Selemia

33 Neʼe palalau ia Sehova kia Selemia, ko tona tuʼa lua ʼaia, kae neʼe kei pilisoniʼi ʼi te Malaʼe ʼo Te Kau Leʼo.+ Neʼe ina ui: 2 “Koʼeni te folafola ʼa Sehova, ia Ia ʼae neʼe ina fakatupu te kele, ia Sehova ʼae neʼe ina faʼu mo fakatuʼu malohi, ia ia ʼae ko tona huafa ko Sehova: 3 ‘Pauʼi mai kia te au pea ʼe au tali atu anai. ʼE au fakaha atu anai ni meʼa lalahi ʼe mole feala he mahino ki ai pea ʼe mole ke iloʼi.’ ”+

4 “Koʼeni te folafola ʼa Sehova, te ʼAtua ʼo Iselaele ʼo ʼuhiga mo te ʼu ʼapi ʼo te kolo ʼaeni mo te ʼu ʼapi ʼo te ʼu hau ʼo Suta, ʼae ʼe maumauʼi e te hahaʼi moʼo puipui ʼo natou mai te heleta mo te ʼu kaupa ʼae neʼe laga e ʼonatou fili moʼo tauʼi te kolo,+ 5 pea ʼo ʼuhiga mo te ʼu tagata ʼae neʼe ʼomai moʼo tauʼi te kau Kaletea, mo fakafonu te ʼu koga meʼa ʼaeni ʼaki te ʼu sino ʼo natou ʼae neʼe au matehi ʼi toku hauhau, pea ʼuhi ko tanatou agakovi neʼe au lituʼa ai ki te kolo ʼaeni: 6 ‘ ʼE au toe fakatuʼu anai mo foaki ki ai he malolo,+ ʼei, ʼe au faitoʼo anai te hahaʼi mo foaki lahi kia natou te tokalelei mo te moʼoni.+ 7 ʼE au toe fakaliliu mai anai te hahaʼi ʼo Suta mo Iselaele ʼae ʼe nonofo popula,+ pea ʼe au toe laga anai ia natou ohage ko taku fai ʼi te kamata.+ 8 ʼE au fakamaʼa anai ia natou mai tanatou lakahala ʼae ʼe tupu ko te ʼu agahala ʼae ʼe natou fai kia te au.+ ʼEi, ʼe au fakamolemole anai tanatou lakahala ʼae ʼe tupu ko ʼanatou agahala pea mo ʼanatou talagataʼa kia te au.+ 9 ʼE au fiafia anai ʼi te logologona ʼo te kolo ʼaeni, pea ʼe vikiʼi anai mo fakakololiaʼi au e te ʼu puleʼaga fuli ʼo te kele moka natou iloʼi te ʼu meʼa lelei fuli ʼae ʼe au fai kia natou ʼae neʼe nonofo popula.+ ʼE natou matataku anai mo tekelili+ ʼuhi ko te ʼu meʼa lelei fuli ʼae ka au fakahoko anai ki te kolo ʼaeni pea mo te tokalelei ʼae ka au foaki ki ai.’ ”+

10 “Koʼeni te folafola ʼa Sehova: ‘ ʼI te koga meʼa ʼaeni ʼae ʼe kotou ui anai ʼe ko he toafa ʼe mole ʼi ai he tagata peʼe ko he faga manu, ʼi te ʼu kolo ʼo Suta mo te ʼu ala ʼo Selusalemi kua tuʼu lavaki, ʼe mole he tagata, mo he hahaʼi ʼe nonofo ai, mo he faga manu, ʼe toe logoʼi anai 11 te ʼu kalaga fakafiafia,+ te leʼo ʼo te tagata ʼohoana mo te leʼo ʼo te fafine ʼohoana, mo te leʼo ʼo natou ʼae ʼe natou ui: “Kotou fakafetaʼi kia Sehova ʼo te ʼatu kautau he ʼe agalelei ia Sehova.+ Pea ʼe ina fakaha tona ʼofa agatonu ʼo talu ai.” ’+

“ ‘ ʼE natou ʼaumai anai ni molaga fakafetaʼi ki te fale ʼo Sehova+ he ʼe au toe fakaliliu mai anai te hahaʼi ʼo te fenua ʼae ʼe nonofo popula, pea ʼe toe hage anai ia meʼa fuli ko te kamata,’ ko te ui ʼaia ʼa Sehova.”

12 “Koʼeni te folafola ʼa Sehova ʼo te ʼatu kautau: ‘ ʼI te koga meʼa lavaki ʼaeni ʼe mole kei ʼi ai he tagata mo ni faga manu pea ʼi ʼona kolo fuli, kae ʼe toe ʼi ai anai ni koga meʼa lunaʼia ʼe feala ke fakamalolo ai e te kau tagata tauhi ovi ʼanatou faga ovi.’+

13 “ ‘ ʼI te ʼu kolo ʼo te potu moʼugaʼia, mo te ʼu kolo ʼo te potu fenua malalo, mo te ʼu kolo ʼo te potu saute, mo te fenua ʼo Pesamino, mo te ʼu tafaʼaki ʼo Selusalemi+ pea mo te ʼu kolo ʼo Suta,+ ʼe toe fakalaka anai te faga ovi ʼi te ʼu lalo nima ʼo te tagata ʼae ʼe ina lau natou,’ ko te ui ʼaia ʼa Sehova.”

14 “ ʼE ui e Sehova: ‘Koʼeni ʼe hoko mai anai te ʼaho ʼae ʼe au fakahoko ai taku fakapapau taulekaleka ʼo ʼuhiga mo te hahaʼi ʼo Iselaele mo te hahaʼi ʼo Suta.+ 15 ʼI te temi ʼaia, ʼe au fakatupu anai he huli* ʼe faitotonu maʼa Tavite+ pea ʼe ina fakahoko anai te faitotonu ʼi te fenua.+ 16 ʼI te temi ʼaia, ʼe haofaki anai ia Suta+ pea ʼe maʼuli anai ia Selusalemi ʼi te fimalie.+ Pea ʼe fakahigoaʼi anai te kolo ʼaia: ‘Ko Sehova Tomatou Faitotonu.’ ”+

17 “Koʼeni te folafola ʼa Sehova: ‘ ʼE ʼi ai tuʼumaʼu anai he tagata ʼi te hakoga ʼo Tavite ʼe ʼafio anai ʼi te hekaʼaga fakahau ʼo Iselaele.+ 18 Pea ʼi te kau pelepitelo Levite ʼe ʼi ai tuʼumaʼu anai he tahi ʼi ʼoku muʼa moʼo momoli ni holokoseta, pea mo tutu ni molaga meʼa kai pea mo momoli ni sakilifisio.’ ”

19 Neʼe toe palalau leva ia Sehova kia Selemia, ʼo ina ui: 20 “Koʼeni te folafola ʼa Sehova: ‘ ʼE feala anai koa ʼi he ʼaho ke kotou maumauʼi taku fuakava ʼo ʼuhiga mo te ʼaho mo taku fuakava ʼo ʼuhiga mo te poʼuli ke ʼaua naʼa toe ʼaho mo poʼuli ʼi tona temi totonu? Kailoa!+ 21 ʼE toe feia pe, ʼe mole anai he meʼa ʼe ina maumauʼi te fuakava ʼae neʼe au fai mo taku tagata kaugana ko Tavite+ pea mo taʼofi hona foha ke heka ki tona hekaʼaga fakahau.+ Pea ʼe mole ʼi ai anai he meʼa ʼe ina maumauʼi te fuakava ʼae neʼe au fai mo ʼaku pelepitelo Levite, ʼaku kaugana.+ 22 ʼE mole feala ke lau te foʼi kautau ʼo te ʼatu lagi* mo te ʼone ʼo te tai, ʼe toe feia pe ʼe au fakaliliu anai te hakoga ʼo taku tagata kaugana ko Tavite ʼo kaugamalie, mo te ʼu Levite ʼae ʼe tauhi kia te au.’ ”

23 Neʼe toe palalau leva ia Sehova kia Selemia, ʼo ina ui: 24 “Neʼe mole ke tokagaʼi koa la te ʼu palalau ʼa te hahaʼi ʼaeni? ‘ ʼE liʼaki anai e Sehova te ʼu famili ʼe lua ʼae neʼe ina filifili.’ ʼE mole natou fakaʼapaʼapa ki taku hahaʼi pea ʼe mole kei hage kia natou ko he puleʼaga.

25 “Koʼeni te folafola ʼa Sehova: ‘Neʼe au fakatuʼu taku fuakava ʼo ʼuhiga mo te ʼaho mo te poʼuli, ʼo feia ki te ʼu lao ʼo te lagi mo te kele, pea neʼe mole au maumauʼi.+ 26 ʼE toe feia pe ʼe mole au liʼaki anai te ʼu hakoga ʼo Sakopo pea mo taku tagata kaugana ko Tavite, pea ʼe mole he meʼa anai ʼe ina taʼofi taku filifili ni pule mai ʼona hakoga pea mo fakanofo ke pule ki te ʼu hakoga ʼo Apalahamo, mo Isaake mo Sakopo, he ʼe au toe fakatahiʼi anai ʼanatou hahaʼi popula+ pea ʼe au ʼofa anai kia natou.’ ”+