Sopo

 2 “Ka na neʼe au toe liliu la ki te ʼu mahina kua hili,

Ki te ʼu ʼaho ʼae neʼe tokaga ai te ʼAtua kia au,

 3 ʼI tana fakamu tona malama ki toku ʼulu,

ʼI tana taki au ʼi te fakapoʼuli ʼaki tona malama,+

 4 ʼI te temi ʼae neʼe kei au malohi ai,

Mo te iloga ʼo taku fakakaumeʼa mo te ʼAtua ʼi toku fale la,+

 5 ʼI te kei nofo ʼa te Mafimafi mo au,

ʼI te kei nonofo ʼo ʼaku fanau* ʼi ʼoku tafa,

 6 ʼI te temi ʼae neʼe lahi ʼaupito ai te potilo,

Pea mo hali mai ʼi te ʼu fuʼu maka he lolo.+

 7 Ka au alu ki te matapa ʼo te kolo,+

Mo heka ʼi toku hekaʼaga ʼi te malaʼe lahi,+

 8 Neʼe mavae kehe* te kau tupulaga ʼi tanatou sisio mai,

Maʼia mo te kau matuʼa neʼe natou tutuʼu ki ʼoluga.+

 9 Neʼe mole palalau te kau ʼaliki,

Neʼe natou pupunu ʼonatou gutu ʼaki ʼonatou nima.

10 Neʼe fakalogologo mo te hahaʼi maʼuhiga,

Neʼe mate noa ʼonatou ʼalelo.

11 Neʼe vikiʼi au e te tagata fuli neʼe fagono mai,

ʼO toe feia pe mo natou ʼae neʼe sisio kia au, neʼe natou fakamoʼoni mai kia au.

12 He neʼe au haofaki te masiva ʼae neʼe kole tokoni,+

ʼO toe feia pe mo te fanau hala mo tamai pea mo ia ʼae neʼe mole he tahi ke tokoni ki ai.+

13 Ko ia ʼae ka mate neʼe ina tapuakiʼi au,+

Pea neʼe au fakafiafiaʼi te loto ʼo te fafine vitua.+

14 Neʼe au kofuʼi te faitotonu ohage ko he teu,

Neʼe hage taku faitotonu ko he kofu* mo he kie neʼe takai ʼaki toku ʼulu.

15 Neʼe au liliu ko he ʼu mata maʼa te tagata kivi,

Mo he ʼu vaʼe maʼa te tagata ketu.

16 Neʼe au liliu ko te tamai ʼa te masiva,+

Neʼe au sivi te fakamau ʼo ni hahaʼi neʼe mole au iloʼi.+

17 Neʼe au maumauʼi te kaugao ʼo te tagata agakovi,+

Pea neʼe au taʼaki mai tona gutu te meʼa ʼae neʼe ina kai.

18 Neʼe au ui: ‘ ʼE au mate anai ʼi toku ʼapi,+

Pea ʼe hage anai ʼoku ʼaho ko te lahi ʼo te ʼu fisiʼi ʼone.

19 ʼE alu anai ʼoku aka ʼo kaku ki te vai,

Pea ʼi te poʼuli ʼe nofo anai te hahau ʼi ʼoku vaʼa.

20 ʼE fakafoʼou tuʼumaʼu toku kololia,

Pea ʼe au fana tuʼumaʼu anai ni kauʼi nahau ʼaki te nahau ʼae ʼe au puke.’

21 Neʼe fakalogo lelei mai te hahaʼi,

Pea neʼe natou atalitali fakalogologo ki ʼaku tokoni.+

22 Ka ʼosi taku palalau, neʼe mole toe tali mai e he tahi,

Neʼe logo lelei ʼaku palalau ki ʼonatou taliga.

23 Neʼe natou atalitali mai kia au ohage ko tanatou atalitali ki te ʼua,

Neʼe natou avahi lahi ʼonatou gutu ʼo inu ʼaku palalau ohage ko te ʼua ʼo te temi mātala ʼo te ʼu fisiʼi ʼakau.+

24 Ka au malimali kia natou, neʼe natou punamaʼuli,

Neʼe natou fimalie ʼi tanatou sisio ki taku matafiafia.*

25 Neʼe au hage ko he pule, ʼo au fakahinohino age te ala ʼae ke natou haʼele ai,

Pea neʼe au maʼuli ohage ko he hau ʼi te lotolotoiga ʼo tana kautau,+

Ohage ko he tahi ʼe ina fakafimalieʼi te kau putu.+