Te ʼu Gaue ʼa Te Kau Apositolo
16 Neʼe tau leva ki Telepe pea mo Lisitia.+ Neʼe ʼi ai te tisipulo neʼe higoa ko Timoteo,+ ko te tama ʼa te fafine Sutea neʼe tui pea ko tana tamai neʼe ko he Keleka. 2 Neʼe palalau lelei te ʼu tehina ʼo Lisitia pea mo Ikoniome ʼo ʼuhiga mo ia. 3 Neʼe fakaha leva e Paulo tana loto ʼae ke kaugā olo mo Timoteo. Neʼe ina toʼo ia ia ʼo silikosisioʼi* ʼuhi ko te kau Sutea ʼi te ʼu koga meʼa ʼaia,+ he neʼe natou iloʼi fuli ko tana tamai neʼe ko he Keleka. 4 ʼI te fakalaka ʼa Paulo mo ʼona kaugā fagona ʼi te ʼu kolo, neʼe natou fakaha kia natou te ʼu tonu ʼae neʼe fai e te kau apositolo pea mo te ʼu tagata ʼafeā ʼi Selusalemi, ke natou mulimuli ki ai.+ 5 Koia ko te ʼu kokelekasio neʼe haga malolohi aipe ʼi te tui pea mo tuputupu ʼo kaugamalie ʼi te ʼaho fuli.
6 Neʼe natou fakalaka leva ʼi Filisia mo te fenua ʼo Kalate,+ koteʼuhi neʼe tapuʼi kia natou e te laumalie maʼoniʼoni ke ʼaua naʼa natou fakaha ia te folafola ʼa te ʼAtua ʼi te potu fenua ʼo Asia. 7 Pea ʼi tanatou hifo ki Misia, neʼe natou faigaʼi ke natou hu ki Pitinia,+ kae neʼe mole fakagafua age e Sesu ʼaki te laumalie maʼoniʼoni. 8 Koia neʼe natou fakalaka ai ʼi Misia ʼo hifo ki Toloasi. 9 ʼI te poʼuli, neʼe sio ia Paulo ki te meʼa neʼe ha age, neʼe ko te tagata Masetonia neʼe tuʼu ʼi ʼona muʼa ʼo ina kole mamahi age: “Haʼu ki Masetonia ʼo tokoni mai.” 10 Hili tana sio ki te meʼa ʼaia, neʼe matou faiga atu aipe ke matou olo ki Masetonia, ʼi tamatou manatu ʼae neʼe fakatotonu mai e te ʼAtua ke matou tala te logo lelei kia natou.
11 Koia mai Toloasi, neʼe matou heheka ʼi te vaka ʼo matou folau fakahagatonu ki Samotalase, kae ʼi te ʼaho ake, neʼe matou olo ki Neapoli. 12 Pea mai ai, neʼe matou olo ki Filipe,+ te kolo ʼe puleʼi e Loma pea ko te kolo maʼuhiga ʼo te tisitilike ʼo Masetonia. Neʼe matou nonofo ʼi te kolo ʼaia ʼi he ʼu ʼaho. 13 ʼI te ʼaho ʼo te Sapato neʼe matou olo ki te tuʼa kolo ʼo ovi ki he vai tafe, he neʼe matou manatu ʼe fakatahitahi ai te hahaʼi ʼo faikole. Pea neʼe matou heheka ʼo faipalalau mo te ʼu fafine ʼae neʼe ʼi ai. 14 Pea neʼe ʼi ai te fafine mai te kolo ko Tiatile+ neʼe higoa ko Litia, neʼe ina fakatau he ʼu kie mo he ʼu mutuʼi meʼa huʼa lotuma pea neʼe atolasio ki te ʼAtua. Neʼe fakalogo pea neʼe avahi e Sehova* tona loto ke ina tokagaʼi te ʼu palalau ʼa Paulo. 15 ʼI tana ʼosi papitema ʼo feia mo tona loto fale,+ neʼe ina kole mamahi mai: “Kapau kua kotou manatu ʼe au agatonu kia Sehova,* kotou ʼomai ʼo nonofo ʼi toku ʼapi.” Pea neʼe ina fakakinauʼi matou ke matou tali tana fakaafe.
16 ʼI te tahi ʼaho, ʼi tamatou olo ki te koga meʼa ʼae ʼe fakatahitahi ai te hahaʼi ʼo faikole, neʼe matou felaveʼi mo te taʼahine faifekau neʼe ulu sino ai te temonio.+ Neʼe feala ke ina fakakikite te ka haʼu, pea neʼe lahi ai te paʼaga ʼae neʼe maʼu e ʼona pule. 17 Neʼe haga mulimuli te taʼahine ʼaia ia Paulo mo matou, ʼo kalaga: “Ko te ʼu tagata ʼaeni, ʼe ko he ʼu kaugana ʼa te ʼAtua Maʼoluga+ pea ʼe natou fakaha atu te ala ʼo te fakamaʼuli.” 18 Neʼe ina haga fai te faʼahi ʼaia lolotoga he ʼu ʼaho. ʼI te kua fiu leva ʼa Paulo, neʼe haga ki ai ʼo ina ui ki te laumalie kovi: “ ʼE au fakatotonu atu ʼi te huafa ʼo Sesu Kilisito* ke ke mavae mai ia ia.” Pea neʼe mavae ʼi te temi pe ʼaia.+
19 ʼI te tokagaʼi e ʼona pule neʼe mole kei feala ke natou maʼu he paʼaga,+ neʼe natou puke ia Paulo mo Silasi ʼo toho naua ki te kau pule+ ʼi te fakatauʼaga koloa. 20 Pea neʼe natou ʼave leva ia naua ki te ʼu pule ʼo te kolo, ʼo natou ui: “ ʼE lahi te fakatupu maveuveu ʼa te ʼu tagata ʼaeni ʼi totatou kolo.+ ʼE ko he ʼu tagata Sutea, 21 pea ʼe nā tala he ʼu agaʼi fenua ʼe mole fakagafua ke tou tali peʼe ke tou mulimuli ki ai, he ʼe ko tatou ʼaeni ko te kau Loma.” 22 Neʼe fakafeagai te hahaʼi fuli kia naua, pea neʼe fakatotonu e te ʼu pule ʼo te kolo ke huʼi fakamalohi ʼonā kofu tuʼa pea ke ta naua ʼaki he ʼu kauʼi ʼakau.+ 23 ʼI tanatou ʼosi haha naua, neʼe natou tuku ia naua ki te fale pilisoni mo fakatotonu ki te tagata leʼo ke ina leʼo fakaleleiʼi naua.+ 24 ʼUhi ko te fakatotonu ʼaia, neʼe ina tuku naua ki te loto fale pilisoni pea mo ina fakamaʼu ʼonā vaʼe ʼaki he ʼu papa.
25 Kae ʼi te vaʼevaʼe maʼupo, neʼe faikole ia Paulo mo Silasi pea nā hiva fakavikiviki ki te ʼAtua.+ Neʼe fagono te kau pilisoni kia naua. 26 Fokifa pe neʼe hoko te mafuike lahi, ʼo galulu ai te ʼu fakatafito ʼo te fale pilisoni. Neʼe ava atu aipe te ʼu matapa fuli mo mavete te ʼu seini ʼo te kau pilisoni fuli.+ 27 ʼI te ʼala ake ʼa te tagata leʼo mo sio kua ava te ʼu matapa ʼo te fale pilisoni, neʼe ina tohoʼi ake tana heleta ke fakamate, he ʼe ʼi tana manatu kua feholaki te kau pilisoni.+ 28 Kae neʼe kalaga ia Paulo: “ ʼAua naʼa ke fai he meʼa ʼe kovi kia koe, koʼeni ia matou fuli ʼi heni!” 29 Neʼe ina kole he ʼu malama ʼo lele ai ki loto, pea neʼe tekelili ʼo tuʼutuli ifo ia muʼa ʼo Paulo mo Silasi. 30 Neʼe ina ʼave naua ki tuʼa pea neʼe ina fehuʼi age: “ ʼU tagata, kotea ʼae ʼe tonu ke au fai ke haofaki ai au?” 31 Neʼe nā tali: “Ke ke tui ki te ʼAliki ko Sesu pea ʼe haofaki anai ia koe mo tou loto fale.”+ 32 Neʼe nā fakaha age leva te folafola ʼa Sehova* kia ia mo natou fuli ʼae neʼe ʼi tona loto fale. 33 Neʼe ina toʼo naua ʼi te hola ʼaia ʼo te poʼuli ʼo ina fufulu ʼonā mataʼi lavea. Neʼe papitema atu aipe ʼo feia mo tona loto fale katoa.+ 34 Neʼe ina ʼave naua ki tona ʼapi, ʼo ina hili he ʼu meʼa kai ki te laupapa ʼi ʼonā muʼa, pea neʼe fiafia lahi mo tona loto fale katoa ʼi tana kua tui leva ki te ʼAtua.
35 ʼI te ʼaho ake, neʼe fekauʼi e te ʼu pule ʼo te kolo ia te kau leʼo ke natou ui: “Fakaʼateainaʼi te ʼu tagata ʼaia.” 36 Pea neʼe fakamatala age e te tagata leʼo ʼo te fale pilisoni kia Paulo ʼanatou palalau, ʼo ina ui: “Neʼe fekauʼi mai e te ʼu pule ʼo te kolo he ʼu tagata ke fakaʼateainaʼi koulua. Koia ʼi te temi nei, kolua mavae ʼo olo ʼi te tokalelei.” 37 Kae neʼe ui e Paulo kia natou: “Neʼe natou ta maua ia muʼa ʼo te hahaʼi kae neʼe heʼeki fakamauʼi maua, logo la ko maua ko he ʼu tagata Loma+ pea neʼe tuku maua ʼi te fale pilisoni. Pea ʼi te temi leva ʼaeni ʼe natou fia fakamavae fakafufu maua? Kailoa ia, kae ke natou ʼomai ia natou totonu ʼo taki maua ki tuʼa.” 38 Neʼe fakaha e te kau leʼo ʼana palalau ki te ʼu pule ʼo te kolo. Neʼe natou matataku ʼi tanatou logo ʼae neʼe ko he ʼu tagata Loma.+ 39 Koia neʼe natou ʼomai ai ʼo faifakalelei age kia naua, pea ʼi tanatou ʼosi taki naua ki tuʼa, neʼe natou kole ke nā mavae ʼi te kolo. 40 Kae neʼe nā mavae ʼi te fale pilisoni ʼo nā olo ki te ʼapi ʼo Litia. Pea ʼi tanā sisio ki te ʼu tehina, neʼe nā fakalotomalohiʼi natou+ pea hoki nā olo ai leva.