Jehovah Go Comfort You

1. Wetin be the condition of Israel people when them dey Babylon?

JUST think how Israel people wey them carry as slave go Babylon go don feel. Them see how Babylon people destroy Jerusalem wey be their land. Because them don disobey Jehovah for many-many years, e allow their enemy carry them as slave go another land. (2 Chron. 36:​15, 16, 20, 21) Na true say them be slave, but Babylon people allow them to live normal life. (Jer. 29:​4-7) Even with that one, life no still easy for them because no be there them go like to stay. How Israel people feel about their condition? See wetin one of them talk, e say: “We sitdown near the rivers for Babylon, and we cry when we remember Zion.” (Ps. 137:1) Wetin e talk show say Israel people for Babylon really need wetin go make their mind come down. But who go comfort them?

2-3. (a) Wetin Jehovah do for Israel people wey dey Babylon? (b) Wetin we go talk about for this article?

² Jehovah na “the God wey de give all kind of comfort.” (2 Cor. 1:3) Jehovah love im servants well-well, so e de happy to comfort them. Jehovah know say when Israel people dey Babylon, some of them go repent from their sin and start to worship-am well again. (Isa. 59:20) More than 100 years before Babylon people carry Israel people go Babylon, Jehovah use prophet Isaiah write the Bible book of Isaiah. How wetin Isaiah write go take help them? Isaiah talk say: “Una God talk say: ‘Comfort, comfort my people.’” (Isa. 40:1) So, e clear say Jehovah use wetin prophet Isaiah write, comfort Israel people for Babylon.

³ Just like Israel people for Babylon that time, sometimes we too need comfort. For this article, we go talk about three ways wey Jehovah comfort Israel people for Babylon: (1) E promise to forgive them if them repent, (2) e give them hope, and (3) e help them stop to fear. As we de talk about this three things, we go still talk about how Jehovah de comfort us like that today.

JEHOVAH DE SHOW PITY AND DE FORGIVE

4. How Jehovah show Israel people say im na God wey de show pity and de forgive? (Isaiah 55:7)

⁴ Jehovah na “the Papa wey de really show pity.” (2 Cor. 1:3) Jehovah really show say e de show pity when e promise Israel people for Babylon say e go forgive them if them repent. (Read Isaiah 55:7.) Jehovah talk say: “Because of my love wey no de fail wey de last forever, I don show [una] pity.” (Isa. 54:8) How Jehovah take show them pity? Even though say Israel people go stay for Babylon for many years as punishment for their sin, Jehovah promise say them no go stay for Babylon forever. (Isa. 40:2) This one go don really make their mind come down!

5. Why we get more reason to believe pass Israel people say Jehovah de forgive?

⁵ Wetin we learn? Jehovah ready to forgive finish. Israel people wey dey Babylon that time believe say Jehovah de forgive. But today we get more reason to believe say Jehovah de forgive. Why we talk like that? Because we know wetin Jehovah don do to forgive our sin. Around 700 years after Isaiah talk about how Jehovah de forgive, Jehovah send Im special Son come this earth to use im life pay for the sin of everybody wey repent. So, because of Jesus sacrifice, Jehovah go fit forgive us kpatakpata. (Acts 3:19; Isa. 1:18; Eph. 1:7) True-true, Jehovah na God wey de forgive!

6. Why e de make our mind come down when we think about the way Jehovah de forgive? (Still check the picture.)

⁶ Wetin Jehovah talk for Isaiah 55:7, go fit make our mind come down if our mind de still judge us after we don repent. Our mind fit continue to worry us even after we don repent from the bad thing wey we do. This one fit happen especially if we still de suffer because of the sin. The truth be say, if we don confess our sin and we don comot hand for the sin, make we dey sure say Jehovah don forgive us. And when Jehovah forgive person, e de decide say e no go ever remember the sin again. (Compare Jeremiah 31:34.) So, if Jehovah no de put our sin for mind after e don forgive us, why we go de allow-am worry us? Wetin dey important to Jehovah na the way we de worship-am now, no be the bad thing wey we do wey Jehovah don already forgive us. (Ezek. 33:​14-16) Small time, our Papa wey de show pity go bring Paradise. For there, e go remove all the suffer wey we de suffer because of our sin.

7. If we don commit serious sin and we de hide-am, wetin go help us fit tell elders?

⁷ Wetin we go do if our mind de worry us because we commit serious sin and we de hide-am? Bible advice us say make we go tell elders so that them go help us. (Jas. 5:​14, 15) The truth be say, e fit no easy to go tell them. But we need to remember say Jehovah de use the elders to help us and say them go show us love and pity us just like Jehovah. If we remember this one and if we feel bad for wetin we do, this one go move us to go tell the elders. See the example of how Jehovah use elders comfort one brother wey im name na Austin.a The brother mind really worry-am because of wetin e do. E talk say: “I watch film and picture of naked people for like one year. But after I hear one talk for meeting wey talk about our conscience, I tell my wife and the elders wetin I do. After I tell them, my mind come down, but I no still happy at all for wetin I do. The elders remind me say Jehovah never troway me. And say e de correct us because e love us. The way them talk to me really touch me and e help me see say Jehovah don really forgive me.” Brother Austin na pioneer and ministerial servant now. E de make our mind come down to know say when we repent with all our heart, Jehovah always ready to forgive us!

JEHOVAH DE GIVE US HOPE

8. (a) Which hope Jehovah give Israel people for Babylon? (b) As e dey for Isaiah 40:​29-31, how Israel people for Babylon feel because of the hope wey Jehovah give them?

⁸ For the mind of Israel people for Babylon, them fit don think say e no go ever dey possible for them to go back to their land. Why? Because Babylon people no de ever free their slave. (Isa. 14:17) Even with this one, Jehovah give im people hope. E promise them say e go free them from Babylon so that them go fit go back to their land, and nothing go fit hold Jehovah make e no do wetin e promise. (Isa. 44:26; 55:12) For Jehovah eye, Babylon people just be like dust. (Isa. 40:15) Just as e dey easy to blow dust comot, na so e dey easy for Jehovah to free im people from Babylon. How the hope say Jehovah go free them from Babylon, help them? E make their mind come down. But no be only that one. Prophet Isaiah talk say: “People wey put their hope for Jehovah go get power again.” (Read Isaiah 40:​29-31.) True-true, the hope wey Jehovah give them go make them strong and give them power like eagle.

9. Which reason Israel people get to believe say Jehovah go free them from Babylon as e promise?

⁹ Jehovah do things wey go help Israel people for Babylon fit trust say wetin e promise them go happen. Wetin Jehovah do wey help them fit trust im promise? Make we talk about some things wey Jehovah talk say go happen, wey Israel people know say e happen the way Jehovah talk-am. For example, Jehovah talk say Assyria people go win the ten tribe kingdom of Israel and carry them go another land, and na so e happen. (Isa. 8:4) Them see how Babylon people destroy Jerusalem and carry the people as slave go Babylon. (Isa. 39:​5-7) And them know when the king of Babylon blind King Zedekiah and carry-am go Babylon. (Jer. 39:7; Ezek. 12:​12, 13) Everything wey Jehovah talk, happen. (Isa. 42:9; 46:10) All this one go don make their faith strong say, as Jehovah promise to free them, e go really do-am.

10. Wetin go help us continue to make our hope strong for this last days?

¹⁰ Wetin we learn? When we no de happy, the hope wey we get fit comfort us and give us the power wey we need. This time wey we dey really hard and people wey no love Jehovah dey against us. But make we no allow this one make life tire us. Jehovah don promise us say we go live for Paradise forever. And for there, we no go de fear again and we go enjoy real peace. Make we continue to put mind for the hope wey we get. If we no do like that, our hope for our future go weak. Wetin go help us continue to make our hope strong? We fit do this one if we de take time to think about how our life go be for Paradise. We fit read our book them, watch videos, and listen to songs wey de talk about our hope. And we fit pray to Jehovah and tell-am all the things wey we de wait to see for Paradise.

11. Wetin help one sister wey get serious sickness to fit get power again?

¹¹ Make we see how the hope wey we get for Paradise comfort one sister and give-am power when e de face serious sickness, the sister name na Joy. E talk say: “When I de feel say my problem for life too plenty, I de pray to Jehovah and tell-am the way I de feel, and I know say Jehovah understand me. Then, Jehovah de give me ‘the power wey pass normal power.’” (2 Cor. 4:7) Another thing wey de help Sister Joy, be say e de think about imself for Paradise, where “nobody for there go talk say: ‘I de sick.’” (Isa. 33:24) Just like Sister Joy, if we de tell Jehovah everything wey de worry us, and de think about Paradise, we go get the power wey we need to fit endure all our problem.

12. Which reason we get to trust all Jehovah promise? (Still check the picture.)

¹² Just as Jehovah give Israel people plenty reason to trust im promise, na so e still de do for us today. Think about the things wey Jehovah talk say go happen, wey de really happen for this our time. For example, we de see the world power wey Bible talk say go “strong for one way and still weak for another way.” (Dan. 2:​42, 43) ‘Ground de shake open for different-different place,’ and we de preach the good news to people for “all the nations,” just as Bible talk. (Matt. 24:7, 14) All the things wey Bible talk wey de happen for this our time, de make us dey sure say all the things wey Jehovah promise, go happen.

JEHOVAH DE HELP US STOP TO DE FEAR

13. (a) How things go be for Israel people when time don de near for Jehovah to free them? (b) As e dey for Isaiah 41:​10-13, how Jehovah comfort Israel people for Babylon?

¹³ Na true say Jehovah promise to free Israel people wey dey Babylon, but e know say things go hard for them when the time don de near. Jehovah talk say one king wey get power well-well go attack Babylon and all the city wey dey around-am and take over them. (Isa. 41:​2-5) When this one happen, Israel people no need to fear. Many years before this one happen, Jehovah comfort im people. E tell them say: ‘No fear, I dey with una. No worry, I be una God.’ (Read Isaiah 41:​10-13.) Wetin Jehovah mean when e talk say, “I be una God”? E no de tell Israel people say them need to worship-am, because them already know say na wetin them need to do. But e de remind them say e dey with them and e go help them.—Ps. 118:6.

14. Which other thing Jehovah do to help Israel people stop to fear?

¹⁴ Another thing wey Jehovah do to help Israel people for Babylon stop to fear na to remind them about the kind power and sense wey e get. E tell them say make them look heaven to see the stars. E tell them say na im make the stars and e know all their name. (Isa. 40:​25-28) If Jehovah know the name of each of the stars, e no go hard-am to know the name of each of im servants! And if Jehovah get power to make stars, we no go doubt say e get power to help im people. True-true, Israel people for Babylon no suppose fear at all.

15. How Jehovah help Israel people fit ready for wetin go happen when the time wey e go free them don reach?

¹⁵ Jehovah tell im people wetin them go need to do when the time don reach for-am to free them from Babylon. Jehovah use prophet Isaiah tell Im people say: “Make una enter una inner room and close door. Make una hide unaself small until God vex finish.” (Isa. 26:20) E fit be say Israel people do wetin this Bible verse talk when King Cyrus attack Babylon. One Greek man wey study history talk say when Cyrus enter Babylon, e “tell im soldiers say make them kill anybody wey them see for outside.” Imagine the kind fear wey go dey for Babylon that time. But e fit be say them no kill Israel people because them obey Jehovah.

16. Why we no need to de fear or worry about wetin go happen for great tribulation? (Still check the picture.)

¹⁶ Wetin we learn? Small time, great tribulation go start. When e start, people go confuse and really fear. But e no go happen to Jehovah people like that. We know say na Jehovah be our God. So, e go dey clear to us say “the time wey them go save [us] don de near.” (Luke 21:28) Even when nations go join together to attack us, we go continue to trust Jehovah. Jehovah go use im angels protect us and give us directions wey go save our life. How Jehovah go take give us directions that time? We no really know. But e fit be say Jehovah go use our congregations, give us direction. We fit talk say the congregation go be like the inner rooms wey go protect us. How we fit prepare now for wetin go happen? We need to get tight friendship with our brothers and sisters, ready to obey any direction wey come from Jehovah organization now, and really believe with all our heart say na Jehovah de direct our organization.—Heb. 10:​24, 25; 13:17.

17. Wetin go help you trust say Jehovah go comfort you?

¹⁷ Even though say life no easy for Israel people for Babylon, Jehovah give them wetin them need to make their mind come down. E go do the same thing for us. No matter wetin happen for future, trust say Jehovah go comfort you. Wetin go help you na to get strong faith say Jehovah de forgive im servants and e love you. And continue to make your hope strong. Remember say as far say you continue to hold Jehovah tight, you no get any reason to fear.