Copy the Angels

1-2. (a) How we take different from angels? (b) Which ways we take resemble angels?

AS SERVANTS of Jehovah, we dey part of im family wey de worship-am. Our brothers and sisters for the whole world dey this family and angels for heaven still join. (Dan. 7:9, 10) When we think about angels, wetin fit come our mind na how them take different from us. For example, angels don de live plenty years before any human being come life. (Job 38:4, 7) Them get power pass us. Them dey holy and righteous pass us by far because we get sin for body.—Luke 9:26.

² But even though say angels different well-well from us, plenty things still dey wey we take resemble them. For example, just like the angels, we fit copy Jehovah character. We dey free to make our own decisions, the same way them dey free to make their own decision. Just like them, each of us get our own name, and character wey people take know us. And just like them, we still get work wey each of us de do for Jehovah organization. Another thing be say, just like the angels, we too need to worship Jehovah.—1 Pet. 1:12.

3. Wetin we fit learn from angels?

³ Since we get plenty things wey we take resemble angels, we fit learn from their example and them fit encourage us. True-true, we fit learn plenty better things from them. For this article, we go talk about how we fit copy the way angels de carry body down, show love to people, endure, and do their best to make sure say the congregation continue to dey clean for Jehovah eye.

ANGELS DE CARRY BODY DOWN

4. (a) How angels take de show say them de carry body down? (b) Why angels de carry body down? (Psalm 89:7)

⁴ Angels de carry body down. Even though say them sabi plenty things, get power and get sense well-well, them still de obey Jehovah. (Ps. 103:20) When them de do the work wey Jehovah give them, them no de use-am boast or try to show people how them get power reach. Them de happy to do any work wey Jehovah give them, even if people no go know their name.a (Gen. 32:​24, 29; 2 Ki. 19:35) Them no de accept praise wey suppose be for Jehovah. Why angels de carry body down like this? Na because them love Jehovah and them really respect-am.—Read Psalm 89:7.

5. How one angel show say e carry body down when e de correct apostle John? (Still check the picture.)

⁵ Make we see one example wey show say angels de carry body down. Around 96 C.E., one angel wey Bible no tell us im name show apostle John one wonderful vision. (Rev. 1:1) Wetin apostle John do when e receive the vision? E try to worship the angel. But the angel stop-am quick-quick and tell-am say: “No try-am! No do that kind thing. I be ordinary slave like you and your brothers . . . Worship God!” (Rev. 19:10) The angel really carry body down. E no de find praise or honor. So e no waste time to tell John to worship God. And the angel no feel say e better pass John. Even though say the angel don de worship Jehovah for long time pass John, and e get power well-well pass-am, e talk say im na ordinary slave just like John. And even though say the angel need to correct John, e no use vex talk to-am. Instead e use better mind talk to John. E fit be say e understand say na because of the wonderful thing wey John see, make John be want worship-am.

6. How we fit copy the way angels de carry body down?

⁶ How we fit copy the way angels de carry body down? Like the angels, we want do our best for Jehovah work. But we no go take-am boast or de do like say we dey special. (1 Cor. 4:7) Another thing be say, we no want de feel say we better pass other people because we don serve Jehovah for plenty years or because of wetin we de do for Jehovah organization. In fact, the more we de get work for Jehovah organization, the more we suppose de see ourself say na we small pass. (Luke 9:48) Just like the angels, we want work for our brothers and sisters. We no want do wetin go make them de think say we better pass them.

7. How we fit show say we de carry body down when we de correct person?

⁷ We fit still show say we de carry body down when we de correct person, whether na brother or sister for congregation or our pikin. Sometimes, e fit be say the person need strong correction. But just like the angel wey correct John for kind way, we fit still give the person strong correction the way e no go make the person feel bad. If we no de see ourself say we better pass other people, we go fit use Bible give the person correction the way wey go show the person say we love and respect-am.—Col. 4:6.

ANGELS LOVE PEOPLE

8. (a) How Luke 15:​10, show say angels love people? (b) How angels de help us for the preaching work? (Still check the picture.)

⁸ Angels care about us and we dey important to them. Them love people. Them de happy when person wey commit serious sin repent and come back to Jehovah or when person change im life and start to worship Jehovah. (Read Luke 15:10.) The angels de support us for the preaching work. (Rev. 14:6) Even though say them no de preach to people direct, them fit direct brother or sister to preach to person wey want learn about Jehovah. But we no go fit talk say na angel direct us to preach to one particular person wey we preach to. Why? Because Jehovah fit use other ways direct us to preach to people. For example, e fit use im holy spirit. (Acts 16:6, 7) Even with this one, Jehovah de use im angels support us well-well. So when we de preach, we dey sure say Jehovah angels de support us.—Check the box, “God Answer Their Prayer.”b

9. How we fit copy the way angels de show love to people?

⁹ How we fit copy the way angels de show love to people? When them announce say person wey them disfellowship before don come back to Jehovah, e good make we happy with the person just like the angels. Make we let the brother or sister know say we love-am and say we happy say e don de worship Jehovah again. (Luke 15:​4-7; 2 Cor. 2:​6-8) We fit still copy the angels when we de put body for the preaching work. (Eccl. 11:6) And just as angels de support us for our preaching work, make we de look for ways to support our brothers and sisters for the preaching work. For example, we fit plan to work with new publisher for preaching. We fit still support brothers and sisters wey don old or wey de sick so that them go fit enjoy the preaching work too.

10. Wetin we learn from Sister Sarah story?

¹⁰ But what if our condition no allow us do wetin we go like do for Jehovah? We go fit still see other ways wey we fit work with the angels for the preaching work. For example, see the story of Sister Sarahc for India. After e don pioneer for about 20 years, e begin sick and e no fit comot from bed again. This one make-am no happy at all. Because of the help from brothers and sisters for congregation and as e de always read Bible everyday, e start to happy again. E look for new ways to preach. Since e no go fit sitdown write letter to people, na only telephone e de use preach. So e call im return visits, and them tell-am about other people wey fit still like to study Bible. Wetin come happen? After some months, Sister Sarah come get 70 Bible student! E no fit study with all of them, so e give some to brothers and sisters for congregation. Now, many of the Bible students de attend meeting. The angels de happy well-well to support brothers and sisters like Sister Sarah wey de put body for the preaching work.

ANGELS DE ENDURE WELL-WELL

11. How angels wey de serve Jehovah de show better example for the way them de endure?

¹¹ Angels wey de serve Jehovah na better example for the way them de endure. Them don see bad things wey de happen for many-many years. Them see how Satan and many other angels wey de serve Jehovah with them before, turn against Jehovah. (Gen. 3:1; 6:1, 2; Jude 6) Bible even talk about one angel wey struggle for many days with one demon wey get power well-well. (Dan. 10:13) Another thing be say, since when Adam and Eve sin, the angels don see say the number of people wey choose to serve Jehovah no plenty. Even with all this one, this better angels continue to de happy as them de worship Jehovah with all their heart. Them know say Jehovah go comot all the bad things wey de happen, for the correct time.

12. Wetin go help us fit endure?

¹² How we fit copy the way angels de endure? Just like the angels, people fit dey against us because we de serve Jehovah, and we de see bad things wey de happen around us. But like the angels, we know say Jehovah go comot all the bad things wey de happen, for the correct time. So like the angels wey no stop to do wetin dey fine, we too ‘no go stop to do wetin dey fine.’ (Gal. 6:9) And God don promise us say e go help us fit endure. (1 Cor. 10:13) So we fit beg Jehovah make e give us im holy spirit, and this spirit go help us de happy and endure. (Gal. 5:22; Col. 1:11) What if them de suffer you because you de serve Jehovah? Trust Jehovah with all your heart and no fear. Jehovah go always help you and give you the power wey you need.—Heb. 13:6.

ANGELS DE MAKE SURE SAY CONGREGATION CONTINUE TO DEY CLEAN

13. Which special work Jehovah give angels for this our time? (Matthew 13:​47-49)

¹³ For this our time, Jehovah don give angels special work to do. (Read Matthew 13:​47-49.) When we de preach the good news, plenty people for the whole world de like our message. Some of them de change their life to fit serve Jehovah, but some no de gree change. Jehovah don give the angels the work to “separate wicked people from righteous people.” This one mean say Jehovah don give them the work to make sure say congregation continue to dey clean. This one no mean say people wey don stop to serve Jehovah no go ever fit come back. And e no mean say problem no go ever dey for congregation. But we dey sure say the angels de do their best to make sure say congregation continue to dey clean.

14-15. How we fit copy the angels as them de do their best to make sure say congregation continue to dey clean? (Still check the picture.)

¹⁴ How we fit copy the angels as them de do their best to make sure say congregation continue to dey clean? We fit do this one when we do our best to protect our friendship with Jehovah. For example, we go run from anything wey fit spoil our friendship with Jehovah and we no go make friend with people wey de do wetin Jehovah no like. This one go help us fit make congregation continue to dey clean. (Ps. 101:3) Another way na to help our brothers and sisters continue to hold Jehovah tight. For example, wetin we go do if we know say one brother or sister don commit serious sin? Because we love the brother or sister, we go tell-am say make e go tell elders wetin e do. But if e no gree tell them, we go go tell the elders by ourself. We want make them quick help our brother or sister wey don spoil im friendship with Jehovah!—Jas. 5:​14, 15.

¹⁵ When person wey commit serious sin no gree repent, them go remove-am from congregation. This one no de make us happy. But when this kind thing happen, we go stop to do things with them.d (1 Cor. 5:​9-13) This arrangement de help congregation continue to dey clean. Another thing be say, when we no de do things with people wey them remove from congregation, we de show them say we care for them. When we obey Jehovah as we no de do things with them, that one fit help them see say them really need to come back to Jehovah. And if them come back to Jehovah, we go happy like Jehovah and the angels.—Luke 15:7.

16. Which ways you go like to copy the angels example?

¹⁶ Na big honor e be for us say Jehovah allow us learn about the angels and work with them. Make we continue to copy their better-better character, like: to de carry body down, show love to people, de endure, and de make sure say congregation continue to dey clean for Jehovah eye. If we copy their example, we go continue to dey part of Jehovah family forever.