Selemia
34 Neʼe palalau ia Sehova kia Selemia ʼi te temi ʼae neʼe tauʼi ai ia Selusalemi mo te ʼu kolo fuli ʼi ʼona tafaʼaki e te Hau ʼo Papiloni ko Nepukanesa mo tana foʼi tau katoa, mo te ʼu puleʼaga fuli ʼo te kele pea mo te hahaʼi fuli ʼae neʼe ina puleʼi. Neʼe ina ui:+
2 “Koʼeni te folafola ʼa Sehova, te ʼAtua ʼo Iselaele: ‘Alu ʼo palalau ki te Hau ʼo Suta ko Setesiasi+ ʼo ui age ki ai: “Koʼeni te folafola ʼa Sehova: ‘ ʼE au tuku anai te kolo ʼaeni ki te ʼu nima ʼo te hau ʼo Papiloni, pea ʼe ina tutu anai.+ 3 ʼE mole ke hao anai. ʼE puke anai koe ʼo ʼave ki te hau ʼo Papiloni.+ ʼE kolua fesioʼaki anai mo faipalalau pea ʼe ke alu anai ki Papiloni.’+ 4 Kae Hau ʼo Suta ko Setesiasi, fakalogo ki te folafola ʼa Sehova: ‘Koʼeni te folafola ʼa Sehova ʼo ʼuhiga mo koe: “ ʼE mole matehi anai koe ʼaki te heleta. 5 ʼE ke mate fimalie anai,+ pea ka tanu koe ʼe tutu anai te iseso ohage ko tona fai ki ʼau kui, te ʼu hau ʼae neʼe muʼamuʼa ia koe. ʼE tagiʼi anai koe e te hahaʼi ʼo natou ui: ‘Oiaue, siʼomatou pule!’ ʼE moʼoni, ‘ko te ʼu meʼa ʼaia neʼe au fakakikite,’ ko te ui ʼaia ʼa Sehova.” ’ ” ’ ”
6 Neʼe fakaha leva e te polofeta ko Selemia te ʼu logo fuli ʼaia ki te Hau ʼo Suta ko Setesiasi ʼi Selusalemi. 7 Neʼe lolotoga tauʼi e te hau ʼo Papiloni mo tana foʼi kautau ia Selusalemi mo te ʼu kolo ʼo Suta ʼae neʼe kei toe,+ ia Lakisi+ mo Aseka.+ Neʼe ko te ʼu kolo tau pe ʼaia ʼo Suta neʼe heʼeki maʼu.
8 Neʼe palalau leva ia Sehova kia Selemia hili te fuakava ʼae neʼe fai e te Hau ko Setesiasi pea mo te hahaʼi fuli ʼo Selusalemi. Neʼe natou fakapapauʼi ai ʼe natou fakaʼateainaʼi anai te hahaʼi kaugana.+ 9 ʼE tahi fakaʼateainaʼi anai ʼana kaugana Hepeleo, tagata mo fafine. ʼE mole taupau anai e he tahi he tagata Sutea ko hana kaugana. 10 Neʼe fakalogo te ʼu tama ʼaliki fuli mo te hahaʼi. Neʼe natou fakapapau ʼaki te fuakava ʼaia te fakaʼateainaʼi ʼo te hahaʼi kaugana, tagata mo fafine, pea ke mole taupau natou ko ni kaugana. Neʼe natou fakalogo ʼo natou tuku ai ke olo. 11 Kae ki muli age, neʼe natou toe fakaliliu mai te hahaʼi kaugana, tagata mo fafine, ʼae neʼe kua natou tuku age ke olo pea neʼe natou toe fakakauganaʼi. 12 Neʼe palalau leva ia Sehova kia Selemia pea neʼe ui e Sehova:
13 “Koʼeni te folafola ʼa Sehova, te ʼAtua ʼo Iselaele: ‘ ʼI te ʼaho ʼae neʼe au fakamavae ai ʼakotou kui mai Esipito, te fenua ʼae neʼe natou kaugana ai, neʼe au fai ai he fuakava mo natou.+ Neʼe au ui kia natou: 14 “Hili taʼu ʼe fitu, ʼe kotou tahi fakaʼateainaʼi anai tona tehina Hepeleo ʼae neʼe fakatau atu ke gaue lolotoga taʼu ʼe ono. ʼE tonu anai ke kotou fakaʼateainaʼi.”+ Kae neʼe mole fakalogo mai ʼakotou kui, neʼe mole natou tokagaʼi ʼaku folafola. 15 Kae ko koutou, heʼeki faʼa fualoa ki ai neʼe fetogi takotou aga, neʼe kotou fai te meʼa ʼae ʼe lelei kia au he neʼe kotou fakaʼateainaʼi ʼokotou tehina pea kotou fai he fuakava ʼi ʼoku muʼa, ʼi te fale ʼae ʼe tuʼu ai toku huafa. 16 Kae neʼe fetogi leva takotou manatu. Neʼe kotou ʼulihi toku huafa+ ʼo kotou toe fakaliliu mai ʼakotou hahaʼi kaugana, tagata mo fafine, ʼae neʼe kua fakaʼateainaʼi ke feoloʼaki faʼifaʼitaliha, pea neʼe kotou toe fakakauganaʼi.’
17 “Koʼeni te folafola ʼa Sehova: ‘Neʼe kotou fakapapau ke kotou tahi fakaʼateainaʼi tona tehina mo tona kaiga Sutea kae neʼe mole kotou fakalogo mai.+ Ko te ʼateaina ʼaeni ʼe au fakapapauʼi atu ʼi te ʼaho nei: ʼe kotou mamate anai ʼi te tau, ʼi te ʼu taʼi mahaki* pea ʼi te hoge,’+ ko te ui ʼaia ʼa Sehova, ‘pea ʼe au fakaliliu anai ia koutou ko he meʼa fakalialia ki te ʼu puleʼaga fuli ʼo te kele.+ 18 Koʼeni te meʼa ʼae ʼe hoko anai ki te ʼu tagata ʼae neʼe natou maumauʼi taku fuakava, ʼae neʼe mole natou mulimuli ki te ʼu fakatotonu ʼo te fuakava ʼae neʼe natou fai ʼi ʼoku muʼa, ʼi te temi ʼae neʼe natou taʼaga lua ai te ʼuhiʼi pipi ʼo natou fakalaka ʼi te vaha ʼo te ʼu koga pipi ʼaia ʼe lua.+ 19 ʼEi, koʼeni te meʼa ʼae ʼe hoko anai ki te ʼu tama ʼaliki ʼo Suta, mo te ʼu tama ʼaliki ʼo Selusalemi, mo te kau faifekau ʼo te fale hau, mo te ʼu pelepitelo pea mo te hahaʼi fuli ʼo te fenua ʼae neʼe fakalaka ʼi te vaha ʼo te ʼu koga pipi ʼaia ʼe lua: 20 ʼe au tuku anai ia natou ki ʼonatou fili pea mo natou ʼae ʼe natou fia matehi natou, pea ʼe kai anai ʼonatou sino e te ʼu manulele mo te ʼu manu ʼo te vao.+ 21 Pea ʼe au tuku anai te Hau ʼo Suta ko Setesiasi mo ʼana tama ʼaliki ki te ʼu nima ʼo ʼonatou fili, kia natou ʼae ʼe natou fia matehi ia natou pea mo te foʼi kautau ʼa te hau ʼo Papiloni+ ʼae ʼe mavae mai ia koutou.’+
22 “ ‘ ʼE au foaki anai he fakatotonu pea ʼe au toe fakaliliu mai anai ia natou ki te kolo ʼaeni. ʼE natou tauʼi anai te kolo, mo maʼu ʼo natou tutu.+ ʼE au fakaliliu anai te ʼu kolo ʼo Suta ko he koga meʼa ʼe tuʼu lavaki,’ ko te ui ʼaia ʼa Sehova.”+