Senesi

41 Hili ki ai taʼu ʼe lua, neʼe moemisi+ ia Falaone neʼe tuʼu ʼi te kauvai ʼo te Vai Tafe ʼo Nile. 2 Pea neʼe hake ake mai te vai tafe te ʼu pipi fafine ʼe fitu, neʼe matalelei mo sisino, neʼe natou kai te luna ʼae ʼi te kauvai ʼo te Nile.+ 3 Neʼe muli mai ia natou ʼaia te tahi ʼu pipi fafine ʼe fitu, neʼe matakokovi mo sino kokovi, pea neʼe natou toe hake ake mai te Nile. Neʼe natou tutuʼu ʼi te kauvai ʼo te Nile ia tafa ʼo te ʼu pipi fafine ʼae neʼe sisino. 4 Neʼe kamata kai leva e te ʼu pipi fafine ʼae neʼe matakokovi mo sino kokovi te ʼu pipi fafine ʼe fitu ʼae neʼe matalelei mo sisino. Pea neʼe ʼala leva ia Falaone.

5 Neʼe toe alu leva ʼo moe pea neʼe ina toe fai tana moemisi. Neʼe sio ki he kauʼi fulumeto neʼe ʼi ai ʼona vaʼa ʼe fitu pea neʼe matalelei mo fua lalahi ʼona fua.+ 6 Hili ʼaia, neʼe homo ake te ʼu vaʼa ʼe fitu ʼi he tahi age kauʼi fulumeto pea neʼe fua liliki mo moamoa ʼona fua ʼuhi ko te matagi ʼo te potu esite. 7 Pea neʼe kamata folo e te ʼu vaʼa fulumeto ʼae neʼe fua liliki ʼona fua ia te ʼu vaʼa fulumeto ʼae neʼe matalelei mo fua lalahi ʼona fua. Neʼe ʼala leva ia Falaone pea neʼe ina iloʼi neʼe ko he moemisi pe ia.

8 Kae ʼi te ʼaho ake, neʼe hoha ia Falaone. Neʼe ina fekauʼi ai ke ʼomai te kau pelepitelo fuli ʼae ʼe gaohi meʼa fakamanamana pea mo te kau tagata popoto fuli ʼo Esipito. Neʼe fakamatala age e Falaone ʼana moemisi kia natou kae neʼe mole he tahi neʼe feala ke ina fakamahino age kia Falaone.

9 Neʼe palalau leva te pule ʼo te ʼu tagata pule ʼo te vino kia Falaone, ʼo ina ui: “ ʼE au manatuʼi ʼi te ʼaho nei ʼaku agahala. 10 Siʼi Falaone, neʼe ke ita ki ʼau tagata faifekau. Koia, neʼe ke fakatotonu ai ke tuku ia au pea mo te pule ʼo te kau taʼo pane ki te fale pilisoni, ʼae neʼe takitaki e te pule ʼo te kau leʼo.+ 11 Hili ʼaia, neʼe ma tahi fai tana moemisi ʼi te po pe ʼe tahi. Pea neʼe ʼi ai te fakaʼuhiga ʼo ʼama moemisi.+ 12 Neʼe fakatahi mo maua he tupulaga Hepeleo, neʼe ko he tagata faifekau ʼa te pule ʼo te kau leʼo.+ ʼI tamā tahi fakamatala age kia ia ʼama moemisi,+ neʼe ina fakaha mai tona fakaʼuhiga. 13 Pea neʼe hoko moʼoni te ʼu meʼa fuli ʼae neʼe ina fakamahino mai. Neʼe toe fakanofo au ki toku tuʼulaga kae neʼe tautau te pule ʼo te kau taʼo pane ki he pou.”+

14 Koia, neʼe fekauʼi ai e Falaone ke kumi mai ia Sosefo,+ pea neʼe fakamavae fakavilivili ai ia ia mai te fale pilisoni.*+ Neʼe ina tele ʼona kava,* mo fetogi ʼona mutuʼi meʼa pea neʼe alu leva kia muʼa ʼo Falaone. 15 Neʼe ui leva e Falaone kia Sosefo: “Neʼe au fai taku moemisi, kae neʼe mole feala ke fakamahino mai e he tahi. Pea neʼe ui mai, ʼe feala ke ke fakamahino he moemisi ʼa he tahi moka ina fakamatala atu.”+ 16 Neʼe tali age e Sosefo kia Falaone: “Siʼi Falaone, ʼe mole ko au ia! Kae ʼe ko te ʼAtua ʼae ka ina fakaha atu he logo lelei.”+

17 Neʼe ui e Falaone kia Sosefo: “Neʼe au moemisi neʼe au tuʼu ʼi te kauvai ʼo te Vai Tafe ʼo Nile. 18 Neʼe hake ake mai te Nile te ʼu pipi fafine ʼe fitu, neʼe matalelei mo sisino, pea neʼe natou kai te luna ʼae ʼi te kauvai ʼo te Nile.+ 19 Neʼe muli mai ia natou ʼaia te tahi ʼu pipi fafine ʼe fitu, neʼe vaivavai, mo matakokovi ʼosi pea mo sino kokovi. Neʼe heʼeki au sio ki he ʼu pipi fafine matakokovi feia ʼi te fenua katoa ʼo Esipito. 20 Pea neʼe kai e te ʼu pipi fafine ʼae neʼe sino kokovi mo matakokovi te ʼu pipi fafine ʼe fitu ʼae neʼe sisino. 21 Kae hili ʼaia, neʼe mole feala ke iloʼi e he tahi neʼe natou kai te ʼu pipi fafine ʼaia, koteʼuhi neʼe kei natou sino kokovi pe pea mo matakokovi. Pea neʼe au ʼala ai leva.

22 “Hili ʼaia, neʼe au sio ʼi taku tahi moemisi ki he kauʼi fulumeto neʼe ʼi ai ʼona vaʼa ʼe fitu pea neʼe matalelei mo fua lalahi ʼona fua.+ 23 Hili ʼaia, neʼe homo ake te ʼu vaʼa ʼe fitu ʼi he tahi age kauʼi fulumeto pea neʼe fua liliki mo moamoa ʼona fua ʼuhi ko te matagi ʼo te potu esite. 24 Pea neʼe kamata folo e te ʼu vaʼa fulumeto ʼae neʼe fua liliki ʼona fua ia te ʼu vaʼa fulumeto ʼe fitu ʼae neʼe matalelei ʼona fua. Koia, neʼe au fakamatala ki te kau pelepitelo ʼae ʼe gaohi meʼa fakamanamana,+ kae neʼe mole feala ke fakamahino mai e he tahi.”+

25 Neʼe ui leva e Sosefo kia Falaone: “Siʼi Falaone, ʼe fakaʼuhiga ʼau moemisi ki he meʼa pe ʼe tahi. Neʼe fakaha atu e te ʼAtua moʼoni te meʼa ʼae ka Ina fai anai.+ 26 Ko te ʼu pipi fafine ʼe fitu ʼae ʼe lelei ʼe ko taʼu ʼe fitu. ʼO toe feia pe, ko te ʼu vaʼa fulumeto ʼe fitu ʼae ʼe lelei ʼona fua ʼe ko taʼu ʼe fitu. ʼE fakaʼuhiga te ʼu moemisi ʼaia ki he meʼa pe ʼe tahi. 27 Ko te ʼu pipi fafine ʼe fitu ʼae neʼe sino kokovi mo matakokovi pea neʼe muli mai ia natou, ʼe ko taʼu ʼaia ʼe fitu. Pea ko te ʼu vaʼa fulumeto ʼe fitu ʼae neʼe mole hona fua neʼe moamoa ʼuhi ko te matagi ʼo te potu esite, ʼe fakaʼuhiga kia taʼu hoge ʼe fitu. 28 Koia Falaone, ʼe hage pe ko te meʼa ʼae neʼe au tala atu: Neʼe fakaha atu e te ʼAtua moʼoni te meʼa ʼae ka Ina fai anai.

29 “ ʼE ʼi ai anai taʼu ʼe fitu ka mahu ai te meʼa kai ʼi te fenua katoa ʼo Esipito. 30 Kae ʼe hoa mai anai ki ai te ʼu taʼu hoge ʼe fitu, pea ʼe galoʼi moʼoni anai te mahu ʼaia ʼo te meʼa kai ʼi te fenua ʼo Esipito, pea ʼe maumauʼi anai te fenua ʼuhi ko te hoge.+ 31 Pea ʼe mole toe manatuʼi anai te mahu ʼaia ʼo te meʼa kai ʼae neʼe hoko ʼi muʼa atu ʼi te fenua, he ʼe kovi ʼaupito anai te hoge. 32 Neʼe fakaha tuʼa lua atu te moemisi ʼaia kia koe Falaone, koteʼuhi kua ʼosi fakatuʼutuʼu e te ʼAtua moʼoni ke ina fakahoko te faʼahi ʼaia, pea kua ina vave fakahoko pe anai.

33 “Koia, ʼi te ʼaho nei Falaone, ke ke kumi he tagata ʼe poto pea ke fakanofo ia ia ke tokaga ki te fenua ʼo Esipito. 34 Pea ke ke hinoʼi he kau takitaki ʼi te fenua, ʼae ka natou tanaki te vahe tahi ki te nima ʼo te ʼu meʼa ʼae ka fua ʼi Esipito lolotoga te ʼu taʼu ʼe fitu ʼae ʼe mahu ai te meʼa kai.+ 35 Pea ke natou tanaki te ʼu meʼa kai fuli ʼaia lolotoga te ʼu taʼu lelei ʼaeni ka hoko mai, pea ke natou tanaki te fulumeto* ʼaia ki ʼou fale tanakiʼaga meʼa ʼae ʼe tuʼu ʼi te ʼu kolo.+ 36 Koia, ʼe maʼu anai ʼi Esipito he meʼa kai lolotoga te ʼu taʼu hoge ʼe fitu ʼae ka hoko anai ʼi te fenua, ke mole mamate ai te hahaʼi mo te faga manu ʼuhi ko te hoge.”+

37 Neʼe leleiʼia e Falaone mo ʼana hahaʼi faifekau fuli ia te manatu ʼaia. 38 Koia, neʼe ui e Falaone ki ʼana hahaʼi faifekau: “ ʼE tou toe maʼu anai koa he tahi age tagata ʼe ina maʼu te laumalie ʼo te ʼAtua, ohage ko ia ʼaeni?” 39 Pea neʼe ui age e Falaone kia Sosefo: “Neʼe fakaha atu e te ʼAtua te ʼu meʼa fuli ʼaeni, koia, ʼe mole he tahi age tagata ʼe poto ohage ko koe. 40 ʼE ke tokaga anai ki toku loto fale, pea ʼe fakalogo katoa anai taku hahaʼi fuli kia koe.+ ʼE au lahi age pe anai ia koe ʼuhi ko toku ʼuhiga hau.” 41 Neʼe toe ui e Falaone: “Koʼeni ʼe au fakanofo koe ke ke pule ki te fenua katoa ʼo Esipito.”+ 42 Pea neʼe toʼo leva e Falaone tona mama fakailoga ʼae ʼi tona kauʼi tuhi* ʼo ʼai ki te kauʼi tuhi* ʼo Sosefo, mo ina fakatui ki ai he ʼu kofu lino,* pea mo fakatau he kahoa aulo ki tona kia. 43 Tahi ʼae meʼa, neʼe ina fakaheka ia ia ki tana lua saliote, pea neʼe kalaga te hahaʼi ʼi ʼona muʼa: “Aveleke!”* Koia, neʼe ina fakanofo ai ia ia ke pule ki te fenua katoa ʼo Esipito.

44 Pea neʼe ui e Falaone kia Sosefo: “Logo la ko au ia Falaone, kae ʼe mole feala anai ke fai e he tahi he meʼa* ʼi te fenua katoa ʼo Esipito kae ’e heʼeki ke fakagafua age.”+ 45 Hili ʼaia, neʼe foaki e Falaone kia Sosefo te higoa ʼae ko Safinati-paneasi pea neʼe ina toe foaki foki ia Asenate,+ te ʼofafine ʼo Potifela, te pelepitelo ʼo Oni* ke ʼohoana mo ia. Pea neʼe tokaga leva ia Sosefo ki* te fenua ʼo Esipito.+ 46 Neʼe taʼu 30 ia Sosefo+ ʼi te temi ʼae neʼe kamata gaue ai maʼa Falaone, te hau ʼo Esipito.

Neʼe mavae leva ia Sosefo mai ia Falaone pea neʼe fealuʼaki ʼi te fenua katoa ʼo Esipito. 47 Pea neʼe lahi ʼaupito te ʼu meʼa ʼae neʼe fua ʼi te fenua lolotoga te ʼu taʼu ʼe fitu ʼae neʼe mahu ai te meʼa kai. 48 Pea neʼe ina tanaki ʼi te ʼu kolo te ʼu meʼa kai fuli ʼae neʼe maʼu ʼi te fenua ʼo Esipito lolotoga te ʼu taʼu ʼaia ʼe fitu. Neʼe ina tanaki ʼi te ʼu kolo takitahi ia te meʼa kai ʼae neʼe maʼu ʼi te ʼu gaueʼaga ʼi ʼonatou tafaʼaki. 49 Neʼe lahi ʼaupito te fulumeto ʼae neʼe tanaki e Sosefo, ohage pe ko te ʼone ʼo te tai. Pea neʼe mole kei natou malau te fulumeto he neʼe kua lahi ʼaupito.

50 ʼI muʼa ʼo te hoko mai ʼo te hoge, neʼe maʼu e Sosefo mo Asenate, te ʼofafine ʼo Potifela, te pelepitelo ʼo Oni* ʼanā tama ʼe lua.+ 51 Neʼe fakahigoaʼi e Sosefo tona ʼuluaki foha ko Manase,*+ he neʼe ina ui: “Neʼe tokoni mai te ʼAtua ke au galoʼi ʼoku mamahi fuli pea ke mole au manatu ki te loto fale katoa ʼo taku tamai.” 52 Pea neʼe ina fakahigoaʼi tona lua foha ko Efalaimi,*+ he neʼe ina ui: “Neʼe foaki mai e te ʼAtua ʼaku fanau ʼi te fenua ʼo toku mamahi.”+

53 Neʼe ʼosi leva te ʼu taʼu ʼe fitu ʼae neʼe mahu ai te meʼa kai ʼi te fenua ʼo Esipito,+ 54 kae neʼe kamata leva te ʼu taʼu hoge ʼe fitu, ohage pe ko tona tala e Sosefo.+ Neʼe to te hoge ʼi te ʼu fenua fuli, kae neʼe maʼu pe te pane* ʼi te fenua katoa ʼo Esipito.+ 55 Kae ki muli age, neʼe to leva te hoge ʼi te fenua katoa ʼo Esipito, pea neʼe tagi te hahaʼi kia Falaone ke foaki age hanatou pane.+ Pea neʼe ui e Falaone ki te kau Esipito fuli: “Kotou olo kia Sosefo, pea kotou fai te ʼu meʼa fuli ʼae ka ina ui atu.”+ 56 Pea neʼe hoko atu pe te hoge ʼi te kele katoa.+ Neʼe kovi ʼaupito te hoge ʼi te fenua ʼo Esipito. Koia, neʼe avahi leva e Sosefo te ʼu fale tanakiʼaga meʼa kai fuli pea neʼe ina fakatau ai te meʼa kai ki te kau Esipito.+ 57 Tahi ʼae meʼa, neʼe ʼomai te hahaʼi ʼo te kele katoa ki Esipito ke natou totogi kia Sosefo hanatou meʼa kai, he neʼe kovi ʼaupito te hoge ʼi te kele katoa.+