grow for place wey be 900 miles (1,500 km) from the Bethel wey de their country. But their papa and mama de always plan to visit the Bethel and go round everywhere, especially when when their daughters still de grow. Them explain say: “Before, we be think say to go round Bethel no be for people like us, but na for only old people. But we see people wey de work hard for Jehovah and them de enjoy-am! We see say Jehovah organization pass the small area wey we de stay. And anytime wey we visit Bethel, we de really get power again because of the things wey we see.” As them see the things wey Jehovah organization de do with their own eye, e really move Mandy and Bethany to start to pioneer, and them even invite them to come serve for Bethel as temporary volunteers.
w12 8/15 12 ¶5
Continue to be Citizen of the Kingdom!
5 Study the history. Person wey want become citizen of one government fit need to learn something about the history of that government. For the same way, people wey want be citizen for God Kingdom need to learn everything wey them fit learn about that Kingdom. See the example of Korah sons wey serve for Israel for Bible time. Them really like Jerusalem and the place wey them de worship. And them de happy to talk about the history of the city. No be the stones and the things wey them take build-am really de touch them, but na wetin the city and the place wey them de worship represent. That time, na Jerusalem be “the city of the big King” wey be Jehovah, because na the main place of pure worship. Na there them de teach the Law of Jehovah. Na the people wey the King of Jerusalem de rule Jehovah show love wey no de fail for. (Read Psalm 48:1, 2, 9, 12, 13.) Like them, e de really hungry you to study and to talk about the history of Jehovah organization wey dey this earth? The more you de learn about God organization and how Jehovah de support im people, the more God Kingdom go dey real to you. And e go really de hungry you to preach the good news about God Kingdom.—Jer. 9:24; Luke 4:43.
Fine-Fine Things Wey You See for Bible
it-2 805
Money and Property
As nation wey get money and property, Israel people fit enjoy better food and drink (1Ki 4:20; Ec 5:18, 19), and the things wey them get protect them from the problems wey poverty de cause. (Pr 10:15; Ec 7:12) Na true say part of wetin Jehovah want na make Israel people enjoy the better-better things wey go come from their hard work (compare Pr 6:6-11; 20:13; 24:33, 34), but e still warn them about the danger wey dey if them start to forget say na im be the Person wey de give them everything wey them get, and them start to trust the money and property wey them get. (De 8:7-17; Ps 49:6-9; Pr 11:4; 18:10, 11; Jer 9:23, 24) Jehovah remind them say money and property na something wey no de last (Pr 23:4, 5), them no fit give-am to God as something wey fit save them make them no die (Ps 49:6, 7), and say e no get value to people wey don die (Ps 49:16, 17; Ec 5:15). E still help them see say too much love for money and property fit make them start to do bad things and no get Jehovah favor again. (Pr 28:20; compare Jer 5:26-28; 17:9-11.) E still encourage them to ‘honor Jehovah with the things wey them really value’—Pr 3:9.
JUNE 17-23
FINE-FINE LESSON FROM BIBLE PSALMS 51-53
Do Things Wey Fit Help You No Make Serious Mistake
How You Fit Protect Your Heart?
4 For Proverbs 4:23, the word for “heart” de talk about “the person wey we be for inside” or “the secret person” wey we be. (Read Psalm 51:6 and footnote.) We fit still talk say “the heart” na the things wey only us de think about, the way we de feel, the reason why we de do things, and the things wey we de like or want. Na the kind of person wey we really be for inside, no be just the way people de see us for outside.
5 Make we talk about how our health fit show say the kind person wey we be for inside dey important. Number one, for our body to dey fine for inside, we must chop good food and always do exercise. Na so e still be if we want make our faith dey strong. Just like person wey de chop good food, make we de read Bible and our publications. And just like person wey de always do exercise, make we de always show say we get faith for Jehovah. We de do this kind of exercise when we de do the things wey we learn, and de tell people about wetin we believe. (Rom. 10:8-10; Jas. 2:26) Number two, because of the way our body be for outside, we fit think say we dey fine even if we get disease for inside. Na so e still be when we de do the normal things wey de help us near Jehovah, like personal study and other things. We fit de think say our faith dey strong, but bad things fit de grow inside us. (1 Cor. 10:12; Jas. 1:14, 15) Make we remember say Satan go like to poison our heart make we de think the way e de think. How e fit do this one? And how we fit protect ourself?
w15 6/15 14 ¶5-6
We Fit Dey Clean
5 One important way wey we fit show say we trust Jehovah na when we do our best to de use prayer fight any bad thinking. When we de near Jehovah for prayer, e go draw near us. E de open hand give us im holy spirit wey de help us fight dirty thinking and continue to dey clean. So make we always tell God about how we really want make-am happy with the things wey we de think about. (Ps. 19:14) We de carry body down and beg-am make e help us see any “bad thing”—dirty things wey our body want or wey dey our heart—wey fit make us sin? (Ps. 139:23, 24) We de pray to-am everytime make e help us fit continue to stand well for im side when we de face temptation?—Matt. 6:13.
6 The way we grow or things wey we de do before fit don make us like things wey Jehovah hate. Even with that one, Jehovah fit still help us change so that we go fit continue to de do things wey e like. This one na wetin King David later know. After e don sleep with Bath-sheba wey no be im wife, David beg Jehovah say: “Make me get clean heart, . . . Put new spirit for inside me, and make this one be faithful one.” (Ps. 51:10, 12) Our body wey no dey perfect fit really make us de like things wey fit make person sin, but Jehovah fit help us get strong heart wey ready to obey-am. Even if e be like say the bad things wey we de do don really enter our blood and e no de make us fit think good things again, Jehovah fit help us so that we go fit de obey the things wey e don command. And then we go fit succeed as we de do this things wey e tell us. E fit help us make bad things no control us.—Ps. 119:133.
Fine-Fine Things Wey You See for Bible
it-1 644
Doeg
Doeg come from Edom. E de serve as King Saul chief shepherd. This na really big position. (1Sa 21:7; 22:9) E clear say Doeg na person from another country wey join Jew religion. Doeg see how Ahimelech wey be High Priest take give David show bread and the sword of Goliath because e dey the tabernacle for Nob that time, maybe because of one vow wey e go don make, or because e no dey clean, or because them de suspect say e get leprosy. Later when Saul de talk to im servants and tell them say people de plan bad against-am, Doeg come tell-am wetin e eye see for the tabernacle that time for Nob. After Saul don call the high priest and the other priest for Nob and question them about wetin Ahimelech don do, e command the guards wey dey around-am say make them kill all the priest. When them no gree kill the priests, Saul command Doeg to kill them. Doeg no waste time, e kill all the 85 priest. After this wicked thing wey e do, e still destroy their city wey be Nob. E kill everybody wey dey the city, both young people and old people, and even their animals.—1Sa 22:6-20.
As e dey for the first things wey them write for up for Psalm 52, David write about Doeg say: “Your tongue wey sharp like razor, de plan wetin bad and de work for cunny-cunny way. You love bad things pass wetin good, and to de lie de sweet you pass to talk truth. You love every word wey de wound person, you wey your tongue de deceive people.”—Ps 52:2-4.
JUNE 24-30
FINE-FINE LESSON FROM BIBLE PSALMS 54-56
God Dey Your Side
w06 8/1 22 ¶10-11
Get Sense—Fear God!
10 E get one time wey David hide under Achish wey be the king of the Philistine city for Gath, the place wey Goliath come from. (1 Samuel 21:10-15) The king servant accuse David say e na enemy of their nation. Wetin David go do for this kind dangerous condition? E pray to Jehovah and tell-am eveything wey dey im mind. (Psalm 56:1-4, 11-13) Na true say e pretend to be person wey de craze so that them no go do-am anything, but still e know say na Jehovah save-am as E bless the thing wey e do. As David use all im heart trust Jehovah, e show say im na person wey really de fear God.—Psalm 34:4-6, 9-11.
11 Like David, we fit show say we de fear God when we trust the promise wey e make to help us when we de face problem. David talk say: “Put everything wey you want do for Jehovah hand, trust Jehovah, and e go help you.” (Psalm 37:5) This one no mean say we go leave our problem for Jehovah, de expect make e do something and we no go just do anything about the problem at all. David no pray to Jehovah for help and then leave the matter kpatapkata. E use the power and the sense wey Jehovah don give-am to handle the problem wey e de face. But still, David know say to fit succeed, e no fit trust only im power. Na so e suppose be for us too. We go try do everything wey our power fit do and leave the rest for Jehovah. The truth be say sometimes, e no get anything wey we fit do. Na just to put our trust for Jehovah. Na this time we go really need to show say we de fear Jehovah. The thing wey David talk fit make our mind come down. E say: “Na people wey de fear Jehovah be im tight friend.”—Psalm 25:14.
cl 243 ¶9
Nothing “Go Fit Separate Us From the Love Wey God Get For Us”
9 Jehovah still value-am as we de endure. (Matthew 24:13) Remember say Satan want make we comot from Jehovah side. Everyday wey we fit hold Jehovah tight, we de help Jehovah to fit answer Satan wey de insult-am. (Proverbs 27:11) Sometimes, to endure no dey easy. Sickness, money problem, when our mind no settle, and other kind of problem fit make everyday really hard for us. We fit still dey sad when we no get wetin we de expect. (Proverbs 13:12) E de really sweet Jehovah anytime wey we endure this kind problem. Na im make David tell Jehovah say make E collect im tears put for inside “skin bottle.” David dey sure of this one, na e make-am say: “Them no dey inside your book?” (Psalms 56:8) Yes, Jehovah de value and remember all our tears and our suffer as we continue to endure and hold-am tight. Them really get value for im eyes.
How Love De Help Us Make We No De Fear
16 Satan know say our life dey important to us. E talk say we ready to leave everything wey we get, and even spoil our friendship with Jehovah because we want save our life. (Job 2:4, 5) That one na big lie! But as e be say na Satan be “the person wey de cause death,” e de try to use that normal fear wey we get about death to make us leave Jehovah. (Heb. 2:14, 15) Sometimes, people wey Satan de control fit talk say them go kill us if we no stop to worship Jehovah. For other times, if we get serious sickness, Satan fit use that chance try to make us break Jehovah law. Doctors and our family members wey no de serve Jehovah fit de tell us say make we take blood, and that one dey against God law. Or somebody fit de tell us say make we accept one kind treatment wey dey against wetin Bible talk.
17 Na true say we no want die. But we know say even if we die, Jehovah no go stop to love us. (Read Romans 8:37-39.) When people wey be Jehovah friend die, e still de remember them as if them still dey alive. (Luke 20:37, 38) E de hungry Jehovah to bring them come back to life. (Job 14:15) No be small thing Jehovah give so that we go “fit . . . get life wey no go end.” (John 3:16) We know say Jehovah really love us, and e de care for us. So, instead make we leave Jehovah when we de sick or when them talk say them go kill us, e good make we near Jehovah because e go make our mind calm down. E go give us sense and power. Na exactly wetin Valérie and e husband do be that.—Ps. 41:3.
Fine-Fine Things Wey You See for Bible
it-1 857-858
To Know Wetin Go Happen for Future, To Plan Or Arrange How Things Wey Never Happen Go Take Happen
The thing wey Judas Iscariot do make wetin Bible don talk before happen, and this one show say Jehovah and im Son fit know wetin go happen for front. (Ps 41:9; 55:12, 13; 109:8; Ac 1:16-20) But we no fit talk say na God plan-am or arrange-am make e be say na Judas go make that thing happen. The prophecy for Bible talk say Jesus friend go betray-am, but e no talk the particular friend of Jesus wey go do that thing. Another thing be say, wetin Bible talk really show say God no plan or arrange the way Judas go be, or the way e go de do things. The thing wey apostle Paul talk for Bible dey clear. E say: “Make you no ever hurry to put your hand ontop any man, and make you no join for the sins of other people, continue to live clean life.” (1Ti 5:22; compare 3:6.) Before Jesus start to choose im 12 apostles, e spend the whole night de pray to im Papa so that e go fit choose well and e no go make mistake. (Lu 6:12-16) If God don already plan-am make Judas betray Jesus, then e go mean say God no de guide and direct person for the correct way, and as the Bible verse wey dey up show, that one go mean say God don make imself part of another person sin.
So, e clear say the time wey Jesus select Judas as apostle, nothing about im character show say im mind no clean. But e later allow ‘root wey get poison to grow’ inside im heart, and this one come spoil im character. This one come make-am de comot from God side small-small and e follow Satan way. E come de thief and play wayo. (Heb 12:14, 15; Joh 13:2; Ac 1:24, 25; Jas 1:14, 15; see JUDAS No. 4.) After some time, when this bad thing don grow for Judas heart well-well, Jesus come fit read Judas heart and e come know say na Judas go betray-am.—Joh 13:10, 11.