Selemia
11 Koʼeni te folafola ʼa Sehova kia Selemia. Neʼe ina ui age: 2 “Ke fagono te hahaʼi fuli ki te ʼu kupu ʼo te fuakava ʼaeni!
“Ke ke* fakaha ki te ʼu tagata ʼo Suta pea mo te hahaʼi ʼo Selusalemi. 3 Tala age kia natou: ‘Koʼeni te folafola ʼa Sehova, te ʼAtua ʼo Iselaele: “Malaʼia ki te tagata ʼae ʼe mole fakalogo ki te ʼu kupu ʼo te fuakava ʼaeni,+ 4 ʼae neʼe au fakatotonu ki ʼakotou kui ke natou fakaʼapaʼapa ki ai ʼi te ʼaho ʼae neʼe au fakamavae ai natou mai Esipito,+ mai te gutuʼumu haka ukamea.+ Neʼe au ui age kia natou: ‘Kotou fakalogo mai kia te au mo fai te meʼa ʼae ʼe au fakatotonu atu. Pea ʼe kotou liliu anai ko taku hahaʼi, pea ʼe au liliu anai ko tokotou ʼAtua,+ 5 ke au fakahoko ai te fakapapau ʼae neʼe au fai ki ʼakotou kui. Neʼe au fakapapau ʼe natou nonofo anai ʼi te fenua ʼae ʼe tafe ai te huʼa pipi mo te meli.+ ʼE mole koia koa la ʼae ʼe hoko ʼi te ʼaho nei?’ ” ’ ”
Pea neʼe au tali leva: “Sehova e, Ameni!”*
6 Pea neʼe toe ui mai e Sehova: “Kalaga ʼi te ʼu kolo ʼo Suta pea ʼi te ʼu ala ʼo Selusalemi te ʼu folafola fuli ʼaeni: ‘Kotou fakalogo ki te ʼu kupu ʼo te fuakava ʼaia, pea kotou maʼuliʼi. 7 Talu mai te ʼaho ʼae neʼe au fakamavae ai ʼakotou kui mai Esipito ʼo kaku mai ki te ʼaho nei, neʼe au fakatokagaʼi natou. Neʼe au faiga tuʼumaʼu pe ke au fakalotoʼi natou, ʼo ui age: “Kotou fakalogo mai kia te au.”+ 8 Kae neʼe mole natou fakalogo peʼe tokaga mai. Neʼe natou uigataʼa pe mo mulimuli ki ʼonatou holi kovi.+ Koia neʼe au fakahoko ai kia natou ia meʼa fuli ʼae neʼe tohi ʼi te fuakava ʼae neʼe au fakatotonu ke natou fakaʼapaʼapa ki ai, pea neʼe mole natou fia maʼuliʼi.’ ”
9 Pea neʼe ui mai e Sehova: “Neʼe logo tahi te ʼu tagata ʼo Suta pea mo te hahaʼi ʼo Selusalemi ke natou agatuʼu kia te au. 10 Neʼe natou toe fai pe te ʼu hala ʼae neʼe fai e ʼanatou kui ʼi te temi muʼa, ʼi tanatou mole fia fakalogo ki ʼaku folafola.+ Neʼe natou toe fakalogo mo tauhi ki ʼihi ʼatua.+ Neʼe maumauʼi e te hahaʼi ʼo Iselaele mo te hahaʼi ʼo Suta te fuakava ʼae neʼe au fai mo ʼanatou kui.+ 11 Koia koʼeni te folafola ʼa Sehova: ‘ ʼE au fakato anai he malaʼia kia natou+ pea ʼe mole hao anai he tahi. Ka natou kole tokoni mai, ʼe mole au fakalogo anai.+ 12 ʼE haga anai te ʼu kolo ʼo Suta pea mo te hahaʼi ʼo Selusalemi ki te ʼu ʼatua ʼae ʼe natou momoli ki ai ni sakilifisio, pea ʼe natou kole tokoni anai kia natou.+ Kae ʼe mole feala tuʼa tahi anai ki te ʼu ʼatua ʼaia ke natou haofaki natou ʼi te temi mamahi. 13 Suta, kua kaugamalie ʼou ʼatua ohage pe ko te lahi ʼo ʼou kolo. Pea ohage pe ko te lahi ʼo te ʼu ala ʼi Selusalemi, kua lahi mo te ʼu ʼaletale ʼae neʼe ke laga ki te meʼa fakaufiufi,* te ʼu ʼaletale moʼo momoli ni sakilifisio kia Paale.’+
14 “Kae kia koe,* ʼaua naʼa ke hufakiʼi te hahaʼi ʼaeni. ʼAua naʼa ke kole tokoni mai peʼe ke faikole ʼo ʼuhiga mo natou,+ he ʼe mole au fakalogo anai moka natou lauga ʼo ʼuhiga mo tonatou malaʼia.
15 Kotea koa ʼae ʼe fai e taku hahaʼi ʼofaina ʼi toku fale,
Kae kaugamalie ia natou ʼae ʼe natou fakahoko ni fakatuʼutuʼu kovi?
ʼE feala anai koa ke natou taʼofi te malaʼia ʼae ka to kia koe* ʼaki tanatou momoli te kanoʼi manu taputapu?*
ʼE ke fiafia ai anai koa?
16 Fuʼu oliveto malohi, fuʼu ʼakau taulekaleka mo fua matalelei,
Neʼe feia tou fakahigoaʼi ʼi te temi muʼa e Sehova.
Neʼe ina tutu te fuʼu ʼakau ʼi he gugulu malohi,
Pea neʼe fasifasiʼi ʼona vaʼa.
17 “Hahaʼi ʼo Suta, ko Sehova ʼo te ʼatu kautau ʼae neʼe Ina to+ ia koe, neʼe ina tala ʼe hoko anai he malaʼia kia koe, ʼuhi ko te kovi ʼae neʼe ke fai, ia koe pea mo te hahaʼi ʼo Iselaele, ʼi takotou fakamamahiʼi au ʼi takotou momoli ni sakilifisio kia Paale.”+
18 Sehova e, neʼe ke fakaha mai ke au iloʼi.
ʼI te temi ʼaia neʼe ke fakaha mai te meʼa ʼae neʼe natou fai.
19 Neʼe au hage ko he ovi ʼe ʼave ʼo tamateʼi.
Neʼe mole au iloʼi au ʼe natou fonofono ʼo ʼuhiga mo au:+
“Tou tuʼusi te fuʼu ʼakau mo ʼona fua,
Pea tou molehi ia ia ʼi te fenua ʼo te kau maʼuli
Ke mole toe manatuʼi tona higoa.”
20 Kae ko Sehova ʼo te ʼatu kautau ʼe faifakamau ʼi te faitotonu.
ʼE ina sivisivi te loto pea mo te ʼu manatu loloto.+
Fakagafua mai ke au sio ki tau lagavaka kia natou,
He ʼe ko koe ʼae ka ke fakamauʼi au.
21 Koia koʼeni te folafola ʼa Sehova ʼo ʼuhiga mo te ʼu tagata ʼo Anatote,+ ʼae ʼe natou kumi ke natou matehi koe pea mo ui: “ ʼAua naʼa ke faifakakikite ʼi te huafa ʼo Sehova,+ naʼa matou matehi anai koe.” 22 Koʼeni te folafola ʼa Sehova ʼo te ʼatu kautau: “ ʼE au fakamauʼi anai natou. ʼE mamate anai te kau tupulaga ʼi te heleta,+ pea ʼe mamate anai ʼonatou foha mo ʼonatou ʼofafine ʼi te hoge.+ 23 ʼE au fakahoko anai he malaʼia ki te ʼu tagata ʼo Anatote+ pea ʼe mole hao anai he tahi, ʼi te taʼu ʼae ka au fakamauʼi ai natou.”