Selemia
30 Neʼe palalau ia Sehova kia Selemia, ʼo ina ui: 2 “Koʼeni te folafola ʼa Sehova, te ʼAtua ʼo Iselaele: ‘Tohi ki he tohi ia te ʼu meʼa fuli ʼae ʼe au fakaha atu. 3 ʼE ui e Sehova: “Fakalogo mai! ʼE au fakatahiʼi anai ʼi he ʼaho taku hahaʼi ʼae ʼe nofo popula, ia Iselaele pea mo Suta,”+ ko te ui ʼaia ʼa Sehova. “ ʼEi, ʼe au toe ʼaumai anai natou ki te fenua ʼae neʼe au foaki ki ʼanatou kui pea ʼe natou toe maʼu anai te fenua.” ’ ”+
4 Koʼeni te ʼu folafola ʼae neʼe ui e Sehova ki Iselaele pea mo Suta.
5 Koʼeni te folafola ʼa Sehova:
“Neʼe matou logo ki ni kalaga ʼa ni hahaʼi neʼe matataku.
ʼE natou matataku, ʼe mole ʼi ai te tokalelei.
6 Fakalelei ʼokotou loto, kae kotou kumikumi pe ʼe feala ke fanau he tagata.
He koʼe ʼe au sio ki te ʼu tagata malolohi fuli ʼe natou hili ʼonatou nima ki ʼonatou fatu
Ohage ko he fafine ʼe fanau?+
Pea he koʼe kua lau tetea ia te ʼu fofoga fuli?
7 ʼI fakaʼofaʼofa foki, he ʼe ko te ʼaho ʼaia ʼe ko he ʼaho fakamataku.+
ʼE mole hona fakatatau,
Ko he temi mamahi kia Sakopo.
Kae ʼe haofaki anai ia.”
8 “ ʼI te ʼaho ʼaia,” ko te ui ʼaia ʼa Sehova ʼo te ʼatu kautau, “ ʼe au fasiʼi anai te ʼakau ʼamo ʼae ʼe hili ʼi ʼonatou kia pea ʼe au motuhi anai ʼonatou haʼi. Pea ʼe mole toe fakakauganaʼi anai natou e te kau matapule. 9 ʼE natou tauhi anai kia Sehova tonatou ʼAtua pea mo Tavite, ia te hau ʼae ka au fakanofo anai kia natou.”+
10 “Pea ko koe taku tagata faifekau ko Sakopo, ʼaua naʼa ke mataku,” ko te ui ʼaia ʼa Sehova,
“Pea ʼaua naʼa ke mataku, Iselaele.+
ʼE au haofaki anai koe mai te potu mamaʼo ʼae ʼe ke nofo ai,
Pea ʼe au haofaki anai tou hakoga mai te fenua ʼae ʼe natou pilisoni ai.+
ʼE toe liliu mai anai ia Sakopo. ʼE maʼuli fimalie anai mo tokalelei,
ʼO mole tuʼania ki he tahi.”+
11 “ ʼE au nofo mo koe moʼou haofaki,” ko te ui ʼaia ʼa Sehova.
“ ʼE au pulihi anai ia te ʼu puleʼaga fuli ʼae neʼe au fakamavetevete ai koe.+
Kae ʼe mole au pulihi anai ia koe.+
ʼE au fakatonutonuʼi* anai ia koe ʼi te faitotonu,
Kae ʼe mole au tuku anai ke ke hao mai te tautea.”+
12 Koʼeni te folafola ʼa Sehova:
“ ʼE mole ʼi ai he faitoʼo ki tou mahaki,+
Pea ʼe mole toe mole ia tou mataʼi lavea.
13 ʼE mole lagolago atu he tahi,
ʼE mole ʼi ai he faitoʼo ki tou mataʼi papala.
Pea ʼe mole ʼi ai he puleʼaki moʼou fakamalolo.
14 Kua galoʼi koe e te ʼu tagata fuli ʼae ʼe laukau ia koe.+
ʼE mole kei natou kumi koe.
Neʼe au taʼi koe ohage pe ko tona fai e hou fili,+
Pea neʼe au tauteaʼi koe ohage pe ko tona fai e he tagata agakovi
ʼUhi ko te lahi ʼo tau agakovi mo ʼau agahala.+
15 He koʼe ʼe ke tagi ʼi tou mahaki?
ʼE mole he faitoʼo ki tou mamahi.
Neʼe au tauteaʼi koe
ʼUhi ko te lahi ʼo tau agakovi mo ʼau agahala.+
16 Kae ko natou fuli ʼae ʼe natou gaohi koviʼi koe, ʼe gaohi koviʼi anai natou,+
Pea ʼe toe ʼave popula anai ʼou fili fuli.+
Ko natou ʼae ʼe natou maumauʼi koe, ʼe maumauʼi anai,
Pea ʼe au tuku anai ke kaihaʼa ia natou fuli ʼae ʼe natou kaihaʼa ia koe.”+
17 “Kae ʼe au fakamalolo anai koe ʼo faitoʼo ʼou lavea,”+ ko te ui ʼaia ʼa Sehova,
“Tatau aipe pe neʼe fakahigoaʼi koe ko he fafine neʼe kapu
Peʼe ‘Sione ʼae ʼe mole tokagaʼi e he tahi.’ ”+
18 Koʼeni te folafola ʼa Sehova:
“ ʼE au toe liliu anai ki te ʼu fale la ʼo Sakopo ʼo fakatahiʼi te kau pilisoni,+
Pea ʼe au fakaʼofaʼofa anai ʼo toe laga ʼonatou nofoʼaga.
ʼE toe laga anai te kolo ʼi tona kiʼi moʼuga+
Pea ʼe fakatuʼu anai te tule malohi ʼi tona tuʼulaga ʼafeā.
19 ʼE logo anai mai ai ni hiva fakafetaʼi pea mo ni kata.+
ʼE au fakahahaʼi anai pea ʼe mole natou tokosiʼi anai.+
ʼE au fakaliliu anai natou ʼo kaugamalie,*
Pea ʼe mole meʼa noaʼi anai ia natou.+
20 ʼE maʼuli fiafia anai te ʼu foha ʼo Sakopo ohage ko te temi muʼa.
ʼE tuʼu malohi anai tana hahaʼi ʼi ʼoku muʼa.+
ʼE au tauteaʼi anai ia natou fuli ʼae ʼe natou gaohi koviʼi natou.+
21 Ko te tagata maʼuhiga ʼae ka takitaki ʼe haʼu anai mai tana hahaʼi,
Pea ko tona pule ʼe hifo anai mai tona hakoga.
ʼE au fakafealagia anai ke fakaovi mai pea ʼe fakaovi mai anai kia te au.”
“Ko ai ʼae ʼe lava fakaovi mai kia te au, gata pe kia ia ʼae neʼe au fakaafe?” ko te ui ʼaia ʼa Sehova.
22 “ ʼE kotou liliu anai ko taku hahaʼi+ pea ʼe au liliu anai ko tokotou ʼAtua.”+
23 Koʼeni, ʼe agi malohi anai te tuʼani matagi ʼae ʼe haʼu mai ia Sehova.+
ʼE to anai he afā ki te kau agakovi.
24 ʼE hoki malū ifo anai te hauhau ʼo Sehova
Moka ʼe ina fakahoko ʼana fakatuʼutuʼu.+
ʼE kotou mahino lelei anai ki ai ʼi te ʼu ʼaho fakamuli.+