Taʼaga Lea
27 ʼAua naʼa ke fiameʼameʼa ki te apogipogi
He ʼe mole ke iloʼi pe kotea ʼae ka hoko.+
2 Ke vikiʼi koe e he tahi kehe, kae mole ko koe totonu,
ʼEi, ʼe mole ko koe kae ko ʼihi.+
3 ʼE mamafa te maka, ʼo toe feia pe mo te ʼone,
Kae ʼe mamafa age te ita ʼae ʼe fakatupu e he tagata vale.+
4 ʼE kovi te itaita mo fua kovi ohage ko he puvai,
Kae ko ai ʼae ʼe ina lava taʼofi te maheka?+
5 ʼE lelei age te fakatonutonuʼi fakahagatonu ʼi te mole fakaha ʼo tokita ʼofa.+
6 ʼE fakatupu mamahi te fakatonutonu ʼa he kaumeʼa kae ʼe agatonu ia,+
Kae ʼe lahi* te ʼu ʼuma ʼa he fili.
7 ʼE fakafisi he tahi kua makona ki te meli foʼou,
Kae ko ia ʼae ʼe pakupaku, ʼe malie kia ia te meʼa ʼae ʼe kona.
8 Ohage ko te fakamamaʼo* ʼa he manulele mai tona moeʼaga,
ʼE toe feia mo te fakamamaʼo ʼa he tagata mai tona loto fale.
9 ʼE fakalotofiafia te lolo mo te iseso.
ʼE feia he kaumeʼa lelei ʼe ina fai he ʼu tokoni ʼofa.+
10 ʼAua naʼa ke liʼaki tou kaumeʼa, ʼo feia ki te kaumeʼa ʼo tau tamai,
Pea ʼaua naʼa ke hu ki te ʼapi ʼo tou tehina ʼi te temi ʼae ʼe ke faigataʼaʼia ai.
ʼE lelei age he vahaʼa fale ʼi he tehina ʼe nofo mamaʼo.+
11 Siʼoku foha, ke ke fakapotopoto pea ke ke fakafiafiaʼi toku loto,+
Ke feala ai haku tali kia ia ʼae ʼe laukovi mai kia te au.+
12 ʼE sio te tagata aga fakaʼeteʼete ki te tuʼutamaki pea ʼe nono ia,+
Kae ʼe haga alu pe te tagata vale pea fua kovi pe kia ia.
13 Kapau neʼe fakapapau e he tagata ʼe ina huʼi anai te maʼua ʼo he tahi ʼe mole ina iloʼi, toʼo te kofu ʼo te tagata ʼaia.
Kapau neʼe ina fai maʼa he fafine* matapule, toʼo mai te tagata ʼona koloa mo’o fakamoʼoni ʼe ina huʼi anai.+
14 Kapau ʼe fakaʼapaʼapaʼi leʼo lahi e he tahi tona tatau ʼi te mafoata,
ʼE ui ʼe fakatupu malaʼia anai kia ia.
15 ʼE hage he fafine ʼohoana munamuna* ko he ʼato ʼe tutulu tuʼumaʼu ʼi te ʼaho ʼua.+
16 Ko ia ʼae ʼe ina lava taʼofi te fafine ʼaia, ʼe feala hana taʼofi te matagi
Pea mo puke he moʼi lolo ʼi tona nima mataʼu.
17 Ohage ko te ukamea ʼe ina fakamasila te ukamea,
ʼE feia te tokoni ʼa he tagata ki hona kaumeʼa ke poto age.+
18 Ko ia ʼae ʼe tokaga ki tona fuʼu fiku ʼe kai anai ki ʼona fua,+
Pea ko ia ʼae ʼe tokaga ki tona pule ʼe fakaʼapaʼapaʼi anai.+
19 Ohage ko te fakaʼata e te vai he fofoga,
ʼE feia te fakaʼata e te loto ʼo he tagata he loto ʼo he tahi kehe.
20 ʼE mole makokona ʼi he temi te Faitoka* mo te koga meʼa ʼo te fakaʼauha,*+
ʼO feia pe mo te ʼu mata ʼo te tagata.
21 ʼE haka te siliva mo te aulo ʼi te afi moʼonā fakamaʼa.+
ʼO toe feia pe, ʼe ha te ʼuhiga moʼoni ʼo he tahi moka vikiʼi.
22 Tatau aipe pe ʼe ke tuki lailai he tahi ʼe vale,
Ohage ko tau lailaiʼi te ʼu tegaʼi ʼakau,
Kae ʼe mole puli anai tana agavale.
23 ʼE tonu ke ke iloʼi lelei te agaaga ʼo tau faga manu.
Tokaga lelei ki tau faga ovi,+
24 He ʼe mole maʼu te koloa ʼo talu ai,+
Pea ʼe mole tuku holo te pale ki te ʼu taʼiake fuli.
25 ʼE moamoa te luna pea homo te luna foʼou,
Pea ʼe tanaki te vao ʼo te ʼu moʼuga.
26 ʼE ke teuteu ʼaki te ʼu fuluʼi akeno
Pea ʼe ke totogi he gaueʼaga ʼaki te ʼu tao tagata.
27 Pea ʼe feʼauga anai te huʼa pipi ʼo te tao moʼo fafaga ʼo koe,
Mo tou famili pea mo ʼau fafine kaugana.