Selemia

32 Neʼe palalau leva ia Sehova kia Selemia ʼi te 10 taʼu ʼo te pule ʼa te Hau ʼo Suta ko Setesiasi, neʼe ko te 18 taʼu ʼaia ʼo te pule ʼa Nepukanesa.+ 2 ʼI te temi ʼaia, neʼe ʼa takai ia Selusalemi e te foʼi tau ʼa te hau ʼo Papiloni pea neʼe pilisoniʼi te polofeta ko Selemia ʼi te Malaʼe ʼo Te Kau Leʼo,+ ʼi te fale ʼo te hau ʼo Suta. 3 ʼEi, neʼe pilisoniʼi ia ia e te Hau ʼo Suta ko Setesiasi+ pea neʼe ina ui age: “He koʼe ʼe ke fakakikite he ʼu meʼa feia? ʼE ke ui: ‘Koʼeni te folafola ʼa Sehova: “ ʼE au tuku anai te kolo ʼaeni ki te nima ʼo te hau ʼo Papiloni pea ʼe ina maʼu anai.+ 4 ʼE mole hao anai te Hau ʼo Suta ko Setesiasi mai te kau Kaletea he ʼe tuku moʼoni anai ia ia ki te hau ʼo Papiloni. ʼE nā faipalalau anai mo fesioʼaki.” ’+ 5 ‘ ʼE ina ʼave anai ia Setesiasi ki Papiloni pea ʼe nofo ai anai ia Setesiasi ʼo kaku ki taku tokaga ki ai. ʼE kotou fiu anai ʼi te tauʼi ʼo te kau Kaletea kae ʼe mole kotou malo anai,’ ko te ui ʼaia ʼa Sehova.”+

6 ʼI te temi ʼaia, neʼe ui leva e Selemia: “Neʼe palalau mai ia Sehova, ʼo ina ui: 7 ‘ ʼE haʼu anai kia koe ia Anamele, te foha ʼo Salume, te tehina ʼo tau tamai ʼo ui atu: “Totogi taku gaueʼaga ʼae ʼe tuʼu ʼi Anatote+ he ʼe ko koe ʼae ʼe tonu muʼa ke fai ki ai te kole.” ’ ”+

8 Ko Anamele, te foha ʼo te tehina ʼo taku tamai, neʼe haʼu kia au ʼi te Malaʼe ʼo Te Kau Leʼo ʼo ui mai, ohage pe ko tona fakaha mai e Sehova: “Fakalelei siʼou loto, totogi taku gaueʼaga ʼae ʼe tuʼu ʼi Anatote ʼi te fenua ʼo Pesamino, he ʼe ko koe ʼae ʼe tonu muʼa ke fai ki ai te kole pea ke ke maʼu. Ke ke totogi.” Neʼe au mahino ai leva neʼe ko te finegalo ʼaia ʼo Sehova.

9 Koia neʼe au totogi ai mai ia Anamele, te foha ʼo te tehina ʼo taku tamai ia tana gaueʼaga ʼae neʼe tuʼu ʼi Anatote. Pea neʼe au fua ia te paʼaga:+ neʼe ko sikele* ʼe 7 mo piesi siliva ʼe 10. 10 Neʼe au tohi leva te totogi ʼo te gaueʼaga ki he pepa fakamoʼoni,+ neʼe au fakamaʼu ʼaki te fakailoga, neʼe au pauʼi ni tagata fakamoʼoni+ pea neʼe au fua leva te paʼaga ʼae neʼe tonu ke au foaki. 11 Neʼe au toʼo ai te pepa fakamoʼoni (ʼae neʼe kua fakamaʼu ʼaki te fakailoga ʼo mulimuli ki te fakatotonu mo te lao, pea mo te pepa fakamoʼoni ʼae neʼe heʼeki fakamaʼu) 12 ʼo fakatoʼo age kia Paluke,+ foha ʼo Nelisa,+ foha ʼo Makesesa, ia muʼa ʼo Anamele, te foha ʼo te tehina ʼo taku tamai, mo te ʼu tagata fakamoʼoni ʼae neʼe natou tohi te pepa fakamoʼoni pea mo te kau Sutea fuli ʼae neʼe heheka ʼi te Malaʼe ʼo Te Kau Leʼo.+

13 Neʼe au fakatotonu leva kia Paluke ʼi ʼonatou muʼa: 14 “Koʼeni te folafola ʼa Sehova ʼo te ʼatu kautau, te ʼAtua ʼo Iselaele: ‘Toʼo te ʼu pepa ʼaeni, te pepa fakamoʼoni ʼae kua fakamaʼu pea mo ʼae ʼe heʼeki fakamaʼu, pea ke tuku ki he ipu kele ke tologa ʼo fualoa.’ 15 Koʼeni te folafola ʼa Sehova ʼo te ʼatu kautau, te ʼAtua ʼo Iselaele: ‘ ʼE toe totogi anai ni fale, mo ni gaueʼaga pea mo ni gaueʼaga vite ʼi te fenua ʼaeni.’ ”+

16 Hili taku fakatoʼo te pepa fakamoʼoni kia Paluke, foha ʼo Nelisa neʼe au faikole leva kia Sehova: 17 “Tuʼi ʼAliki ko Sehova, ko koe ʼae neʼe ke fakatupu te lagi mo te kele ʼaki tou malohi+ pea mo tou nima mafimafi. ʼE mole faigataʼa he meʼa kia te koe. 18 ʼE ke fakaha tou ʼofa agatonu ki he toko lauʼi afe kae ʼe ke tuku ke hoko ki te ʼu foha ia te ʼu nunuʼa ʼo te ʼu hala ʼae neʼe fai e ʼanatou tamai ʼi muʼa atu.+ Ko koe te ʼAtua moʼoni, te Maʼoluga mo te Mafimafi, pea ko tou huafa ko Sehova ʼo te ʼatu kautau. 19 ʼE taulekaleka ʼau fakatuʼutuʼu mo fakaofoofo ʼau gaue.+ ʼE ke sio kia meʼa fuli ʼe fai e te tagata+ ke ke foaki ai ki te takitokotahi ʼo mulimuli pe ki tana aga pea mo ʼana gaue.+ 20 Neʼe ke fakahoko ni fakailoga mo ni milakulo ʼi Esipito, pea ʼe kei manatuʼi pe ia ʼaho nei. Neʼe ke liliu ai ʼo logologona ʼi Iselaele pea mo te hahaʼi fuli,+ ohage pe ko te temi nei. 21 ʼEi, neʼe ke fakamavae mai Esipito ia tau hahaʼi ko Iselaele ʼaki ni fakailoga mo ni milakulo, ʼaki tou nima malohi mo tou mafimafi pea ʼaki he ʼu gaue fakamataku.+

22 “Neʼe ke foaki leva kia natou ia he fenua ʼe tafe ai te huʼa pipi mo te meli,+ te fenua ʼae neʼe ke fakapapau ʼe ke foaki anai ki ʼanatou kui.+ 23 Neʼe natou hu ai ki te fenua ʼo nofoʼi. Kae neʼe mole natou fakalogo kia te koe pea neʼe mole natou maʼuliʼi ia tau lao. Neʼe mole natou mulimuli pe la ki he fakatotonu neʼe ke fai age kia natou. Koia ʼae neʼe ke fakahoko ai kia natou ia te malaʼia ʼaeni.+ 24 Koʼeni, neʼe ʼomai ni tagata ʼo laga ni kaupa moʼo tauʼi te kolo ke natou maʼu.+ ʼE mahino ia, ʼe maʼu anai te kolo e te kau Kaletea ʼi tanatou ʼohofi pea ʼe to anai ʼi te tau,+ mo te hoge pea mo te ʼu taʼi mahaki.*+ Kua hoko te ʼu meʼa fuli ʼaia neʼe ke fakakikite ohage pe ko tau sio ki ai ia ʼaho nei. 25 Kae Tuʼi ʼAliki ko Sehova neʼe ke ui mai: ‘Totogi te gaueʼaga ʼaki he paʼaga pea ke pauʼi ni tagata fakamoʼoni.’ Kae ʼe mahino ia, ʼe maʼu anai te kolo e te kau Kaletea.”

26 Neʼe palalau leva ia Sehova kia Selemia, ʼo ina ui: 27 “Koʼeni au ia Sehova, te ʼAtua ʼo te tagata fuli. ʼE ʼi ai koa he meʼa ʼe faigataʼa kia te au? 28 Koʼeni te folafola ʼa Sehova: ‘ ʼE au tuku anai te kolo ʼaeni ki te nima ʼo te kau Kaletea pea mo te Hau ʼo Papiloni ko Nepukanesa, pea ʼe ina maʼu anai.+ 29 ʼEi, ʼe hu anai ki te kolo ia te kau Kaletea ʼae ʼe natou lolotoga ʼohofi pea ʼe natou tutu anai.+ ʼE natou tutu anai te kolo mo te ʼu fale ʼae neʼe momoli ai ni sakilifisio kia Paale ʼi te ʼu ʼato pea mo liligi ni molaga meʼa inu ki ʼihi ʼatua moʼoku fakamamahiʼi.’+

30 “ ʼE toe ui e Sehova: ‘Talu mai tanatou kei tupulaga mo te fai pe e te hahaʼi ʼo Iselaele mo Suta ia te meʼa ʼae ʼe kovi ki ʼoku mata.+ ʼE fakamamahiʼi tuʼumaʼu pe au e te hahaʼi ʼo Iselaele ʼaki ʼanatou aga. 31 Talu mai te ʼaho ʼae neʼe laga ai te kolo ʼaeni ʼo kaku mai kia ʼaho nei, neʼe ina fakatupu pe ia toku hauhau.+ Koia ʼae ʼe tonu ai ke pulihi ʼi ʼoku muʼa+ 32 ʼuhi ko te ʼu meʼa kovi fuli ʼae neʼe fai e te hahaʼi ʼo Iselaele pea mo Suta moʼoku fakamamahiʼi, mo ʼonatou hau,+ mo ʼonatou tama ʼaliki,+ mo ʼonatou pelepitelo, mo ʼonatou polofeta,+ mo te hahaʼi tagata ʼo Suta pea mo te hahaʼi ʼo Selusalemi. 33 Neʼe natou lituʼa tuʼumaʼu mai pe kae neʼe mole natou haga mai kia te au.+ Neʼe au faiga liuliuga ke au akoʼi natou kae neʼe mole pe la he tahi neʼe fia fakalogo mai ʼo tali taku fakatonutonu.+ 34 Pea neʼe natou fakatuʼu ʼanatou fakatata fakalialia ki te fale ʼae ʼe tuʼu ai toku huafa moʼona ʼulihi.+ 35 Pea tahi, neʼe natou laga te ʼu faʼahi maʼoluga ʼo Paale ʼi te potu fenua lauveliveli ʼae ko Te Foha ʼo Hinome*+ ke tutu ai ʼonatou foha mo ʼonatou ʼofafine kia Moleke.*+ Kae neʼe mole au fakatotonu ke natou fai he toe meʼa fakalialia feia+ pea neʼe heʼeki au manatu ki ai. Neʼe agahala ai ia Suta.’

36 “ ʼE kotou ui ʼe tuku anai te kolo ʼaeni ki te nima ʼo te hau ʼo Papiloni ʼaki te tau, mo te hoge pea mo te ʼu taʼi mahaki. Koia koʼeni te folafola ʼa Sehova, te ʼAtua ʼo Iselaele: 37 ‘ ʼE au fakatahiʼi anai mo toe fakaliliu mai natou mai te ʼu fenua fuli ʼae neʼe au fakamavetevete ai natou ʼi toku hauhau.+ ʼEi, ʼe au toe ʼaumai anai natou ki te koga meʼa ʼaeni pea ʼe natou maʼuli fimalie ai anai.+ 38 ʼE natou liliu anai ko taku hahaʼi pea ʼe au liliu anai ko tonatou ʼAtua.+ 39 ʼE au foaki anai kia natou ia he loto ʼe tahi+ pea ʼe au fakahaʼele anai natou ʼi he ala ʼe tahi ke natou manavasiʼi tuʼumaʼu kia te au ke fua lelei kia natou pea mo ʼanatou fanau ki ʼamuli.+ 40 ʼE au fai anai mo natou ia he fuakava heʼe gata+ pea ʼe au fakapapau ʼe au tokaga tuʼumaʼu anai kia natou.+ ʼE au uga anai natou ke natou manavasiʼi kia te au, ke ʼaua naʼa natou fakamamaʼo ia te au.+ 41 ʼE au fiafia anai ʼi te tokaga kia natou+ pea ʼe au fakanofo moʼoni anai natou ʼi te fenua ʼaeni+ ʼaki toku loto katoa mo toku malohi* katoa.’ ”

42 “Koʼeni te folafola ʼa Sehova: ‘Neʼe au ʼaumai ki te hahaʼi ʼaeni ia he toe malaʼia, ʼo toe feia pe ʼe au foaki anai kia natou ia te ʼu meʼa lelei fuli ʼae neʼe au fakapapauʼi age.+ 43 ʼE toe totogi anai ni gaueʼaga ʼi te fenua ʼaeni+ logo la takotou ui ʼae: “Ko he toafa ʼe mole maʼuli ai he tagata peʼe ko he manu ʼo te vao. Neʼe tuku ia kia nima ʼo te kau Kaletea.” ’

44 “ ‘Koʼeni te meʼa ʼae ka hoko ʼi te fenua ʼo Pesamino, mo te ʼu tafaʼaki ʼo Selusalemi, mo te ʼu kolo ʼo Suta,+ mo te ʼu kolo ʼo te potu moʼugaʼia, mo te ʼu kolo ʼo te potu fenua malalo+ pea mo te ʼu kolo ʼo te potu saute: ʼe totogi anai ni gaueʼaga ʼaki he paʼaga, ʼe tohi anai ni pepa fakamoʼoni pea fakamaʼu ʼaki he fakailoga,+ pea ʼe pauʼi anai ni fakamoʼoni koteʼuhi ʼe au toe ʼaumai anai ʼanatou hahaʼi popula,’+ ko te ui ʼaia ʼa Sehova.”