Selemia
12 Sehova e, ʼe ke faitotonu+ moka ʼe au lauga atu,
Moka ʼe au faipalalau mo koe ki te faitotonu.
Kae he koʼe ʼe fua lelei ia meʼa fuli ʼae ʼe fai e te kau agakovi?+
Pea he koʼe ʼe mole fihifihia ia natou ʼae ʼe agakaka?
2 Neʼe ke to ia natou pea neʼe natou tauaka.
Neʼe natou homo ake ʼo fua.
ʼE natou palalau tuʼumaʼu kia koe kae ʼe mamaʼo ʼonatou ia loto.+
3 Sehova e, ʼe ke iloʼi lelei ia au+ pea ʼe ke sio mai.
Neʼe ke sivisivi toku loto pea neʼe ke tokagaʼi ʼe au logo tahi mo koe.+
Tuku keheʼi te kau agakovi ohage ko ni ovi ka tamateʼi,
Pea mo tuku keheʼi ki te ʼaho ʼo te mātea.
4 ʼE kaku ki ʼafea te mamahi ʼo te fenua
Pea mo te moamoa ʼo te ʼulu vao fuli?+
Kua mamate te ʼu manu ʼo te vao pea mo te ʼu manulele
ʼUhi ko te agakovi ʼo ʼona hahaʼi.
Neʼe natou ui: “ ʼE mole sio ia ki te meʼa ʼae ka hoko kia tatou.”
5 Kapau ʼe ke gaʼegaʼe ʼi te lele mo ni tagata ʼe haʼele lalo,
ʼE feafeaʼi age la hau fakataupiepie mo ni hosi?+
ʼE ke lotofalala ʼi he fenua tokalelei,
Kae ʼe feafeaʼi age la hau hao ʼi ni vao ʼakau matolu ʼe homo ʼi te vaʼe Solotane?
6 ʼE mahino ia, ko ʼou tehina, te famili ʼo tau tamai,
Mo natou neʼe natou kakaʼi ia koe.+
Neʼe natou kalaga malohi kia koe.
ʼAua naʼa ke falala kia natou,
Tatau aipe pe ʼe natou fai atu ni palalau lelei.
7 “Neʼe au siʼaki toku ʼapi+ pea mo toku tofiʼa.+
Neʼe au tuku toku ʼofaina ki te ʼu nima ʼo ʼona fili.+
8 ʼE hage toku tofiʼa ko he laione ʼi te vao matuʼa.
Neʼe gugulu ia kia au.
Koia neʼe au fehiʼa ai leva ki ai.
9 ʼE hage toku tofiʼa ko he akuila ʼe lanu kehekehe.
ʼE ʼa takai e te ʼu manulele ʼae pea ʼe natou ʼohofi.+
Kotou fakatahi fuli ʼu manu ʼo te vao,
Kotou ʼomai ʼo kakai.+
10 Neʼe kaugamalie te ʼu tauhi ovi ʼae neʼe natou maumauʼi taku gaueʼaga vite,+
Neʼe natou malamalaki taku gaueʼaga.+
Neʼe natou fakaliliu taku gaueʼaga matalelei ko he toafa pea neʼe tuʼu lavaki.
11 Kua liliu ia ʼo vaoa.
Kua maumau te fenua katoa,
Kae ʼe mole pe la tokagaʼi e he tahi.+
12 Neʼe tau mai te kau fakatupu maumau ʼi te ʼu ala foufou fuli ʼae ʼe haʼeleʼi ʼi te toafa,
He neʼe kai e te heleta ʼa Sehova te fenua mai te tahi potu ki te tahi potu.+
ʼE mole maʼuli tokalelei he tahi.
13 Neʼe natou nunusi te fulumeto kae neʼe natou utu ni ʼakau talatala.+
Neʼe natou gaue kinakina kae ʼe mole hona ʼuhiga.
ʼE natou ufiufi anai ʼi te fua ʼo ʼanatou gaue
ʼUhi ko te hauhau ʼo Sehova.”
14 Koʼeni te folafola ʼa Sehova: “Kae ko ʼoku vahaʼa fale agakovi fuli ʼae ʼe natou tauʼi te fenua ʼae neʼe au foaki ko he tofiʼa ki taku hahaʼi ko Iselaele,+ ʼe au taʼaki anai natou mai tonatou fenua+ pea ʼe au taʼaki anai te hahaʼi ʼo Suta mai ia natou. 15 Kae ʼi taku ʼosi taʼaki natou, ʼe au toe ʼofa anai kia natou mo toe fakaliliu natou ki tonatou fenua pea ki tonatou tofiʼa.”
16 “ ʼE natou maʼu anai honatou nofoʼaga ʼi taku hahaʼi, mo kapau ʼe natou tokakaga ʼo ako te ʼu faʼahiga maʼuli ʼo taku hahaʼi pea mo fakamoʼoni ʼi toku huafa ʼo natou ui: ‘ ʼE matou fakapapau ia muʼa ʼo Sehova, te ʼAtua maʼuli,’ ohage pe ko tanatou akoʼi ki taku hahaʼi ke natou fakapapau ʼaki ia Paale. 17 Kae kapau ʼe mole natou fia fakalogo, ʼe au toe taʼaki anai mo te puleʼaga ʼaia. ʼE au taʼaki anai mo pulihi,” ko te ui ʼaia ʼa Sehova.+