Study Book for Our Life and Preaching Meeting
© 2025 Watch Tower Bible and Tract Society of Pennsylvania
JULY 7-13
FINE-FINE LESSON FROM BIBLE PROVERBS 21
Better Advice Wey Go Make Marriage Happy
w03 10/15 4 ¶5
How You Fit Make Better Decisions?
Decisions wey them rush make fit no make sense. Proverbs 21:5 talk say: “The plan of person wey de work hard go succeed, but anybody wey de rush go enter poverty.” For example, young people need to take their time before them decide whether them go marry who them dey relationship with. If not, wetin William Congreve, wey de write English poem for the beginning of 18th century talk, go happen for their life. E talk say: ‘If you rush marry when you never know the person well, you fit regret-am later.’
g 7/08 7 ¶2
How to Succeed for Your Marriage
De Carry Body Down. “For everything wey una de do, make e no be because una get quarrel for mind or because una de feel say una dey too important, but make una de carry body down and de see other people as people wey better pass una.” (Philippians 2:3) Many problem de come for marriage because husband and wife de carry body up and de blame each other when problem dey, instead of to carry body down and look for ways to make things better for each other. When you de carry body down e go help you make you no de talk say na your own must stand if una no agree for something.
w06 9/15 28 ¶13
“Dey Happy With the Wife Wey You Marry When You Dey Young”
13 What if problem dey marriage because of the way the husband and wife de treat each other? The problems fit no easy to solve. For example, e fit be say the two of them don de use word wey no good de talk with each other and now e don become problem. (Proverbs 12:18) As we talk for the article before this one, this kind thing fit cause serious problem. One Bible verse advice say: “E better to stay for wilderness than to stay with woman wey de always quarrel and de quick vex.” (Proverbs 21:19) If you be wife wey dey for this kind marriage, ask yourself say, ‘The way I de behave de make-am hard for my husband to stay with me?’ Bible tell husbands say: “Una wey be husbands, make una continue to love una wives and no de overvex for them.” (Colossians 3:19) If you be husband, ask yourself say, ‘The way I de treat my wife fit make-am de look for wetin go make-am happy outside?’ Na true say we no get any reason to sleep with person wey no be our husband or wife. But, because this kind thing fit happen, e good to discuss any problem wey fit affect the marriage.
Fine-Fine Things Wey You See for Bible
w05 1/15 17 ¶9
The Dream of God Kingdom Don Become Real
9 Jesus no be human being again wey sitdown for back of donkey, e don be powerful King. Bible describe-am say e de ride ontop horse—this one mean war. (Proverbs 21:31) Revelation 6:2 talk say, “And I see one white horse and the person wey sitdown ontop-am hold bow, and them give-am crown, and e comot go de win im enemies until e win finish.” David still write about Jesus say: “Jehovah go raise the rod of your power to rule from Zion, and e go talk say: ‘Go de win among your enemies.’”—Psalm 110:2.
JULY 14-20
FINE-FINE LESSON FROM BIBLE PROVERBS 22
Better Advice About How to Train Children
Your Pikin Go Serve Jehovah When E Grow?
7 If you don marry, and you and your husband or wife go like to get pikin, make una ask unaself say: ‘We be humble people wey love Jehovah and im Word? We be the kind people wey Jehovah fit choose to take care of the life of new baby?’ (Ps. 127:3, 4) If you don already be papa or mama, ask yourself say: ‘I de teach my children say e good to work hard?’ (Eccl. 3:12, 13) ‘I de do my best to protect my children from the bad things wey them fit face for this world wey Satan de control?’ (Prov. 22:3) You no fit protect your children from all the problem wey them fit face. This one no dey possible. But, if you continue to sofri teach them to always check Bible for advice, you de prepare them for the problem wey them go face for life. (Read Proverbs 2:1-6.) For example, if any of your family member decide to leave Jehovah, help your children to learn from Bible why e dey important to hold Jehovah tight. (Ps. 31:23) Or if person wey you love die, show your children how to use Bible endure the pain and get peace of mind.—2 Cor. 1:3, 4; 2 Tim. 3:16.
Papa and Mama—Make Una Train Una Pikin to Love Jehovah
17 Start to train your pikin when e still dey small. Na good thing for papa and mama to begin train their pikin from small. (Prov. 22:6) Make we talk about the example of Timothy. When Timothy don grow, e travel with apostle Paul. Im mama na Eunice and im grandmama na Lois. And na “from small pikin” the two of them begin train Timothy—2 Tim. 1:5; 3:15.
18 Another husband and wife for Côte d’Ivoire, wey their name na Jean-Claude and Peace, train all their six children to love and serve Jehovah. Wetin help them succeed? Them follow the example of Eunice and Lois. Them talk say, “We begin teach our children Bible from small pikin, just after we born them.”—Deut. 6:6, 7.
19 Wetin e mean to “teach” your pikin Bible? “To teach” fit still mean “to always repeat something.” For this one to happen, papa and mama go need to always spend time with their pikin them. Sometimes, this one fit make papa and mama tire because them go need to always repeat wetin them don already tell the pikin. But papa and mama fit try to see this one as one way to help their pikin make e understand Bible and follow-am.
w06 4/1 9 ¶4
Papa and Mama—Make Una Be Better Example for Una Children
Na true say, children go behave like children, and some of them no go de hear word. (Genesis 8:21) Wetin papa and mama fit do? Bible talk say: “E dey pikin mind to do things wey no make sense. But if you use something correct-am, e go make-am stop those things.” (Proverbs 22:15) Some people think say to de correct pikin like this no make sense again. True-true Bible no support-am if them de treat anybody for harsh way. The “rod,” (as e dey for English Bible) sometimes fit mean cane or to flog person, and e de represent the power wey papa and mama get to train their children with love so that things go better for them.—Hebrews 12:7-11.
Fine-Fine Things Wey You See for Bible
De Get Joy From the Things Wey You Fit Do for Jehovah
11 For the same way, we fit get more joy when we put all our power for any work wey them give us to do for Jehovah organization. De “really busy” for the preaching work, and work hard for congregation. (Acts 18:5; Heb. 10:24, 25) Prepare well for meeting so that you go fit encourage people with your comment. No play with any student assignment wey you get for Life and Preaching meeting. If them tell you make you help to do work for congregation, make you do the work for the correct time and show say them fit trust you. No treat any assignment wey them give you as if them de use-am waste your time. Make you try to sabi your work well.(Prov. 22:29) If you de really work hard for Jehovah, una go tight more-more and you go get more joy. (Gal. 6:4) And this one go make-am dey more easy for you to dey happy with other people when them get work wey you for like to get.—Rom. 12:15; Gal. 5:26.
JULY 21-27
FINE-FINE LESSON FROM BIBLE PROVERBS 23
Better Advice About Alcohol
w04 12/1 19 ¶5-6
De See Alcohol for the Correct Way
5 What if person de drink alcohol but e dey careful so that people no go know say e dey drunk? E no de show for some people body say them don dey drunk even after them don drink plenty alcohol. But, if person de think say to de drink like this no fit affect-am, e de deceive imself. (Jeremiah 17:9) Small-small, the person no go fit rest if e no drink alcohol and e go become “slave to too much wine.” (Titus 2:3) For person to become drunkard, Caroline Knapp wey be writer talk say: ‘E no de start one day, na small-small person de become drunkard.’ When person don become drunkard e don enter trap wey fit kill-am!
6 Jesus still talk say: “Make una dey careful so that to de chop too much, to de drink too much, and overworry about life no go full una heart sotey that day go come when una no expect, and e go be like trap for una. Because that day go affect everybody wey dey everywhere for the earth.” (Luke 21:34, 35) Person no need to dey drunk before drink go start to turn im eye and make-am lazy—this one fit be real drink or person friendship with Jehovah. What if Jehovah day come when the person dey that kind condition?
it-1 656
To Dey Drunk
Bible No Support-Am. Bible really dey against-am say person go drink alcohol sotey e come dey drunk. One of the person wey write the book of Proverbs talk wetin alcohol de really do person when e drink-am too much. E talk say: “Who de suffer? Who im mind no settle? Who de cause trouble? Who get things wey de worry-am? Who get wound when them no beat-am? Who im eye no de see clear? Na people wey no want leave drink; Na people wey de find where them de mix drink. No let how the wine color fine reach de sweet you, no let how e de shine for cup de deceive you, and no let how e de enter body de sweet you. For the end e de bite like snake, and e go poison the person like snake [e fit make person sick (for example, e fit make person get liver problem) and e fit make person no well for some time (for example im head fit no correct for some time, e fit de shake, e go confuse, e go de worry-worry and e fit de vomit), and e fit even kill the person]. Your eyes go de see things wey no make sense [alcohol de affect the part of the brain wey de control the mind; e go make the mind no de work well again; the person go start to de do things wey no normal; the person go start to see things wey no dey real; because e no de think well e go start to talk sweet-sweet story wey be like truth so that people go believe; the person go start to talk and do things without shame], and your mind go de move you to talk wetin no good [you go come de think and do things wey you no go do if you no drink].”—Pr 23:29-33; Ho 4:11; Mt 15:18, 19.
The writer continue to describe the way the person wey dey drunk go de feel, e say: “And you go be like person wey lie down for the middle of sea [e go confuse like person wey fall inside big water, then later e no go know wetin de happen around-am again], like person wey lie down for the highest part of the ship [when the drunkard don reach this point im life don dey danger, e fit get accident, stroke, start to fight, and do many things]. ‘Them flog me but I no feel pain. Them beat me, but I no know [na so the drunkard talk, as if e de talk to imself; e no just know wetin de happen around-am and the kind punishment wey the drink don give-am]. When I go wake up? I need another drink [e go come sleep because e don overdrink, but because e don become slave to drink e go de look for more drink when e wake up].’” E go come dey poor, because e don use plenty money take drink and people no trust-am again and e don turn imself to person wey no fit work again.—Pr 23:20, 21, 34, 35.
Fine-Fine Things Wey You See for Bible
w04 11/1 31 ¶2
Question Wey Some People Don Ask
For example, when person fat too much (obesity), e fit be say the person de chop or drink too much, but that one no be the only reason. Sickness fit still make person get too much fat for body. E fit still be say people from the family wey the person come from de fat well-well. Make we still know say when person fat too much e de show for im body, but if person de like to chop or drink too much na im mind e dey. Obesity na when fat too much for person body. Gluttony na when person get long throat and like to de chop or drink too much. So, no be the size of person you go take know whether the person de chop or drink too much, but na the way the person de behave for food matter. Person fit get normal size or e fit even slim, but e de chop and drink too much. The way people de see who get the correct weight or shape dey different well-well for different-different place.
JULY 28–AUGUST 3
FINE-FINE LESSON FROM BIBLE PROVERBS 24
Prepare for Time When Trouble Go Dey
it-2 610 ¶8
When People De Suffer Us
Christians still de wait for the prize wey God go give people wey endure. Jesus talk about this prize say: “People wey other people don suffer because them de do wetin correct for God eye, go happy, because the Kingdom wey dey heaven na for them.” (Mt 5:10) Wetin them know about the resurrection and wetin them know about the Person wey Go Make-Am Happen de give them strong mind. E de make them continue to hold God tight even if the people wey de suffer them threaten to kill them. Because of the faith wey them get for wetin Jesus death go do for them, them no de fear to die. (Heb 2:14, 15) For person to continue to hold God tight even when them de suffer-am, e dey important make e de think like Jesus. “So make una de think for this same way just like Christ Jesus. . . . E obey till e die. True-true, e die ontop torture pole.” (Php 2:5-8) “Because of the joy wey dey [Jesus] front, e endure for torture pole, e no mind the shame.”—Heb 12:2; still check 2Co 12:10; 2Th 1:4; 1Pe 2:21-23.
w09 12/15 18 ¶12-13
Continue to De Happy Even When You De Face Problem
12 Proverbs 24:10 talk say: “If you tire when problem dey, you no go too get power.” Another place talk say: “When [person] dey sad e go dey weak.” (Prov. 15:13) Some Christians don tire sotey them don stop to do their personal Bible reading and to de think deep about wetin dey Bible. When them de pray, their prayer no de get meaning, them just de do-am, and them no de like dey with brothers and sisters. E clear say to dey this kind condition really bad.—Prov. 18:1, 14.
13 But when we de see things for the correct way, e go help us to put mind for the things wey we de do wey fit make us happy. David write say: “O my God, e de sweet me to do wetin you want.” (Ps. 40:8) When things no go well for our life, make we no ever think say the solution na to stop to do the things wey we de normally do to worship God. The truth be say, the thing wey go help us when we dey sad na to do the things wey de make us happy. Jehovah tell us say we go get joy when we de read Bible every time and de study-am. (Ps. 1:1, 2; Jas. 1:25) We de hear “better word” wey de encourage us and make us happy when we de read Bible and de attend our Christian meeting.—Prov. 12:25; 16:24.
Question Wey Some People Don Ask
Proverbs 24:16 talk say: “Good person fit fall seven times, and e go get up again.” This verse de talk about person wey de sin everytime wey Jehovah de always forgive?
The truth be say, that one no be wetin this verse de talk. But this verse de talk about person wey de face many problem but e de endure everytime.
So, all this one show say Proverbs 24:16 no de talk about the sin wey person de commit, but na about problems wey person de face everytime. For this wicked world wey we dey, righteous person fit sick or face other problems. Government people fit even suffer-am because of the things wey e believe. But this kind person fit trust say God go support-am and help-am to face the problem well and succeed. Ask yourself say, ‘I no de see say many times, servants of God de manage to handle their problem well?’ Why e be like that? We dey sure say “Jehovah de support all the people wey de fall and e de raise all the people wey problem don bend.”—Ps. 41:1-3; 145:14-19.
Fine-Fine Things Wey You See for Bible
w09 10/15 12
Question Wey Some People Don Ask
For Bible time, if man want ‘take care of [im] family,’ or marry to start im own family, e need to ask imself say, ‘I don ready to care for wife and support-am and the children wey we fit get later?’ Before e start family, e get work wey e de do, wey be to de care for im farm or the things wey e plant. Na this one make Today’s English Version Bible write about this verse say: ‘No build your house and start family until the things wey you plant don ready and you dey sure say you fit de make money.’ This advice still de work today?
Yes. Man wey want marry need to prepare well for family. If e dey strong for body, e go need to work. But man work no be only to care for things like food, or clothes wey the family need. God Word talk say man wey no fit provide the things wey im family need to survive, things wey go make their mind come down, and the things wey go help them near God, worse pass person wey no get faith! (1 Tim. 5:8) So, when man de prepare to marry and start family, e go need to ask imself questions like: ‘I don ready to provide the things wey my family go need? I don ready to be person wey fit help im family near God? I go fit de do the work of to de study Bible with my wife and children everytime?’ God Word talk how that work dey important reach.—Deut. 6:6-8; Eph. 6:4.
So man wey de find wife really need to think about the advice for Proverbs 24:27. Na so e still be for woman wey want marry. E go need to check whether e don ready to do the work of wife and mama. Young husband and wife go need to ask theirself this kind questions when them de think about whether them go get children. (Luke 14:28) When God servants follow this advice, e go help them no get plenty headache for marriage and enjoy better family life.
AUGUST 4-10
FINE-FINE LESSON FROM BIBLE PROVERBS 25
Better Advice About How to Talk
w15 12/15 19 ¶6-7
Use Your Tongue Well
6 Proverbs 25:11 use example help us understand why e dey important to choose the correct time to talk. E say: “Any word wey person talk for the right time be like golden apples for inside silver designs wey them carve.” Apples wey them use gold make go surely fine. When you come put them inside wetin them make with silver, e go make them fine more-more. Na so e go still be when we choose the correct time to talk, e go make the thing wey we de talk touch the person and e go get better result. How?
7 The things wey we want talk fit be wetin the people wey de listen to us really need to hear, but if we no talk-am for the correct time, e fit no make sense to them. (Read Proverbs 15:23.) For example, for March 2011 earthquake and water destroy some part of Japan, and really finish some towns for there. E pass 15,000 people wey die. Na true say e still affect some of Jehovah servants for the area, but them use every chance wey them get use the Bible make people mind come down. But, many of the people for the area dey Budha religion and them hold their belief tight. E fit be say them get small idea about Bible or them no even know anything about-am. Our brothers see-am say, that time wey the thing just happen no be the correct time to tell the people wey e affect about the resurrection hope. Instead, them use their tongue well to encourage the people and them use the Bible explain why bad things like this de happen to innocent people.
w15 12/15 21 ¶15-16
Use Your Tongue Well
15 Just as the thing wey we want talk dey important, na so the way we go take talk-am dey important too. When Jesus de talk for the synagogue for Nazareth, the people “surprise because of the sweet-sweet words wey de come out from im mouth.” (Luke 4:22) The sweet word wey we go talk go touch the person heart, and e no mean say our word dey weak. The truth be say, na when we talk something for fine way we fit make the person believe or do wetin we de tell-am. (Prov. 25:15) We fit copy the better way wey Jesus de talk when we dey kind, de show respect, and de think about how other people de feel. When Jesus see the way them de struggle to come listen to-am, e make-am pity for them and “e start to teach them plenty things.” (Mark 6:34) Even when people de curse Jesus, e no curse them back.—1 Pet. 2:23.
16 When we de talk with person wey we know well-well, e no de easy to dey gentle and talk with respect. We fit de feel say we get right to tell-am our mind. That one fit be true whether we de talk with family member or with tight friend for congregation. Jesus feel say because e and im disciple dey close e fit talk with them anyhow? No, e no feel so! When im apostles de argue about who big pass, Jesus use better word and the example of one small pikin correct them. (Mark 9:33-37) When elders de give correction, make them copy Jesus example and ‘try to sofri help the person.’—Gal. 6:1.
w95 4/1 17 ¶8
How We Fit Encourage Each Other to Show Love And Do Fine Work?
8 As we de serve our God, all of us fit encourage each other with our example. Jesus encourage the people wey de listen to-am. E enjoy the preaching work and e make-am the number one thing for im life. E talk say e be like food for-am. (John 4:34; Romans 11:13) The way Jesus put body for the work make other people like the work. Other people de see-am say you dey happy as you de do the preaching work? Tell other people for congregation the things wey you de enjoy for your preaching work, but dey careful make the way you de talk-am no show say you de boast. When you tell other people make them work with you, try help them get the joy wey we de get when we de tell people about Jehovah.—Proverbs 25:25.
Fine-Fine Things Wey You See for Bible
it-2 399
To Dey Gentle
Person wey dey gentle be like that because of im faith and where e de get im power from. Something no de quick shake-am or make-am start to behave anyhow. When person no dey gentle e fit be say na because e de fear, life tire-am, or e no get faith and hope. The book of Proverbs talk about person wey no dey gentle, e say: “Just like city wey no get wall, wey person fit just enter, Na so the man wey no fit control e temper be.” (Pr 25:28) E go dey weak and e go dey easy for bad things to start to de come im mind, and body fit move-am to do those bad things.
AUGUST 11-17
FINE-FINE LESSON FROM BIBLE PROVERBS 26
Run From “Person Wey No Get Sense”
it-2 729 ¶6
Rain
Seasons. The two main season for the Promise Land na dry season and rainy season. (Compare Ps 32:4; Ca 2:11,ftn.) From around middle of April to middle of October na small-small rain de fall. Na this period them de harvest their things, and e no dey common for rain to fall this time. Proverbs 26:1 show say e no dey normal for rain to fall for harvest time. (Compare 1Sa 12:17-19.) For rainy season, rain no de fall everytime; weather go clear sometimes. Since this na still cold period, if rain touch you, e de cold well-well. (Ezr 10:9, 13) So, person go really like to stay for place wey dey warm.—Isa 4:6; 25:4; 32:2; Job 24:8.
w87 10/1 19 ¶12
Correction De Bring Better Result
12 Proverbs 26:3 talk say: “Whip na for horse, rope wey them tie for donkey mouth na to control-am, and cane na for the back of foolish people.” This one show say some people go need strong correction. Sometimes, Jehovah de allow the nation of Israel to face the bad result of wetin them do. Bible talk say: “Because them no do wetin God talk; them no respect the advice wey the Person Wey High Pass give them. So E correct them for hard way so that them go learn; them fall, but nobody dey to help them. And them beg Jehovah for help when them de suffer, and E save them from their problem.” (Psalm 107:11-13) But some people wey no get sense don make their heart strong and no de gree accept correction wey fit help them change. Bible talk say: “Person wey them correct plenty times but e no gree listen go face destruction.”—Proverbs 29:1.
it-2 191 ¶4
When Person No Fit Waka
When Them Use-Am as Proverb. King Solomon talk say, “Person wey carry something give person wey no get sense, be like person wey use im own hand cut im leg comot and injure imself.” True-true, person wey give person wey no get sense work de use im hand spoil im work. E go use im own eye see how im work go scatter finish, and this one no go good for-am.—Pr 26:6.
Fine-Fine Things Wey You See for Bible
it-1 846
Fool
When person de answer fool “with the way e de talk”, e de make the person wey de argue with-am to be like the fool or de think like the foolish person. So that we no go be like the foolish person, the book of Proverbs tell us say, “No answer foolish person with the way e de talk.” But Proverbs 26:4, 5 still talk say, make we answer the foolish person “with the way e de talk”, wey mean to check wetin the foolish person de talk, to make-am see say wetin e de talk no make sense, and when we show-am say e don de talk different thing from how the matter be, e fit help-am.
AUGUST 18-24
FINE-FINE LESSON FROM BIBLE PROVERBS 27
How We De Gain When We Get Better Friends
Jehovah Value Us When We Dey Humble
12 Humble person de like correction. Think-am like this: Make we talk say you dey for congregation meeting. After you don talk with some brothers and sisters, one of them draw you go corner and tell you say food hang for your teeth. Shame go catch you, no be so? But you no go still glad say e tell you about-am? And the truth be say, you fit de wonder why person no quick tell you! For the same way, make we dey humble and dey glad say our brother or sister get the mind to give us correction when we need-am. We go see the person as our friend, instead of our enemy.—Read Proverbs 27:5, 6; Gal. 4:16.
it-2 491 ¶3
Neighbor
E good to trust our friends and call them when we need help, and the book of Proverbs advice say: “No leave your friend or your papa friend, and no enter your brother house when you get problem; Neighbor [sha·khenʹ] wey dey near better pass brother wey dey far.” (Pr 27:10) The person wey write this proverbs de try to talk say, e good to value our friend and to run go meet-am if we need help, instead of to meet our brother wey de stay where far. The reason na say that brother fit no ready or even get the chance to help us like that friend.
Young People—How Una Fit Make Una Life Better?
7 One lesson wey we learn from the bad decision wey Jehoash make be say we need to choose friends wey go help us love Jehovah. To fit get this kind friend, no be only people wey be our age we go make friends with. Remember say Jehoiada wey help Jehoash worship Jehovah well when e dey young senior Jehoash well-well. To know if na better friends you get, ask yourself this questions: ‘Them de help me make my faith strong more-more? Them de help me to fit follow wetin Bible talk? Them de talk about Jehovah and the things wey we de learn from Bible? Them de follow wetin Bible talk? Them go fit correct me when I make mistake or na wetin I like to hear them de tell me?’ (Prov. 27:5, 6, 17) The truth be say, if your friends no de worship Jehovah, you no need them. But if your friends de worship Jehovah and love-am well-well, make you hold them tight, because them go always help you.—Prov. 13:20.
Fine-Fine Things Wey You See for Bible
w06 9/15 19 ¶12
Lessons From the Book of Proverbs
27:21. We fit know the kind of person wey we be when them praise us. We de show say we dey humble when them praise us if we de remember say, na Jehovah give us the power to fit do the things wey we de do and move us to continue to serve-am. If we start to think say we better pass other people because them praise us, this one go show say we no dey humble.
AUGUST 25-31
FINE-FINE LESSON FROM BIBLE PROVERBS 28
How Wicked Person Take Dey Different From Righteous Person?
w93 5/15 26 ¶2
You De Follow Jehovah Well?
“RIGHTEOUS people dey like lion wey no de fear.” (Proverbs 28:1) Them de show say them get faith, them trust God Word, and them de use all their heart do Jehovah work no matter the problem wey them de face.
it-2 1139 ¶3
Know Wetin Go Happen
People wey no de do wetin God talk. People wey de do bad thing no de feel say them need to think about how God de feel about their decisions and the things wey them plan to do. (Job 34:27) This kind people don allow their heart to deceive them and them no de think well again. (Ps 36:1-4) Even if e de claim say e de worship God, na wetin people talk e like to do pass wetin God talk. (Isa 29:13, 14) E no de see the things wey e de do say them bad; them be like game for-am (Pr 10:23) and this one don make-am spoil imself, e de fight-fight, e no de think well again, sotey e don start to think say the God wey dey heaven no de see or know the bad things wey e de do. This kind person de think say God no get power again to know wetin we de do. (Ps 94:4-10; Isa 29:15, 16; Jer 10:21) From the way e de live im life, e de talk say Jehovah no dey (Ps 14:1-3) and e no de think about God at all. Because e no de allow the advice from Bible to direct-am, e no go fit judge matter well, e no go de see things for clear way, check how the matter really be, and make better decision.—Pr 28:5.
it-1 1211 ¶4
Serve Jehovah With Complete Heart
Na only when person get strong faith and trust for Jehovah and say E get the power to save-am, the person go fit continue to hold God tight, no be by im own power. (Ps 25:21) God promise say e go protect and direct the “people wey hold-am tight.” (Pr 2:6-8; 10:29; Ps 41:12) Because them de always think about how to make Jehovah happy, their life de better, and this one de help them fit do the things wey them plan. (Ps 26:1-3; Pr 11:5; 28:18) As Job talk, na true say the people wey get clean heart go suffer because of say na wicked people de rule, and them fit die with wicked people. But Jehovah talk say e de see the life of this people, and say them get better future, and them go get good things for life. (Job 9:20-22; Ps 37:18, 19, 37; 84:11; Pr 28:10) As e be for Job, na when person serve God with complete heart im life de better and e de get respect, no be when e get money. (Pr 19:1; 28:6) Children wey get this kind papa and mama go dey happy (Pr 20:7), them go get better name because of the better way wey their papa live im life, and people go respect them.
Fine-Fine Things Wey You See for Bible
w01 12/1 11 ¶3
You Fit Protect Your Friendship With Jehovah
No Over Trust Yourself. Many people wey don get heart attack be de think say nothing de do them for body before their heart fail them. Many times, them no de gree go check their body or them de even laugh and think say need no dey to go for checkup. Na so e still be for some people wey don be Christian for some time, them de feel say nothing go happen to them. Them fit de think say no need to de check how their friendship with Jehovah be, until problem go come. E dey important to remember the better advice wey apostle Paul give about why e good make we no de over trust ourself. E talk say: “Make the person wey think say e de stand dey careful make e no fall.” So e go make sense make we know say we no dey perfect and make we de check our friendship with Jehovah everytime.—1 Corinthians 10:12; Proverbs 28:14.